Leksiyon 24 Materyal sa Magtutudlo

Pag-atubang sa Kahimsog sa Pangisip uban sa Paglaom ug Kalooy

Ang mga hagit sa kahimsog sa pangisip mahimong dakong bahin sa atong mortal nga kasinatian. Niini nga leksiyon, ang mga estudyante adunay oportunidad sa pag-ila unsaon nila sa pagpalambo ang ilang kahimsog sa pangisip ug emosyon. Ang mga estudyante mokonsiderar usab unsaon nila sa pagtubag uban ang mas dako nga kapuangod ngadto sa mga sakop sa pamilya ug sa uban kinsa nakasinati og mga hagit sa kahimsog sa pangisip o sa mga sirkumstansiya nga naglakip og paghikog.

Mga Sugyot alang sa Pagtudlo

Kita mopanalangin sa atong kaugalingon ug sa atong mga pamilya samtang maningkamot kita sa pagpadayon ug pagpalambo sa atong kahimsog sa pangisip.

Ipakita ang mosunod nga mga pakisayran sa kasulatan: Job 6:1–3; 1 Nephi 18:17–18; Alma 26:26–27. Dapita ang mga estudyante nga hilom nga mobasa sa usa niini nga mga tudling ug mangita sa mga hagit sa kaayohan sa pangisip o emosyon sa mga indibidwal. Hangyoa ang mga estudyante sa pagpaambit sa unsay ilang nakit-an. Samtang mopaambit sila, mahimo nimong ilista ang ilang mga tubag diha sa pisara.

• Unsa ang ubang mga matang sa mga hagit ug mga sirkumstansiya ang negatibong makaapektar sa kaayohan sa atong pangisip ug emosyon? (Isulat diha sa pisara ang mga tubag sa mga estudyante.)

• Ngano kaha nga makatabang kini nga masayod nga ang pag-atubang sa mga hagit sa atong kahimsog sa pangisip ug emosyon mahimong normal nga bahin sa atong mortal nga kasinatian?

Pahinumdomi ang mga estudyante nga si Jesukristo “usa ka tawo sa mga kasub-anan, ug nakasinati sa pag-ant[o]s” (Isaias 53:3). Dapita ang mga estudyante sa pagpaambit og mga kasinatian nga nasinati sa Manluluwas nga naghulagway sa katumanan sa panagna ni Isaias.

Ipakita ang mosunod nga mga pakisayran sa kasulatan: Mateo 14:22–23; Marcos 1:35; 6:31, 46; Luca 5:16. Dapita ang mga estudyante nga hilom nga mobasa sa usa o daghan niini nga mga tudling ug sa pagpangita sa mga leksiyon nga atong makat-onan gikan sa mga aksyon sa Ginoo. Hangyoa sila sa pagpaambit sa unsay ilang nakit-an, ug tabangi sila nga makaila sa mosunod nga kamatuoran: Kita mosunod sa ehemplo ni Jesukristo kon kita mogahin og panahon sa pagpahulay, maghilom, ug mag-ampo.

• Ngano nga importante nga aktibong moamuma sa inyong kahimsog sa pangisip ug emosyon? (Ikonsidera ang pagbasa sa pamahayag ni Presidente M. Russell Ballard sa seksiyon 1 sa materyal sa pagpangandam.)

Hatagi ang mga estudyante og pipila ka minutos sa pagpamalandong ug sa pagrekord og usa ka paagi nga sila makapalig-on sa ilang kahimsog sa pangisip ug emosyon ug sa paghimo og yanong plano sa pagbuhat sa ingon. Ikonsiderar ang pagpabasa sa mga estudyante sa mga pangutana diha sa seksiyon 1 sa materyal sa pagpangandam alang sa mga ideya.

Kita makatubag uban ang Kristohanong gugma ug kapuangod ngadto sa mga indibidwal kinsa nakasinati og mga hagit sa kahimsog sa pangisip.

Ipakita ug basaha ang mosunod nga mga asoy sa mga indibidwal kinsa nakasinati og mga hagit sa kahimsog sa pangisip, sumala sa gipaambit ni Sister Reyna I. Aburto. Dapita ang mga estudyante sa pagpamalandong kon unsay ilang gibati samtang sila naminaw niini nga mga asoy.

Ang akong bugtong anak nga babaye kausa misulat: “Adunay higayon … [dihang] sobra kaayo ko kaguol sa tanang higayon. Kanunay ko nga naghunahuna nga ang kaguol usa ka butang nga angay ikaulaw, ug nga timaan kini sa kahuyang. Mao nga akong gitago ang akong kaguol sa akong kaugalingon. … Mibati ko nga hingpit nga walay bili” [Hermana Elena Aburto blog, hermanaelenaaburto.blogspot.com/2015/08].

Usa ka higala mihulagway niini sa ingon aning paagi: “Sukad sa akong pagkabata, nag-atubang ko og kanunay nga mga pagbati sa kawalay pagla[o]m, kangitngit, pag-inusara, ug kahadlok ug sa pagbati nga ako gubaon ug depektoso. Gibuhat nako ang tanan aron sa pagtago sa akong kasakit ug sa dili paghatag og impresyon nga ako walay laing gibati kon dili naglambo ug lig-on” [personal nga sulat]. (“Sa Dag-[o]m ug Kahayag, Ginoo, Ubani Ako!,” Liahona, Nob. 2019, 57)

• Unsa nga mga hunahuna ug mga pagbati ang inyong naangkon samtang naminaw kamo niini nga mga asoy?

Hatagi ang matag estudyante og kopya sa gisukip nga handout, o ipakita ang mga pangutana aron makita sa tanan. Dapita ang mga estudyante sa pagbasa ug sa pagpamalandong sa ilang kaugalingong mga pangutana. Human sa igong panahon, pundoka ang mga estudyante ngadto sa gagmay nga mga grupo ug hangyoa ang mga estudyante sa pagpaambit sa ilang mga hunahuna mahitungod sa usa o duha ka pangutana nga importante kanila.

Mga Hagit sa Kahimsog sa Pangisip

Materyal sa Magtutudlo sa Ang Mahangtoron nga Pamilya—Leksiyon 24

• Sa unsa nga paagi nga ang mga indibidwal nga nakasinati og mga hagit sa kahimsog sa pangisip mapanalanginan pinaagi sa pagdawat ug paghisgot bahin niini? Ngano kaha nga importante alang niini nga mga indibidwal sa pagpangayo og tabang gikan sa lider sa Simbahan o sa batid nga medikal nga propesyonal?

• Kon ang usa ka sakop sa pamilya o higala mopaambit kaninyo nga siya nakasinati og hagit sa kahimsog sa pangisip, unsa kaha ang labing importante nga butang (o mga butang) nga inyong ikasulti o mabuhat? (Ikonsiderar ang pagrebyo sa pamahayag ni Sister Reyna I. Aburto sa seksiyon 2 sa materyal nga pagpangandam.) Unsa ang pipila ka mga butang nga dili makatabang nga isulti o buhaton? Kanus-a kamo nakakita og usa ka tawo nga mitubag sa Kristohanon nga paagi ngadto sa hagit sa kahimsog sa pangisip sa laing tawo?

• Pamalandongi unsa ang nasabtan ni Jesukristo mahitungod sa atong mga hagit sa kahimsog sa pangisip. (Mahimo ninyong basahon ang Alma 7:11–12.) Unsaon ninyo sa pagpangayo sa Iyang tabang kon kamo nag-antos gikan sa usa ka hagit sa kahimsog sa pangisip o kon ikaw nagsuporta og usa ka tawo nga adunay hagit sa kahimsog sa pangisip?

© 2022 pinaagi sa Intellectual Reserve, Inc. All rights reserved.

Mga Hagit sa Kahimsog sa Pangisip

Human sa igong panahon, dapita ang pipila ka estudyante sa pagpaambit sa unsay ilang nakat-onan sa ilang grupo.

Kita makatabang nga mapugngan ang paghikog ug motabang niadtong kinsa nawad-an og minahal tungod sa paghikog.

Pahinumdomi ang mga estudyante nga ang grabe nga mga hagit sa kahimsog sa pangisip maoy mga hinungdan nga risgo alang sa paghikog. Dapita ang mga estudyante sa pagrebyo sa Mosiah 18:8–9 ug sa pagpaambit kon sa unsa nga paagi nga ang mga pagtulon-an niini nga tudling makagiya kanato sa pagtabang niadtong kinsa nakigbisog sa mga hunahuna sa paghikog. (Samtang mopaambit ang mga estudyante, mahimo silang moila og kamatuoran susama sa mosunod: Isip mga disipulo ni Jesukristo, kita gitawag sa pagtambayayong sa usag usa nga mga alantoson ug magbangotan uban niadtong nagbangotan.)

• Sa unsa nga mga paagi nga inyong nakita nga gibuhat kini nga baroganan? Unsa ang ubang piho nga mga aksiyon ang inyong mahimo isip usa ka disipulo ni Jesukristo sa pagtabang nga mapugngan ang paghikog? (Mahimo nimong ipakita ang video nga “Pagpakgang sa Paghikog” [1:43], nga nag-feature ni Sister Carol F. McConkie, nga gihisgotan diha sa seksiyon 3 sa materyal sa pagpangandam.)

• Sa unsa nga paagi nga ang Langitnong Amahan ug si Jesukristo motabang niadtong kinsa nakigbisog sa mga hunahuna sa paghikog? Unsaon Nila sa pagtabang sa mga indibidwal kinsa nawad-an og minahal tungod sa paghikog?

Hatagi ang mga estudyante og pipila ka minuto sa pagrekord unsay ilang mabuhat sa pagtubag uban ang Kristohanon nga gugma ug kapuangod ngadto sa hagit sa kahimsog sa pangisip sa usa ka tawo o sa mga sirkumstasiya nga naglakip og paghikog.

Alang sa Sunod nga Higayon

Ikonsiderar ang pagpangutana sa mosunod nga mga pangutana sa kataposan sa klase o sa usa ka mensahe niana nga semana. Dapita ang mga estudyante sa pagtuon sa materyal sa pagpangandam alang sa sunod klase uban niini nga mga pangutana diha sa hunahuna.

1. Sa unsa nga paagi nga ang inyong paghinulsol makaapekto sa kaayohan sa inyong pamilya?

2. Unsaon ninyo pagdawat og tabang sa pagpasaylo sa usa ka sakop sa pamilya kinsa nakasilo o nakapasakit kaninyo?