Leksiyon 19 Materyal sa Magtutudlo

Ang Sagrado nga mga Responsibilidad sa mga Inahan

Si Presidente M. Russell Ballard sa Korum sa Napulog Duha ka Apostoles miingon, “Walay tahas niining kinabuhia nga labaw ka mahinungdanon ug mas mahangt[o]ron kay sa pagkainahan” (“Mga Anak nga Babaye sa Dios,” Liahona, Mayo 2008, 108). Niini nga leksiyon, ang mga estudyante mopasabot sa mahangtoron nga kinaiyahan ug bili sa pagkainahan ug sa pag-amuma sa uban. Hisgotan nila kon giunsa sa Manluluwas pagpakita og ehemplo sa pag-amuma. Praktison usab sa mga estudyante ang pagpasabot sa mga baroganan mahitungod sa pagkainahan ngadto sa uban.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Tinoa ang kapaspason. Likayi ang paggahin og dako kaayo nga panahon sa unang bahin sa leksiyon ug dayon magdalidali na hinoon sa nahabilin nga bahin. Samtang mag-andam ka, bana-banaa kon unsa ang gidugayon nga mahuman sa mga estudyante ang kada seksiyon sa leksiyon gamit ang mga pamaagi nga imong napili. Ipahiangay ang mga pamaagi kon kinahanglanon base sa mga panginahanglan ug interes sa imong mga estudyante.

Ang mga inahan adunay sagradong responsibilidad sa pag-amuma.

Ipakita ang mosunod nga pamahayag ni Presidente Russell M. Nelson:

Atol sa akong propesyonal nga pagpanarbaho isip usa ka doktor sa medisina, adunay higayon nga gipangutana ko nganong mipili ko nianang lisod nga trabaho. Gitubag nako sa akong opinyon nga ang labing taas ug labing halangdon nga buhat niini nga kinabuhi mao kanang buhat sa usa ka inahan. Kay kana nga opsiyon dili man nako mahimo, naghunahuna ko nga ang pag-atiman sa mga masakiton morag maoy duol-duol. …

Daghang katuigan ang milabay ang Unang Kapangulohan miisyu og usa ka pamahayag nga adunay tinuod ug malungtarong impluwens[i]ya ngari nako. “Ang pagkainahan,” sila misulat, “duol ngadto sa pagkabalaan. Kini ang labing taas, labing balaan nga pangalagad nga mahimong abagahon sa tawo. Nagbutang kini kaniya kinsa mitahod niining balaang tawag ug pagserbisyo sunod sa mga anghel” [sa James R. Clark, comp., Messages of the First Presidency of The Church of Jesus Christ of Latter-day Saints (1975), 6:178]. (“Our Sacred Duty to Honor Women,” Ensign, Mayo 1999, 38)

• Unsa ang labing mahinungdanon alang nimo sa pamahayag ni Presidente Nelson, ug ngano?

• Unsaon man nimo sa pagpasabot ang mahangtorong kinaiyahan sa tahas sa pagkainahan?

• Sa unsang paagi nga ang tahas sa pagkainahan may kalabotan sa tanang babaye, lakip na niadtong walay mga anak? (Kon gikinahanglan, dapita ang mga estudyante sa pagrebyo sa mga pamahayag ni Sister Sheri L. Dew ug Presidente Nelson diha sa seksiyon 1 sa materyal sa pagpangandam. Tabangi ang mga estudyante sa pag-ila og usa ka kamatuoran nga susama sa mosunod: Ang matag babaye usa ka inahan pinaagi sa katungod sa iyang mahangtoron nga balaanong kapalaran [tan-awa sa Russell M. Nelson, “Ang Partisipasyon sa mga Sister sa Pagpundok sa Israel,” Liahona, Nob. 2018, 68].)

• Unsay kahulogan niini nga kamatuoran alang nimo ug sa mga babaye nga imong nailhan?

Ikonsiderar ang pagdala ngadto sa klase o pagpakita og mga hulagway sa himsog nga tanom ug nalaya nga tanom.

Dapita ang mga estudyante sa paghunahuna kon unsa kaha ang gihimo alang sa himsog nga tanom nga wala himoa alang sa nalaya nga tanom.

• Sa unsang paagi nga ang pag-atiman sa mga tanom ikakomparar ngadto sa pag-amuma sa mga tawo? (Kon gikinahanglan, rebyoha uban sa mga estudyante ang kahulogan sa pag-amuma nga gihatag ni Presidente Susan W. Tanner diha sa seksiyon 2 sa materyal sa pagpangandam.)

Ipakita ang mosunod nga pamahayag gikan sa pamahayag bahin sa pamilya: Ang unang mga kapangakohan sa mga inahan mao ang pag-atiman sa ilang mga anak (tan-awa sa ChurchofJesusChrist.org).

• Unsa nga mga gasa ang gihatag sa Langitnong Amahan ngadto sa mga babaye aron matabangan sila sa pagtuman niining sagrado nga responsibilidad? (Isip ka bahin sa panaghisgot, mahimo nimong rebyohon uban sa mga estudyante ang mga pamahayag ni Sister Neill F. Marriott ug Presidente Henry B. Eyring diha sa seksiyon 2 sa materyal sa pagpangandam.)

Ipasabot nga si Jesukristo mao ang perpekto nga ehemplo sa pag-amuma. Dapita ang mga estudyante sa pagrebyo sa mga hugpong sa mga pulong nga gitun-an nila diha sa seksiyon 2 sa materyal sa pagpangandam, nga mangita kon unsay ilang makat-onan mahitungod sa pag-amuma gikan sa ehemplo sa Manluluwas. Dapita ang pipila ka estudyante sa pagpaambit sa ilang mga hunahuna.

Ang mga inahan adunay sagrado ug mahinungdanon nga tahas diha sa plano sa Dios.

Dapita ang mga babaye diha sa klase sa pagtubag sa mosunod nga pangutana:

• Unsa ang imong mga hunahuna, mga pagbati, o mga kabalaka mahitungod sa pagkahimong usa ka inahan?

Dayon pangutan-a ang klase sa mosunod nga mga pangutana:

• Unsa ang mga nagpalisod sa atong kultura nga tingali maoy gibati sa usa ka babaye ngadto sa pagkainahan?

• Unsa nga mga kalainan ang imong makita tali sa unsay panglantaw sa pipila ka tawo bahin sa pagkainahan ug kon unsay panglantaw sa Dios bahin sa pagkainahan? (Isip kabahin niini nga panaghisgot, mahimo nimong giyahan ang mga estudyante ngadto sa mga pamahayag ni Presidente Nelson ug Elder D. Todd Christofferson diha seksiyon 3 sa materyal sa pagpangandam. Tabangi ang mga estudyante sa pagtino og usa ka kamatuoran sama sa mosunod: Ang pagpanganak ug pag-atiman sa mga anak sa Dios importante ngadto sa buhat ug himaya sa Dios.)

• Ngano nga ang pagpanganak (kon posible) ug pag-atiman sa mga anak importante man sa plano sa Langitnong Amahan bahin sa kalipay?

Ipakita ang hulagway sa batan-ong mga manggugubat. Dapita ang mga estudyante sa pagpaambit sa unsay ilang nahibaloan mahitungod sa hugot nga pagtuo niining mga batan-ong lalaki (tan-awa sa Alma 56:45–48; 57:21–26).

• Unsa ang impluwensiya nga nahimo sa mga inahan sa batan-ong mga manggugubat diha sa kinabuhi sa ilang mga anak nga lalaki ug sa seguridad sa nasod sa mga Nephite?

Agi og pagpangandam alang sa klase, ang mga estudyante gidapit sa pagpadala og mubo nga sulat ngadto sa ilang inahan o gipakasama nga inahan nga nakapanalangin sa ilang kinabuhi. Mahimo nimong dapiton ang pipila ka estudyante sa pagpaambit kon sa unsang paagi nga ang mga babaye nga ilang gisulatan nakaimpluwensiya sa ilang kinabuhi. O, kon ang kadaghanan sa mga estudyante wala magsulat, mahimo nimo silang dapiton sa paggahin og pipila ka minuto sa pag-text o pag-email atol sa klase.

Hangyoa ang mga estudyante sa pagpili og usa niadto nga mga pananglitan nga naghulagway sa mga opinyon o mga kinaiya nga ilang makita diha sa social media. Dapita sila sa pagsulat og usa ka tubag base sa ilang hunahuna nga sa ilang paminaw epektibong makatubag niini nga sentimento. (Kon ang mga estudyante adunay usa ka pananglitan nga nahitabo sa tinuod nga kinabuhi nga gusto nila nga mao lang ang gamiton, dapita sila sa paggamit niana nga pananglitan.) Awhaga ang mga estudyante sa paggamit sa unsay ilang nakat-onan diha sa ilang pagtuon sa materyal sa pagpangandam ug gikan sa personal nga kasinatian, ingon man sa pagpaambit sa ilang pagpamatuod, samtang nagporma sila sa ilang tubag.

• Usa ka higala naghulagway sa pagkainahan isip pag-usik sa tinuod nga potensyal sa usa ka babaye, nag-ingon nga ang pagpili sa pagbaton og pamilya imbis sa propesyon makahatag og limitasyon sa unsay mahimo ug makab-ot sa kinabuhi sa usa ka babaye.

• Usa ka higala mibati nga wala mapasalamati—mibati siya nga unsay iyang gihimo alang sa iyang mga anak gibaliwala ra ug nga siya dili ingon ka maayo isip usa ka inahan.

• Usa ka higala nabalaka, “Unsa kaha kon dili ko klase sa tawo nga maayong moamuma? Unsaon man nako aron mahimo ko nga usa ka matang sa inahan nga gusto sa Ginoo nga ako mamahimo?”

• Usa ka higala naguol kaayo tungod kay siya ug ang iyang bana wala makabaton og mga anak.

Human nga ang mga estudyante aduna nay igong panahon, dapita ang pipila nila nga gustong mopaambit sa unsay ilang gisulat sa pagpaambit niini.

Sa pagtapos sa leksiyon, mahimo nimong dapiton ang mga estudyante sa pagkonsiderar sa unsay ilang mahimo aron sa pagtuman sa ilang sagradong tahas isip mga inahan o pagsuporta sa mga babaye nga suod nila niini nga tahas. Dapita ang mga estudyante nga mosalig sa tabang sa Ginoo samtang naghimo sila niini nga mga paningkamot. Pagpamatuod, o pagdapit og usa ka estudyante nga mopamatuod, bahin sa kaimportante sa pagkainahan diha sa plano sa Langitnong Amahan.

Alang sa Sunod nga Higayon

Dapita ang mga estudyante sa pagkonsiderar sa mga tahas sa mga amahan samtang magtuon sila sa materyal sa pagpangandam alang sa leksiyon 20. Ang mga estudyante mahimong mosulat og mubo nga sulat sa pasalamat ngadto sa ilang amahan o gipakasama nga amahan nga nakapanalangin sa ilang kinabuhi.