Leksiyon 13 Materyal sa Magtutudlo

Ang Balaanong Gasa ug Sagradong Responsibilidad sa Sekswal nga Kasuod

Ang sekswal nga kasuod tali sa usa ka bana ug asawa usa ka gasa gikan sa Dios, gi-orden nga mahimong usa ka maanindot ug sagradong bahin sa kaminyoon. Niini nga leksiyon, malig-on sa mga estudyante ang ilang pagsabot sa mahangtorong mga kamatuoran kalabot ngadto niini nga balaanong gasa. Ang mga estudyante usab mobanabana sa mga limitasyon o mga kinutoban nga ilang gihan-ay o kinahanglang ihan-ay sa pagtabang kanila nga magpuyo sa balaod sa kaputli.

Mubo nga sulat: Tungod sa ka sensitibo sa matang niini nga hilisgotan, palihog itudlo ang doktrina sa tataw nga paagi apan uban ang pagkadaling mobati ug pagkamabinantayon. Mahimong ikaw manginahanglang mopahiangay sa mga pamaagi sa pagtudlo o sa mga sitwasyon nga gigamit sa leksiyon sa paghaom sa inyong kultura.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pagpalambo og pagbati nga sagrado. Unsaon sa usa ka magtutudlo ang pag-atubang o pagporma ang usa ka hilisgotan nga makatabang sa mga estudyante sa pagbati sa sagradong kinaiyahan niini. Si Elder Paul B. Pieper sa Seventy mitudlo, “Pinaagi sa pagtratar sa butang nga sagrado, ang Ginoo nagpakita nga kini mas taas og bili ug unahunon kay sa ubang mga butang” (“Huptan nga Sagrado,” Liahona, Mayo 2012, 109). Samtang ikaw maghisgot og sekswal nga kasuod, pamalandonga kon unsaon nimo sa pagpalambo ang usa ka madayganon ug matinuorong panaghisgot samtang ang mga estudyante matabangan usab nga mobati ug masabtan ang sagradong kinaiyahan niini nga hilisgotan.

Ang sekswal nga kasuod tali sa bana ug asawa gituyo nga mahimong maanindot ug sagrado.

Ipakita ang mosunod nga sitwasyon:

Ang inyong mga higala dili makasabot nganong kamo naghunahuna nga ang pakighilawas sa dili pa minyo sayop. Usa ka adlaw niana ang usa ka higala nagsulti kaninyo, “Unsay sayop nga makighilawas ngadto sa usa ka tawo nga imong gihigugma? Kon kamong duha nagkasinabot, unsaon niana nga mahimong problema? Wala ba kamo maghunahuna nga nasal-angan ninyo ang usa ka importante ug makalingaw nga bahin sa kinabuhi pinaagi sa pagpaabot nga makighilawas hangtod kamo maminyo?”

Dapita ang mga estudyante sa pagrebyo sa seksiyon 1 ug 2 sa materyal sa pagpangandam, mangita alang sa mga kamatuoran nga makatabang kanila sa pagtubag ngadto sa sitwasyon gikan sa usa ka panan-awon sa ebanghelyo. Dapita ang pipila ka estudyante sa pagsulat sa mga kamatuoran nga ilang nakaplagan diha sa pisara. Ang posible nga mga kamatuoran mahimong maglakip sa: Ang Dios nagmando nga ang sekswal nga kasuod kinahanglan nga ipahayag lamang tali sa usa ka lalaki ug usa ka babaye kinsa legal nga naminyo. Ang sekswal nga kasuod gituyo sa pagpahayag sa gugma, paglalang og kinabuhi, ug sa paglig-on sa koneksyon ug panaghiusa. Ang sekswal nga kasuod usa ka simbolo sa usa ka hingpit nga pasalig ug tibuok nga panaghiusa sa kaminyoon. Ang atong pisikal nga lawas usa ka importanting bahin sa atong kalag, ug kon unsaon nato kini paggamit makaapekto sa atong espiritu ug sa atong mahangtorong pag-uswag.

Wala kay panahon sa pag-usisa og maayo sa tanan niining mga kamatuoran, busa ipunting diha sa mga kamatuoran nga ang mga estudyante labing interesado sa paghisgot. Ang pipila sa mosunod nga mga pangutana mahimong motabang sa paglig-on sa pagkat-on sa mga estudyante:

• Sumala sa Genesis 2:18, 21–24, unsay nakat-onan ni Adan ug ni Eva mahitungod sa kinaiyahan sa gugma sa kaminyoon? Unsaon nga ang usa ka bana ug asawa mapanalanginan pinaagi sa pagtan-aw sa sekswal nga kasuod isip usa ka simbolo sa paghiusa sa “ilang mga kasingkasing, mga paglaom, mga kinabuhi, gugma, kaugmaon, tanan”? (Jeffrey R. Holland, “Personal Purity,” Ensign, Nob. 1998, 76). (Hunahunaa ang pagdapit sa mga estudyante sa pagrebyo sa pamahayag ni Elder Jeffrey R. Holland diha sa seksiyon 1 sa materyal sa pagpangandam. Isip kabahin sa panaghisgot, tabangi ang mga estudyante sa pagsabot nga samtang ang mga magtiayon nag-ugmad sa ilang intelektwal, emosyonal, ug espiritwal nga kasuod, ang ilang sekswal nga kasuod mahimong mas makahuloganon.)

• Nganong makadala og kasaypanan ang pagtan-aw sa sekswal nga kasuod isip usa lamang ka pisikal nga kasinatian nga gituyo sa paghatag og pisikal nga kalipay? Unsaon nga ang sekswal nga kasuod sa gawas sa kaminyoon makadaot sa emosyonal ug pisikal nga paagi sa naapil? (Tingali makatabang ang pagdapit sa mga estudyante sa pagrebyo sa pamahayag ni Elder Holland diha sa seksiyon 2 sa materyal sa pagpangandam.)

• Unsaon sa usa ka pagpamatuod kabahin ni Jesukristo ug sa Iyang Pag-ula ug sa balaanong mga katuyoan sa pisikal nga lawas pag-impluwensya kon unsaon nato pag-atubang ang sekswal nga kasuod? (Hunahunaa ang pagdapit og usa ka estudyante sa pagbasa og kusog sa 1 Mga Taga-Corinto 6:19–20 sa dili pa ipangutana kini nga pangutana.)

• Sa unsang paagi nga ang pagsabot sa mga kamatuoran nga gilista diha sa pisara motugbang sa negatibong mga kinaiyahan o panghunahuna nga gibase sa kahadlok mahitungod sa sekswal nga kasuod?

Uban sa panabang sa Ginoo kita makapatubo sa atong personal nga kaputli ug sa malipayong paagi makapuyo sa balaod sa kaputli.

Dapita ang mga estudyante sa paghanduraw nga sila mao ang mga ginikanan sa 13 anyos nga anak nga lalaki o babaye. Gibati nila nga kini usa ka maayong higayon sa pagbaton og lain nga panag-istoryahanay uban sa ilang anak mahitungod sa balaod sa kaputli. Hatagi ang mga estudyante og pipila ka minuto sa pagpakigbahin diha sa ginagmay nga mga grupo kon unsaon nila sa pagtudlo o ipanghimatuod ang balaod sa kaputli ngadto sa ilang 13 anyos nga anak. Pabantaya ang mga estudyante batok sa paggamit og pinulongan o pasumbingay nga makahatag og kaulaw, kahadlok, o kalibog. Human sa igong panahon, pangutan-a ang klase:

• Unsaon ninyo pagtudlo sa paagi nga makatabang sa usa ka batan-ong tin-edyer nga makabaton og positibo nga mga pagbati mahitungod sa balaanong gasa sa sekswal nga kasuod ug sa balaod sa kaputli?

• Unsa ang pipila ka mga pagtulon-an nga inyong nakat-onan samtang nagtubo nga nagtabang kaninyo sa pag-atubang sa sekswal nga kasuod isip usa ka butang nga maanindot ug tukma nga kabahin sa kaminyoon?

Dapita ang usa ka estudyante sa pagbasa og kusog sa Alma 38:12. Awhaga ang mga estudyante sa paghunahuna og marka sa mga pagtulun-an ni Alma nga naghulagway sa mosunod nga baruganan: Kon atong pugngan ang atong mainit nga mga pagbati, kita mapuno sa gugma.

Ipakita ang mga mosunod nga ulohan ug mga pangutana. (Kon ikaw gusto, makapa-imprinta ka og mga kopya ug iapud-apod kini.) Dapita ang mga estudyante sa pagtrabaho diha sa ilang ginagmay nga mga grupo ug sa pagpili og duha o tulo ka pangutana nga ilang gibati nga may labot kanila ug sa paghisgot niini.

Paghan-ay og mga Limitasyon ug Pagpangayo og Balaanong Panabang sa Pagpuyo sa Balaod sa Kaputli

Materyal sa Magtutudlo sa Ang Mahangtorong Pamilya—Leksiyon 13

• Unsa ang pipila sa labing dagkong mga hagit sa pagpuyo sa balaod sa kaputli? Sa unsang paagi kita makabuntog niini nga mga hagit?

• Sa unsang paagi nga ang paggamit sa hugot nga pagtuo diha ni Jesukristo ug sa pagpangayo sa Iyang grasya mitabang kaninyo sa pagsunod sa balaod sa kaputli? (Hunahunaa ang pagrebyo sa 1 Mga Taga-Corinto 10:13; Alma 13:28; Doktrina ug mga Pakigsaad 62:1.)

• Nganong kini importante nga mohan-ay sa inyong mga limitasyon sa dili pa ug sa panahon sa kaminyoon kon kini mahitungod sa pagsunod sa balaod sa kaputli? Unsaon sa usa ka managpares kinsa nag-date nga mapanalanginan pinaagi sa pagbaton og panaghisgot mahitungod sa ilang mga utlanan alang sa pisikal nga pagbati? (Mahimong gusto nimong rebyohon ang pamahayag ni Elder Neil L. Andersen sa seksiyon 3 sa materyal sa pagpangandam.)

• Dili ka minyo o minyo man, unsang mga pamaagi, mga praktis, ug mga utlanan ang inyong nakaplagan nga labing makatabang sa pagsunod sa balaod sa kaputli?

• Giunsa nato pagtahod ang Langitnong Amahan ug si Jesukristo pinaagi sa pagsunod sa balaod sa kaputli?

© 2022 pinaagi sa Intellectual Reserve, Inc. All rights reserved.

Paghan-ay og mga Limitasyon ug Pagpangayo og Balaanong Panabang sa Pagpuyo sa Balaod sa Kaputli

Sa pagtapos sa klase, dapita ang mga estudyante sa pagpakigbahin kon giunsa paglig-on ang ilang pagsabot sa sekswal nga kasuod ug sa balaod sa kaputli pinaagi sa materyal sa pagpangandam ug sa panaghisgot sa klase.

Dapita ang mga estudyante sa pagrebyo unsay ilang gisulat agi og tubag ngadto sa pag-aghat nga “Irekord ang Inyong mga Hunahuna” sa seksiyon 3 sa materyal sa pagpangandam ug sa pagdugang sa bisan unsay dugang nga mga ideya nga sila aduna o mga panghunahuna nga ilang nadawat. Mahimo ka usab nga modapit kanila sa paghunahuna mahitungod kon giunsa sa Manluluwas paghimo niini nga posible alang kanato sa pagbuntog sa sekswal nga pagtintal ug sala ug sa pagbaton og maayong mga relasyon.

Ipakigbahin ang imong pagpamatuod mahitungod sa mga kamatuoran nga gitudlo karong adlawa, ug awhaga ang mga estudyante sa pagpangayo og balaanong panabang samtang sila naningkamot sa pagpuyo sa balaod sa kaputli.

Alang sa Sunod nga Higayon

Ipasabot sa mga estudyante nga usa sa labing makuyaw nga mga hulga sa atong personal nga kaputli mao ang pornograpiya. Dapita ang mga estudyante sa pagtuon nga mabinantayon sa materyal sa pagpangandam alang sa sunod nga leksiyon, mangita alang sa unsaon nga sila makalikay ug makatabang sa uban sa paglikay niiini nga hulga.