Leksiyon 10 Materyal sa Magtutudlo: Ang Bag-o ug Walay Kataposang Pakigsaad sa Kaminyoon
“Leksiyon 10 Materyal sa Magtutudlo: Ang Bag-o ug Walay Kataposang Pakigsaad sa Kaminyoon,” Materyal sa Magtutudlo sa Ang Mahangtorong Pamilya (2022)
“Leksiyon 10 Materyal sa Magtutudlo,” Materyal sa Magtutudlo sa Ang Mahangtorong Pamilya
Leksiyon 10 Materyal sa Magtutudlo
Ang Bag-o ug Walay Kataposang Pakigsaad sa Kaminyoon
Ang pagsulod ug pagtahod sa “ang bag-o ug walay katap[o]sang pakigsaad sa kaminyoon” (Doktrina ug mga Pakigsaad 131:2) mahinungdanon alang sa kahimayaan. Dinhi niini nga leksiyon, ang mga estudyante makabaton og oportunidad sa pagpasabot sa mahangtorong kahulogan sa pakigsaad sa kaminyoon ug kon nganong sila naninguha alang sa mahangtorong kaminyoon. Sila usab naghunahuna unsay ilang mabuhat sa pag-andam sa pagsulod o sa pagtahod sa ilang mga pakigsaad sa kaminyoon.
Mga Sugyot alang sa Pagtudlo
Ang mahangtorong kaminyoon usa ka panag-uban sa Dios.
Hunahunaa ang pagsugod sa klase pinaagi sa pagdapit og pipila ka mga estudyante sa pagpakigbahin unsay ilang nakat-onan gikan sa ilang panag-istoryahanay uban sa usa ka tawo kinsa nasilyo diha sa templo (tan-awa ang pagdapit diha sa seksiyon 1 sa materyal sa pagpangandam). (Mubo nga sulat: Mahimong kamo gusto nga mokontak og usa o duha ka mga estudyante pipila ka adlaw sa wala pa ang klase sa paghangyo nga sila moanha nga andam sa pagpakigbahin unsay ilang nakat-onan gikan a ilang panag-istoryahanay.)
Mahimong kamo mangutana sa mga estudyante kon sila ba adunay bisan unsa nga mga pangutana mahitungod sa pakigsaad sa kaminyoon o sa ordinansa sa pagsilyo sa kaminyoon. (Hunahunaa ang pagpahiangay sa sulod sa leksiyon base sa mga pangutana sa mga esdtudyante. Siguroha nga ang mga tubag ngadto sa mga pangutana sa mga estudyante nagtahod sa pagkasagrado sa templo.)
Pagpalambo sa Atong Pagtudlo ug Pagkat-on
Tubaga sa mahunahunaong paagi ang mga pangutana sa estudyante. Pagmapasalamaton kon ang mga estudyante andam sa pagpangutana. Pagbaton og panahon sa pagpaminaw ug sa pagsabot gayod sa ilang mga pangutana ug pangutana og follow-up nga mga pangutana ingon sa panginahanglan. Usahay kini angay ang pagtubag og direkta sa mga pangutana, samtang sa ubang mga higayon kini mas maayo nga tabangan ang mga estudyante sa pagpangita sa mga tubag sa ilang kaugalingong mga pangutana. Mahimo ka usab nga modapit sa ubang mga sakop sa klase sa pagtubag sa mga pangutana.
Basaha og dungan ang mosunod nga pamahayag ni Elder Parley P. Pratt sa Korum sa Napulog Duha ka Apostoles, diin iyang gihulagway unsay iyang gibati sa dihang iyang nahibaloan sa unang higayon nga ang kaminyoon molungtad sa kahangtoran:
Imahe
Parley P. Pratt
Kini gikan [ni Propeta Joseph Smith] nga ako nakakat-on nga ang akong pinalangga nga asawa mahimong mahuptan nako karon ug sa tanang kahangtoran. … Kini gikan kaniya nga mahimo natong ugmaron kini nga mga pagbati, ug patubuon ug dugangan kini ngadto sa tanang kahangtoran; samtang ang resulta sa atong walay kataposang panaghiusa mao ang kaliwatan nga ingon ka daghan sa mga bitoon sa langit, o sa balas sa baybayon sa dagat. … Ako nahigugma kaniadto, apan wala ako masayod ngano. Apan karon ako nahigugma—uban sa usa ka lunsay—labihan ka kusog nga pagtuboy, gibayaw nga pagbati. (Autobiography of Parley P. Pratt, ed. Parley P. Pratt Jr. [1938], 297–98)
Unsaon kaha ang pagkahibalo nga ang kaminyoon mahimong mahangtoron pag-apekto sa atong mga pagpili ug mga pagbati kabahin sa kaminyoon dinhi niini nga kinabuhi?
Pagdungan og rebyo sa Doktrina ug mga Pakigsaad 131:1–4 mangita alang sa dugang nga mga kamatuoran nga gitudlo ni Joseph Smith mahitungod sa mahangtorong kaminyoon. Mahimo dayon nimong pangutan-on ang mga estudyante kon unsa ang importante kanila niini nga tudling. Mahimo silang moila og mga kamatuoran sama niini: Ang mahangtorong kaminyoon gikinahanglan sa pagkab-ot sa labing taas nga ang-ang sa celestial nga gingharian. Kadtong kinsa mosulod ngadto sa bag-o ug walay kataposang pakigsaad sa kaminyoon makabaton og mahangtorong pagtubo.
Gikan sa unsay inyong nakat-onan sa seksiyon 1 sa materyal sa pagpangandam, sa unsang paagi ang bag-o ug walay kataposan nga pakigsaad sa kaminyoon sumpay ngadto ni Abraham ug Sara? (Hunahunaa ang pagtabang sa mga estudyante nga makaila nga ang Ginoo mihatag niining labing importante nga saad ngadto ni Abraham ug Sara, lakip ang saad nga sila makabaton og mahangtorong pagtubo [usa ka dili maihap nga kaliwatan].)
Unsaon sa pakigsaad sa kaminyoon paghimo kanato nga mahisama sa atong langitnong mga ginikanan?
Ipakita ang nag-ubang hulagway nga nagrepresentar sa pakigsaad sa kaminyoon nga relasyon. Hangyoa ang mga estudyante sa pagpasabot sa unsay gitudlo ni Elder David A. Bednar mahitungod niining dayagram (tan-awa sa seksiyon 1 sa materyal sa pagpangandam).
Ipakita ang mosunod nga pamahayag ni Presidente Russell M. Nelson: “Ang kaminyoon sa templo dili lamang tali sa bana ug sa asawa, naglakip kini og pakigkumboya-uban sa Dios [tan-awa sa Mateo 19:6]” (“Celestial nga Kaminyoon,” Liahona, Nob. 2008, 93).
Unsaon nga ang pagsabot niini nga kamatuoran makaimpluwensya sa mga pagpili nga himoon sa bana ug sa asawa?
Kon usa o daghan pa nga mga tawo diha sa imong klase nasilyo na sa templo, hunahunaa ang pagpangutana kanila kon sila andam ba sa pagpakigbahin ngadto sa klase og pipila sa ilang mga pagbati mahitungod sa pagkanasilyo diha sa templo ug unsa ang gipasabot niana nga pakigsaad ngadto kanila. (Mahimo tingali nga mohangyo ka niini nga mga estudyante sa wala pay klase aron sila adunay panahon sa pag-andam sa ilang tubag.)
Ipakita ug pagbasa og dungan sa mosunod nga pamahayag ni Presidente Thomas S. Monson:
Imahe
Presidente Thomas S. Monson
Ako motambag kaninyo nga sa kanunay ipadayon ang mahangtorong panglantaw. Siguroha nga ang kaminyoon sa inyong umaabot usa ka kaminyoon sa templo. Walay talan-awon nga hilabihan katam-is, walay panahon nga hilabihan ka sagrado sama nianang hilabihan ka espesyal nga adlaw sa inyong kaminyoon. Diha-diha dayon masiplatan ninyo ang celestial nga hingpit nga kalipay. Pagbantay; ayaw itugot ang tintasyon nga mokawat kanimo niini nga panalangin. (“Whom Shall I Marry?,” New Era, Okt. 2004, 6)
Ngano kaha nga ang doktrina mahitungod sa mahangtorong kaminyoon nagdala og lig-ong mga pagbati sa hingpit nga kalipay ug gugma?
Hunahunaa ang pagpangutana bisan hain sa mga estudyante kinsa andam sa pagpahayag kon ngano ug giunsa nila sa pagpaninguha alang sa usa ka mahangtorong kaminyoon.
Ang kaminyoon mahimong mahangtoron alang niadtong kinsa mga matinud-anon ngadto sa ilang mga pakigsaad.
Bahina ang klase ngadto sa gagmay nga mga grupo. Hatagi ang matag grupo og kopya sa nag-uban nga handout. Tudloi ang mga grupo sa pagbasa sa sitwasyon ug sa paghisgot og dungan sa mga pangutana.
Mahangtoron nga Kaminyoon
Materyal sa Magtutudlo sa Ang Mahangtorong Pamilya—Leksiyon 10
Kamo mga higala sa usa ka magtiayon sa inyong ward kinsa wala na magsimbahan. Atol sa usa ka panagsultihanay kanila, ang bana nag-ingon, “Ayaw kaguol mahitungod kanamo nga wala magsimbahan sa pagka-karon. Nasilyo kami diha sa templo, busa kami OK. Mag-uban kami sa hangtod.”
Naghunahuna mahitungod sa unsay inyong nakat-onan gikan sa seksiyon 2 sa materyal sa pagpangandam, unsay wala masabti niini nga magtiayon mahitungod sa unsay gikinahanglan alang sa ilang kaminyoon nga mahimong mahangtoron? (Mahimong daklit nimong rebyohon ang seksiyon 2.)
Unsa nga mga kalidad o mga pagpili ang maghimo sa usa ka tawo nga “mosunod diha [sa] pakigsaad”? (Doktrina ug mga Pakigsaad 132:19).
Sa unsang paagi kita mahimong mas mahisama sa Manluluwas sa pagsunod og sagradong mga pakigsaad nga atong gihimo uban sa Dios?
Human sa igong panahon, dapita ang pipila ka estudyante sa pagpakigbahin unsay ilang nakat-onan diha sa mga panaghisgotan sa ilang grupo. Samtang ang mga estudyante nakigbahin sa ilang mga komentaryo, mahimo nimong ilista diha sa pisara ang pipila sa mga kamatuoran nga ilang gisulti. Kini nga mga kamatuoran mahimong nag-apil og mga ideya nga sama sa mosunod: Ang atong mga kaminyoon mahimong mahangturon lamang kon kini gipahigayon pinaagi sa awtoridad sa Dios ug kon kita mosunod sa pakigsaad sa kaminyoon. Ang Espiritu Santo (ang Balaang Espiritu sa Saad) mopamatuod ngadto sa Amahan sa atong pagkamatinud-anon ngadto sa atong mga pakigsaad sa kaminyoon. Ang Manluluwas mao ang hingpit nga ehemplo sa paghupot sa mga saad ug mga pakigsaad.
Pagpamatuod nga adunay paglaom alang sa tanan nga makabaton og mahangtorong kaminyoon. Gihimo niini nga posible sa Manluluwas alang kanatong tanan sa paghinulsol, mapasaylo, ug maghimo ug maghupot og sagrado nga mga pakigsaad uban Kaniya. Pahinumdomi ang mga estudyante nga bisan kadtong kinsa walay oportunidad sa pagminyo niini nga kinabuhi mahimong masilyo ngadto sa usa ka kapikas alang sa kahangtoran kon sila mga matinud-anon.
Mahimo nimong ipakita ang mosunod nga mga pangutana ug sa pagdapit sa mga estudyante sa pagpili og usa ug pagrekord sa ilang mga panghunahuna mahitungod niini:
Unsa ako ka may pasalig nga magminyo diha sa templo? Unsa nga mga pagpili ako makahimo karon sa pagsuporta niana nga pasalig?
Sa unsa nga paagi ako makasunod og mas maayo sa ehemplo sa Manluluwas diha sa paghupot sa akong mga pakigsaad? Sa unsa nga paagi ako makagamit sa Iyang gahom sa pagtabang kanako sa paghimo ug sa paghupot sa akong mga pakigsaad?
Taposa ang imong pagpamatuod sa mga kamatuoran nga nahisgotan dinhi niini nga leksiyon, ug awhaga ang mga estudyante sa paggamit unsay ilang gibati o nakat-onan.
Sa unsang mga paagi ang Ginoo nagtabang kanako sa akong mga paningkamot sa pagpangita og usa ka mahangtorong kauban (o, alang niadtong kinsa mga minyo, sa pagtukod og usa ka mahangtorong relasyon)?
Unsa nga Kristohanong mga kalidad ang labing importante kanako diha sa usa ka kapikas ug diha sa akong kaugalingon?