Leksiyon 2 Materyal sa Magtutudlo

Ang Tahas sa mga Propeta sa Pagsangyaw sa Doktrina sa Mahangtoron nga Pamilya

“Ang Pamilya: Usa ka Pamahayag ngadto sa Kalib[o]tan” nagsugod niini nga paagi: “Kami, ang Unang Kapangulohan ug Konseho sa Napulog Duha ka Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag …” (ChurchofJesusChrist.org). Kini nga leksiyon motabang sa mga estudyante sa pagsabot sa sagradong responsibilidad sa mga propeta isip mga magbalantay sa pagsangyaw sa kabubut-on sa Ginoo ug sa pagpasidaan sa mga hulga ngadto sa atong espirituhanong kaayohan. Ang mga estudyante adunay oportunidad sa pagpiho kon unsaon nila sa paggamit ang mas dako nga pagpailob ug hugot nga pagtuo diha sa Ginoo samtang sila naninguha sa pagpamati ngadto sa mga pagtulon-an sa Iyang buhi nga mga propeta kalabot sa kaminyoon ug pamilya.

Mga Sugyot alang sa Pagtudlo

Ang Ginoo nagtawag og mga propeta sa paglihok isip mga magbalantay sa tore.

Ipakita ang mosunod nga mga pangutana sa wala pa ang klase:

• Ngano nga ang mga propeta nagpili sa pagtubag sa malisod nga mga hilisgotan ug sa pagpamulong batok sa katilingbanong gidawat nga mga praktis, nahibalo nga ang ilang mga pulong makapasuko sa pipila ka mga tawo?

Sugdi ang klase pinaagi sa pagpangutana sa mga estudyante sa ilang mga hunahuna mahitungod sa pangutana. Isip kabahin sa inyong panaghisgotan, mahimo nimong basahon uban sa mga estudyante ang pahayag ni Presidente Russell M. Nelson gikan sa seksyon 1 sa materyal sa pagpangandam.

• Unsaon ninyo sa pag-summarize ang unsay gitudlo ni Presidente Nelson? (Tabangi ang mga estudyante sa pag-ila sa mga kamatuoran sama sa mosunod: Ang Dios nagpakita sa Iyang gugma pinaagi sa pagtawag og mga propeta sa pagpasidaan ug sa pagpanalipod kanato. Nagpakita ang mga propeta nga sila nag-amuma alang sa tanang mga katawhan pinaagi sa pagtudlo sa kamatuoran.)

• Giunsa nimo pagbati ang gugma sa Dios pinaagi sa mga pasidaan, pagtudlo, ug pagtambag sa buhing mga propeta? (Hunahunaa ang pagpakigbahin sa imong pagpamatuod mahitungod usab niini.)

Pagpakita og usa sa mga hulagway sa magbalantay nga makaplagan diha sa materyal sa pagpangandam, ug hatagi ang mga estudyante og panahon sa pagrebyo sa Ezequiel 3:17–19.

• Sa unsang paagi nga ang mga propeta sama sa mga magbalantay diha sa tore?

Mahimo kang magpataas og usa ka kopya sa pamahayag sa pamilya ug mangutana:

• Sa unsang paagi ang pag-isyu sa pamahayag sa pamilya naghulagway sa mga tahas sa mga propeta isip mga magbalantay diha sa tore? (Makadapit ka og mga estudyante sa pagrebyo sa pahayag ni Presidente Gordon B. Hinckley ug sa mubong kinutlo gikan sa kasaysayan sa kinabuhi ni Presidente Russell M. Nelson diha sa seksiyon 2 sa materyal sa pagpangandam.)

Ang Ginoo nagmando kanato sa pagsunod sa mga propeta diha sa pagpailob ug hugot nga pagtuo.

Mahimo kang modapit og mga estudyante sa paglista og pipila ka mga rason nga ang mga katawhan sa karaang mga panahon nahimong mipili sa dili pagsanong ngadto sa mga pasidaan sa magbalantay.

Hunahunaa ang pagpakigbahin sa mosunod nga sitwasyon (o paghimo og usa nga mas kalabot ngadto sa imong mga estudyante) ug sa pagdapit og mga estudyante sa pagtubag sa mga pangutana nga mosunod:

Si Jorge gitudloan sa doktrina nga gilangkob sa pamahayag sa pamilya sukad sa gamay pa siya. Apan ang iyang suod nga mga ig-agaw ug pipila ka mga higala nagtuo nga ang mga pagtulon-an kitid og panghunahuna ug kinaraan sa pipila ka estilo sa kinabuhi. Ang pipila sa ilang gisulti makatarunganon ngadto ni Jorge. Siya naghunahuna kon ang pamahayag karaan ba.

• Unsa ang inyong mga hunahuna mahitungod sa sitwasyon ni Jorge?

• Unsa nga mga impluwensya ang makahimo niini og malisod alang sa mga tawo sa pagdawat sa ubang mga pagtulon-an diha sa pamahayag sa pamilya?

Dapita ang mga estudyante sa pagbasa o sa pagrebyo sa Doktrina ug mga Pakigsaad 21:4–6. Pahinumdomi sila nga kini nga mga bersikulo nagpasabot ngadto ni Propeta Joseph Smith ug, busa, mahimong magamit sa karon nga Presidente sa Simbahan sa Ginoo.

• Unsa kaha ang kahulogan sa pagdawat sa mga pulong sa propeta “sa tanang pagpailob ug hugot nga pagtuo” (bersikulo 5)?

• Unsaon ninyo sa pag-summarize ang mga saad sa Ginoo ngadto niadtong kinsa nagdawat ug nagpatalinghog sa mga pulong sa Iyang propeta sa pagpailob ug hugot nga pagtuo? (Mahimo nimong tabangan ang mga estudyante sa pag-ila og baroganan nga susama ngadto sa mosunod: Kon kita mopatalinghog sa mga pulong sa propeta, ang Ginoo mopanalangin kanato ug mowagtang sa mga gahom sa kangitngit.)

Pagpalambo sa Atong Pagtudlo ug Pagkat-on

Tabangi ang mga estudyante sa pagsinati og lig-on nga pagkat-on. Samtang ikaw nagtudlo, hatagi og gibug-aton ang unsay kinahanglan gayod masinati ug mabuhat sa mga estudyante sa pagdapit og personal nga pagpadayag ug pagpapalig-on sa pagkakabig. Unsaon nimo sila pagtabang nga mapalig-on diha sa unsay ila nang nahibaloan? Unsaon nimo sila pagtabang nga mahimong aktibo nga mga tigkat-on ug makatampo sa pagkat-on sa uban? Unsaon nimo sila sa paghatag og mga oportunidad sa pag-ila sa mga pag-aghat gikan sa Espiritu Santo?

Sa pagtabang sa mga estudyante sa paghunahuna og mga ehemplo niini nga baroganan, hatagi sila og pipila ka mga minuto sa pagbasa o pagrebyo sa asoy sa kasulatan nga ilang gipili gikan sa seksiyon 3 sa materyal sa pagpangandam. Mahimo nimong bahinon ang klase ngadto sa gamay nga mga grupo ug sa pagdapit sa mga estudyante sa paghisgot sa ilang mga tubag ngadto sa mga pangutana diha sa “Irekord ang Imong mga Hunahuna” nga kalihokan sa seksiyon 3. Kon dili, dapita ang mga estudyante sa paghisgot sa ilang mga tubag isip usa ka klase.

Mahimo usab nga imong dapiton ang mga grupo sa pagsulti mahitungod sa tanan o sa pipila sa mosunod nga mga pangutana (o ikaw makahimo sa paghisgot niini isip usa ka klase):

• Sa inyong kaugalingong kinabuhi, unsa ang nagtabang kaninyo sa pagpatalinghog sa mga pulong sa mga propeta sa Ginoo sa pagpailob ug hugot nga pagtuo? Unsa ang inyong nahibaloan mahitungod sa Ginoo nga makatabang kaninyo sa pagtubag niini nga paagi ngadto sa mga pulong sa Iyang mga propeta?

• Kanus-kamo mibati nga gipanalanginan o dihay kangitngit nga nawagtang tungod sa imong pagpailob ug hugot nga pagtuo sa pagpatalinghog sa mga pulong sa mga propeta?

• Unsa ang bag-ohay nga tambag nga gihatag sa Ginoo pinaagi sa Iyang mga propeta nga tingali nagkinahanglan og pipila ka pagpailob ug hugot nga pagtuo sa pagdawat ug pagpatalinghog?

Ipakita ang mosunod nga mga pangutana, ug paghatag og igo nga panahon alang sa mga estudyante sa pagpamalandong diha niadtong mga labing magamit nila. Awhaga ang mga estudyante sa pagrekord ug paglihok sa bisan unsa nga mga panghunahuna nga ilang nadawat.

• Kon usa ka butang ang natudlo sa propeta mahitungod sa kaminyoon o pamilya malisod alang kanako sa pagdawat, unsaon ko ang pagsumbalik? Unsay gusto kaha sa Ginoo nga akong buhaton dinhi niini nga sitwasyon?

• Unsa ka tinuyo ug ka kanunay ako sa akong mga paninguha sa pagpatalinghog sa tambag sa mga propeta sa Ginoo kalabot ngadto sa kaminyoon ug pamilya? Sa unsa nga paagi kaha ang Ginoo gusto kanako nga mausab?

Pagpamatuod sa mga kamatuoran nga gitudlo dinhi niini nga leksiyon. Pasaligi ang mga estudyante nga ang Ginoo andam sa pagtabang kanila samtang sila naningkamot sa pagpatalinghog sa mga pulong sa propeta sa tanang pagpailob ug hugot nga pagtuo.

Alang sa Sunod nga Higayon

Mahimo nimong dapiton ang mga estudyante sa paghunahuna kon sila naghunahuna ba kon kinsa sila mahimo sa pipila ka adlaw o unsa ang kinahanglan nilang buhaton niini nga kinabuhi. Awhaga ang mga estudyante nga mainampoong magtuon sa materyal sa pagpangandam alang sa sunod nga leksiyon uban niini nga mga ideya diha sa hunahuna.