Leksiyon 22 Materyal sa Magtutudlo

Pag-amuma sa mga Anak diha sa Pagkamatarong

“Ang mga ginikanan adunay sagrado nga katungdanan sa pag-amuma sa ilang mga anak sa … pagkamatar[o]ng” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Kini nga leksiyon motabang sa mga estudyante nga masabtan kon unsa ang ilang mahimo sa pagtabang sa ilang mga anak nga makakat-on mahitungod sa Manluluwas ug sa Iyang ebanghelyo. Ang mga etudyante mosuhid usab kon unsaon pagtabang ang mga minahal nga nahisalaag gikan sa dalan sa ebanghelyo.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Gamita ang kurikulum. Samtang nag-andam ka sa matag leksiyon, pagmainampoong morebyo sa materyal sa magtutudlo ug sa materyal sa pagpangandam. Sa pagbuhat nimo sa ingon, ang Espiritu Santo makatabang nimo nga mapahiangay ang leksiyon ngadto sa mga panginahanglan sa mga estudyante. Mahimo nimong pilion nga gamiton ang tanan o ang pipila sa mga sugyot sa pagtudlo, o mahimo nimong iminubo ang pipila ka bahin sa leksiyon ug ipahiangay ang gisugyot nga mga ideya sigon sa mga panginahanglan ug mga kahimtang sa imong mga estudyante.

Ang Ginoo misugo sa mga ginikanan sa pag-amuma sa ilang mga anak diha sa kahayag ug kamatuoran.

Ikonsiderar ang pagsugod sa leksiyon pinaagi sa pagdapit sa mga estudyante sa paghunahuna bahin sa mga impluwensiya sa atong panahon karon nga maoy nakapalisod sa pagpadako sa mga anak nga lig-on sa espirituhanong paagi. Hangyoa ang pipila ka estudyante sa pagpaambit sa ilang mga hunahuna.

Dapita ang mga estudyante sa pagrebyo sa Doktrina ug mga Pakigsaad 68:25, 28 ug 93:40 ug sa pagsulat og usa ka kapahayag [sentence] nga nagminubo, sa ilang kaugalingong mga pulong, sa unsay gilaoman sa Langitnong Amahan sa mga ginikanan. Hangyoa ang pipila ka estudyante sa pagpaambit sa ilang mga hunahuna. Human sa pagpaambit sa mga estudyante sa ilang mga giminubo, ipakita ang mosunod nga kamatuoran gikan sa pamahayag bahin sa pamilya: Ang mga ginikanan adunay sagrado nga katungdanan sa pag-amuma sa ilang mga anak sa pagkamatar[o]ng.

• Nganong importante man nga ang mga ginikanan mao ang “nag-unang mga magtutudlo sa ebanghelyo ug mga ehemplo” sa ilang mga anak? (Tad R. Callister, “Mga Ginikanan: Ang Nag-unang mga Magtutudlo sa Ebanghelyo sa Ilang mga Anak,” Liahona, Nob. 2014, 32). (Mahimo nimong dapiton ang mga estudyante sa pagrebyo sa mga pamahayag ni Presidente Tad R. Callister ug Presidente Joy D. Jones diha sa seksiyon 1 sa materyal sa pagpangandam.)

• Sa unsang mga paagi nga si Satanas mosulay sa pagbalda sa mga ginikanan gikan niining sagrado nga katungdanan? (Mahimo usab nimong hisgotan ang pipila ka paagi nga gilista diha sa kataposang duha ka parapo [paragraph] sa seksiyon nga “Ang mga Pag-ataki sa Kaaway sa Pamilya” sa artikulo nga “Ang Sagradong mga Responsibilidad sa Pagkaginikanan” ni Presidente M. Russell Ballard sa Korum sa Napulog Duha ka Apostoles [Liahona, Mar. 2006, 10–17].)

• Unsay mahimong buhaton sa mga pamilya aron magmalamposon sa kanunayng pagpahigayon og pamilya nga pag-ampo, pamilya nga pagtuon sa kasulatan, ug home evening?

Rebyohon og dungan ang pamahayag ni Sister Cheryl A. Esplin diha sa seksiyon 1 sa materyal sa pagpangandam.

• Sa unsang paagi nga ang mga ginikanan makatabang sa ilang mga anak nga “ang doktrina makasulod sa ilang mga kasingkasing nga kini mahimong kabahin sa ilang pagkatawo”? (“Pagtudlo sa Atong mga Anak nga Makasab[o]t,” Liahona, Mayo 2012, 10). Sa unsang paagi nga ang mga ginikanan makatabang sa ilang mga anak nga mobati ug makakat-on gikan sa Espiritu Santo?

• Sa unsang paagi nga ang usa ka ginikanan o gipakasama nga ginikanan, diha sa pulong o ehemplo, nakatabang nimo nga makaila ug mosunod sa Manluluwas? (Ikonsiderar ang pagrebyo og dungan sa 2 Nephi 25:26 ug sa mga pamahayag ni Elder Neil L. Andersen ug Presidente Joy D. Jones diha sa seksiyon 2 sa materyal sa pagpangandam.)

Dapita ang mga estudyante sa pagrebyo sa unsay ilang gisulat agi og tubag ngadto sa “Irekord ang Imong mga Hunahuna” nga pag-aghat diha sa seksiyon 2 sa materyal sa pagpangandam. Hangyoa ang pipila ka estudyante nga mibati nga komportableng mopaambit sa pagbuhat sa ingon. Awhaga ang mga estudyante sa pagrekord sa bisan unsa nga dugang nga may kalabotan nga mga hunahuna o mga impresyon nga aduna sila diha sa klase.

Kinahanglan nga atong higugmaon ug iampo ang mga sakop sa pamilya nga mibiya sa dalan sa ebanghelyo.

Dapita ang mga estudyante sa pagkonsiderar kon unsa kaha ang bation kon usa sa ilang mga anak mopili sa pagbiya sa dalan sa ebanghelyo. Kon mahimo, ipakita ang Basahon ni Mormon nga video nga “Gidapit ni Lehi ang Iyang Pamilya sa Pagkaon sa Bunga sa Kahoy (1 Nephi 8:12–18)” (3:23). (Kon dili nimo mapatan-aw ang video, ipakita ang kauban nga hulagway ug basahon og dungan ang 1 Nephi 8:12–18.) Dapita ang mga estudyante sa paghunahuna kon unsa kaha ang gibati ni Lehi mahitungod sa lainlaing mga tubag sa mga sakop sa iyang pamilya sa iyang pagdapit sa pagkaon sa bunga sa kahoy sa kinabuhi. Hangyoa ang pipila ka estudyante sa pagpaambit sa ilang mga hunahuna.

Si Lehi ug ang bunga sa kahoy sa kinabuhi

• Unsa ang uban pang mga pananglitan gikan sa mga kasulatan bahin sa matarong nga mga ginikanan kansang anak o mga anak nahisalaag gikan sa dalan sa ebanghelyo? Unsa ang mahimo nimong makat-onan gikan sa mga tubag niini nga mga ginikanan nga makagiya nimo sa imong pagtubag ngadto sa mga sakop sa pamilya nga nahisalaag?

Rebyohon og dungan ang pamahayag ni Elder Ulisses Soares diha sa seksiyon sa materyal sa pagpangandam.

• Unsa ang atong makat-onan gikan ni Elder Soares kon unsaon pagtubag ang usa ka sakop sa pamilya nga mibiya gikan sa dalan sa ebanghelyo? (Ang mga estudyante kinahanglan nga moila og usa ka baroganan nga susama sa mosunod: Kon ang usa ka sakop sa pamilya mobiya gikan sa dalan sa ebanghelyo, kita kinahanglan nga mopadayon sa paghigugma ug pag-ampo alang niya ug mangayo og tabang sa Ginoo.)

• Kanus-a nimo nakita nga ang mga sakop sa pamilya migamit sa mga pagtulon-an ni Elder Soares? Unsa ang mga epekto sa ilang mga gihimo?

Ikonsiderar ang pagbasa sa mosunod nga pamahayag ni Presidente Henry B. Eyring sa Unang Kapangulohan:

Presidente Henry B. Eyring

Alang sa uban, … ang walay katap[o]san nga kalipay ingon og huyang o gani nagkaawop nga pagla[o]m. Mga ginikanan, mga anak, mga igsoong lalaki ug babaye tingali naghimo og mga pagpili aron dili mokwalipay sa kinabuhi nga dayon. …

Ang propeta sa Dios sa makausa mitanyag kanako og tambag nga naghatag kanako og kalinaw. Nabalaka ko nga ang pagpili sa uban makahimo niining imposible alang sa among pamilya aron magkauban sa kahangt[o]ran. Siya miingon, “Imong gikabalak-an ang sayop nga problema. Kinahanglan lang nga magpuyo nga tak[o]s sa celestial nga gingharian, ug mas monindot pa ang kahimtang sa imong pamilya kay sa imong mahunahunaan.” (“Ang Pagla[o]m nga adunay Gugma sa Mahangt[o]rong Pamilya,” Liahona, Ago. 2016, 4, 5)

• Sa unsang paagi nga kini nga pagtulon-an makahatag og paglaom ug kahupay niadtong adunay mga minahal nga nahisalaag gikan sa dalan sa ebanghelyo?

Ikonsiderar ang pagtapos sa leksiyon pinaagi sa pagpamatuod nga ang Ginoo andam sa pagtabang nato samtang maningkamot kita sa pag-amuma sa atong mga anak diha sa pagkamatarong.

Alang sa Sunod nga Higayon

Ikonsiderar ang pagpakita sa mosunod nga pamahayag ni Elder Andersen:

Elder Neil L. Andersen

Adunay daghan kaayo, batan-on ug tigulang, kinsa maunungon ug matinuoron ngadto sa mga pagtul[o]n-an sa mga propeta, bisan tuod og ang ilang kaugalingong bag-o nga kasinatian wala moha[o]m og maayo sa sulod sa pamahayag sa pamilya. (“Ang Mata sa Hugot nga Pagtuo,” Liahona, Mayo 2019, 36)

Dapita ang mga estudyante, samtang magtuon sila sa materyal alang sa sunod nga leksiyon, sa pagpangita sa mga pagtulon-an nga makapanalangin sa mga pamilya o mga indibidwal nga ilang nailhan nga ang mga kasinatian sa pamilya sa kasamtangan dili sama sa unsay ilang gilaoman.