Leksiyon 12 Materyal sa Magtutudlo

Pag-amuma sa Relasyon sa Kaminyoon

Ang Ginoo gusto nga motabang kanato sa pagtukod og malipayon, mahangtorong mga kaminyoon. Gamit ang propetikanhong mga tambag ug ehemplo ni Jesukristo, madiskobre sa mga estudyante ang mga paagi nga sila makaamuma sa ilang karon o umaabot nga kaminyoon. Ang mga estudyante pagadapiton usab sa pagtino og mga paagi sa matinud-anong pag-unong ngadto sa ilang kapikas.

Mga Sugyot alang sa Pagtudlo

Makaamuma kita sa atong kaminyoon pinaagi sa pagpuyo sa ebanghelyo ni Jesukristo.

Pagpalambo sa Atong Pagtudlo ug Pagkat-on

Paabota ang mga estudyante nga motuman sa ilang tahas isip mga tigkat-on. “Ang kalidad sa katuyoan anaa sa usa ka klase diin ang mga magtutudlo nagpaabot sa mga estudyante sa pagtuman sa ilang tahas isip mga tigkat-on ug nagtabang kanila sa pagbuhat sa mao ug diin ang mga estudyante gisaligan sa pagtampo sa mahinungdanong mga paagi” (Pagtudlo ug Pagkat-on sa Ebanghelyo: Usa ka Tamdanan nga Basahon alang sa mga Magtutudlo ug mga Lider sa mga Seminary ug mga Institute sa Relihiyon [2012], 15).

Dapita ang usa ka estudyante sa pagbasa og kusog sa pamahayag ni Elder Jeffrey R. Holland sa seksiyon 1 sa materyal sa pagpangandam. Dayon dapita ang pipila ka estudyante sa pagpakigbahin og mga ehemplo sa mga magtiayon nga ilang kaila kinsa adunay malipayong mga kaminyoon.

Han-aya ang mga estudyante ngadto sa ginagmay nga mga grupo, ug pagtudlo og usa ka lider alang sa matag grupo. Hatagi ang matag grupo og kopya sa mosunod nga handout, basaha og dungan ang mga panudlo, ug dayon hatagi ang mga estudyante og igong panahon sa pagkompleto sa kalihokan. (Kon adunay panahon, mahimo gani nimong dapiton ang mga grupo sa pagmugna sa ilang blog post o video atol sa kalihokan ug ipaandam kini nga ipakigbahin sa klase.)

Importanting mga Baroganan sa Pag-amuma og usa ka Malipayon ug Mahangtorong Kaminyoon

Materyal sa Magtutudlo sa Ang Mahangtorong Pamilya—Leksiyon 12

Handurawa nga ang inyong grupo magsulat og usa ka blog post o magmugna og usa ka video nga gitawag og “Importanting mga Baroganan sa Pag-amuma og Malipayon ug Mahangtorong Kaminyoon.” Ang mga baroganan alang sa inyong blog post o video kinahanglan nga kuhaon gikan sa mga seksiyon 1 ug 2 sa materyal sa pagpangandam o gikan sa mga kasulatan. Tungod kay dili ninyo masulti ang tanang importanting mga bahin sa inyong blog post o video, pagdesisyon hain ang lima nga labing importanting mga paagi sa pagkompleto sa mosunod nga baroganan: Ang mga bana ug mga asawa makaamuma og usa ka malipayon ug mahangtorong kaminyoon pinaagi sa …

• Ehemplo:

• Ang mga bana ug mga asawa makaamuma og usa ka malipayon ug mahangtorong kaminyoon pinaagi sa pagsunod sa ehemplo sa Manluluwas sa gugma ug matarong nga sakripisyo (tan-awa sa Mga Taga-Efeso 5:25, 28–31).

Ang mosunod nga mga pangutana makatabang kaninyo sa pagdesisyon hain nga baroganan ang iapil:

• Nganong kinahanglan nga iapil kini nga baroganan sa atong blog post o video? Sa unsang paagi ang pagpuyo niini nga baroganan nagtampo ngadto sa malipayon ug mahangtorong kaminyoon?

• Ang malipayon ba nga mga magtiayon nga atong gikasulti agig pag-andam alang sa klase mihisgot niini nga baroganan? Kon mao, mahitungod sa unsa ang ilang gipakigbahin niini?

© 2022 pinaagi sa Intellectual Reserve, Inc. All rights reserved.

Importanting mga Baroganan sa Pag-amuma og usa ka Malipayon ug Mahangtorong Kaminyoon

Human ang grupo dihay igo nga panahon sa pag-ila ug pagrekord sa lima ka mga baroganan, hangyoa sila sa pagsulat sa ilang nag-unang tulo ka mga baroganan diha sa pisara (o sa pagpakigbahin sa ilang mga blog post o mga video). Human maila ang mga baroganan, dapita ang mga estudyente sa pagpakigbahin unsay ilang nakat-onan gikan niini nga kasinatian. Samtang sila nakigbahin, hunahunaa ang pagpangutana sama sa mosunod sa pagtabang sa mga estudyante sa paghimo og epektibo, matarong nga lihok.

• Kanus-a ninyo nakita kini nga baroganan nga gigamit? Unsay inyong naobserbahan?

• Giunsa sa kinabuhi ug ehemplo sa Manluluwas paglig-on sa inyong pagsabot niini nga baroganan?

• Kon kamo dili minyo, unsa ang pipila ka mga paagi nga kamo makapraktis niini nga baroganan sa pagtabang kaninyo sa pagpangandam alang sa malipayong kaminyoon?

• Kon kamo minyo, unsaon nga ang paggamit niini nga baroganan diha sa inyong kaminyoon mogiya ngadto sa mas dako nga kalipay?

Human ang panahon alang sa makahuloganong paghisgot, dapita ang mga estudyante sa pagrekord og piho nga lihok nga ilang pagahimoon sa pag-andam alang sa usa ka malipayong kaminyoon o sa mas maayo ba nga pag-amuma sa ilang kaminyoon.

Ang mga bana ug mga asawa kinahanglan nga mounong ngadto sa usag usa.

Samtang kaming mga Kaigsoonan nagbiyahe sa tibuok kalibotan, usahay among makit-an ang makaguol nga mga panghitabo. Bag-ohay pa lang sa eroplano, naglingkod ako luyo sa usa ka magtiayon. Kita kaayo ang iyang paghigugma sa iyang bana. Sa iyang paghapuhap sa tangkugo sa iyang bana nakita nako ang iyang singsing sa kasal. Miparayeg siya kaniya nga ang iyang ulo gisandig sa iyang abaga, nagtinguha sa iyang pakig-uban.

Ang nakalahi, ang bana daw wala hatagi sa tinud-anay nga pagtagad ang iyang asawa. Nagtutok siya og maayo sa usa ka elektronik nga dulaan. Sa tibuok biyahe, ang iyang atensyon napunting niadto nga butang. Bisan kausa lang wala gayod siya motan-aw, makigsulti, o wala hatagi og pagtagad ang pamaraeg sa iyang asawa.

Sa iyang walay pakabana buot akong mosinggit nga: “Bukha ang imong mga mata! Wa ka ba kakita? Tan-awa! Gihigugma ka sa imong asawa! Gikinahanglan ka niya!”

Wala na akoy dugang pang nasayran kabahin kanila. Wala ko na sila igkita pa. Tingali nakalitan lang ako pag-ayo. Ug mahimo usab nga, kon kining tawhana nasayod pa sa akong kabalaka kanila, siguro malooy siyang maghunahuna kanako nga dili kamao nga mogamit niadtong makadasig nga dulaan. (“Pag-amuma sa Kaminyoon,” 36)

• Unsay problema mahitungod sa kinaiya sa bana niini nga sitwasyon?

• Unsa nga mga butang ang makababag sa magtiayon nga magkighiusa sa usag usa ug mag-amuma sa ilang kaminyoon?

Dapita ang usa ka estudyante sa pagbasa og kusog sa Doktrina ug mga Pakigsaad 42:22. Hatagi og gibug-aton nga ang mga bana ug mga asawa kinahanglang maghigugmaay sa tibuok nilang kasingkasing ug mag-inunongay lamang ngadto sa usag usa. Hunahunaa ang pagdapit sa mga estudyante sa pagtubag og usa o daghan pa sa mosunod nga mga pangutana sa pagtabang kanila sa paglig-on sa ilang pagsabot niini nga baroganan.

• Unsa ang ipasabot sa pag-unong ngadto sa imong kapikas ug “wala nay lain”? (Doktrina ug mga Pakigsaad 42:22). (Mahimo nimong rebyohon ang pamahayag ni Presidente Spencer W. Kimball sa seksiyon 3 sa materyal sa pagpangandam.) Ngano nga ang pag-unong usa ka gamhanan nga pahayag sa gugma?

• Unsa ang lain-laing mga paagi nga ang pagkamatinud-anon sa kaminyoon (pagkamatinud-anon ngadto sa inyong kapikas) mahagit? Unsaon sa mga magtiayon pagpanalipod ang ilang mga kaugalingon batok sa bisan unsa nga matang sa pagluib sa kaminyoon? (Hunahunaa ang pagdapit sa mga estudyante sa pagrebyo sa mga pamahayag ni Elder L. Whitney Clayton ug Presidente Nelson diha sa seksiyon 3 sa materyal sa pagpangandam.)

• Unsaon sa minyo nga magtiayon pagbalanse ug pagmugna alang sa ilang personal nga mga interes samtang sa hustong paagi nag-amuma ug nagpalambo og hingpit nga pagkamaunongon ngadto sa ilang kaminyoon?

Hatagi ang mga estudyante og panahon sa pagrekord sa ilang mga tubag ngadto sa mosunod nga pangutana, nga sila gidapit sa pagpamalandong sa seksiyon 3 sa materyal sa pagpangandam:

• Unsang mga pagpahiangay ang inyong gikinahanglan sa paghimo sa karon nga mas maandam sa pag-unong ngadto sa inyong umaabot nga kapikas o sa mas hingpit nga paagi mounong ngadto sa inyong kapikas kon kamo minyo na?

Taposa ang leksiyon pinaagi sa pagpamatuod sa tinguha ug gahom sa Ginoo sa pagsuporta kanato sa pagtukod og malipayon, mahangtorong mga kaminyoon samtang kita naghatag sa atong labing maayo nga paningkamot.

Alang sa Sunod nga Higayon

Dapita ang mga estudyante sa mainampoong pagtuon sa materyal sa pagpangandam alang sa sunod nga leksiyon, diin mahitungod sa matam-is ug sagradong gasa sa sekswal nga kasuod. Awhaga ang mga estudyante sa pag-anha sa klase nga andam sa pagsulti sa madayganon ug matinahorong paagi mahitungod sa gasa ug unsaon sa pagpanalipod niini.