Leksiyon 11 Materyal sa Pagpangandam sa Klase

Pagpili og Mahangtorong Kapikas

Si Elder Quentin L. Cook sa Korum sa Napulog Duha ka Apostoles mitambag, “Palihog himoa nga ‘matinguhaon nga moapil’ [Doktrina ug mga Pakigsaad 58:27] sa espiritwal ug sosyal nga mga kalihokan nga haom sa inyong tumong sa pagminyo sa templo” (“Maalamong Mopili,” Liahona, Nob. 2014, 47). Samtang inyong tun-an ang materyal alang niini nga leksiyon, hunahunaa kon unsaon sa hugot nga pagtuo diha sa Ginoo nga makatabang kaninyo samtang kamo nangita, nagpili, ug nahigugma sa inyong mahangtorong kapikas.

Mubo nga sulat: Ang pagpakig-date nagpasabot og lain-laing mga butang diha sa lain-laing mga kultura. Alang sa mga katuyoan niini nga leksiyon, ang pagpakig-date nagpasabot og paggahin og panahon uban sa usa ka tawo sa kaatbang nga sekso, samtang nagsunod sa mga sumbanan sa ebanghelyo ug uban sa katuyoan sa pagpalambo og usa ka relasyon nga sa kadugayan mogiya ngadto sa kaminyoon.

Seksiyon 1

Unsaon nga ang paggamit sa hugot nga pagtuo diha sa Ginoo makatabang kanako sa pagpalambo og usa ka relasyon nga mogiya ngadto sa kaminyoon?

Ang pagpakig-date mahimong nindot ug mahagiton. Kini naghatag kanato og mga oportunidad sa pag-ilaila sa uban, pagbaton og bag-ong mga kasinatian, ug pagkat-on og importanting mga leksiyon mahitungod sa atong mga kaugalingon ug mga relasyon. Nahibaloan ang importansya sa kaminyoon, kini dili ikatingala nga tingali kita magsinati og pagsupak samtang kita nakig-date ug nag-andam alang sa kaminyoon. Ikaw ba, o aduna bay usa ka tawo nga imong nailhan, misinati og bisan hain sa mosunod nga mga butang nga makalangan o makahunong sa pag-uswag padulong ngadto sa mahangtorong kaminyoon?

• Kahadlok nga mabalibaran

• Kabalaka sa sosyal nga mga kahimtang

• Kakulang sa oportunidad o mga gilaoman

• Emosyonal nga kaluya tungod sa napakyas nga mga relasyon

• Ekonomikanhong kawalay kasigurohan

• Nakapunting lamang sa edukasyon o panginabuhi

• Kahadlok og pasalig

• Nawad-an og pagsalig sa kaminyoon

Samtang nagserbisyo diha sa Kinatibuk-ang Kapangulohan sa Relief Society, naobserbahan ni Presidente Julie B. Beck nga daghang batan-on nga mga tawo nagpaminos sa kaimportante sa pagmugna og mahangtorong pamilya. Daghan ang wala makakita nga ang pagmugna og mga pamilya maoy usa ka buhat nga nagkinahanglan og hugot nga pagtuo” (“Pagtudlo sa Doktrina Kabahin sa Pamilya,” Liahona, Mar. 2011, 32).

Pagtuon agi og Pagpangandam alang sa Klase

Basaha ang Mga Proverbio 3:5–6; 2 Nephi 22:2, ug pamalandonga kon unsaon sa hugot nga pagtuo diha sa Ginoo pagtabang kaninyo samtang kamo nagtinguha ug nagpili og usa ka mahangtorong kapikas.

Ang Ginoo nag-amuma og maayo mahitungod sa inyong mga kasinatian sa pagpangita ug sa pagpili og usa ka mahangtorong kapikas. Siya motabang kaninyo samtang kamo naggamit og hugot nga pagtuo diha Kaniya. Si Elder Jeffrey R. Holland sa Korum sa Napulog Duha ka Apostoles mihatag og gibug-aton kon unsaon sa atong hugot nga pagtuo diha sa Manluluwas makaimpluwensya sa pagpakig-date ug sa kaminyoon:

Tuohi nga ang inyong hugot nga pagtuo adunay mahinungdanong bahin sa usa ka maayong panaghigugmaay, tungod kay kini aduna gayod. Ang inyong pagbulag sa pagpakig-date gikan sa pagkatinun-an nagbutang kaninyo sa katalagman. Si Jesukristo, ang Kahayag sa Kalibotan, mao lamang ang lampara pinaagi diin kamo malamposong makakita sa dalan sa gugma ug kalipay. (“How Do I Love Thee?,” New Era, Okt. 2003, 8)

Ang paggamit og hugot nga pagtuo diha ni Jesukristo naglakip sa paghimo og matarong nga mga lihok. Samtang gitudloan sa Ginoo ang usa ka pundok sa unang mga Santos sa Ulahing mga Adlaw kinsa buot mahibalo sa Iyang kabubut-on alang kanila, Siya nagpaabot kanato sa paggamit sa atong kabubut-on sa paglihok diha sa hugot nga pagtuo.

Pagtuon agi og Pagpangandam alang sa Klase

Tun-i ang Doktrina ug mga Pakigsaad 58:26–28, ug paghunahuna mahitungod kon unsaon ninyo paggamit ang mga panudlo sa Ginoo ngadto sa inyong mga paningkamot sa pagpangita og mahangtorong kapikas.

Si Presidente Dieter F. Uchtdorf, kaniadto sa Unang Kapangulohan, misulti kalabot kon unsaon nato nga makapadayon sa unahan uban ang hugot nga pagtuo ug pagpailob:

Unsa ang mahitungod niadtong kinsa nawad-an sa paglaom nga dili makakaplag og mahangtorong kapikas? Una, ayaw pagbiya. Tambong og mga kalihokan, pakighimamat og mga tawo, ug buhata ang tanan nga kamo makahimo. Ako nahibalo nga ang pagpakig-date dili sayon. Ang mabalibaran usa sa labing sakit nga mga butang nga atong masinati. …

… Pangita og yanong mga paagi nga magkauban. … Ang tumong mao nga makaila og usa ka indibidwal nga tawo ug makakat-on kon unsaon pagpalambo og usa ka makahuloganong relasyon ngadto sa kaatbang nga sekso. (“The Reflection in the Water” [Church Educational System fireside alang sa mga young adult, Nob. 1, 2009], ChurchofJesusChrist.org)

Ang mga saad sa Dios dili kanunay nga matuman dayon o sa paagi nga atong gilaoman; kini moabot sa Iyang panahon ug sa Iyang mga pamaagi. … [Apan] ang mga saad sa Ginoo, kon tingali dili kanunay nga dali, sa kanunay sigurado. (“Ipadayon ang Pagpailob,” Liahona, Mayo 2010, 58)

Samtang nagserbisyo isip usa ka sakop sa Kapangulohan sa Seventy, si Elder Marlin K. Jensen mitudlo mahitungod sa usa ka importante nga bahin sa relasyon nga ang mga lalaki ug mga babaye kinahanglan nga mopalambo diha sa pagpakig-date:

Ang pagpakighigala … usa ka mahinungdanon ug talagsaon nga bahin sa pagpangulitawo ug kaminyoon. Ang usa ka relasyon tali sa usa ka babaye ug sa usa ka lalaki nga nagsugod sa panaghigalaay ug dayon milambo ngadto sa panaghigugmaay ug sa kataposan sa kaminyoon sa kasagaran mahimong malahutayon, mahangtorong panaghigalaay. (“Friendship: A Gospel Principle [Pakighigalaay: Usa ka Baroganan sa Ebanghelyo],” Ensign, Mayo 1999, 64)

Pamalandong agi og Pagpangandam alang sa Klase

Unsay inyong mabuhat o mapadayon sa pagbuhat sa paggamit pa og dugang nga hugot nga pagtuo diha sa inyong mga paningkamot sa pagpakig-date ug pagminyo? Kon kamo minyo, giunsa ninyo sa paggamit ang hugot nga pagtuo diha sa Ginoo sa inyong mga paningkamot sa pagpangita sa inyong mahangtorong kapikas?

Seksiyon 2

Unsa nga mga kalidad kinahanglan nga akong pangitaon ug palamboon agi og pagpangandam alang sa kaminyoon?

Nakahimo ba kamo sukad og usa ka lista sa mga kalidad nga inyong gilaoman diha sa usa ka kapikas? Samtang nakig-date, importante kini nga ang usa ka lalaki ug usa ka babaye naggahin og daghang panahon sa panag-uban sa pag-ilaila sa usag usa nga mga kalidad, personalidad, ug mga hiyas. Si Elder Robert D. Hales sa Korum sa Napulog Duha ka Apostoles mitambag:

Kon makig-date mo, pagkat-on sa tanan kutob sa inyong mahimo mahitungod sa usag usa. Ilha ang mga pamilya sa usag usa kon mahimo. Ang inyong mga tumong magkauyon ba? Pareho ba mo og pagbati bahin sa mga sugo, sa Manluluwas, sa pagkapari, sa templo, pagkaginikanan, mga calling sa Simbahan, ug sa pagserbisyo sa uban? Inyo bang naobserbahan ang usag usa kon maugtas, ilang reaksyon sa kalamposan ug kapakyasan, pagbuntog sa kasuko, ug sa pag-atubang sa mga problema? Ang tawo ba nga inyong gika-date modaot sa uban o modasig kanila? Ang iya bang kinaiya ug sinultihan ug gawi mao ang ganahan nimo sa tawo nga ikauban kada adlaw? (“Pagdawat ug Pagbuntog sa mga Hagit sa Kalibotan Karon,” Liahona, Nob. 2015, 45–46)

Mas importante pa gani kay sa mga kalidad nga inyong gilaoman alang sa inyong kapikas mao ang mga kalidad nga inyong gipalambo sa inyong kaugalingon. Kalabot niini si Elder David A. Bednar sa Korum sa Napulog Duha ka Apostoles mitambag:

Pipila sa mga batan-on ingon og adunay shopping list sa mga kinaiya nga ilang gusto sa usa ka kapikas ug mosukod sa ilang potensyal: “Anaa ba kanimo ang tanang mga butang nga akong gikinahanglan?” Kon naglaom kamo nga makabaton og mahangtorong kapikas kinsa adunay piho nga espirituhanong mga hiyas, nan kinahanglan gayod kamong maningkamot sa pagpalambo niadtong espirituhanong mga hiyas sa inyong kaugalingon. Niana usa ka tawo kinsa aduna niadto nga mga kalidad madani nganha kaninyo. (Sa “Understanding Heavenly Father’s Plan,” ChurchofJesusChrist.org; tan-awa usab sa Doktrina ug mga Pakigsaad 88:40)

Samtang nagserbisyo diha sa Kinatibuk-ang Kapangulohan sa Relief Society, si Sister Carole M. Stephens mitudlo sa susamang paagi:

Tun-i ang kinabuhi sa Manluluwas ug paninguha nga mas mahisama Kaniya. Kon kamo makapalambo niadtong Kristohanong mga hiyas sa inyong kinabuhi ug maninguha nga mas mahisama sa Manluluwas, nan kamo mahimong mas maandam og maayo nga mahimong usa ka kapikas. (Face to Face uban nila ni Elder Holland, Sister Stephens, ug Elder Hallstrom [tibuok kalibotan nga broadcast sa young single adult, Mar. 8, 2016], facetoface.ChurchofJesusChrist.org)

Samtang kini importante alang kanato sa pagpalambo og Kristohanong mga kalidad ug sa pagpangita niini diha sa usa ka umaabot nga kapikas, kita kinahanglan nga magmabinantayon nga dili kita magpalambo sa dili makab-ot nga mga gilaoman sa atong mga kaugalingon ug sa uban. Ingon sa gitudlo ni Elder Hales, “Walay usa kanato ang makaminyo og perpekto; makaminyo kita og dunay potensyal” (“Pagdawat og Pagbuntog sa mga Hagit sa Kalibotan Karon,” 46).

Pamalandong agi og Pagpangandam alang sa Klase

Unsay imong ikasulti nga labing importanting Kristohanong mga kalidad nga inyong gusto nga anaa sa usa ka kapikas? Unsa ang inyong buhaton sa pagpalambo niadto nga mga kalidad diha sa inyong kaugalingon?

Seksiyon 3

Unsaon nako sa paghukom kon kinsa ang akong minyoan?

Ang pagpili kon kinsa ang minyoan kinahanglan nga usa ka mabinantayon ug dinasig nga paghukom. Si Presidente Thomas S. Monson mipakigbahin og usa ka tambag nga iyang nakita nga gikwadro diha sa panimalay sa iyang iyaan ug uyoan: “Pilia ang imong higugmaon; higugmaa ang imong gipili” (“Gahom sa Priesthood,” Liahona, Mayo 2011, 68).

Mahimo nga kini makatabang sa pag-ila nga kita wala mangita alang sa usa ug mao lamang gayod nga gitakda nang daan nga gugma. Si Presidente Spencer W. Kimball mitudlo, “Ang ‘mga soul mate’ dili tinuod ug usa ka imahinasyon” (“Oneness in Marriage,” Liahona, Okt. 2002, 42). Si Elder Hales mipasabot nga kon kita maghimo og importanting mga desisyon sa kinabuhi lakip ang mahitungod sa kaminyoon, “Naglaom ang Langitnong Amahan nga gamiton nato ang atong kabubut-on, tun-an ang sitwasyon diha sa atong hunahuna sumala sa mga bar[o]ganan sa ebanghelyo, ug ipresentar ang desisyon ngadto Kaniya pinaagi sa pag-ampo.” (“Ang Espiritu Santo,” Liahona, Mayo 2016, 105).

Gusto sa Ginoo nga ipuhonan sa mga indibidwal ang ilang labing maayong mga paningkamot ug panghunahuna sa pagdesisyon kon kinsa ang ilang minyoan ug sa pagtinguha og panghimatuod nga pagpadayag mahitungod sa desisyon. Kini ug ang ubang mga baroganan sa pagdawat og pagpadayag gitudlo ngadto ni Oliver Cowdery sayo diha sa Pagpahiuli.

Pagtuon agi og Pagpangandam alang sa Klase

Basaha ang Doktrina ug mga Pakigsaad 6:22–23 ug 9:7–9. Samtang kamo nagbasa, pangita og mga baroganan sa pagdawat og pagpadayag nga makatabang og usa ka tawo sa pagdesisyon kon minyoan ba ang usa ka piho nga tawo. (Tan-awa usab sa Doktrina ug mga Pakigsaad 8:2–3; 11:12–14.)

Irekord ang Inyong mga Hunahuna

Pagsulat og usa ka pamahayag nga nag-summarize kon unsay inyong nakat-onan gikan niini nga mga tudling mahitungod sa pagdawat og pagpadayag gikan sa Ginoo.

Gusto pa og Dugang? (Mahimong buhaton o dili)

Asa ako makakaplag og tambag sa pagpakig-date alang sa akong sitwasyon?

Makakaplag ka og dugang pa nga mga artikulo mahitungod sa pagpakig-date ug mga relasyon diha sa young adult nga seksiyon sa Hunyo 2020 nga Liahona (mga pahina 42–49). (Mubo nga sulat: Kadaghanan niini nga mga artikulo anaa sa digital nga pormat lamang.)

Unsaon nako pag-ila sa pagpadayag kabahin kon kinsa ang minyoan?

Si Elder Gerrit W. Gong sa Korum sa Napulog Duha ka Apostoles ug si Elder Michael John U. Teh sa Seventy mipakigbahin sa ilang mga kasinatian sa pagdawat og pagpadayag sa pagminyo sa ilang tagsa-tagsa nga mga kapikas diha sa “Pagkasakop diha sa Pakigsaad” ( Liahona, Nob. 2019, 80–83) ug sa “Ang Pagbalanse nga Buhat sa Paglahutay” (Liahona, Hunyo 2018, 44–47).