Leksiyon 23 Materyal sa Magtutudlo

Kon ang mga Panalangin sa Mahangtoron nga Kaminyoon o mga Anak Malangan

Daghang mga miyembro sa Simbahan adunay matarong nga mga tinguha alang sa mga panalangin sa mahangtoron nga kaminyoon o mga anak nga nalangan o nabalda. Niini nga leksiyon, ang mga estudyante mohisgot unsaon nila paglihok inubanan sa hugot nga pagtuo kang Jesukristo kon sila mag-atubang niini nga mga matang sa mga hagit. Ang mga estudyante motino usab unsay ilang mabuhat aron malakip ang uban sa ilang mga ward o mga branch, bisan pa sa mga sirkumstansiya sa ilang pamilya.

Mga Sugyot alang sa Pagtudlo

Kita makapili sa pagpakita og hugot nga pagtuo kang Jesukristo kon ang gitinguha nga mga panalangin malangan.

Ipakita ug basaha og dungan ang pamahayag ni Elder Neil L. Andersen diha sa seksiyon 1 sa materyal sa pagpangandam. Mahimo nimo i-highlight o i-lista diha sa pisara ang mga sirkumstansiya nga iyang gihisgotan nga dili kanunay hingpit nga mohaom sa mga sulundon nga gitudlo diha sa pamahayag sa pamilya.

• Ngano kaha nga ang mga lider sa Simbahan magpadayon sa pagtudlo sa mga sulundon sa kinabuhi sa pamilya kon ang kadaghanan sa mga miyembro sa Simbahan wala makasinati karon niini nga mga sulundon? (Ikonsiderar ang pagpabasa sa pamahayag ni Sister Sharon Eubank sa seksiyon 1 sa materyal sa pagpangandam.)

Ipakita ang litrato ni Abraham ug Sara gikan sa seksiyon 2 sa materyal sa pagpangandam, ug hangyoa ang mga estudyante sa pag-summarize sa mga panalangin nga nalangan o wala matuman diha sa mga kinabuhi ni Abraham ug Sara.

Dapita ang mga estudyante sa pagrebyo sa Mga Hebreo 11:8, 11–13 sa tagsa-tagsa, mangita sa hugpong sa mga pulong nga naghisgot sa hugot nga pagtuo ni Abraham ug Sara. Hangyoa ang pipila ka mga estudyante sa pagpaambit sa unsay ilang nakit-an.

• Sa unsa nga paagi nga ang ehemplo ni Abraham ug Sara makatabang sa modernong mga miyembro sa Simbahan kansang hugot nga pagtuo nahagit sa dihang ang gisaad nga mga panalangin nalangan o wala matuman niini nga kinabuhi? (Human ang mga estudyante mopaambit sa ilang mga hunahuna, isulat ang mosunod nga baroganan diha sa pisara: Kon kita matinud-anon ngadto sa Ginoo ug mosalig sa Iyang tukmang panahon, kita makadawat sa Iyang gisaad nga mga panalangin dinhi sa pagkamortal o sa kahangtoran.)

Mahimo nimong pahinumdoman ang mga estudyante nga ang pagdawat sa gisaad nga mga panalangin sa kasagaran dili mahitungod sa pagkamatarong apan sa tukmang panahon sa Ginoo. Ipakita ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles:

Ang ubang panalangin moabot diha dayon, ang uban dugay, ug ang uban dili moabot hangtod didto sa langit; apan para niadtong mohangop sa ebanghelyo ni Jesukristo, moabot kini. Niana ako personal nga mopamatuod. (“An High Priest of Good Things to Come,” Ensign, Nob. 1999, 38)

Ikonsiderar ang paghisgot sa pipila sa mosunod nga mga pangutana aron matabangan ang mga estudyante nga mapalawman ang ilang pagsabot sa baroganan diha sa pisara:

• Sa unsa nga paagi kaha nga ang mga miyembro sa Simbahan sa usa sa mga sirkumstansiya nga gihisgotan ni Elder Andersen (sa iyang pamahayag sa seksiyon 1 sa materyal nga pagpangandam, nga gihisgotan sa sayo pa niini nga seksiyon) magpadayon sa pagpakita og hugot nga pagtuo diha kang Jesukristo ug sa Iyang mga pagtulon-an bahin sa pamilya?

• Unsa nga mga kasinatian o mga pagtulon-an ang nakapalig-on sa imong pagsalig nga ang Ginoo motuman sa Iyang mga saad bisan kon ang gitinguha nga mga panalangin nalangan? (Dapita ang mga estudyante nga gamiton ang unsay ilang gisulat agig tubag sa kalihokan sa “Irekord ang Inyong mga Hunahuna” diha sa seksiyon 2 sa materyal sa pagpangandam.)

• Kanus-a kamo, o usa ka tawo nga inyong kaila nagpadayon inubanan sa hugot nga pagtuo diha sa Ginoo sa dihang ang panalangin nga may kalabotan nga maminyo o magbaton og mga anak nalangan? Unsay inyong nakat-onan mahitungod sa Ginoo gikan niana nga kasinatian?

Isip kabahin sa panaghisgotan, ikonsiderar ang pagpaambit sa mosunod nga asoy sa usa ka young single adult nga gipaambit ni Presidente Dallin H. Oaks sa Unang Kapangulohan:

Ako nakadawat og sulat gikan sa usa ka babaye nga nagtuon sa Harvard University. Nadasig ko sa mga sulod niini.

Siya miingon, “Ako 26 anyos lang ug mibati nga ang pagsulay sa pagkadili minyo nakapabug-at nako.”

Human makapaambit og dugang pa sa iyang sulat, siya mitapos: “Naglakaw ko pauli gikan sa trabaho usa ka hapon usa ka tuig na ang milabay, mitugyan sa akong kasingkasing ngadto sa Dios, nagsulti Kaniya sa akong labing dakong tinguha nga mahimong usa ka asawa ug inahan. Napahunong ko diha sa akong gilaktan sa dihang usa ka gamhanan nga hunahuna ug pagbati misulod sa akong kasingkasing ug hunahuna. Ang hunahuna mao nga ako sayop. Ang labing dako nga tinguha sa akong kasingkasing mao ang pagkadisipulo ni Jesukristo ug dayon ang ikaduha mao nga mahimong asawa ug inahan. Ang akong panglantaw sa kinabuhi nausab sukad niadto. Nasayop ko sa akong prayoridad. Nasayod ko nga ang tanang mga panalangin nga gisaad maakoa, apan mahitabo kini sa panahon sa Ginoo ug dili sa akoa.” Pagkagamhanan nga hunahuna! (Facebook, Hulyo 11, 2016, facebook.com/dallin.h.oaks)

Dapita ang mga estudyante sa pagrekord unsay ilang mahimo sa pagpadayon sa pagpakita og hugot nga pagtuo kang Jesukristo samtang sila maghulat nga modawat og mga panalangin sa pamilya nga ilang gitinguha.

Mahimo nimong awhagon ang mga estudyante sa pagpangayo sa giya ug suporta sa Ginoo sa pagkat-on unsaon sa pag-angkon og hingpit nga kalipay, katumanan, ug kalamboan karon, bisan unsa pa ang mga sirkumstansiya sa ilang pamilya.

Ang matag sakop sa Simbahan usa ka importante nga bahin sa lawas ni Kristo.

Dapita ang mga estudyante sa pagrebyo sa 1 Mga Taga-Corinto 12:12–27, mangita sa unsay gitudlo kanato sa analohiya ni Pablo mahitungod sa Simbahan ug sa mga miyembro niini.

• Unsa nga mga kamatuoran ang atong makat-onan gikan niini nga analohiya? (Sa mga kamatuoran nga makit-an sa mga estudyante, siguroha sa paghatag og gibug-aton ang mosunod nga kamatuoran: Ang matag miyembro sa Simbahan gikinahanglan ug makahimo og importante nga kontribusyon ngadto sa Simbahan.)

Aron matabangan ang mga estudyante nga mokonsiderar unsaon sa paglakip sa uban ug mopili nga mahilakip ang ilang kaugalingon diha sa mga kalihokan sa Simbahan, mahimo nimong ipaambit ang mosunod nga senaryo (o usbon ang senaryo aron mas mahimong importante ngadto sa inyong mga estudyante):

Si Victoria bag-o lang nagdiborsyo. Misulti siya nimo nga wala niya batia nga siya mahiangay pa sa Simbahan. Mag-inusara ra siya nga maglingkod sa mga miting sa Simbahan ug mibati nga walay labot atol sa mga panaghisgotan sa Relief Society kalabot sa kaminyoon ug pamilya. Nakakwestyon siya kon siya aduna bay bisan unsang ikatampo sa iyang ward sa iyang kasamtangan nga sitwasyon.

Ikonsiderar ang pagpares-pares sa mga estudyante ug pagpakita sa mosunod nga mga pangutana. Dapita ang usa ka estudyante gikan sa matag paresan sa pagpamalandong kon unsaon niya sa pagtubag ang mga pangutana gikan sa panglantaw ni Victoria. Dapita ang ubang estudyante sa pagpamalandong sa uban pang mga pangutana gikan sa panglantaw sa usa ka tawo sa ward ni Victoria. Human sa pipila ka minuto, dapita ang mga estudyante sa paghisgot sa ilang mga tubag sa usag usa.

Victoria	Miyembro sa Ward
Akong gibati nga ako wala nahisakop. Unsa man ang akong mabuhat aron mobati nga nahilakip?	Unsaon nako sa pagsuporta si Victoria sa iyang kasamtangan nga sitwasyon?
Unsa ang pipila ka talagsaong mga panglantaw ug mga kontribusyon nga akong ikadugang sa akong ward?	Unsay akong mabuhat aron mas makasabot ni Victoria ug motabang kaniya nga mobati nga bililhon ug nahilakip sa atong ward?
Unsay akong mabuhat aron sa pagtugot sa Manluluwas sa pagtabang nako nga makasabot ug mobati sa akong bili ug dapit diha sa Iyang Simbahan?	Unsaon nako nga ako mas makahimo sa paglakip sa mga miyembro sa ward kinsa nakasinati og mga sirkumstansiya sama sa pagka-single adult, sa pagkaginikanan nga nag-inusara [single parent], o naminyo ug dili makabaton og mga anak?

Human sa igong panahon, dapita ang pipila ka mga estudyante nga mopaambit uban sa klase unsay ilang nakat-onan gikan niini nga kalihokan.

Hatagi og panahon ang mga estudyante sa pagrekord ug pagplano unsaon nila sa pagbuhat sa ilang mga impresyon sa pagsuporta sa isig ka mga miyembro sa Simbahan, bisan pa sa ilang mga sirkumstansiya sa ilang pamilya. Mahimo nimong dapiton ang mga estudyante sa paghunahuna mahitungod sa piho nga mga miyembro sa ilang ward o branch nga ilang masuportahan.

Ikonsiderar ang pagtapos sa leksiyon pinaagi sa pagpamatuod bahin sa walay pagkapakyas nga gugma ug suporta sa Langitnong Amahan alang niadtong kansang mga sitwasyon sa pamilya mahagiton. Ipamatuod usab nga ang matag miyembro sa Simbahan sa Ginoo gikinahanglan ug makahimo og makahuloganon nga kontribusyon.

Alang sa Sunod nga Higayon

Dapita ang mga estudyante sa paghunahuna mahitungod sa mga tawo nga ilang nailhan kinsa nakasinati og mental o emosyonal nga mga hagit sa kahimsog. Awhaga ang mga estudyante nga mainampoong magtuon sa materyal sa pagpangandam alang sa sunod nga leksiyon uban niini nga mga indibidwal diha sa hunahuna. Mahimo usab nimong awhagon ang mga estudyante sa pagpangita og panahon nga mag-inusara sa pagtimbang-timbang sa ilang kaugalingon nga kahimsog sa pangisip.