Leksiyon 25 Materyal sa Magtutudlo

Paghinulsol ug Kapasayloan diha sa Kinabuhi sa Pamilya

Kita makadapit sa gahom sa Ginoo sa pag-ayo ug paglig-on sa atong mga relasyon sa pamilya pinaagi sa paggamit sa mga baroganan sa paghinulsol ug pagpasaylo. Kini nga leksiyon makatabang sa mga estudyante nga makasabot sa unsa nga paagi nga ang ilang paghinulsol makapalambo sa mga relasyon sa pamilya. Ang mga estudyante mokonsiderar usab unsaon nila sa pagkuha sa tabang sa Ginoo sa pagpasaylo sa mga sakop sa pamilya kinsa nakasilo ug nakapasakit kanila.

Pahinumdom: Usahay ang pagpasakit nga gihimo sa mga sakop sa pamilya mao ang pag-abuso. Ang pagkaayo gikan sa abuso pagahisgotan sa sunod nga leksiyon.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Tutoki unsay kinahanglan nga masinati sa usa ka estudyante aron mahimong mas nakabig pag-ayo. Makakat-on ang mga estudyante samtang aktibo sila nga moapil sa proseso sa pagkat-on ug sa pagsunod sa ebanghelyo. Samtang ikaw nagtudlo, hatagi og gibug-aton ang unsay kinahanglan gayod masinati ug mabuhat sa imong mga estudyante aron sa pagdapit og personal nga pagpadayag ug pagpapalig-on sa pagkakabig. Samtang nagdugang sila sa ilang kahibalo sa ebanghelyo ug nagkinabuhi sumala sa unsay ilang nahibaloan, ang mga estudyante mas makabig ngadto sa Manluluwas ug sa Iyang ebanghelyo.

Ang atong personal nga paghinulsol makapalambo og mga relasyon sa pamilya.

Ipakita ang mosunod nga mga pamahayag diha sa pisara (ikonsiderar ang pag-usab niini nga mga pamahayag aron mas matubag ang mga panginahanglan sa imong mga estudyante):

1. Importante nga motutok sa pagsiguro nga ang ubang mga sakop sa pamilya maghinulsol kanunay.

2. Kon ang usa ka sakop sa pamilya mao ang mas nasayop kay kanato, kita kinahanglan nga maghulat niana nga sakop sa pamilya nga mangayo og pasaylo ug mag-usab sa dili pa kita mohimo sa ingon.

3. Sayon kanunay ang paghinulsol sa mga paagi nga kita makapasakit sa mga sakop sa pamilya.

4. Ok ra nga abusohan ang mga tawo sa atong pamilya kon sila mosulay sa pagpalagot kanato.

Sugdi ang leksiyon pinaagi sa pagdapit sa mga estudyante sa pagbasa og kusog sa mga pamahayag diha sa pisara. Hangyoa ang mga estudyante nga ikonsiderar sa hilom kon ang matag pamahayag tinuod o sayop (ayaw hangyoa ang mga estudyante sa pagpaambit sa ilang mga tubag). Human sa igong panahon, ipasabot nga ang tanan nga mga pamahayag sayop.

• Unsaon nimo sa pagkorihir ang matag usa niini nga mga pamahayag aron mahimo silang tinuod?

• Ngano nga mahagiton ang paghinulsol kon kita makapasakit sa mga sakop sa pamilya? Sa unsa nga paagi nga ang Ginoo makatabang kanato sa atong mga paningkamot sa paghinuslsol?

Mahimo nimong ipakita ang usa sa mga paghulagway sa sambingay sa nawala nga anak gikan sa materyal sa pagpangandam ug mohangyo sa usa ka estudyante sa pag-summarize sa sambingay. Ikonsiderar ang pagrebyo sa Lucas 15:17–24 ug mangutana sa mga estudyante unsa nga mga baroganan ang ilang makita gikan niini nga sambingay mahitungod sa paghinulsol diha sa kinabuhi sa pamilya.

• Unsay atong makat-onan mahitungod sa Langitnong Amahan gikan sa amahan niini nga sambingay? Sa unsang paagi kini nga kahibalo makaimpluwensiya sa paagi sa atong pagtan-aw sa paghinulsol?

• Kanus-a ikaw nakakita og kaminyoon o pamilya nga napanalanginan tungod sa paghinulsol sa usa sa mga sakop niini? (Pahinumdomi ang mga estudyante nga dili mopakigbahin og bisan unsa nga personal o pribado ra kaayo.)

Ang Ginoo makatabang nato sa pagpasaylo sa mga sakop sa pamilya kinsa nakasilo o nakapasakit nato.

Dapita ang mga estudyante sa paghunahuna kanus-a sila nasilo o napasakitan sa usa ka sakop sa pamilya. Mahimo usab nga hangyoon nimo sila sa pagpamalandong kon unsa ka maayo nila napasaylo kana nga tawo.

• Ngano nga usahay lisod ang pagpasaylo sa mga sakop sa pamilya kinsa nakahimo og sayop kanato?

Rebyoha pagdungan ang Doktrina ug mga Pakigsaad 64:8–11, ug pangutan-a ang klase unsa nga mga kamatuoran nga ilang nakat-onan gikan sa mga pagtulon-an sa Ginoo mahitungod sa pagpasaylo. Sa mga kamatuoran nga nakita sa mga estudyante tingali sama sa mosunod: Ang Ginoo nagkinahanglan nato nga mopasaylo sa tanang mga tawo.

Mahimo nimong dapiton ang mga estudyante sa pagpili og pipila ka parapo o pamahayag gikan sa mga lider sa Simbahan diha sa seksiyon 2 sa materyal sa pagpangandam sa lakbit nga pagrebyo. Dayon ipangutana:

• Sa unsa nga paagi nga kini nga mga pagtulon-an makatabang sa usa ka tawo nga mopasaylo sa usa ka sakop sa pamilya kinsa nakahimo og sayop kaniya?

Isip kabahin sa panaghisgotan, ikonsiderar ang pagpakita sa pamahayag ni Elder Massimo De Feo gikan sa seksiyon 2 sa materyal sa pagpangandam ug pagbasa niini uban sa mga estudyante. Hatagi ang mga estudyante og pipila ka minuto sa pagpamalandong unsa ang nahimo sa Manluluwas alang kanila.

• Sa unsa nga paagi nga ang paghinumdom sa sakripisyo sa Manluluwas makatabang nato nga mopasaylo sa uban?

Ikonsiderar ang paggamit sa istorya ni Jacob ug Esau aron matabangan ang mga estudyante nga molawom ang ilang pagsabot sa pagpasaylo diha sa kinabuhi sa pamilya, o paghimo og imong kaugalingon nga senaryo nga makatabang sa mga estudyante nga mokonsiderar sa mga pagbati, mga kabalaka, ug mga pagpili nga may kalabotan sa pagpakig-uli sa usa ka sakop sa pamilya kinsa atong nasiloan o kinsa nakapasilo nato.

Kon posible, ipakita ang mosunod nga imahe:

Hangyoa ang mga estudyante sa pagpasabot unsay ilang nahibaloan mahitungod niini nga asoy ni Jacob ug Esau ug unsay nakaapekto sa relasyon tali niini nga mga igsoon. Kon gikinahanglan, mahimo nimong dugangan ang pagsabot sa mga estudyante pinaagi sa pagpaambit sa pipila sa mosunod nga mga detalye:

Si Isaac ug si Rebeca adunay kaluha nga mga anak, si Esau ug Jacob. Si Esau mao ang kinamagulangan ug busa anaa sa posisyon nga mao ang anak sa katungod sa pagkatawo. Nagpasabot kini nga siya makapanunod sa yuta sa iyang amahan, “duha ka bahin sa mga katigayunan sa iyang amahan,” ug ang awtoridad sa pagdumala isip espirituwal nga lider sa pamilya human sa kamatayon sa iyang amahan (Ang Giya ngadto sa mga Kasulatan, “Unang Natawo”; tan-awa usab sa Ang Giya ngadto sa mga Kasulatan, “Katungod sa Pagkatawo”).

Si Esau, hinoon, mibaligya sa katungod sa pagkatawo ngadto ni Jacob alang sa usa ka linugaw (usa ka panaksan sa sabaw o lugaw). Dayon, sa dihang si Isaac nagtinguha sa paghatag sa panalangin sa katungod sa pagkatawo, si Esau misulay sa pagdawat niini bisan og wala na niya ang katungod. Si Rebeka miinterbenir, ug si Jacob nakadawat sa panalangin. Isip resulta, si Esau nasilag ni Jacob ug nanumpa sa pagpatay kaniya. Si Rebeka ug Isaac mipadala ni Jacob nga mopuyo uban sa iyang uyoan nga si Laban. Si Jacob nagminyo ug nakabaton og mga anak. Human sa 20 ka tuig, ang Ginoo misugo ni Jacob nga mobalik ngadto sa iyang yutang natawhan. Si Jacob nahadlok unsay buhaton ni Esau kaniya ug sa iyang pamilya sa dihang nakahibalo siya nga si Esau moabot uban sa 400 ka lalaki aron mosugat kaniya. Gisugo ni Jacob ang iyang mga sulugoon sa pagbahin sa dakong pundok sa iyang kahayopan ngadto sa pipila ka grupo ug sa paghalad niini ngadto ni Esau sa iyang pag-abot. (Tan-awa sa Genesis 25–32.)

Ikonsiderar ang pagpares-pares sa klase o ngadto sa gagmay nga mga grupo. Dapita ang mga estudyante sa pagbasa og hilom sa Genesis 33:1–11, mangita unsay nahitabo sa dihang si Jacob ug Esau nagkita. Hangyoa ang matag estudyante sa pagpili sa panglantaw bisan hain nila ni Jacob o Esau ug sa paghanduraw nga makasinati sa maong mga hitabo nga narekord niini nga mga bersikulo gikan niana nga panglantaw.

Human sa igong panahon, hangyoa ang mga estudyante sa paghisgot sa mosunod nga mga pangutana uban sa ilang kauban o grupo, gamit unsay ilang nakat-onan samtang naghunahuna niini nga panagkita gikan sa panglantaw bisan hain nila ni Jacob o Esau:

• Unsa kaha nga mga hunahuna o mga pagbati ang moabot nimo samtang ikaw moduol ug makigsulti sa imong igsoon?

• Unsay imong gibuhat aron makig-uli sa imong igsoon? Unsa nga baroganan ang imong makat-onan gikan niini?

Kon makompleto na sa mga estudyante kini nga kalihokan, ikonsiderar ang paghisgot sa pipila sa mosunod nga mga pangutana isip usa ka klase:

• Unsa nga mga baroganan ang inyong nakita sa mga ehemplo nila ni Jacob ug Esau? Sa unsa nga mga paagi nga inyong nakita ang kamot sa Ginoo niini nga asoy?

• Giunsa sa Dios pagtabang nimo nga mohimo og lakang sa paghusay sa usa ka panagbangi o sa pagpasaylo sa usa ka tawo sa inyong pamilya? (Pahinumdomi ang mga estudyante nga dili mopaambit og bisan unsa nga personal ra kaayo.)

Dapita ang mga estudyante sa pagkonsiderar sa hilom kon sa unsa nga paagi nga ang Langitnong Amahan gusto nga sila mogamit sa mga baroganan sa paghinulsol o pagpasaylo sa mga relasyon sa ilang pamilya niining higayona. Awhaga sila nga buhaton ang bisan unsa nga mga pag-aghat nga ilang madawat. Mahimo nimong hatagan ang mga estudyante og panahon sa pagpamatuod sa bili sa paghinulsol ug pagpasaylo diha sa pamilya.

Alang sa Sunod nga Higayon

Ipasabot nga ang pipila ka tawo, subo lang gayod, mopili sa pag-abuso sa uban. Awhaga ang mga estudyante sa pagtuon pag-ayo sa materyal sa pagpangandam alang sa sunod nga leksiyon. Dapita sila sa pagkonsiderar unsaon, uban sa tabang sa Manluluwas, nga sila makaayo o makatabang sa uban nga maayo gikan sa mga epekto sa pag-abuso.