Leksiyon 8 Materyal sa Magtutudlo

Pagtinguha sa Pagsabot sa Pagkaibog sa Managsama og Sekso ug sa Paghigugma sa Atong LGBT nga mga Kaigsoonan

Isip mga disipulo ni Jesukristo, kita gidapit nga “mag-una kabahin sa pagpadayag og gugma, kalooy, ug pagtabang” niadtong kinsa nakasinati og pagkaibog sa managsama og sekso o nagpaila isip gay, lesbian, o bisexual (Quentin L. Cook, “Let Us Be at the Forefront” [video], ChurchofJesusChrist.org). Niini nga leksiyon, ang mga estudynate adunay oportunidad sa pag-ila, paghisgot, ug paggamit sa mga kamatuoran sa ebanghelyo nga makatabang nila nga motubag uban sa gugma, paghilakip, ug pagtahod niadtong kinsa nakasinati og pagkaibog sa managsama og sekso o nagpaila nga LGBT.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pagtudlo uban ang pagsabot ug kapuangod. Samtang mag-andam ka alang sa klase, paggahin og panahon sa pagpamalandong sa imong pagsabot sa pagkaibog sa managsama og sekso ug sa imong kinaiya ngadto niadtong kinsa nagpaila nga gay, lesbian, o bisexual. Unsaon nimo sa pagtabang ang mga estudyante nga makasinati og mga pagbati og gugma, pagkahilakip, ug pagtahod alang sa tanang mga anak sa Dios?

Si Jesukristo misugo sa Iyang mga disipulo sa paghigugmaay sa usag usa sama sa Iyang paghigugma kanato.

Dapita ang mga estudyante sa paghunahuna nga ang usa ka young adult nga ginganlan og Jean mitambong niini nga institute sa unang higayon. Sa dihang si Jean nakaamgo nga ang hilisgotan sa pagkaibog sa managsama og sekso hisgotan sa klase karon, diha-diha nabalaka siya ug gusto nga mobiya, tungod kay nailhan siya nga lesbian. Hisgoti ngano nga si Jean mibati og kabalaka ug unsay mahimo sa mga sakop sa klase sa pagtabang kaniya ug sa uban nga mobati nga luwas nga maghisgot niini.

Dapita ang mga estudyante sa pagbasa sa Mateo 22:37–39 ug Juan 13:34–35, mangita sa importansya nga gibutang sa Langitnong Amahan ug ni Jesukristo sa paghigugma sa uban. Isulat ang mosunod nga kamatuoran diha sa pisara: Kita gisugo nga maghigugmaay sa usag usa sama sa paghigugma ni Jesukristo kanato.

• Ngano nga importante alang sa mga disipulo ni Jesukristo sa paghigugma sa uban sama sa Iyang paghigugma?

• Sa unsa nga mga paagi nga gipakita ni Jesukristo ang hingpit nga gugma atol sa Iyang mortal nga pangalagad? (Isip kabahin sa panaghisgotan, pahinumdomi ang mga estudyante nga ang paghigugma sa uban wala magpasabot nga kita kinahanglang mouyon o mosuporta sa mga kinaiya nga supak sa mga sugo sa Dios. Ang Manluluwas mahigugmaong mitudlo sa doktrina sa Iyang Amahan uban ang kaisog ug kaklaro.)

• Sa unsang paagi nga ang ehemplo sa Manluluwas sa gugma makagiya nato atol sa atong panaghisgotan mahitungod sa pagkaibog sa managsama og sekso?

Kita makatubag niadtong kinsa nakasinati og pagkaibog sa managsama og sekso uban sa pagkamabination, paghilakip, ug pagtahod.

Bahina ang klase ngadto sa gagmay nga mga grupo. Ipasabot nga sa pipila ka gutlo ang matag grupo maghisgot og usa ka senaryo nga naglakip sa usa ka tawo kinsa nakasinati og pagkaibog sa managsama og sekso. Itudlo nga kini nga senaryo susama sa tinuod nga mga kasinatian sa kinabuhi sa pipila ka miyembro sa Simbahan. Aron matabangan ang mga estudyante nga magbase sa ilang mga panaghisgotan diha sa mga baroganan sa ebanghelyo, mahimo nimong dapiton ang matag sakop sa grupo sa pagrebyo pag-una sa usa sa mga seksiyon diha sa materyal sa pagpangandam.

Human ang mga estudyante nakagahin og panahon sa pagrebyo sa ilang mga seksiyon, hatagi ang matag estudyante og kopya sa handout nga makita sa kataposan niini nga leksiyon. Sugoa ang mga estudyante sa pagbasa sa sitwasyon sa hilom nga paagi ug dayon maghisgot sa mga pangutana nga misunod isip usa ka grupo.

Human ang mga estudyante adunay daghan nga panahon sa paghisgot sa senaryo ug sa mga pangutana, dapita ang pipila kanila sa pagpaambit unsay ilang nakat-onan o gibati atol sa ilang panaghisgot. Samtang ang mga estudyante mopaambit sa ilang mga hunahuna, ikonsiderar ang pagpangutana og follow-up nga mga pangutana nga makatabang nila nga mapalawman ang ilang pagsabot niini nga hilisgotan. Ania ang pipila ka ehemplo sa mga paagi sa pagbuhat og follow-up nga mga pangutana:

• Sa unsa nga paagi kana nga panabot/kamatuoran/baroganan nakaimpluwensya …

• Kanus-a ikaw mibati/nakakita/nakasinati …

• Unsa ang ehemplo sa …

• Unsaon nimo sa paglihok inubanan sa hugot nga pagtuo …

Human sa panaghisgotan, pangutan-a ang mga estudyante kon sila aduna bay mga pangutana o mga kabalaka mahitungod sa pagkaibog sa managsama og sekso nga wala pa matubag.

Aron matabangan ang mga estudyante nga magamit kon unsay ilang nakat-onan, ikonsiderar ang pagpakita sa mosunod nga mga pangutana ug pagdapit sa mga estudyante sa pagpili og usa o daghan nga importante kanila. Awhaga ang mga estudyante sa pagpamalandong sa ilang pangutana (o mga pangutana) ug sa pagrekord sa bisan unsa nga mga impresyon nga ilang gibati.

• Unsay akong kinahanglan nga usbon mahitungod sa paagi nga ako maghunahuna ug molihok aron nga ako makatagad sa tanang tawo, lakip niadtong kinsa makasinati og pagkaibog sa managsama og sekso, uban sa mas dako nga gugma, paghilakip, ug pagtahod? Sa unsa nga paagi ako makasalig sa Manluluwas samtang ako mohimo niini nga mga kausaban?

• Isip usa ka tawo kinsa nakasinati og pagkaibog sa managsama og sekso, sa unsa nga paagi nga ang pagtutok sa Manluluwas ug sa Iyang ebanghelyo makatabang nako nga magpuyo uban ang mas dako nga paglaom ug kalipay? Kon ako wala makapaambit sa akong kasinatian ni bisan kinsa, kinsa ang akong maduolan alang sa suporta? (Pahinumdom: Kon ikaw mohukom sa paghisgot sa imong mga pagbati sa pagkaibog sa managsama og sekso, sa mainampoong paagi ikonsiderar kinsa ang sultihan ug unsaon sa pagpaambit niini nga aspeto sa imong mortal nga kasinatian)

Ang Istorya ni Jackson

Materyal sa Magtutudlo sa Ang Mahangtoron nga Pamilya—Leksiyon 8

Si Jackson nagdako sa usa ka pamilya kinsa matinud-anon nga mga miyembro sa Ang Simbahan ni Jesukristo sa mga Santos sa Ulahing mga Adlaw. Siya adunay mahigugmaong mga ginikanan ug suod kaayo siya sa iyang igsoong babaye nga si Selena.

Si Jackson nahigugma sa ebanghelyo ug adunay pagpamatuod ni Jesukristo ug sa Pagpahiuli. Nailhan siya sa iyang malipayon ug alegre nga personalidad. Karong bag-o, hinoon, ang iyang pagkamalipayon gipulihan sa kasubo, ug kanunay na siyang mag-inusara. Si Jackson adunay sekreto ug wala masayod unsay buhaton niini.

Sukad sa iyang nahinumdoman, si Jackson mas naibog sa mga lalaki kay sa mga babaye. Sulod sa daghan nga mga tuig naningkamot siya sa pagbaliwala niini nga mga pagbati o nagpakaaron-ingnon nga wala kini diha. Tungod kay kini nga hilisgotan wala gayod mahisgoti sa iyang panimalay, gibati niya nga gidili kini nga panagsultihanay. Usahay ang iyang mga higala mihimo og dili maayong mga komentaryo mahitungod sa gay nga mga tawo. Ang tanan niyang nahinumdoman gikan sa mga magtutudlo ug mga lider sa simbahan mao nga ang homosexuality usa ka seryoso nga sala.

Sa wala pa ang iyang misyon si Jackson balik-balik nga nangamuyo sa Dios sa pagkuha sa iyang pagkaibog sa mga lalaki. Mibati siya nga masaligon nga kon siya moserbisyo og misyon, ang iyang mga pagbati mausab. Hinoon, sukad nakompleto ni Jackson ang misyon, ang iyang pagkaibog sa mga lalaki nagpadayon. Si Jackson gusto gayod kaayo nga makigsulti sa usa ka tawo, apan ang kahadlok nakapahimo niya nga magpakahilom.

Si Selena nakamatikod sa iyang emosyonal nga pagpalayo gikan sa ilang pamilya. Makita niya ang kasakit sa iyang mga mata. Nag-ampo na siya alang ni Jackson ug nag-ampo nga makahibalo unsaon sa pagtabang kaniya.

Karong buntag si Selena mihangyo ni Jackson nga mahimo bang maglakaw-lakaw silang duha. Nagduhaduha siya nga miuyon. Samtang sila naglakaw, nag-istorya sila mahitungod sa matag adlaw nga mga butang. Gani napahiyom ni Selena si Jackson. Sa kataposan, si Selena miingon, “Jackson, nasayod ko adunay dili maayo. Makita nako kini sa imong mga mata. Palihog sultihi ko. Nabalaka kaayo ko nimo.”

Si Jackson nagbarog lang sa dugay nga higayon. Mga luha misugod sa pag-agas sa iyang nawong. Sa kataposan, usa ka grabe nga emosyon misiak gikan sa kinahiladman, ug uban sa nagkurog nga tingog miingon siya, “Selena, bayot ko ug ingon niani kutob sa akong mahinumdoman. Wala ko kahibalo kon unsa ang buhaton. Nahadlok ko unsay isulti ni Mama ug Papa kon makahibalo sila. Ang ato bang pamilya maulaw kanako? Ang ako bang mga higala gustong makig-uban nako kon sila makahibalo nga ako bayot? Unsay mahitabo sa akong pagkamiyembro sa Simbahan kon akong sultihan ang bishop? Wala nako makita unsaon nga ako magmalipayon pa ug makabaton og pamilya. Gibati nako nga ingon ang Dios mibiya kanako.”

Giduko ni Jackson ang iyang ulo ug mitutok sa yuta. Human sa taas nga kahilom, hinay siyang miingon, “Selena, pasayloa ko kon ako nakapahigawad nimo. Palihog ayaw sultihi si bisan kinsa. Gibati nako nga nahisalaag ug naglibog.”

Panaghisgot nga mga Pangutana

1. Unsa ang inyong mga pagbati samtang kamo naghunahuna mahitungod sa kasinatian ni Jackson? Ngano kaha nga lisod ang pagpakigsulti mahitungod sa mga pagbati sa pagkaibog sa managsama og sekso uban sa usa ka sakop sa pmilya, suod nga higala, o sa lider sa Simbahan?

2. Unsa kaha ang inyong bation kon kamo si Selena? Unsay mahimo ni Selena aron makatubag uban ang pagsabot ug kapuangod?

3. Sa unsa nga paagi nga ang sakto nga pagsabot sa mga pagtulun-an sa Ginoo bahin sa pagkaibog sa managsama og sekso makatabang ni Selena ug Jackson? Ngano kaha nga kini nga mga pagtulon-an usahay lisod nga dawaton?

4. Unsaon ni Jackson ug Selena pagtan-aw ang pagkaibog sa managsama og sekso uban sa mahangtoron nga panglantaw?

5. Asa pa ang maduolan ni Jackson aron makadawat og dugang nga giya, pag-awhag, ug tabang?

© 2022 pinaagi sa Intellectual Reserve, Inc. All rights reserved.

Ang Istorya ni Jackson

handout sa magtutudlo

Alang sa Sunod nga Higayon

Dapita ang mga estudyante samtang magtuon sila sa sa materyal sa pagpangandam alang sa seksiyon 9 sa paggahin usab og gamay nga panahon sa pagkat-on mahitungod sa ilang mga katigulangan sa FamilySearch.org o sa Family Tree app. Awhaga sila sa pagkonsiderar sa mga panalangin nga gisaad ngadto niadtong kinsa motabang sa ilang mga katigulangan nga makadawat sa makaluwas nga mga ordinansa sa templo.