Leksiyon 15 Materyal sa Magtutudlo

Ang Sugo sa Pagsanay ug Pagpuno sa Yuta

Ang mga propeta namahayag nga ang sugo sa Langitnong Amahan sa pagsanay ug pagpuno sa yuta nagpabilin nga ipatuman sa atong panahon karon. Niini nga leksiyon, ang mga estudyante maghisgot sa kaimportante ug sa kalipay nga makabaton og mga anak. Hisgotan usab nila kon unsaon paghimo og gibase sa hugot nga pagtuo nga mga desisyon mahitungod kon kanus-a magbaton og mga anak ug kon pila kabuok anak. Ang mga estudyante adunay oportunidad sa pagsusi sa ilang hugot nga pagtuo diha sa Dios ug sa ilang pagkahisubay sa Iyang kabubut-on kalabot niini nga sugo.

Pahinumdom: Sa dili pa ang klase, ikonsiderar ang pagdapit sa mga estudyante sa pagsumiter og mga pangutana nga sila aduna mahitungod sa hilisgotan niini nga leksiyon pinaagi sa text, email, online nga survey, o laing pamaagi. Gamita ang mga pangutana sa mga estudyante ug ang giya sa Espiritu sa pagtino unsa ang labing maayong tutokan niini nga leksiyon. Ikonsiderar ang mga paagi nga imong madala ang mga pangutana sa mga estudyante ngadto sa ilang kasinatian sa pagkat-on. Pananglitan, mahimo nimong ilisan ang pipila sa mga pangutana nga gigamit diha sa hisgotanan sa grupo (tan-awa ang handout sa ubos) nga adunay susama nga mga pangutana nga gisumiter sa imong mga estudyante.

Mga Sugyot alang sa Pagtudlo

Ang sugo sa Dios sa pagsanay ug pagpuno sa yuta nagpabilin nga ipatuman.

Ikonsiderar ang pagpakita og litrato sa usa ka masuso. Hangyoa ang mga estudyante sa pagsulti og usa ka pulong nga mahimong gamiton sa usa ka tawo sa paghulagway kon unsay gibati sa mga tawo mahitungod sa mga masuso, ug ilista diha sa pisara ang mga pulong nga hisgotan sa mga estudyante. (O, alang sa dugang nga hagit, ikonsiderar ang pagdapit sa mga estudyante sa pagsulat kutob sa ilang mahimo og mahulagwayon nga mga pulong sulod sa 30 ka segundo ug dayon hangyoa ang pipila ka estudyante sa pagpaambit sa ilang mga lista nganha sa klase.) Dapita ang pipila ka estudyante sa pagpaambit og mga hunahuna bahin sa mga pulong nga ilang hisgotan.

• Unsa ang pipila ka prayoridad nga maoy unahon sa minyo nga mga magtiayon kay sa pagbaton og mga anak? (Kon gikinahanglan, ikonsiderar ang pagdapit og usa ka estudyante sa pagbasa og kusog sa unang pamahayag ni Elder Neil L. Andersen diha sa seksiyon 1 sa materyal sa pagpangandam.)

Basahon og dungan ang Genesis 1:27–28, ug dapiton ang mga estudyante sa pagkonsiderar sa pagmarka sa unang sugo nga gihatag sa Langitnong Amahan ngadto ni Adan ug ni Eva. Dayon basahon og dungan ang ikaupat nga parapo [paragraph] sa “Ang Pamilya: Usa ka Pamahayag ngadto sa Kalib[o]tan” (ChurchofJesusChrist.org), ug timan-i kon sa unsang paagi nga kini nga sugo magamit sa atong panahon karon.

• Unsaon nimo sa pagpasabot sa mga katuyoan nga natuman diha sa plano sa Langitnong Amahan pinaagi sa pagbaton og mga anak sa mga bana ug mga asawa? (Kon gikinahanglan, dapita ang mga estudyante sa pagrebyo sa ikaduhang pamahayag ni Elder Andersen ug ang pamahayag ni Presidente M. Russell Ballard diha sa seksiyon 1 sa materyal sa pagpangandam. Isip kabahin sa hisgotanan, hatagi og gibug-aton ang mosunod nga kamatuoran: Kon ang bana ug asawa makabaton og anak dinhi sa kalibotan, sila nagtuman sa bahin sa plano sa kalipay sa Langitnong Amahan.)

Mahimo nimong pahinumdoman ang mga estudyante sa hisgotanan nga sila gidapit nga hisgotan uban sa usa ka tawo nga adunay mga anak (tan-awa sa seksiyon 1 sa materyal sa pagpangandam). Hangyoa ang pipila ka estudyante sa pagpaambit sa unsay ilang nakat-onan. (Mahimo nimong kontakon ang usa o duha ka estudyante pipila ka adlaw sa dili pa ang klase sa pagdapit nila sa pagtambong nga andam sa pagpaambit sa ilang mga hunahuna nganha sa klase.)

Han-aya ang mga estudyante ngadto sa gagmay nga mga grupo ug pagpili og usa ka lider alang sa matag grupo. Hatagi ang matag grupo og kopya sa mosunod nga handout, ug dapita ang mga estudyante sa pagsunod sa mga instruksiyon diha sa handout.

Paghimo og Gibase sa Hugot nga Pagtuo nga mga Desisyon mahitungod sa Pagbaton og mga Anak

Materyal sa Magtutudlo sa Ang Mahangtoron nga Pamilya—Leksiyon 15

Basaha ang mosunod nga mga kabalaka nga gipahayag sa pipila ka young adult:

1. Sa akong kataposang pagmabdos, nakasinati ko og pipila ka medikal nga komplikasyon nga mahimong mahitabo pag-usab sa sunod nga pagmabdos. Busa ang akong bana ug ako nakadesisyon nga dili na magdugang og anak. Mibati ko nga sad-an tungod kay duha lang ang akong mga anak apan ang tanan nakong mga igsoon mas dako ang mga pamilya.

2. Ang akong asawa ug ako nagplano nga magbaton og anak sa dili madugay, apan gusto pa kami nga mobiyahe ug makasinati og pipila ka kasinatian sa dili pa kami makabaton og anak. OK ra ba nga maghulat lang una?

3. Ang akong bana ug ako gusto nang magsugod sa pagbaton og mga anak. Wala lang kami mahibalo kon andam na ba kami. Dili pa maayo ang among pinansyal nga kahimtang. Unsaon namo pagkahibalo kon tukma na ba kini nga panahon?

Pagpili og usa niini nga mga kabalaka nga angayng tutokan isip grupo, ug hisgoti ang mosunod nga mga pangutana:

• Sa unsang mga paagi nga balido kini nga kabalaka?

• Sa unsang paagi nga magamit nimo ang unsay imong nakat-onan gikan sa seksiyon 2 sa materyal sa pagpangandam sa pagtabang sa usa ka tawo nga aduna niini nga kabalaka?

• Unsa ang ubang mga asoy gikan sa mga kasulatan o mga pagtulon-an gikan sa mga lider sa Simbahan nga makatabang sa usa ka tawo nga aduna niini nga kabalaka diha sa iyang mga paningkamot sa pagpadayon uban sa hugot nga pagtuo ngadto sa Dios?

© 2022 pinaagi sa Intellectual Reserve, Inc. All rights reserved.

Paghimo og Gibase sa Hugot nga Pagtuo nga mga Desisyon mahitungod sa Pagbaton og mga Anak

Human sa igong panahon, dapita ang usa o duha ka estudyante sa pagpaambit unsay ilang nakat-onan gikan sa ilang panaghisgot diha sa grupo. Kon ang mga estudyante wala mohisgot niini, pahinumdomi sila sa tambag nga gihatag diha sa Alma 37:37, ug ipakita ang mosunod nga baroganan: Samtang ang mga bana ug mga asawa magpakigtambag sa Ginoo ug mopakita og hugot nga pagtuo diha Kaniya, Siya mogiya nila diha sa ilang mga desisyon mahitungod sa pagbaton og mga anak.

Ikonsiderar ang pagdapit sa mga estudyante nga mangutana kon sila adunay mga pangutana mahitungod sa sugo sa pagbaton og mga anak. (Tingali nakakolekta ka og pipila ka pangutana sa mga estudyante sa wala pa ang klase nga mahimo nimong hatagan og pagtagad ug hisgotan dinhi.) Ikaw mahimo usab nga mopili sa bisan asa sa mosunod nga mga pangutana nga sa imong pamati makatabang sa imong mga estudyante nga mapalawman ang ilang pagsabot bahin niini nga hilisgotan ug hisgoti kini isip usa ka klase:

• Nganong importante man nga ang mga bana ug mga asawa makigtinambagay uban sa Langitnong Amahan kalabot kon kanus-a magbaton og mga anak ug kon pila kabuok anak?

• Sa unsang mga paagi nga imong nakita ang mga tawo nga imong nailhan nga nagpadayon uban sa hugot nga pagtuo diha sa Dios sa dihang ilang nadiskobrehan nga dili sila makabaton og mga anak (o dili makabaton og mga anak sama sa ilang gitinguha)?

• Nganong importante man nga dili kita mohukom sa uban sa ilang mga desisyon kalabot kon kanus-a magbaton og mga anak ug kon pila kabuok anak?

Mahimo nimong ipakita ang mosunod nga mga pangutana ug hatagan og panahon ang mga estudyante sa pagrekord sa ilang mga hunahuna mahitungod sa usa o duha sa ilang pilion:

• Unsa ang akong personal nga mga gituohan ug mga pagbati mahitungod sa pagbaton og mga anak?

• Unsa nga mga kausaban, kon aduna, nga tingali kinahanglan nakong buhaton aron mas hingpit nga mahisubay ang akong kabubut-on sa panglantaw sa Ginoo kalabot sa pagbaton og mga anak?

• Sa unsang paagi nga akong madepensahan ang kaimportante sa pagbaton og mga anak?

• Sa unsang paagi nga akong mapalambo ang akong pagsalig nga ang Ginoo mosuporta sa akong kapikas ug nako sa pagtuman sa sugo sa pagbaton og mga anak sumala sa Iyang kabubut-on?

Ikonsiderar ang pagdapit og pipila ka estudyante nga komportable sa pagbuhat niini sa pagpaambit sa unsay ilang girekord.

Gipamatud-an sa Ginoo ang kabalaan sa kinabuhi.

Dapita ang usa ka estudyante sa pagbasa og kusog sa pamahayag gikan sa pamahayag bahin sa pamilya diha sa sinugdanan sa seksiyon 3 sa materyal sa pagpangandam.

• Unsa ang gitudlo ngari kanato niini nga pamahayag mahitungod sa atong Langitnong Amahan ug unsay Iyang gusto alang sa Iyang mga anak? (Mahimo nimong awhagon ang mga estudyante sa pagkonsiderar kon sa unsang paagi nga ang pagkahibalo niini nga mga kamatuoran makaapekto sa ilang mga tinguha alang sa ilang kaugalingong mga anak.)

Pahinumdomi ang mga estudyante nga kini nga deklarasyon gikan sa pamahayag bahin sa pamilya mao ang makigbatok sa pipila ka binuhatan nga gidawat sa kadaghanan karong panahona, sama sa aborsyon.

• Unsaon nimo paggamit sa unsay imong nahibaloan mahitungod sa plano sa Dios aron ipasabot kon ngano nga ang “pinili nga aborsyon alang sa personal o sosyal nga kasayon” sukwahi sa kabubut-on sa Dios? (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.1, ChurchofJesusChrist.org).

Dapita ang mga estudyante sa pagkonsiderar kon unsay ilang mahimo sa pagpasiugda ug pagpanalipod sa kasagrado sa kinabuhi sa tawo.

Mahimo nimong taposon pinaagi sa pagpaambit sa imong pagpamatuod bahin sa kamatuoran nga nahibaloan sa mga estudyante dinhi niini nga leksiyon.

Alang sa Sunod nga Higayon

Hangyoa ang mga estudyante sa pagpamalandong sa mosunod nga pangutana: Unsa nga mga pagtulon-an ni Jesukristo ang nakahatag nimo og labihan nga kalipay sa imong kinabuhi sa pagkakaron?

Awhaga ang mga estudyante sa pagtuon sa materyal sa pagpangandam alang sa sunod nga klase nga maghunahuna niini nga pangutana.