Leksiyon 18 Materyal sa Magtutudlo

Pagsangkap alang sa Temporal nga mga Panginahanglan

Gisaligan sa Ginoo og responsibilidad ang mga ginikanan sa pagsangkap alang sa temporal nga mga panginahanglan sa ilang mga anak. Niini nga leksiyon, ang mga estudyante mosusi kon sa unsang paagi nga ang pagkahimong makabarog pinaagi sa kinaugalingong paningkamot makapalambo sa ilang abilidad sa pagtuman niini nga responsibilidad. Ang mga estudyante dapiton usab sa pagtino kon unsaon nila sa pagpalambo ang ilang mga paningkamot sa pagpuyo pinaagi sa maalamong mga baroganan bahin sa pinansyal.

Mga Sugyot alang sa Pagtudlo

Ang mga ginikanan mao ang responsable sa pagsangkap alang sa temporal nga mga panginahanglan sa ilang pamilya.

Ipakita ang mosunod nga kamatuoran diha sa pisara: Ang mga ginikanan adunay sagradong katungdanan sa pagsangkap alang sa pisikal nga mga panginahanglan sa ilang mga anak (tan-awa sa “Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).

• Unsay imong mga gibati o mga pangutana mahitungod niining sagrado nga katungdanan?

• Unsa ang imong gibuhat sa pagkakaron sa pagpangandam o pagtuman niini nga katungdanan?

Isulat ang pulong nga pagbarog pinaagi sa kinaugalingong paningkamot diha sa pisara. Dapita ang mga estudyante sa paglista og mga pulong diha sa pisara nga naghulagway sa usa ka tawo nga makabarog pinaagi sa kinaugalingong paningkamot. Hangyoa ang pipila ka estudyante sa pagpaambit kon ngano nga gipili nila kana nga mga pulong.

• Nganong importante man nga atong palamboon ang pagbarog pinaagi sa kinaugalingong paningkamot? (Isip kabahin niini nga panaghisgot, mahimo nimong gamiton ang mga pagtulon-an diha sa Doktrina ug mga Pakigsaad 75:28–29 ug ang laing mga pagtulon-an diha sa seksiyon 1 sa materyal sa pagpangandam. Dayon tabangan nimo ang imong mga estudyante sa pag-ila sa mga kamatuoran sama sa mosunod: Ang makugihong pagtrabaho makatabang sa mga ginikanan nga makabarog pinaagi sa kinaugalingong paningkamot ug makasangkap alang sa espirituhanon ug temporal nga mga panginahanglan sa ilang pamilya. Ang pagpalambo sa pagbarog pinaagi sa kinaugalingong paningkamot makatabang nato nga mas mahisama sa Manluluwas. Ang pagkahimong makabarog pinaagi sa kinaugalingong paningkamot mopalambo sa atong abilidad sa pagserbisyo sa uban.)

Pagpalambo sa Atong Pagtudlo ug Pagkat-on

Paminaw og maayo sa mga komentaryo ug mga tubag sa mga estudyante. Usahay ang mga magtutudlo mabalaka ra kaayo mahitungod sa unsay sunod nilang isulti o buhaton nga dili na gayod sila magtagad sa unsay gisulti sa mga estudyante. Pinaagi sa pag-obserbar ug sa pagpaminaw og maayo ngadto sa mga estudyante, ang mga magtutudlo makatino sa ilang mga panginahanglan ug makagiya sa panaghisgot sumala sa giya sa Espiritu Santo. Magmahimong andam sa pagpahiangay sa imong plano sa leksiyon sa pagtubag sa mga pangutana, mga panginahanglan, ug mga kabalaka sa imong mga estudyante.

Pilia gikan sa mosunod nga mga pangutana kadtong labing mahinungdanon ngadto sa imong mga estudyante, ug magdungan sa paghisgot niini isip usa ka klase o diha sa ginagmay nga mga grupo:

• Sa inyong hunahuna sa unsang paagi nga ang pagkahimong makabarog pinaagi sa kinaugalingong paningkamot mohaom diha sa plano sa Langitnong Amahan?

• Unsa nga mga kasinatian ang nakatabang nimo nga makadayeg sa bili sa makugihon nga pagtrabaho? Unsa nga mga panalangin ang imong nasinati gikan sa pagtrabaho og maayo? (Ikonsiderar ang pagdungan og rebyo sa pamahayag ni Elder D. Todd Christofferson mahitungod sa trabaho diha sa seksiyon 2 sa materyal sa pagpangandam.)

• Unsa nga mga benepisyo ang mahatag sa edukasyon ngari nato ug sa atong mga pamilya? Sa unsang paagi nga kini makatabang nato nga mahimong mas mahisama sa Dios? (Kon gikinahanglan, adto sa mga pagtulon-an mahitungod sa edukasyon diha sa seksiyon 2 sa materyal sa pagpangandam aron mapalawman ang panaghisgot.)

• Sa unsang paagi nga ang Ginoo nakatabang nimo, o sa unsang paagi nga Siya makatabang nimo, sa pagpalambo og kinaiya sa makugihong pagtrabaho o pag-angkon og dugang pa nga edukasyon?

Ipasabot nga aron magiyahan ug mapanalanginan ang Iyang mga anak, ang atong Langitnong Amahan mitudlo og partikular nga mga responsibilidad ngadto sa mga amahan ug mga inahan. Isulat o ipakita ang mosunod nga pamahayag diha sa pisara: Pinaagi sa balaan nga plano, ang mga amahan may kapangakohan sa pagsangkap sa mga kinahanglanon sa kinabuhi sa ilang mga pamilya (tan-awa sa “Ang Pamilya: Usa ka Pamahayag ngadto sa Kalib[o]tan”).

Tabangi ang mga estudyante nga makasabot nga tungod kay ang mga kahimtang sa mga managtiayon ug mga pamilya managlahi, sa pipila ka sitwasyon, ang amahan ug inahan kinahanglang magtrabaho aron sa pagsangkap sa mga kinahanglanon alang sa ilang pamilya.

• Unsa ang imong nakat-onan gikan sa tambag ni Presidente M. Russell Ballard mahitungod kon unsaon paghimo sa bana ug asawa niini nga mga matang sa mga desisyon? (Ikonsiderar ang pagdapit sa mga estudyante sa pagrebyo sa pamahayag ni Presidente Ballard diha sa seksiyon 2 sa materyal sa pagpangandam.)

• Unsa ang imong mga hunahuna mahitungod niini nga tambag? (Isip kabahin niini nga panaghisgot, ikonsiderar ang pagminubo sa artikulo nga “Naningkamot nga Mahimong Intelihente ug Halangdon nga Inahan” [Lilian Pagaduan-Villamor, Liahona, Ago. 2018, 16–17]. Kini nga artikulo gilakip diha sa “Gusto pa og Dugang?” nga seksiyon sa materyal sa pagpangandam.)

Ipamatuod nga ang Langitnong Amahan mogiya sa mga estudyante diha sa ilang talagsaong mga kahimtang samtang magtuon sila sa mga pagtulon-an sa mga propeta ug magpakitambag uban sa ilang kapikas ug uban Kaniya.

Ang mga baroganan bahin sa maalamong pagdumala sa pinansyal makagiya nato sa pagsangkap alang sa atong pamilya.

Dapita ang mga estudyante sa pagrebyo og kadali sa mga tudling sa kasulatan nga ilang gipili alang sa kalihokan sa pagtuon diha sa seksiyon 3 sa mateyal sa pagpangandam. (Tingali kinahanglan kang mohatag sa estudyante og panahon sa pagrebyo sa pipila ka tudling.)

Bahina ang mga estudyante nga managpares o sa ginagmay nga mga grupo. Dapita sila nga ipaambit sa usag usa ang mga baroganan bahin sa pinansyal nga ilang nakat-onan gikan niini nga mga tudling sa kasulatan ug sa paghisgot sa mosunod nga pangutana (mahimo nimong ipakita kini nga pangutana diha sa pisara):

• Sa unsang paagi nga ang paggamit niining maalamon nga mga baroganan bahin sa pinansyal makapanalangin nimo sa personal nga paagi o makapanalangin sa imong pamilya?

Ang mosunod mao ang lista sa mga baroganan nga mahimong matino sa mga estudyante gikan sa mga tudling sa kasulatan nga gihatag diha sa materyal sa pagpangandam:

• Sundon ang balaod sa mga ikapulo ug mga halad (tan-awa sa Malaquias 3:8–10).

• Likayan ang pagbutang sa imong kasingkasing diha sa kalibotanon nga mga kabtangan (tan-awa sa Mateo 6:19–21).

• Gamiton ang pagbadyet ug maalamong pagplano (tan-awa sa Lucas 14:28–30).

• Makontento sa unsay anaa nimo (tan-awa sa 1 Timoteo 6:6–10).

• Pangitaa ang Dios sa dili pa mangita sa mga katigayonan, ug kon ikaw mangita sa mga katigayonan, mangita niini alang sa katuyoan sa pagbuhat og maayo (tan-awa sa Jacob 2:18–19).

• Gamita ang imong temporal nga mga panalangin sa pagtabang sa mga kabus ug mga timawa (tan-awa sa Doktrina ug mga Pakigsaad 104:13–18).

• Bayran ang mga utang (tan-awa sa Doktrina ug mga Pakigsaad 104:78).

Human sa igong panahon, dapita ang pipila ka estudyante nga ipaambit diha sa klase ang mga baroganan nga ilang natino. Dayon isulat o ipakita ang mosunod nga baroganan diha sa pisara: Pinaagi sa paggamit sa maalamong mga baroganan bahin sa pinansyal, ang mga indibidwal ug mga pamilya makapalambo sa ilang kaugalingong pinansyal nga kalig-on ug makatabang niadtong nanginahanglan.

• Kanus-a man nga ikaw o ang imong pamilya nakasinati og mga panalangin sa paggamit sa maalamong mga baroganan bahin sa pinansyal?

• Unsa ang atong makat-onan mahitungod sa Ginoo ug sa Iyang kinaiya gikan sa kamatuoran nga Siya mihatag nato og mga baroganan bahin sa pinansyal sama niini?

Ikonsiderar ang paghatag sa mga estudyante og panahon sa pagpamalandong sa unsay ilang nakat-onan mahitungod sa pagkahimong makabarog pinaagi sa kinaugalingong paningkamot, pagpalambo og kinaiya sa makugihong pagtrabaho, pag-angkon og edukasyon o propesyonal nga pagbansay, ug paggamit sa maalamong mga baroganan bahin sa pinansyal. Dapita ang mga estudyante sa pagrekord og usa ka butang nga mahimo nilang sugdan sa pagbuhat, o ipadayon sa pagbuhat, aron mapalig-on ang ilang pagbarog pinaagi sa kinaugalingong paningkamot ug ang ilang mga paningkamot sa pagsunod niini nga mga baroganan. (Isip kabahin niini nga kalihokan, mahimo nimong dapiton ang mga estudyante sa pagrebyo sa unsay ilang gisulat agi og tubag sa “Irekord ang Imong mga Hunahuna” nga pag-aghat diha sa seksiyon 3 sa materyal sa pagpangandam.)

Taposon pinaagi sa pagpaambit sa imong pagpamatuod bahin sa tinguha sa Ginoo sa pagtabang nato sa pagsangkap alang sa atong temporal nga mga panginahanglan.

Alang sa Sunod nga Higayon

Dapita ang mga estudyante sa paghunahuna kon unsay ilang pasalamatan mahitungod sa ilang inahan o gipakasama nga inahan sa ilang kinabuhi. Awhaga sila nga ikonsiderar ang paghatag og bili sa mga inahan samtang nagtuon sa materyal sa pagpangandam alang sa leksiyon 19. Mahimo nimong dapiton ang mga estudyante sa pagsulat og mubo nga sulat sa pagpasalamat ngadto sa ilang inahan o gipakasama nga inahan.