“Leksiyon 4: Materyal sa Pagpangandam sa Klase: Ang Pamilya Sentro sa Plano sa Langitnong Amahan,” Materyal sa Magtutudlo sa Ang Mahangtoron nga Pamilya (2022)
“Leksiyon 4 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Leksiyon 4 Materyal sa Pagpangandam sa Klase
Ang Pamilya Sentro sa Plano sa Langitnong Amahan
Ang mga propeta ug apostoles karon nga panahon nagpahayag nga “ang pamilya mahinungdanon ngadto sa plano sa Tiglalang alang sa walay katap[o]san nga destinasyon sa Iyang mga anak” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Inyo bang nahunahuna kon sa unsang paagi ang pamilya kalabot ngadto sa ubang importanting mga haligi sa plano sa Langitnong Amahan, sama sa Paglalang, sa Pagkapukan ni Adan ug Eva, ug sa Pag-ula ni Jesukristo? Samtang kamo nagtuon, hunahunaa ang kahulogan sa mosunod nga mga pagtulon-an nga aduna diha sa inyong mga pagpili ug mga paglaom alang sa inyong kaugalingon nga pamilya.
Seksiyon 1
Giunsa sa Paglalang sa yuta ug sa Pagkapukan ni Adan ug ni Eva pagtabang sa pagpahinabo sa mahangturong mga katuyoan sa Langitnong Amahan alang sa pamilya?
Si Elder Robert D. Hales sa Korum sa Napulog Duha ka Apostoles mitudlo:
Ang doktrina sa pamilya nagsugod uban sa langitnong mga ginikanan. Ang atong pinakataas nga pangandoy mao nga mahisama kanila. (“The Eternal Family,” Ensign,, Nob. 1996, 64)
Sa dihang nakigsulti ang Dios ngadto ni Moises didto sa bukid, Siya mipasabot nga ang Iyang buhat ug Iyang himaya mao “ang pagpahinabo sa pagka-imortal ug sa kinabuhi nga dayon sa tawo” (Moises 1:39). Ang kinabuhing dayon mao ang pagpuyo uban sa Dios ingon nga Siya nagpuyo, nga nagpasabot ang pagpuyo hangtod sa hangtod isip kabahin sa mahangtoron nga pamilya. Kini mao ang labing mahinungdanon nga gasa nga Siya makatugyan nganhi kanato (tan-awa sa Doktrina ug mga Pakigsaad 14:7).
Ang Paglalang sa yuta ug ang Pagkapukan ni Adan ug Eva mga importante nga bahin sa plano sa Amahan sa pagpahinabo niining mahangturong mga katuyoan. Sa unang kasaysayan sa Simbahan, ang Ginoo mipahayag sa importansya sa kaminyoon ug sa mga anak diha sa plano sa Dios alang sa yuta. Ug diha sa Basahon ni Mormon, mipasabot si Lehi ngadto sa iyang anak nga lalaki sa kaalam sa Pagkapukan ni Adan ug ni Eva.
Pagtuon agi og Pagpangandam alang sa Klase
Basaha ang Doktrina ug mga Pakigsaad 49:15–17 ug ang 2 Nephi 2:22–23, mangita alang sa unsang paagi ang Paglalang ug ang Pagkapukan mitampo ngadto sa paglalang ug pagtubo sa mahangturong mga pamilya.
Mitudlo sila si Presidente Rusell M. Nelson ug Elder Jeffrey R. Holland sa Korum sa Napulog Duha ka Apostoles:
Ingon sa ka bililhon niini, ang planetang Yuta usa ka bahin sa butang nga mas bililhon pa—kanang mahinungdanong plano sa Dios. Sa mubo nga pagkasulti, gilalang ang yuta nga aron ang mga pamilya mahimo. (“The Creation,” Ensign, Mayo 2000, 85)
Ang Pagkapukan usa ka mahinungdanong bahin sa balaang plano sa Langitnong Amahan. Kon wala kini walay mortal nga mga anak nga matawo unta ngadto ni Adan ug ni Eva, ug unta walay tawhanong pamilya nga makasinati og oposisyon ug pagtubo, moral nga kabubut-on, ug ang hingpit nga kalipay sa pagkabanhaw, katubsanan, ug kinabuhing dayon. (“The Atonement of Jesus Christ,” Liahona, Mar. 2008, 35)
Pamalandong agi og Pagpangandam alang sa Klase
Unsaon nga ang pagsabot niining bililhong mga katuyoan sa Paglalang ug sa Pagkapukan makaimpluwensya sa inyong mga paningkamot sa pagtukod sa inyong kaugalingong mahangtoron nga pamilya?
Seksiyon 2
Sa unsang paagi nga ang Pag-ula ni Jesukristo naghimo sa mahangturong mga pamilya nga posible?
Ang Pagkapukan ni Adan ug Eva mipaila-ila sa kalibotan sa mga sitwasyon sa sala ug sa kamatayon. Ang duha nagbulag kanato gikan sa Dios ug sa posibilidad sa kinabuhing dayon uban sa atong mga pamilya.
Diha sa Basahon ni Mormon, naghulagway si Lehi sa batan-ong kinabuhi ni Jacob ingon og puno sa kasakit ug kaguol tungod sa iyang mga igsoong lalaki (tan-awa sa 2 Nephi 2:1). Namatay si Lehi sa dihang si Jacob gamay pa. Bisan pa niining mga hagit sa pamilya, nakakaplag si Jacob og paglaom diha sa iyang kahibalo sa usa ka umaabot nga sakripisyo nga pagahimoon ni Jesukristo sa pagtabang kanatong tanan ug sa atong mga pamilya sa paglingkawas sa kamatayon ug sa impiyerno.
Pagtuon agi og Pagpangandam alang sa Klase
Basaha ang 2 Nephi 9:6–8, 10, 18, ug hunahunaa ang pagmarka sa mga pulong ug mga pagbati ni Jacob mahitungod kon giunsa sa Pag-ula ni Jesukristo pagbuntog sa sala ug sa kamatayon.
Gitudlo nila ni Presidente Julie B. Beck, kanhi Presidente sa Kinatibuk-ang Relief Society, ug ni Presidente Henry B. Eyring sa Unang Kapangulohan ang mahitungod kon giunsa sa Pag-ula ni Jesukristo pagtugot sa mga pamilya nga mahimong mahangturon:
Ang Pag-ula nagtugot sa pamilya nga mag-uban nga ma-sealed sa kahangt[o]ran. Kini nagtugot sa mga pamilya nga makabaton og mahangt[o]rong paglambo ug pagkahingpit. Ang plano sa kalipay, nga gitawag usab og plano sa kaluwasan, maoy usa ka plano nga gimugna alang sa mga pamilya. (“Pagtudlo sa Doktrina kabahin sa Pamilya,” Liahona, Mar. 2011, 12)
Ang atong mapinanggaon nga Langitnong Amahan nasay[o]d sa atong mga kasingkasing. Ang Iyang katuyoan mao ang paghatag kanato og kalipay (tan-awa sa 2 Nephi 2:25). Ug busa gihatag Niya ang gasa sa Iyang Anak aron mahimong posible ang hingpit nga kalipay sa pagbugkos sa pamilya nga magpadayon sa kahangturan. Tungod kay gibugto sa Manluluwas ang higot sa kamatayon, kita mabanhaw. Tungod kay Siya miula sa atong mga sala, mahimo kitang takos sa celestial nga gingharian, pinaagi sa atong hugot nga pagtuo ug paghinulsol, diin ang mga pamilya pagabugkoson diha sa paghigugma hangtud sa kahangturan. (“Ang Paglaum nga adunay Gugma sa Mahangturong Pamilya,” Liahona, Ago. 2016, 4)
Irekord ang Imong mga Hunahuna
Kon kamo adunay oportunidad sa pagpahayag sa inyong mga pagbati ngadto sa Manluluwas mahitungod sa Iyang tahas sa pagtugot kaninyo sa pagbaton og mahangturong pamilya, unsa kaha ang inyong isulti ngadto Kaniya? Ngano?
Seksiyon 3
Unsa ka importante ang pamilya sa inyong plano?
Nagpasabot sa pagka-importante sa pamilya sa kahangturan, si Elder L. Tom Perry sa Korum sa Napulog Duha ka Apostoles mitudlo:
Ang kinatibuk-ang pagtul[o]n-an sa gipahiuli nga ebanghelyo nasentro sa mga pamilya ug sa bag-o ug walay katap[o]sang pakigsaad sa kaminyoon. …
Nagtuo usab kita nga ang lig-on ug tradisyonal nga mga pamilya … ang sukaranang mga yunit sa kahangt[o]ran ug sa gingharian ug gobyerno sa Dios.
Nagtuo kita nga ang organisasyon ug gobyerno sa langit tuk[o]ron diha sa mga pamilya ug mga kapamilya. (“Nganong ang Kaminyoon ug Pamilya Importante—Bisan Asa sa Kalib[o]tan,” Liahona, Mayo 2015, 41)
Tungod sa importansya sa pamilya diha sa plano sa Langitnong Amahan, kita makapaabot ni Satanas sa pagsupak sa atong mga paninguha sa pagmugna ug paglig-on sa atong mga pamilya. Ang atong pagsabot sa plano sa Langitnong Amahan makatabang kanato sa pagkakita sa mga paglingla ni Satanas. Mitudlo si Elder Hales:
Ang mahangturon nga panglantaw maoy atong giya sa inadlaw-adlaw nga mga desisyon ug mga lihok. Mopatunhay kini sa atong mga hunahuna ug mga kalag. Sa higayon nga mapalib[o]tan kita sa mga opinyon nga makapadani apan hiwi hangt[o]d sa hangt[o]d, kita magmakanunayon ug dili matar[o]g. …
Ang kaminyoon ug pamilya ubos sa pag-ataki tungod kay si Satanas nasay[o]d nga kini importante sa pag-angkon og kinabuhing dayon––ingon ka importante sama sa Paglalang, sa Pagkapukan, ug sa Pag-ula ug Pagkabanhaw ni Jesukristo. Napakyas sa paglaglag ni bisan kinsa niadtong mga haligi sa plano, si Satanas nagtinguha sa pagguba sa atong pagsabot ug paggamit sa kaminyoon ug pamilya. (“Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015, 28, 29)
Irekord ang Imong mga Hunahuna
Unsaon ninyo paghimo sa inyong pamilya nga mas importante sa inyong kinabuhi? Unsaon ninyo pagdapit sa gahom sa Ginoo nganha sa inyong mga paninguha sa pagmugna o paglig-on sa inyong kaugalingong mahangtoron nga pamilya?