“Leksiyon 26 Materyal sa Magtutudlo: Pag-ila ug Pagkaayo gikan sa Pang-abuso,” Materyal sa Magtutudlo sa Ang Mahangtoron nga Pamilya (2022)
“Leksiyon 26 Materyal sa Magtutudlo,” Materyal sa Magtutudlo sa Ang Mahangtoron nga Pamilya
Leksiyon 26 Materyal sa Magtutudlo
Pag-ila ug Pagkaayo gikan sa Pang-abuso
Ang mga propeta ug apostoles mipasidaan nga “ang tagsa-tagsa kinsa … moabuso sa ilang kapikas o mga anak … moab[o]t ang adlaw nga mobar[o]g nga adunay tulubagon sa atubangan sa Dios” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Kini nga leksiyon makatabang sa mga estudyante nga mas makasabot unsaon sa pag-ila ug pagtubag sa mga sitwasyon sa pang-abuso. Ang mga estudyante mohisgot usab sa gahom ni Jesukristo nga nagtanyag og pagkaayo ngadto sa tanan kinsa naapektohan sa pang-abuso.
Pahinumdom: Basin ikaw adunay mga estudyante kinsa naapektohan sa pang-abuso. Tungod sa kasensitibo ug kamahagiton nga matang sa abuso, ang pipila ka bahin niini nga leksiyon mahimong makahimo og emosyonal nga mga reaksyon gikan sa mga estudyante kinsa mga biktima sa pang-abuso, ilabi na niadtong kinsa wala maghisgot bahin niini. Mahimo nimong pahibaloon ang mga estudyante og sayo nga kon si bisan kinsa kanila nga dili mobati nga komportable nga motambong og klase alang niini nga leksiyon, mahimong makigsabot sila og laing paagi kanimo bahin niini. Ikonsiderar ang laing makahuloganon nga kasinatian sa pagkat-on nga sila madapit nimo sa pag-apil sa gawas sa klase.
Kon tingali ang usa ka estudyante makig-istorya nimo mahitungod sa personal o pamilya nga pagkalambigit sa pang-abuso, ikaw kinahanglan nga mopasabot uban sa pagkasensitibo nga ikaw gikinahanglan nga moreport og mga alegasyon sa tanang matang sa pang-abuso pinaagi sa pagtawag sa help line sa Simbahan o sa legal counsel sa area. Pagmapailobon, sensitibo, mohatag og kasiguroan, ug magmasinabtonon samtang imong giyahan ang estudyante ngadto sa iyang bishop o presidente sa branch aron hisgotan ang sitwasyon. Pagmabinantayon sa pagsunod sa lokal nga mga balaod kabahin sa mga responsibilidad ug mga tulubagon sa pagreport og pang-abuso.
Mga Sugyot alang sa Pagtudlo
Pagpalambo sa Atong Pagtudlo ug Pagkat-on
Mahimong sensitibo sa mga panginahanglan ug mga pagbati sa mga estudyante. Ang paagi nga ikaw ug ang imong mga estudyante maghisgot sa pang-abuso makahatag og dugang kasakit o makahatag og paglaom. Mahimo nimong hisgotan uban sa mga estudyante ngano nga importante nga masabtan ug mahimong sensitibo sa kasakit ug pag-antos nga nasinati sa mga biktima sa pang-abuso. Samtang ikaw naghunahuna unsaon nimo sa paggiya niini nga panaghisgotan, basin imong makita nga makatabang ang pagbasa sa “Unsaon Nako Pagsuporta ang Usa ka Tawo Kinsa Giabuso?” (abuse.ChurchofJesusChrist.org).
Kadtong kinsa moabuso sa uban adunay tulubagon sa atubangan sa Dios.
Ipakita ang mosunod nga pamahayag gikan sa “Ang Pamilya: Usa ka Pamahayag ngadto sa Kalib[o]tan”: Ang mga tagsa-tagsa kinsa moabuso sa kapikas o mga anak moabot ang adlaw nga mobarog nga may tulubagon sa atubangan sa Dios (tan-awa usab sa Gipadayag 20:12–13; 2 Nephi 9:15–17).
Hatagi ang mga estudyante og pipila ka minuto sa pagrebyo sa mga seksiyon 1 ug 2 sa materyal sa pagpangandam, ug dapita sila sa pagpaambit og mga pangutana o mga impresyon nga ilang nadawat samtang sila nagtuon niini nga mga seksiyon. Kon gikinahanglan, mahimo kang mangutana sama sa mosunod:
-
Unsa ang pang-abuso? Unsa nga mga baroganan sa ebanghelyo ang nasupak kon mahitabo ang pang-abuso?
-
Unsa nga mga pasidaan ug mga sugyot ang importante kanimo niini nga mga seksiyon sa materyal sa pagpangandam?
-
Unsa ang imong mga hunahuna samtang girebyo nimo ang komon nga mga timailhan sa pang-abuso?
-
Sa unsa nga paagi nga ang usa ka tawo nga anaa sa sitwasyon sa pag-abuso luwas nga makapangayo og tabang? Kon ikaw nakahibalo og sitwasyon sa pag-abuso, unsaon nimo nga luwas nga makareport niini? (Ikonsiderar ang paggahin og panahon sa pagtabang sa mga estudyante sa pagpangita og mga kapanguhaan sa pagreport sa pang-abuso. Tan-awa, sama panaglit sa “Anaa sa Krisis? Pakig-istorya Karon.” [abuse.ChurchofJesusChrist.org].)
Si Jesukristo makaayo niadtong kinsa nag-antos sa pag-abuso.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F37%2Fab%2F37ab6053579b76b006c477a46a0170a8d83ef81d%2F37ab6053579b76b006c477a46a0170a8d83ef81d.jpeg/full/!250,/0/default)
Hunahunaa ang pagpangutana sa mosunod:
-
Sa unsang mga paagi nga moabot ang pagkaayo gikan sa pang-abuso? (Kon gikinahanglan, mahimo nimong rebyohon ang ikaduha nga pamahayag ni Elder Richard G. Scott diha sa seksiyon 3 sa materyal sa pagpangandam.)
-
Unsa ang imong ipaambit sa usa ka higala, sama ni Erin, kinsa nakigbisog gikan sa mga epekto sa pang-abuso? Unsa ang pipila ka mga butang nga nakapahimong lisod nga mamaayo gikan sa pang-abuso?
Basaha pagdungan ang Isaias 61:1–3, ug pangitaa ang mga kamatuoran nga makahuloganon ngadto sa usa ka biktima sa pang-abuso (tan-awa sa 2 Nephi 2:1–2). Lakip sa ubang mga kamatuoran, ang mga estudyante mahimong moila sa kamatuoran nga susama sa mosunod: Si Jesukristo adunay gahom nga ayohon ang masulub-on ug hupayon ang tanan nga nagbangotan.
-
Unsa ang inyong nahimo sa pagdapit og kahupayan, tabang, ug pagkaayo gikan sa Manluluwas, sa bisan unsa nga sirkumstansiya?
-
Giunsa sa Manluluwas pagpuli og katahom ang pagkawalay paglaom o kahigawad sa inyong kinabuhi?
-
Unsa ang makatabang nato nga mahimong mapailobon ug matinud-anon sa tibuok panahon nga gikinahanglan nga mamaayo?
Hatagi ang mga estudyante og pipila ka minuto sa paghunahuna kon sa unsa nga paagi nga ang mga pagtulon-an niini nga leksiyon makaapekto sa ilang kasamtangan nga kinabuhi. Awhaga sila sa pagrekord sa bisan unsang impresyon nga ilang nadawat.
Sa pagtapos sa leksiyon, dapita ang mga estudyante sa pagpaambit sa unsay ilang nakat-onan mahitungod sa tahas sa Manluluwas sa pagtabang sa tanan kinsa naapektohan sa pang-abuso.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Ffc%2F7b%2Ffc7b70dba1a6402617733f9f16c74fe0712b3508%2Ffc7b70dba1a6402617733f9f16c74fe0712b3508.jpeg/full/!250,/0/default)
Alang sa Sunod nga Higayon
Dapita ang mga estudyante sa paghunahuna og mga paagi nga ilang nakita nga si Satanas ug ang uban naningkamot sa paglaglag sa pamilya. Awhaga ang mga estudyante, samtang sila magtuon sa materyal nga pagpangandam alang sa sunod nga leksiyon, sa pagbantay sa mga resulta sa pagkabungkag sa mga pamilya sa katilingban ug sa pagpamalandong unsay ilang mahimo sa pagpanalipod sa mga pagtulon-an sa Ginoo bahin sa pamilya.