Leksiyon 23 Materyal sa Pagpangandam sa Klase: Kon ang mga Panalangin sa Mahangtoron nga Kaminyoon o mga Anak Malangan
“Leksiyon 23 Materyal sa Pagpangandam sa Klase: Kon ang mga Panalangin sa Mahangtoron nga Kaminyoon o mga Anak Malangan,” Materyal sa Magtutudlo sa Ang Mahangtoron nga Pamilya (2022)
“Leksiyon 23 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
usa ka young adult nagtan-aw sa templo
Leksiyon 23 Materyal sa Pagpangandam sa Klase
Kon ang mga Panalangin sa Mahangtoron nga Kaminyoon o mga Anak Malangan
Daghang mga tawo nakasinati og kalangan sa pagdawat sa ilang matarong nga mga tinguha alang sa kaminyoon o mga anak, ug kini nga mga kalangan makahatag og kawalay paglaom, kabalaka, o kasakit sa kasingkasing. Samtang tun-an nimo kini nga materyal, hunahunaa ang mahitungod ngano nga kita makasalig nga ang Ginoo motuman sa Iyang gisaad nga mga panalangin alang sa atong mahangtoron nga mga pamilya kon kita matinud-anon ngadto Kaniya. Ikonsiderar usab ngano nga kitang tanan gikinahanglan diha sa Simbahan sa Manluluwas ug sa plano sa Dios, bisan unsa pa ang mga sirkumstansiya sa atong pamilya.
Seksiyon 1
Unsa kon ang akong mga sirkumstansiya dili mohaom niadtong gihulagway diha sa pamahayag sa pamilya?
Ang mga lider sa Simbahan nagtudlo og mga mithi sa kinabuhi sa pamilya. Nakahibalo usab sila nga dili ang tanan makasinati niini nga mga sumbanan. Pananglitan, diha sa pamahayag sa pamilya, ang mga propeta nagtudlo nga ang pipila ka “mga kahimtang mahimong manginahanglan sa pagsagop o sa pag-usab niini nga mga kalihokan” sa pagtuman sa sagrado nga mga responsibilidad sa pamilya (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).
Si Elder Neil L. Andersen sa Korum sa Napulog Duha ka Apostoles miila nga ang matinud-anong mga miyembro sa Simbahan makasinati og lain-laing mga sirkumstansiya sa pamilya:
Imahe
Elder Neil L. Andersen
Adunay daghan kaayo, batan-on ug tigulang, kinsa maunungon ug matinuoron ngadto sa [ebanghelyo ni Jesukristo], bisan tuod og ang ilang kaugalingong bag-o nga kasinatian wala moha[o]m og maayo sa sulod sa pamahayag sa pamilya: ang mga bata kansang mga kinabuhi nauyog pinaagi sa diborsyo; … [ang nagdiborsyo nga] mga babaye ug mga lalaki kinsa grabe nga nasamdan pinaagi sa pagkadili pagkamatinud-anon sa kapikas; mga bana ug mga asawa kinsa dili makapanganak; nag-inusara nga mga babaye ug mga lalaki, kinsa sa nagkalainlain nga mga katar[o]ngan, wala makahimo sa pagminyo. (“Ang Mata sa Hugot nga Pagtuo,” Liahona, Mayo 2019, 36)
Si Presidente M. Russell Ballard sa Korum sa Napulog Duha ka Apostoles mitudlo:
Imahe
Presidente M. Russell Ballard
Sobra sa katunga sa mga hamtong karon diha sa Simbahan mga nabalo, nadiborsyo, o wala pa maminyo. Ang uban naghunahuna mahitungod sa ilang mga oportunidad ug luna diha sa plano sa Dios ug diha sa Simbahan. Kinahanglan natong masabtan nga ang kinabuhing dayon dili lamang usa ka pangutana bahin sa kasamtangang kahimtang sa kaminyoon apan bahin kini sa pagkadisipulo ug pagka “mais[o]g diha sa pagpamatuod ni Jesus.” [Doktrina ug mga Pakigsaad 76:79; tan-awa usab sa Doktrina ug mga Pakigsaad 121:29]. …
… Ang tanang modawat sa mabinationg gasa sa Manluluwas sa paghinulsol ug mosunod sa Iyang mga sugo makadawat og kinabuhing dayon, bisan kon dili nila maangkon ang tanang kahimtang niini ug mga kahingpitan dinhi sa pagkamortal. (“Paglaom diha kang Kristo,” Liahona, Mayo 2021, 54-55)
Ang pipila ka tawo tingali matingala ngano nga ang mga lider sa Simbahan nagpadayon sa pagtudlo mahitungod sa mga sumbanan sa kinabuhi sa pamilya bisan daghan nga mga miyembro sa Simbahan wala makasinati niini nga mga sumbanan.
Si Sister Sharon Eubank sa Kinatibuk-ang Kapangulohan sa Relief Society mipaambit sa pipila sa iyang kasinatian ug panabot isip usa ka single adult:
Imahe
Sister Sharon Eubank
Sa pagkadili minyo mismo, nakahibalo ko niini nga pagbati. Wala kay kauban; maglingkod diha sa simbahan nga dili komportable; ang mga salo-salo mahimong masakit kaayo; ang mga paryente mobati nga sila makakomentaryo kon walay usa nga mosulti. …
Ang pagpahiangay diha sa usa ka Simbahan nga nagtutok sa pamilya mahimo usab nga mahagiton. Apan ang tinuod mao nga ang kadaghanan sa mga miyembro sa Simbahan wala magpuyo og hingpit nga mga sitwasyon sa pamilya. Dili ako sigurado nga bisan kinsa nagpuyo diha nianang hingpit nga sulundong pamilya. Busa nganong hatagan og gibug-aton? Tungod kay ang pamilya mao ang atong padulngan, ug kita ania dinhi sa yuta aron sa pagkat-on sa mga kahanas sa lig-on nga mga relasyon sa pamilya, bisan unsa pa ang atong kaugalingon nga sitwasyon. (“A Letter to a Single Sister,” Ensign, Okt. 2019, 40)
Imahe
icon, pamalandong
Pamalandong agi og Pagpangandam alang sa Klase
Sa unsa nga mga paagi nga kita makagamit sa atong hugot nga pagtuo kang Jesukristo ug sa Iyang mga pagtulon-an diha sa pamilya bisan kon ang mga sirkumstansiya sa atong pamilya dili sulundon?
Seksiyon 2
Unsaon nako sa pagpadayon inubanan sa hugot nga pagtuo kon ang gitinguha nga mga panalangin nalangan?
Si Abraham ug Sara nasayod kon unsay bation nga nalangan ang pipila ka gitinguha nga mga panalangin ug ang uban wala matuman niini nga kinabuhi. Sa dihang si Abraham nag-edad og 75 anyos, siya ug si Sara walay mga anak (tan-awa sa Genesis 11:29–30; 12:4). Apan ang Ginoo misaad kaniya, “Padaghanon ko ang imong mga kaliwat ug walay makaihap kanila” (Genesis 13:16). Ang Ginoo misaad usab nga si Abraham ug ang iyang kaliwatan hatagan sa yuta sa Canaan isip usa ka kabilin (tan-awa sa Genesis 17:8). Dayon, sa dihang si Abraham nag-edad og 100 anyos ug si Sara nag-edad og 90, sila gisaaran nga si Sara makaanak og anak nga lalaki nga hinganlan og Isaac (tan-awa sa Genesis 17:17, 19). Bisan kini nga saad ug ang pipila sa ubang mga saad ngadto kanila natuman, ang mga saad sa Ginoo nga sila adunay dili maihap nga kaliwatan ug madawat ang gisaad nga yuta wala matuman sa panahon ni Abraham ug Sara.
Sa basahon sa mga Hebreo, si Apostol Pablo naghisgot niini nga mga saad ngadto ni Abraham ug Sara.
Imahe
icon, pagtuon
Pagtuon agi og Pagpangandam alang sa Klase
Basaha ang Mga Hebreo 11:8, 11–13, ug ikonsiderar unsay imong makat-onan gikan sa ehemplo ni Abraham ug Sarah mahitungod sa pagpakita og hugot nga pagtuo diha ni Jesukristo sa dihang ang gitinguha nga mga panalangin nalangan o wala matuman niini nga kinabuhi.
Si Presidente Dallin H. Oaks sa Unang Kapangulohan mipasabot, “Ang hugot nga pagtuo nagpasabot nga pagsalig—salig diha sa kabubut-on sa Dios, salig sa Iyang pamaagi sa pagbuhat sa mga butang, ug salig sa Iyang tukma nga panahon [timetable]” (“Timing,” Ensign, Okt. 2003, 12).
Ang paghulat sa Ginoo alang sa mga panalangin nga atong gitinguha makasulay sa atong pailob ug pagkamasulundon. Samtang nagserbisyo isip sakop sa Seventy, si Elder Spencer J. Condie mipaambit:
Imahe
Elder Spencer J. Condie
Usahay, sa atong yutan-ong pagkawalay pail[o]b, mahimong malinga kita sa bililhon nga mga saad sa Ginoo ug mahimong makalimot kita nga ang katumanan niini nga mga saad nag-agad sa atong pagkamasulundon. (“Angkona ang Bililhon ug Dagko Uyamot nga mga Saad,” Liahona, Nob. 2007, 17)
Si Presidente Ballard mitudlo usab sa mosunod mahitungod sa paghulat sa Ginoo:
Imahe
Presidente M. Russell Ballard
Ang paghulat sa Ginoo nagpasabot og padayon nga pagkamasulundon ug espirituhanong pag-uswag paingon Kaniya. Ang paghulat sa Ginoo wala magpasabot nga naghulat lang nga walay gihimo. Kinahanglan nga dili kamo mobati nga anaa sa hulatanan nga lawak. …
Ang personal nga paglambo nga mahimong maangkon sa usa ka tawo karon samtang naghulat sa Ginoo ug sa Iyang mga saad usa ka bililhon, sagrado nga elemento sa Iyang plano alang sa matag usa kanato. … Ang Ginoo mopasidungog niadtong nagserbisyo ug naghulat Kaniya nga mapail[o]bon ug matinud-anon [tan-awa sa Isaias 64:4; Doktrina ug mga Pakigsaad 133:45]. (“Paglaom diha kang Kristo,” 55)
Imahe
icon, irekord
Irekord ang Inyong mga Hunahuna
Irekord ang mga kasinatian o mga pagtulon-an nga nakaimpluwensiya sa inyong pagsalig nga ang Ginoo motuman sa Iyang mga saad bisan kon ang mga panalangin nalangan.
Seksiyon 3
Unsaon nako nga makasalmot diha sa Simbahan sa Ginoo bisan pa sa akong mga sirkumstansiya sa pamilya?
Ang pipila ka mga miyembro sa Simbahan kansang mga sirkumstansiya sa pamilya wala mahiangay karon niadtong gihulagway diha sa pamahayag sa pamilya tingali maghunahuna unsaon nila nga mohaom diha sa Simbahan. Si Apostol Pablo mitandi sa Simbahan ni Jesukristo ngadto sa pisikal nga lawas aron sa pagtudlo kanato ngano nga ang matag miyembro sa Simbahan gikinahanglan.
Imahe
icon, pagtuon
Pagtuon agi og Pagpangandam alang sa Klase
Basaha ang 1 Mga Taga-Corinto 12:12, 16–17, 21, 25–27, ug hunahunaa ang mahitungod kon sa unsa nga paagi nga ang matag miyembro sa Simbahan importante ug makasalmot sa kinatibuk-an.
Ang atong talagsaon nga mga sirkumstansiya makahatag og bili ug kasinatian ngadto sa atong mga pamilya sa ward o branch. Si Presidente Ballard mipasabot:
Imahe
Presidente M. Russell Ballard
Ayaw kalimot nga kamo anak sa Dios, ang atong Amahan sa Kahangtoran, karon ug hangtod sa hangtod. Siya nahigugma kaninyo, ug ang Simbahan nagkinahanglan kaninyo. Oo, kami nagkinahanglan kaninyo! Kami nagkinahanglan sa inyong mga tingog, mga talento, mga kahanas, kamaayo, ug pagkamatarong. (“Paglaom diha kang Kristo,” 55)
Si Elder Robert D. Hales sa Korum sa Napulog Duha ka Apostoles mitudlo usab:
Imahe
Elder Robert D. Hales
Bisan kinsa nato mahimong modistansya sa atong kaugalingon gikan sa ward nga pamilya sa katarongan sa atong mga kalahian. … Hinoon, atong ipakigbahin ang atong mga gasa ug mga talento ngadto sa uban, magdala og kahayag sa paglaom ug kalipay ngadto kanila, ug sa pagbuhat sa ingon mobayaw sa atong kaugalingong mga espiritu. (“Belonging to a Ward Family,” Ensign, Mar. 1996, 16)
Imahe
icon, pamalandong
Pamalandong agi og Pagpangandam alang sa Klase
Unsay akong mahimo aron mas makasabot sa ubang mga miyembro sa akong ward o branch ug motabang nila nga mobati nga gihatagan og bili ug nahilakip? Kon ako mobati nga ako wala mahisakop sa Simbahan, unsay akong mahimo aron sa pagtugot sa Manluluwas sa pagtabang nako nga mobati sa akong bili ug dapit diha sa Iyang Simbahan?