Leksiyon 25 Materyal sa Pagpangandam sa Klase: Paghinulsol ug Kapasayloan diha sa Kinabuhi sa Pamilya
“Leksiyon 25 Materyal sa Pagpangandam sa Klase: Paghinulsol ug Kapasayloan diha sa Kinabuhi sa Pamilya,” Materyal sa Magtutudlo sa Ang Mahangtoron nga Pamilya (2022)
“Leksiyon 25 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
The Prodigal Son [Ang Nawala nga Anak],ni Clark Kelley Price
Leksiyon 25 Materyal sa Pagpangandam sa Klase
Paghinulsol ug Kapasayloan diha sa Kinabuhi sa Pamilya
Ang “malamp[o]son nga mga kaminyoon ug mga pamilya natukod ug napadayon diha sa mga bar[o]ganan” sa ebangehlyo ni Jesukristo (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Duha niini nga mga baroganan mao ang paghinulsol ug kapasayloan. Unsa nga tahas ang nahimo niini nga mga baroganan diha sa kinabuhi sa inyong pamilya? Samtang magtuon ka niini nga materyal, ikonsiderar kon sa unsa nga paagi si Jesukristo makatabang nimo sa imong mga paningkamot sa paghinulsol sa mga sayop o mga dili maayong binuhatan nga imong nahimo ngadto sa mga sakop sa imong pamilya. Ikonsiderar usab kon sa unsa nga paagi ang Manluluwas makatabang nimo sa pagpasaylo sa mga sakop sa pamilya kinsa nakapasilo o nakapasakit kanimo.
Seksiyon 1
Sa unsa nga paagi nga ang akong paghinulsol mopanalangin sa akong pamilya?
Samtang nagserbisyo diha sa Kinatibuk-ang Kapangulohan sa Primary, si Sister Cheryl A. Esplin mitudlo:
Samtang maningkamot kita nga makat-on ug magsunod sa ebanghelyo sa Manluluwas diha sa atong mga panimalay, adunay mga panahon nga kita makahimo og mga sayop. Bisan og ang mga panagsumpaki ug dili maayong binuhatan mahitabo sa matag pamilya, wala kini magpasabot nga ang mga sakop sa pamilya walay labot sa pagka-Kristohanon sa paagi nga sila motagad sa usag usa. Hinoon, ang atong mga sayop maghatag nato og mga oportunidad sa pagsunod sa mga baroganan sa ebanghelyo sa paghinulsol ug pagpasaylo sa atong mga pamilya.
Si Elder Dieter F. Uchtdorf sa Korum sa Napulog Duha ka Apostoles mipasabot unsa ang gipasabot sa paghinulsol:
Imahe
Elder Dieter F. Uchtdorf
Ang paghinulsol nagpasab[o]t og kausaban sa hunahuna ug kasingkasing—mohunong kita sa pagbuhat sa mga butang nga sayop, ug mosugod kita sa pagbuhat sa mga butang nga matar[o]ng. Nagdala kini kanato og usa ka bag-o nga kinaiya ngadto sa Dios, sa kaugalingon, ug sa kinabuhi sa kinatibuk-an. (“Punto sa Luwas nga Pagbalik,,” Liahona, Mayo 2007, 100)
Ang Manluluwas misulti sa usa ka sambingay mahitungod sa usa ka anak nga lalaki kinsa kinahanglan nga maghinulsol tungod sa mga pagpili nga nakadaot sa iyang kaugalinon ug sa iyang pamilya. Kini nga anak mikuha sa iyang kabilin sa dili saktong panahon ug miusik-usik niini sa iresponsable nga pagpuyo. Pobre ug gigutom, nagsugod siya sa paglawog og mga baboy aron makatrabaho ug gani desperado na kaayo nga mokaon sa pagkaon sa mga baboy. (Tan-awa sa Lucas 15:11–16.)
Imahe
icon, pagtuon
Pagtuon agi og Pagpangandam alang sa Klase
Basaha ang Lucas 15:17–24, ug ikonsiderar ang pagmarka sa mga baroganan nga imong nakat-onan mahitungod sa paghinuslsol diha sa kinabuhi sa pamilya.
Si Elder Neil L. Andersen sa Korum sa Napulog Duha ka Apostoles mitudlo kon sa unsa nga paagi nga kita ug ang mga sakop sa atong pamilya mapanalanginan pinaagi sa atong paghinulsol:
Imahe
Elder Neil L. Andersen
Ang paghinulsol dili lamang makapausab kanato, apan mopanalangin usab kini sa atong mga pamilya ug niadtong atong gimahal. Uban sa atong matar[o]ng nga paghinulsol, diha sa gitakda nga panahon sa Ginoo, ang gilugway nga mga bukton sa Manluluwas dili lang moliyok kanato apan moab[o]t ngadto sa mga kinabuhi sa atong mga anak ug kaliwatan. Ang paghinulsol kanunay nga nagpasab[o]t nga adunay mas labaw nga kalipay sa unahan. (“Paghinulsol … Aron Ako Moayo Kaninyo,” Liahona, Nob. 2009, 42)
Samtang nagserbisyo isip usa ka sakop sa Seventy, si Elder L. Whitney Clayton mitudlo kon sa unsa nga paagi nga ang makanunayon nga pagsusi sa kaugalingon ug dali nga paghinulsol makapanalangin og mga kaminyoon. Ikonsiderar kon sa unsa nga paagi nga kini nga mga binuhatan makatabang sa tanan ninyong mga relasyon sa pamilya:
Imahe
Elder L. Whitney Clayton
Ang malipayong kaminyoon nag-agad sa gasa sa paghinulsol. Ang paghinulsol usa ka importanting butang sa tanang maayo nga kaminyoon. Ang mga kapikas kinsa regular nga matinuorong mosusi sa kaugalingon ug mohimo dayon og lakang sa paghinulsol ug molambo makasinati sa makaayong tambal sa ilang kaminyoon. (“Kaminyoon: Tan-awa ug Pagkat-on,” Liahona, Mayo 2013, 84)
Paggahin og pipila ka minuto sa pagpahigayon og matinuoron nga pagsusi sa kaugalingon. Kinahanglan ba ikaw nga maghinsulsol sa bisan unsa nga pagpili nga nakadaot o makadaot og mga relasyon ni bisan kinsa nga mga sakop sa pamilya? Kon mao, unsay imong mabuhat sa pagduol ngadto sa Ginoo ug magsugod niini nga proseso? Ikonsiderar usab ang mga pagpili nga imong gihimo nga nakapanalangin sa imong mga relasyon sa mga sakop sa imong pamilya ug unsaon nimo sa pagpadayon sa paghimo sa susama nga mga pagpili.
Seksiyon 2
Unsaon nako sa pagpasaylo ang usa ka sakop sa pamilya nga nakahimo og sayop kanako?
Sa sambingay sa Manluluwas sa nawala nga anak, ang magulang nga lalaki nagdumili sa pag-apil sa kasaulogan nga gihimo agig pasidungog sa pagbalik sa iyang manghod nga lalaki (tan-awa sa Lucas 15:25–32). Sama niining magulang nga anak nga lalaki, tingali adunay mga panahon nga kita kinahanglan nga mogamit sa mosunod nga tambag gikan ni Elder Jeffrey R. Holland sa Korum sa Napulog Duha ka Apostoles:
Imahe
Elder Jeffrey R. Holland
Tugoti ang mga tawo nga maghinulsol. Tugoti ang mga tawo nga mouswag. Tuohi nga ang mga tawo mausab ug molambo. (“‘Remember Lot’s Wife’: Faith Is for the Future” [debosyonal sa Brigham Young University, Ene. 13, 2009], speeches.byu.edu)
Sama nga adunay mga panahon nga ikaw kinahanglan nga mangayo og pasaylo gikan sa usa ka sakop sa pamilya, usahay kinahanglan nimong ihatag ang pagpasaylo ngadto sa usa ka sakop sa pamilya nga nakahimo og dili maayo o nakapasakit kanimo.
Basaha ang Doktrina ug mga Pakigsaad 64:8–11, mangita kon unsay gitudlo sa Ginoo sa unang mga Santos sa Ulahing mga Adlaw mahitungod sa pagpasaylo sa uban.
Human nga mikutlo sa bahin niini nga tudling sa kasulatan, si Elder Holland mipasabot:
Imahe
Elder Jeffrey R. Holland
Importante … alang sa pipila kaninyo nga nagsinati sa tinuod nga kasakit nga maghunahuna nga [ang Ginoo] wala nag-ingon. Wala Siya nag-ingon nga, “Kamo wala tug[o]ti nga mopabati og tinuod nga kasakit gikan sa napusgay nga kasinatian nga naangkon gikan sa uban.” Wala usab Siya nag-ingon, “Aron makapasaylo sa hingpit ipadayon ang makadaot nga relasyon o balik ngadto sa abusado, makadaot nga kahimtang.” Apan bisan pa man [sa] labing makaguol nga [mga] kalapasan nga tingali moab[o]t kanato, molampos lang kita batok sa atong kasakit kon motunob kita sa dalan sa tinuod nga pagkaalim. Kana nga dalan mao ang pagpasaylo nga gisubay ni Jesus sa Nazaret, kinsa nagtawag sa matag usa kanato, “Umanhi ka ug sumunod kanako” [Lucas 18:22]. (“Ang Pangalagad sa Pagpasig-uli (Reconciliation),” Liahona, Nob. 2018, 79)
Usahay mobati ka nga nagduhaduha o dili makapasaylo. O tingali bation nimo nga ang distansya tali kanimo ug sa usa ka sakop sa pamilya layo kaayo nga mag-uli ang inyong relasyon. Ikonsiderar kon sa unsa nga paagi nga ang tambag gikan ni Presidente James E. Faust sa Unang Kapangulohan makatabang kanimo sa imong mga paningkamot sa pagpasaylo:
Imahe
Presidente James E. Faust
Kinahanglan natong ilhon ug sabton ang masuk-anon nga mga pagbati. Magkinahanglan og pagpaubos sa paghimo niini, apan kon moluhod og mohangyo sa Langitnong Amahan alang sa pagbati og pagpasaylo, Siya motabang kanato. …
… Dili sayon ang pagbuhi ug haw-angon ang atong kasingkasing sa nagkadako nga kalagot. Ang Manluluwas midalit kanatong tanan og bililhon nga kalinaw pinaagi sa Iyang Pag-ula, apan moab[o]t lamang kini samtang kita andam mopapahawa sa dili maayo nga mga pagbati sa kasuko, kasilag, o panimalos. (“Ang Makaalim nga Gah[o]m sa Pagpasaylo,” Liahona, Mayo 2007, 69)
Si Elder Massimo De Feo sa Seventy mihatag usab og gibug-aton sa kaimportante sa pagtutok sa Manluluwas:
Imahe
Elder Massimo De Feo
Minahal kong kaigsoonan, kon naglis[o]d kamo sa pagpangita og kalig-on sa pagpasaylo, ayaw hunahunaa kon unsay nabuhat sa uban kaninyo, apan hunahunaa unsay nahimo sa Ginoo kaninyo, ug makaplagan ninyo ang kalinaw diha sa makatubos nga mga panalangin sa Pag-ula. (“Tiunay nga Gugma: Ang Tinuod nga Timaan sa Matag Tinuod nga Disipulo ni Jesukristo,” Liahona, Mayo 2018, 82)
Ang pagpasaylo ug pagkaayo magkinahanglan og panahon. Pagmapailobon sa imong kaugalingon samtang ikaw magtinguha sa tabang sa Ginoo ug sa Iyang gasa sa pagkaayo.
Imahe
icon, irekord
Irekord ang Inyong mga Hunahuna
Ikonsiderar kon unsay imong nakat-onan ug gibati samtang nagtuon niini nga materyal. Irekord ang imong mga tinguha o mga tumong kalabot sa paghinulsol ug pagpasaylo diha sa kinabuhi sa imong pamilya. Unsaon nimo sa pagdapit ang Manluluwas sa pagtabang nimo sa imong mga paningkamot?