“Leksiyon 9 Materyal sa Pagpangandam sa Klase: Paghiusa sa mga Pamilya alang sa Kahangtoran,” Materyal sa Magtutudlo sa Ang Mahangtorong Pamilya (2022)
“Leksiyon 9 Materyal sa Pagpangandam sa Klase,” Materyal sa Magtutudlo sa Ang Mahangtorong Pamilya
Leksiyon 9 Materyal sa Pagpangandam sa Klase
Paghiusa sa mga Pamilya alang sa Kahangtoran
Misaad si Presidente Russell M. Nelson, “Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.”(“Samtang Magdungan Kita nga Magpadayon sa Unahan,” Liahona, Abr. 2018, 7). Samtang kamo magtuon niini nga leksiyon, hunahunaa kon unsay inyong mahimo aron mas hingpit nga makaamgo niini nga mga panalangin alang sa inyong kaugalingon ug unsaon ninyo nga makatabang sa paghiusa sa mahangtorong pamilya sa Dios pinaagi sa pagpahigayon sa mga ordinansa sa templo alang sa patay ninyong mga katigulangan.
Seksiyon 1
Sa unsang mga paagi ang mga ordinansa sa pagkapari ug ang mga pakigsaad naglig-on kanako?
Ang kamatuoran nga “ang pamilya mahinungdanon ngadto sa plano sa [Langitnong Amahan]” adunay daghang lawom nga mga pasabot (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Si Presidente Joseph F. Smith mitudlo mahitungod sa usa niini nga mga pasabot:
Kinahanglan nga adunay sumpay sa pagkahiusa ug usa ka panaghiusa sa mga ginikanan ug mga anak ug mga anak sa mga ginikanan hangtod nga ang tibuok kadena sa pamilya sa Dios masumpay sa pagkahiusa ngadto sa usa ka kadena, ug silang tanan mahimong pamilya sa Dios ug sa Iyang Kristo. (Mga Pagtul[o]n-an sa mga Presidente sa Simbahan: Joseph F. Smith [2011], 497)
Ang mga propeta sa Ulahing mga adlaw mipahayag kon unsaon niining “masumpay sa pagkahiusa” sa indibidwal nga mga pamilya–– ug sa kataposan ang pamilya sa Dios––pagpahinabo: Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga mahimong magkahiusa sa kahangtoran” (“Ang Pamilya: Usa ka Pamahayag ngadto sa Kalib[o]tan”).
Kining sagrado nga mga ordinansa sa pagkapari ug mga pakigsaad labaw pa kaysa yanong buluhaton nga kompletohon. Pinaagi niini nga mga ordinansa ug mga pakigsaad, ang Dios nagtinguha sa paghatag kanato og gahom nga mahimong mas sama Kaniya (tan-awa sa Doktrina ug mga Pakigsaad 84:19–22) ug takos sa kinabuhing dayon uban Kaniya ug sa atong mga pamilya.
Ang Panama City Panama Temple
Kabahin sa gahom sa mga ordinansa ug mga pakigsaad sa templo, mitudlo si Presidente Nelson:
Ang tumong nga gipaningkamotan sa matag usa kanato mao ang matugahan og gahom diha sa balay sa Ginoo, ma-seal isip mga pamilya, matinud-anon sa mga pakigsaad sa templo nga maghimo kanatong takos sa labing mahinungdanong gasa sa Dios—ang kinabuhing dayon. Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. (“Samtang Dungan Kita nga Magpadayon sa Unahan,” 7)
Sa wala madugay siya mipakigbahin:
Kadtong natugahan diha sa balay sa Ginoo nakadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon sa paggamit niana nga gahom. …
… Sa matag higayon kamo takos nga moserbisyo ug mosimba sa templo, kamo lig-[o]non sa gahom sa Dios ug ang Iyang mga anghel “mobantay” kaninyo [Doktrina ug mga Pakigsaad 109:22], (“Espirituhanon nga mga Bahandi,” Liahona, Nob. 2019, 77, 78)
Pamalandong agi og Pagpangandam alang sa Klase
Sa unsang mga paagi ang mga ordinansa sa pagkapari ug ang mga pakigsaad naghatag og gahom o naglig-on kaninyo ug sa inyong pamilya?
Seksiyon 2
Unsay epekto ang pagbuhat og family history ug ang pagpahigayon og mga ordinansa sa templo alang sa patay nga mga katigulangan diha sa akong kinabuhi?
Ang Ginoo misaad sa pagpadala ni propeta Elias sa kataposang mga adlaw sa pagpahiuli sa awtoridad nga gikinahanglan alang sa mga pamilya nga mahiusa sa kahangtoran.
Pagtuon agi og Pagpangandam alang sa Klase
Basaha ang Malaquias 4:5–6, ug timan-i ang epekto nga aduna sa pag-anhi ni Elias sa kalibotan.
Si Propeta Joseph Smith mipasabot nga ang pulong pabalikon ingon nga gigamit diha sa bersikulo 6 “kinahanglan nga hubaron og pagabugkoson, o i-seal” (Mga Pagtul[o]n-an sa mga Presidente sa Simbahan: Joseph Smith [2007], 572). Ang panagna ni Malaquias nga girekord dinhi niini nga mga bersikulo natuman ang pila ka bahin didto sa Kirtland Temple kaniadtong Abril 3, 1836. Nianang adlawa, si propeta Elijah miduol ni Joseph Smith ug ni Oliver Cowdery ug gitugyan diha kanila ang mga yawe sa Melchizedek nga Pagkapari sa pagbugkos (tan-awa sa Doktrina ug mga Pakigsaad 110:13–16). Pinaagi niini nga awtoridad, ang mga ordinansa nga gipahigayon dinhi sa yuta makalahutay ngadto sa kamatayon ug “mahimong angay sa celestial nga gingharian sa Dios” (Mga Pagtul[o]n-an sa mga Presidente sa Simbahan: Joseph Fielding Smith [2013], 249).
Hunahunaa ang mga paagi kamo napanalanginan pinaagi sa pagpahiuli sa mga yawe sa pagbugkos. Pinaagi niini nga mga yawe, ang mga bana ug mga asawa, ingon man ang mga ginikanan ug mga anak, magkahiusa sa kahangtoran. Kini nga mga yawe milagroso usab nga moabli og mga posibilidad sa pagbuhat og serbisyo sa templo alang sa atong patay nga mga katigulangan.
Gitudloan sa Ginoo si Joseph Smith ug ang ubang unang mga miyembro sa Simbahan mahitungod sa importansya sa pagpahigayon og mga ordinansa alang sa ilang patay nga mga katigulangan diha sa templo.
Pagtuon agi og Pagpangandam alang sa Klase
Basaha ang Doktrina ug mga Pakigsaad 128:15, ug pangitaa kon sa unsang paagi ang atong kaluwasan nalambigit sa kaluwasan sa atong mga katigulangan.
Pinaagi sa pagdiskobre sa atong patay nga mga katigulangan ug sa pagpahigayon og mga ordinansa sa templo alang kanila, kita nahimong mas sama sa atong Manluluwas. Gitudlo ni Presidente Gordon B. Hinckley kon unsaon nato nga mahimong mga manluluwas alang niadtong mga sakop sa pamilya:
Sama sa atong Manunubos nga mihatag sa Iyang kinabuhi isip puli nga sakripisyo alang sa tanang mga tawo, ug sa pagbuhat sa ingon nahimong atong Manluluwas, mao usab kita, sa gamay nga paagi, kon kita moapil sa proxy nga buhat diha sa templo, mahimong isip mga manluluwas niadtong atua sa pikas bahin nga walay paagi sa pag-uswag gawas adunay buhaton alang kanila pinaagi niadtong ania sa yuta. (“Closing Remarks [Panapos nga Pakigpulong],” Liahona, Nob. 2004, 105)
Hunahunaa kon sa unsang paagi gihatag ninyo ang inyong kaugalingon kon kamo moapil sa family history ug sa templo nga serbisyo.
Ang Ginoo nagsaad kanato og importanting mga panalangin kon kita mopili sa pag-apil niini nga sagradong buhat.
Pamalandong agi og Pagpangandam alang sa Klase
Ngano kaha nga ang kaluwasan sa atong mga katigulangan mahinungdanon alang sa atong kaugalingong kaluwasan ug kahingpitan? Hain nga mga panalangin kalabot sa templo ug family history nga serbisyo inyong labing gikinahanglan karon dayon?
Seksiyon 3
Unsaon ko sa paghiusa ang akong pamilya ug sa pagtabang sa Langitnong Amahan sa paghiusa sa Iyang pamilya pinaagi sa mga ordinansa sa templo?
Ang atong Langitnong Amahan matinguhaon sa pagtabang kaninyo sa paghiusa sa inyong pamilya ug sa tanan sa Iyang pamilya pinaagi sa mga ordinansa sa templo. Mipasabot si Elder David A. Bednar sa Korum sa Napulog Duha ka Apostoles og usa ka gasa nga ang Langitnong Amahan naghatag sa pagsuporta kanato niini nga sagradong buhat:
Si Elder Russell M. Nelson nagtudlo nga ang Espiritu ni Elijah “usa ka pagpakita sa Espiritu Santo nga naghatag og pagsaksi sa balaanong kinaiya sa pamilya” (“A New Harvest Time,” Ensign, Mayo 1998, 34). Kining talagsaong impluwensya sa Espiritu Santo nagdasig sa mga tawo sa pag-ila, pagrekord, ug paghinumdom sa ilang mga katigulangan ug mga sakop sa pamilya—kaniadto ug karon.
Ang Espiritu ni Elijah nakaapekto sa mga miyembro ug dili miyembro sa Simbahan. (“Ang mga Kasingkasing sa mga Anak Mobati,” Liahona, Nob. 2011, 25)
Lihok
FamilySearch.org ug ang FamilySearch Family Tree nga app mga importanting mga dapit sa pag-apil sa mga paningkamot sa “pag-ila, pagrekord, ug paghinumdom” sa inyong patay nga mga katigulangan (David A. Bednar, “Ang mga Kasingkasing sa mga Anak Mobati,” 25). (Ang FamilySearch Family Tree nga app makaplagan diha sa app store sa inyong elektronik nga himan.) Paggahin og pipila ka panahon sa pagsinati o paggamit niini nga mga kapanguhaan. Kamo makatukod sa inyong family tree, makadugang og mga panumdoman ug mga litrato sa mga sakop sa pamilya, makaila sa mga ordinansa sa ebanghelyo nga gikinahanglang dawaton sa patay nga katigulangan, maka-index og mga rekord aron ang uban makaila sa ilang mga katigulangan, ug daghan pa. Kon gikinahanglan, kontaka ang usa ka konsultant sa templo ug family history sa pagtabang kaninyo.