Leksiyon 1 Materyal sa Magtutudlo

Pagtuon sa Doktrina sa Mahangtoron nga Pamilya

Ang doktrina kalabot sa pamilya may kalabotan kanatong tanan. Niini nga leksiyon, ang mga estudyante pagadapiton sa pagtimbang-timbang sa ilang pagsalig sa kaalam sa Langitnong Amahan ug sa Iyang plano alang sa mga pamilya. Hunahunaon usab sa mga estudyante kon unsa ang ilang mabuhat sa pagtabang og tukod og usa ka kahimtang sa Kristohanong gugma, pagkadali nga mobati, ug pagtahod kon maghisgot sa doktrina sa pamilya.

Pahinumdom: Kon posible, kontaka ang mga estudyante kinsa nagparehistro alang niini nga kurso sa wala pa ang ilang unang adlaw sa klase, ug dapita sila sa pagtuon sa materyal sa pagpangandam sa klase alang niining unang leksiyon. Siguroha nga ang tanang estudyante adunay kopya sa materyal sa pagpangandam sa pagsugod sa klase. Sa panahon sa panaghisgot sa imong klase, gamita ang materyal sa pagpangandam aron ang mga estudyante makakita kon unsaon niini pagtabang kanila sa pag-andam alang sa pagpalambo sa ilang kasinatian sa pagkat-on. May kagawasan ka sa paggahin og 5 ngadto sa 10 ka minutos diha sa sinugdanan niini nga leksiyon nga mag-ila-ila sa usag usa ug sa pag-abi-abi sa mga estudyante ngadto sa kurso.

Mga Sugyot alang sa Pagtudlo

Makasalig kita sa hingpit nga gugma ug kaalam sa Langitnong Amahan ug ni Jesukristo.

Isip pasiuna ngadto niini nga kurso, mahimo nimong pakit-on ang mga estudyante sa talaan sa mga sulod o sa syllabus alang sa unang bahin sa kurso. Aron mahimong mas pamilyar sa mga panginahanglan sa imong mga estudyante, dapita sila sa pagsulat og mubo, dili magpaila nga mubo nga sulat nganha kanimo mahitungod kon hain sa mga hilisgotan sila labing interesado o gustong mas makasabot. Mahimo usab nimong dapiton sila sa pagsulat og bisan unsa nga pangutana nga sila naglaom kini nga kurso motabang sa pagtubag alang kanila. Kolektaha ang ilang mga tubag ug hunahunaa kini samtang ikaw mag-andam sa umaabot nga mga leksiyon.

Pagpalambo sa Atong Pagtudlo ug Pagkat-on

Diskobreha ang mga panginahanglan ug mga interes sa mga estudyante. Ang mga estudyante mobati og mas dako nga tinguha sa pagkat-on kon bation nila nga ang mga leksiyon gidesinyo sa pagtubag sa ilang mga panginahanglan ug mga interes. Paghatag og mga oportunidad alang sa mga estudyante sa pagsulti sa ilang mga interes ug mga pangutana mahitungod sa pamilya. Pinasubay sa mga tubag sa mga estudyante, sunda ang Espiritu aron mahibalo kon kanus-a hatagan og gibug-aton ug paghisgot ang ilang mga interes ug mga pangutana sa panahon sa kurso.

Hunahunaa ang pagpangutana sa mosunod:

• Kinsa ang pipila sa mga tawo nga inyong gisaligan, ug ngano?

• Unsa ang inyong isalig niini nga mga tawhana?

Han-aya ang mga estudyante ngadto sa grupo nga tinagutlo. Hatagi ang matag grupo og kopya sa mosunod nga handout, ug hangyoa sila sa pagsunod sa mga panudlo.

Pagsalig sa Langitnong Amahan ug ni Jesukristo

Materyal sa Magtutudlo sa Ang Mahangtoron nga Pamilya—Leksiyon 1

Dapita ang matag sakop sa grupo sa pagbasa sa mosunod nga mga tudling, mangita sa mga kamatuoran mahitungod sa Langitnong Amahan ug ni Jesukristo nga makatabang kanato sa pagsalig Kanila: 2 Nephi 26:24; Mosiah 4:9; ug Isaias 55:8–9. Dayon hisgoti ang mosunod nga mga pangutana:

• Unsa ang atong makat-onan mahitungod sa Langitnong Amahan ug ni Jesukristo gikan niini nga mga tudling? Giunsa sa mga kamatuoran nga inyong nadiskobrehan sa pag-impluwensya sa inyong tinguha sa pagsalig Kanila?

• Kanus-a ninyo nasaksihan o nasinati ang bili sa pagsalig sa Langitnong Amahan ug ni Jesukristo?

© 2022 pinaagi sa Intellectual Reserve, Inc. All rights reserved.

Pagsalig sa Langitnong Amahan ug ni Jesukristo

Ipasabot nga usa sa labing mahinungdanong ebidensya sa gugma ug kaalam sa Langitnong Amahan ug ni Jesukristo mao ang doktrina sa mahangtoron nga pamilya. Ang atong pagsalig diha Kanila ug diha sa plano sa Amahan makatabang kanato sa paglawig sa nagkalain-laing mga panan-aw sa mga butang kalabot sa pamilya.

Hatagi ang mga estudyante og usa ka kopya sa “Ang Pamilya: Usa ka Pamahayag ngadto sa Kalib[o]tan” (ChurchofJesusChrist.org), o hangyoa sila sa pagtan-aw niini sa digital nga paagi. Dapita ang mga estudyante sa pagpili og pipila ka mga parapo nga basahon ug sa pagmarka og mga hugpong sa mga pulong nga naghulagway sa mga panalangin ug hingpit nga kalipay nga gitinguha sa Langitnong Amahan alang kanila ug sa ilang mga pamilya. Human sa igong panahon, dapita ang mga estudyante sa pagpakigbahin unsay ilang gimarkahan ug ngano.

• Sa unsa nga paagi nga ang inyong mga tinguha alang sa inyong mga pamilya nagsubay sa mga tinguha sa Langitnong Amahan alang sa inyong pamilya?

• Unsa ang bili nga anaa sa pagsalig sa kaalam ug sa mahangtoron nga panglantaw sa Langitnong Amahan ug ni Jesukristo nga labaw sa kaalam ug panglantaw sa kalibotan?

Pagpamatuod o dapita ang mga estudyante sa pagpamatuod sa kaalam ug mga tinguha sa Langitnong Amahan ug ni Jesukristo alang sa atong mga pamilya karon ug sa umaabot.

Kita makahimo og kahimtang sa pagkat-on nga adunay gugma ug pagtahod.

Pagpakita og litrato sa inyong pamilya. Ipakigbahin ang pipila sa mga butang nga inyong nahigugmaan mahitungod sa inyong pamilya ug ang pipila sa mga paagi nga ang sitwasyon sa inyong pamilya talagsaon.

Dapita ang usa ka estudyante sa pagbasa og kusog sa pamahayag ni Elder Neil. L. Andersen diha sa seksiyon 2 sa materyal sa pagpangandam.

• Unsa ang labing importante alang kaninyo sa gitudlo ni Elder Andersen? (Mahimo nimong tabangan ang mga estudyante sa pag-ila sa mosunod nga mga kamatuoran: tungod kay ang tanang mga pamilya managlahi, kinahanglan atong hisgotan ang sumbanan sa Ginoo alang sa mga pamilya sa mahunahunaon ug dali nga mobati nga paagi.)

Mahimo kang modapit og mga estudyante sa pagpakigbahin kon unsay atong makat-onan gikan sa ehemplo sa Manluluwas sa gugma, dali nga mobati, ug kalooy alang sa uban kinsa nagsinati og mahagitong mga sitwasyon sa personal o sa pamilya. (Ang mga ehemplo makaplagan diha sa “Gusto pa og Dugang?” nga seksiyon sa materyal sa pagpangandam.)

Hunahunaa ang paghatag sa mga estudyante og pipila ka mga minuto sa pagrekord sa ilang mga hunahuna sa mosunod nga pangutana:

• Unsa ang akong mabuhat sa pagtabang sa uban nga mobati og paghigugma ug pagtahod samtang naghisgot sa pamilya ug ubang talandogon nga mga hilisgotan? (Kon ang mga estudyante nagtuon sa seksiyon 2 sa materyal sa pagpangandam, tingali sila nakarekord na sa pipila sa mga hunahuna mahitungod niini nga pangutana. Makahatag ka kanila og panahon sa pagrebyo kon unsay ilang gisulat.)

Dapita ang pipila ka mga estudyante nga mopakigbahin og pipila sa mga hunahuna nga ilang girekord.

Sa imong kaugalingong mga pulong, mahimo nimong ipasabot nga sa tibuok niini nga kurso ang mga estudyante mohisgot og daghang mga kamatuoran nga nagkinahanglan sa panabang sa Espiritu Santo aron makasabot. Tungod sa pagkatalagsaon sa personal ug pamilya nga mga kahimtang, ang mga estudyante magkinahanglan og personal nga pagpadayag sa pagsabot kon unsaon paggamit sa mga pagtulon-an. Tungod kay ang atong labing lig-on nga mga pagbati kalabot sa atong mga pamilya, ang atong kasarang sa pagkat-on gikan sa usag usa ug ang Espiritu nagkinahanglan nga kita adunay kahimtang sa Kristohanong gugma, dali nga mobati, ug pagtahod. Dapita ang mga estudyante sa pagbuhat sa ilang bahin sa pagtampo ngadto sa ingon nga kahimtang.

Mahimo nimong taposon ang klase pinaagi sa pagpakita sa mga estudyante kon unsaon sa pagsulod sa materyal sa pagpangandam. Hangyoa sila sa paghunahuna kon unsaon sa ilang indibidwal nga pagtuon sa materyal sa pagpangandam sa wala pay klase nga makatabang sa tibuok klase sa pagkat-on sa doktrina sa pamilya nga mas lig-on. Dapita sila sa matinud-anong pagpangandam alang sa matag klase.

Alang sa Sunod nga Higayon

Awhaga ang mga estudyante sa ilang pagtuon alang sa sunod nga klase sa pagpangutana kon nganong ang mga lider sa Simbahan sa Ginoo hugot nga nagsunod sa doktrina sa pamilya nga gibutang diha sa pamahayag sa pamilya, bisan og ang nabantog nga mga opinyon tingali supak niini nga doktrina.