Leksiyon 1 Materyal sa Pagpangandam sa Klase: Pagtuon sa Doktrina sa Mahangtoron nga Pamilya
“Leksiyon 1 Materyal sa Pagpangandam sa Klase: Pagtuon sa Doktrina sa Mahangtoron nga Pamilya,” Materyal sa Magtutudlo sa Ang Mahangtoron nga Pamilya (2022)
“Leksyon 1 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
usa ka malipayong bana ug asawa uban sa ilang gamay nga bata
Leksiyon 1 Materyal sa Pagpangandam sa Klase
Pagtuon sa Doktrina sa Mahangtoron nga Pamilya
Welcome sa Kurso sa Mahangtoron nga Pamilya! Ang mga kamatuoran nga inyong makat-onan sa tibuok niini nga kurso, gitipon uban sa paglihok diha sa mga pag-aghat nga inyong bation, makatabang kaninyo ug sa inyong pamilya nga mas mapaduol ngadto sa Dios ug madawat ang tanang mga panalangin nga Iyang gitinguha alang kaninyo. Kamo usab mahimong mas maayo sa pagtabang sa uban sa paghimo og sama.
Samtang kamo magtuon sa mosunod nga materyal sa pagpangandam alang sa leksiyon 1, hunahunaa ang mga panalangin ug hingpit nga kalipay nga gusto sa Langitnong Amahan nga masinati sa tanan Niyang mga anak ug sa unsa nga paagi kana may kalabotan ngadto sa mga pamilya.
Pahinumdom: Ang materyal sa pagpangandam mohatag og pundasyon alang sa kasinatian sa inyong klase. Ang pagtuon sa matag leksiyon sa materyal sa pagpangandam sa wala pa ang klase motabang kaninyo nga makabaton og mas lig-on, mas makahuloganon nga kasinatian sa pagkat-on sa matag panahon nga kamo motambong sa klase.
Seksiyon 1
Unsa ang kalainan nga mahimo sa pagsalig sa hingpit nga gugma ug kaalam sa Langitnong Amahan ug ni Jesukristo diha sa akong personal ug pamilya nga kinabuhi?
Gilibotan kita sa nagkalain-laing mga opinyon ug impormasyon mahitungod sa hilisgotan sa pamilya. Usahay ang katilingbanong gidawat nga panglantaw kabahin sa pamilya hingpit nga supak ngadto sa plano sa Langitnong Amahan. Kon mas daghan kita og nahibaloan ug nasabtan sa Langitnong Amahan ug ni Jesukristo ug sa Ilang kinaiya, mas kita makasalig sa Ilang mga pagtulon-an ug tambag, lakip ang mga butang kabahin sa pamilya. Samtang kita nagbuhat sa mao, makakat-on kita sa pagtan-aw sa mga butang sama sa Ilang pagtan-aw niini––gikan sa mahangturong panglantaw.
Basaha ang 2 Nephi 26:24; Mosiah 4:9; ug ang Isaias 55:8–9, ug pangita sa mga kamatuoran mahitungod sa Langitnong Amahan ug ni Jesukristo nga makatabang kaninyo sa pagsalig Kanila. Hunahunaa ang pagmarka sa unsay inyong makit-an.
Paghunahuna mahitungod kon giunsa sa mga paghulagway sa Langitnong Amahan ug ni Jesukristo niini nga mga tudling sa kasulatan pag-impluwensya kon unsaon ninyo sa pagpili sa pagtan-aw ang tandogon nga mga isyu ug mga pangutana kalabot sa pamilya. Si Elder Richard G. Scott sa Korum sa Napulog Duha ka Apostoles mitudlo:
Imahe
Elder Richard G. Scott
Isip inyong Amahan, ang Iyang katuyoan mao ang inyong mahangturong kalipay, inyong mapadayonong paglambo, ang inyong nagtubo nga kapasidad. Ang Iyang tinguha mao ang pagpakigbahin nganha kaninyo sa tanan nga Siya aduna. (“Obtaining Help from the Lord [Nakakuha og Panabang gikan sa Ginoo],” Ensign, Nob. 1991, 86)
Imahe
icon, pagtuon
Pagtuon agi og Pagpangandam alang sa Klase
Sa usa ka propetikanhong paningkamot sa “pagpahimangno ug pagpasidaan” batok sa mga paglingla sa kalibotan, ang Unang Kapangulohan ug ang Korum sa Napulog Duha ka Apostoles mipagawas og usa ka pamahayag ngadto sa pamilya kaniadtong 1995 (tan-awa sa Gordon B. Hinckley, “Stand Strong against the Wiles of the World,” Ensign, Nob. 1995, 100). Basaha “Ang Pamilya: Usa ka Pamahayag ngadto sa Kalibotan” (ChurchofJesusChrist.org), ug hunahunaa kon unsay gitudlo niini mahitungod sa mga panalangin ug kalipay nga ang Langitnong Amahan nagtinguha alang kaninyo ug sa inyong pamilya. Mahimo ninyong markahan ang mga ebidensya sa Iyang gugma ug mga tinguha alang sa inyong kalipay.
Paghunahuna mahitungod sa pipila ka katilingbanong mga isyu karon o mga pangutana nga gitubag pinaagi sa mga kamatuorang gipahayag diha sa pamahayag sa pamilya. Unsay bili ang anaa sa pagsalig sa kaalam ug mahangturong panglantaw sa Langitnong Amahan ug ni Jesukristo labaw sa kaalam ug panglantaw sa kalibotan kabahin niini nga mga hilisgotan?
Seksiyon 2
Unsaon nato sa pagtukod og luwas nga palibot sa paghisgot og sensitibo nga mga isyu?
Paghunahuna mahitungod sa sitwasyon sa inyong pamilya, mga relasyon, ug mga hagit. Sa unsang paagi ang inyong pamilya lahi gikan sa ubang mga pamilya nga imong nailhan? Ang pipila sa atong lig-on nga mga pagbati may kalabotan diha sa atong mga pamilya. Kon kita maghisgot sa doktrina sa pamilya, kinahanglan gayod nga atong hinumdoman nga ang mga sitwasyon ug mga kasinatian sa ubang mga pamilya mahimong lahi kay sa atong kaugalingon. Ang paghinumdom niini makatabang kanato nga mas mahigugmaon, daling mobati,ug matinahoron sa paagi nga kita naghisgot sa doktrina kalabot sa pamilya. Pinaagi sa pagbuhat niini, kita mas maayo ang pagpangandam alang sa Espiritu Santo sa pagtudlo kanato sa mas hingpit nga paagi mahitungod sa mga pamilya ug sa mga katuyoan sa atong Langitnong Amahan.
Si Jesukristo mao ang atong hingpit nga ehemplo sa pagbaton og putling gugma alang sa mga indibidwal sa tanang mga kahimtang. Basaha ang Moroni 7:45–48. Paghunahuna mahitungod sa mga panahon sa inyong kinabuhi sa dihang ang Manluluwas nagpakita kaninyo og putling gugma, ug hunahunaa ang kalainan nga gihimo niini alang kaninyo.
Isip mga disipulo ni Jesukristo, kita naningkamot nga mahimong mas mahisama Kaniya sa tanan natong isulti ug buhaton. Kini nagkinahanglan og praktis sa pagpaminaw ngadto sa uban ug sa pagkat-on ug pakigbahin og kamatuoran sa mahigugmaon, daling mobati, ug matinahorong mga paagi. Kon ang atong panag-istoryahay magkaduol og tandogon nga mga hilisgotan kalabot ngadto sa pamilya uban ang putling gugma, kita nagpakisama sa Manluluwas. Kon kita andam, ang Espiritu Santo makatabang kanato nga mahibalo sa atong bahin sa pagtukod ug sa pagpalambo og usa ka mahigugmaon, matinahoron, ug kahimtang sa mga estudyante nga lain-lain og abilidad sa pagdawat og samang pagtulun-an sa pagkat-on og kamatuoran.
Si Elder Neil L. Andersen sa Korum sa Napulog Duha ka Apostoles mitudlo:
Imahe
Elder Neil L. Andersen
Ang akong pangamuyo karon alang sa gat[o]san ka libo ka mga bata, mga kabatan-onan, ug mga young adult kinsa wala magagikan niini, tungod sa kakulang sa mas maayong pulong, sa “picture-perfect” [hingpit nga larawan] nga mga pamilya. Namulong ko dili lamang sa kabatan-onan nga nakasinati og kamatayon, diborsyo, o nagkakunhod nga pagtuo sa ilang mga ginikanan apan sa liboan usab ka mga batan-ong lalaki ug babaye sa tibuok kalib[o]tan nga mihang[o]p sa ebanghelyo nga walay inahan o amahan nga mosimba kuyog nila.
Kining batan-ong mga Santos sa Ulahing mga Adlaw misulod sa Simbahan uban sa dakong pagtuo. Nanghina[o]t sila nga makamugna og ideyal nga pamilya sa ilang kinabuhi sa umaab[o]t nga adlaw. Sa kadugayan, mahimo silang importante nga bahin sa atong misyonaryo nga pwersa, ang atong matar[o]ng nga mga young adult, ug kadtong magminyo sa templo aron sugdan ang kaugalingon nilang mga pamilya.
Magpadayon kita sa pagtudlo sa sumbanan sa Ginoo alang sa mga pamilya, apan karon nga adunay minilyon nga mga miyembro ug ang panaglahi … , kinahanglan pa kitang mas manggihunahunaon ug daling mobati. …
… Hunahunaon nato sila, abi-abihon sila, hang[o]pon sila, ug buhaton ang tanan kutob sa atong mahimo aron sa paglig-on sa ilang gugma alang sa atong Manluluwas. (“Bisan Kinsa nga Magadawat Kanila, Magadawat Kanako,” Liahona,, Mayo 2016, 49–50, 52)
Imahe
icon, irekord
Irekord ang Imong mga Hunahuna
Pamalandonga ang inyong kaugalingon nga mga kasinatian ug ang kalainan nga kamo makahimo pinaagi sa pagsugod og mga panaghisgot sa talandogon nga mga hilisgotan mahitungod sa pamilya uban ang putling gugma. Irekord kon unsa ang inyong mahimo sa pagtabang sa uban nga mobati nga gihigugma ug gitahod samtang naghisgot sa ingon nga mga hilisgotan gikan sa panglantaw sa mahangturong kamatuoran.
