Leksiyon 28 Materyal sa Magtutudlo

Mobati og Paglaom alang sa Pagtukod og Mahangtoron nga Pamilya

Kitang tanan makabaton og paglaom nga kita makatukod og mahangtoron nga pamilya, bisan unsa pa ang mga sirkumstansiya sa atong pamilya. Kini nga leksiyon makatabang sa mga estudyante nga mas makasabot nga ang Ginoo makatabang kanila nga molampos sa pagtukod og mahangtoron nga pamilya. Ang mga estudyante adunay oportunidad usab sa pagpaambit ug pagtino unsaon nga dugang nga magamit unsay ilang nakat-onan ug nasinati sa kurso sa Ang Mahangtoron nga Pamilya.

Mga Sugyot alang sa Pagtudlo

Ang Ginoo gusto nga motabang kanato nga molampos sa pagtukod og mahangtoron nga mga pamilya.

Pahinumdom: Pilia pag-ayo ang opsyon sa pagtudlo alang sa unang bahin sa leksiyon nga labing makapanalangin sa imong mga estudyante. Siguroha nga ikaw mogahin og mga 20 minutos alang sa kataposan nga seksiyon sa leksiyon.

Sugdi ang leksiyon pinaagi sa pagdapit sa mga estudyante sa pagpamalandong ug pagrekord sa ilang mga hunahuna mahitungod sa mosunod nga pangutana:

• Unsa ang inyong mga paglaom sa pagtukod og usa ka mahangtoron nga pamilya?

Human sa igong panahon, dapita ang pipila ka estudyante sa pagpaambit sa ilang mga hunahuna kon sila mobati nga komportable.

Ipakita ang mosunod nga kamatuoran gikan sa pamahayag ni Elder David A. Bednar sa seksiyon 2 sa materyal sa pagpangandam: “Uban sa tabang sa Ginoo, makahimo kamo og mahangt[o]ron nga pamilya” (“Usa ka Lig-on nga Sumpay” [tibuok kalibotan nga debosyonal alang sa mga young adult, Sept. 10, 2017], broadcasts.ChurchofJesusChrist.org).

Pagpili og usa sa mosunod nga mga kalihokan aron matabangan ang mga estudyante nga mapalawman ang ilang pagsabot niini nga kamatuoran ug motugot kanila sa pagpaambit unsay ilang nakat-onan samtang nag-andam alang sa klase:

Opsiyon 1

Pahinumdomi ang mga estudyante nga sa kalihokan sa “Irekord ang Inyong mga Hunahuna” sa seksiyon 1 sa materyal sa pagpangandam sila gidapit sa pagpangita og ehemplo gikan sa mga kasulatan o sa ilang kaugalingon nga kasinatian sa pamilya kon sa unsa nga paagi ang Ginoo motabang niadtong kinsa mosalig Kaniya ug magtinguha sa Iyang panabang. Hatagi ang mga estudyante og pipila ka minuto sa pagrebyo sa ilang mga ehemplo ug mga tubag sa mga pangutana.

Pares-paresa o pundoka sa gagmay nga mga grupo ang mga estudyante. Hatagi ang mga estudyante og igong panahon sa pagpaambit sa ilang mga ehemplo ug mga tubag.

Kon mahuman na ang mga estudyante, isulat ang mosunod nga dili kompleto nga kapahayag diha sa pisara: Hinumdomi kanunay: . Hatagi ang matag estudyante og gamay nga piraso sa papel ug tape. Dapita ang mga estudyante sa pagsulat unsaon nila sa pagkompleto ang kapahayag diha sa pisara aron maporma ang kamatuoran base sa unsay ilang nakat-onan sa panaghisgotan sa ilang grupo nga makatabang nila nga mobati nga malaomon mahitungod sa pagtukod og mahangtoron nga pamilya. Dayon hangyoa ang mga estudyante sa pagpapilit sa ilang mga papel libot sa kwarto. (Kon ang imong klase gamay, mahimo nimong ipahiangay kini nga kalihokan pinaagi sa pagdapit sa mga estudyante sa pagsulat sa ilang mga tubag diha sa pisara.)

Hatagi ang mga estudyante og pipila ka minuto sa paglakaw-lakaw libot sa kwarto ug mobasa sa mga pamahayag sa usag usa. Kon mahuman ang mga estudyante, awhaga sila sa pagrekord sa bisan unsa nga dugang nga mga kamatuoran nga gusto nilang mahinumdoman o mga impresyon nga ilang nadawat.

Opsiyon 2

Ipasabot nga pipila nato mahimong makigbisog sa pagbati nga malaomon mahitungod sa pagtukod og mahangtoron nga pamilya tungod kay kita wala makasinati sa matarong nga mga sumbanan sa pamilya diha sa atong kaugalingong mga pamilya.

• Unsay atong makat-onan gikan sa kasinatian ni propeta Abraham nga makahatag nato og paglaom? (Awhaga ang mga estudyante sa paghinumdom unsay ilang nakat-onan mahitungod ni Abraham diha sa seksiyon 2 sa materyal sa pagpangandam. Ikonsiderar ang pagbasa og dungan sa Abraham 1:2. Dayon tabangi ang mga estudyante sa pag-ila og usa ka kamatuoran sama sa mosunod: Kita mahimong mao ang dunay dakong kausaban alang sa atong pamilya ug sa pagpili og matarong bisan pa unsay mga sirkumstansiya sa atong pamilya.)

• Kinsa, kon aduna man, mao ang nahimong instrumento sa pagsugod (o pagpadayon) og mga sumbanan sa matarong nga pamilya diha sa inyong pamilya? Unsa nga kalainan ang nahimo sa mga desisyon niini nga tawo sa imong kinabuhi?

Dapita ang usa ka estudyante sa pagbasa og kusog sa ikatulo ug ikalima nga mga parapo sa pamahayag ni Elder David A. Bednar diha sa seksiyon 2 sa materyal sa pagpangandam.

• Sa unsa nga paagi nga ang Ginoo makatabang nga “makadugang kamo og kalig-on sa inyong kadena ug gani tingali makatabang sa pagpahiuli sa naputol nga mga sumpay”? (“Usa ka Lig-on nga Sumpay”). (Mahimo nimong dapiton ang mga estudyante sa pagrekord sa ilang mga tubag niini nga pangutana kay sa paghisgot niini isip usa ka klase.)

Dapita ang mga estudyante sa paghunahuna sa mga pangutana nga sila gidapit sa pagpamalandong kabahin sa mga sumbanan sa pamilya nga sugdan, padayonon, o dili na padayonon (tan-awa sa seksiyon 2 sa materyal sa pagpangandam). Awhaga ang mga estudyante sa pagrekord sa ilang bisan unsa nga mga hunahuna o mga impresyon.

Kita napanalanginan pinaagi sa paghunahuna sa unsay atong nakat-onan ug sa pagplano og mga pamaagi sa paggamit niini.

Pagpalambo sa Atong Pagtudlo ug Pagkat-on

Hatagi og panahon ang mga estudyante nga maghunahuna. Ang mga estudyante makakita og mas lawom nga katuyoan ug kahulogan sa ilang pagkat-on samtang sila mogahin og panahon sa paghunahuna kon sa unsa nga paagi nga ang mga kamatuoran sa ebanghelyo nakaimpluwensiya sa ilang mga hunahuna, mga kasingkasing, ug mga kinabuhi. Ang pag-awhag sa mga estudyante sa paghunahuna mahitungod unsaon nila paggamit unsay ilang nakat-onan ug gibati makatabang sa pagpalawom sa ilang pagkakabig.

Ikonsiderar ang pagpakita og kopya sa “Ang Pamilya: Usa ka Pamahayag ngadto sa Kalib[o]tan” (ChurchofJesusChrist.org). Pahinumdomi ang mga estudyante sa ilang oportunidad sa kinatibuk-an niini nga kurso sa pagtuon sa mga pagtulon-an bahin sa pamilya gikan sa mahangtoron nga panglantaw.

Ipakita ang mga ulohan sa leksiyon gikan niini nga kurso, o dapita ang mga estudyante sa pagtan-aw niini sa ilang mga device. Hatagi ang mga estudyante og panahon sa pagrebyo sa mga ulohan sa leksiyon aron matabangan sila nga maghunahuna sa unsay ilang nakat-onan, nabati, ug nasinati sa kinatibuk-an niini nga kurso. Dayon dapita ang mga estudyante sa pagpaambit sa ilang mga hunahuna. Mahimo usab ikaw nga mangutana sama sa mosunod aron matabangan ang dugang nga panaghisgotan:

• Sa unsa nga paagi nga kini nga kurso nakaimpluwensya sa inyong pagsabot ug pagpamatuod sa mga pagtulon-an sa Ginoo bahin sa kaminyoon ug pamilya?

• Unsa ang usa sa inyong labing importante nga mga nakat-onan gikan niini nga kurso?

• Unsa ang inyong nakat-onan mahitungod sa Langitnong Amahan ug ni Jesukristo sa kinatibuk-an niini nga kurso? Sa unsa nga paagi nga nalig-on ang inyong relasyon uban Kanila?

Sa pagtapos niini nga leksiyon, ikaw mahimong modapit og usa ka estudyante sa pagbasa og kusog sa pamahayag ni Presidente M. Russell Ballard sa seksiyon 3 sa materyal sa pagpangandam. Tingali makatabang ang pagpakita sa mosunod nga mga pangutana ug mohatag sa mga estudyante og pipila ka minuto sa pagrekord sa ilang mga hunahuna o mga impresyon mahitungod niini:

• Sa unsa nga paagi nga ang inyong kinabuhi lahi isip resulta sa unsay inyong nakat-onan ug nasinati niini nga kurso? Sa unsa nga paagi nga kamo mas mahimong sama ni Jesukristo?

Ikonsiderar ang pagdapit ni bisan kinsa nga mga estudyante kinsa gusto nga mopaambit sa ilang pagpamatuod mahitungod sa kaimportante sa pamilya diha sa plano sa Langitnong Amahan sa kalipay sa pagbuhat sa ingon, kon itugot sa panahon. Ikonsiderar usab ang pagpaambit sa imong kaugalingong pagpamatuod. Ug awhaga ang mga estudyante sa pagpadayon sa pagpalista sa institute.