“Leksiyon 15 Materyal sa Pagpangandam sa Klase: Ang Sugo sa Pagsanay ug Pagpuno sa Yuta,” Materyal sa Magtutudlo sa Ang Mahangtoron nga Pamilya (2022)
“Leksiyon 15 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Leksiyon 15 Materyal sa Pagpangandam sa Klase
Ang Sugo sa Pagsanay ug Pagpuno sa Yuta
Unsa ang imong mga gilaoman o mga kabalaka mahitungod sa pagbaton og mga anak? Samtang magtuon ka sa mosunod nga materyal, pag-ampo nga mapalawman ang imong pagsabot sa sagradong mga katuyoan nga matuman diha sa plano sa Langitnong Amahan kon ang mga bana ug mga asawa mopili sa pagbaton og mga anak. Ikonsiderar kon sa unsang paagi nga ang bana ug asawa makalihok inubanan sa hugot nga pagtuo sa pagtahod sa balaanong sugo sa pagsanay ug pagpuno sa yuta.
Seksiyon 1
Unsay tahas sa pagbaton og mga anak diha sa plano sa Langitnong Amahan bahin sa kaluwasan?
Paghunahuna og lainlaing mga opinyon nga imong nadungog nga gipahayag sa mga tawo mahitungod sa pagbaton og mga anak. Si Elder Neil L. Andersen sa Korum Napulog Duha ka Apostoles mipaambit sa panglantaw sa usa ka inahan:
Daghang tingog sa kalib[o]tan karon ang mibaliwala sa importans[i]ya sa pagbaton og anak o nagsugyot sa paglangay o paglimit sa mga anak sa pamilya. Ang akong mga anak nga babaye bag-o lang nga mi-refer kanako sa usa ka blog nga sinulat sa usa ka Kristiyanong inahan (dili sa atong tinuohan) nga may lima ka anak. Mikomentaryo siya: “[Kon magdako] niini nga kultura, lis[o]d kaayo ang pagkuha og biblikal nga panglantaw sa pagkainahan. … Ang mga bata dili makaab[o]t og college. Siguradong dili makasuroy sa mga dapit sa kalib[o]tan. Walay kahigay[o]nan sa paggawas inig kagabii aron maglingaw-lingaw. Dili makahimo sa pagpanindot sa imong lawas sa gym. Dili makatrabaho sa gipangandoy ninyong trabaho.” Siya dayon midugang: “Ang pagkainahan dili usa ka kalingawan, usa kini ka tawag. Dili kamo mangolekta og mga bata kay nakita ninyong mas nindot sila kay sa mga stamp. Dili kini usa ka butang nga isingit lang kon may panahon. Mao kana nganong gihatagan kamo og panahon sa Ginoo” [Rachel Jankovic, “Motherhood Is a Calling (and Where Your Children Rank),” Hulyo 14, 2011, desiringgod.org]. (“Mga Bata,” Liahona, Nob. 2011, 28)
Human sa paglalang sa Dios kang Adan ug Eva ug mihiusa nila diha sa bag-o ug walay kataposang pakigsaad sa kaminyoon, Siya mihatag nila og usa ka sugo.
Pagtuon agi og Pagpangandam alang sa Klase
Basaha ang Genesis 1:27–28, ug hunahunaa ang mahitungod sa kamahinungdanon niini isip unang sugo nga gihatag sa Dios ngadto ni Adan ug ni Eva.
Ang mga propeta sa Ulahing mga Adlaw mipasabot, “Ang unang sugo nga gihatag sa Dios ngadto ni Adan ug Eva mao ang mahitungod sa posibilidad alang kanila isip bana ug asawa nga mahimong mga ginikanan. Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).
Hunahunaa kon nganong kini nga sugo kinahanglang pamatud-an pag-usab sa atong panahon karon. Si Presidente Dallin H. Oaks sa Unang Kapangulohan mitudlo nga “Ang pinakamakaluya nga pagsupak ni Satanas (ang kaaway) itumong ngadto sa unsa man ang pinakaimportanting plano sa Dios.” Kini nga pagsupak naglakip sa pagtinguha sa “pagdili sa pagpapanganak—ilabi na sa mga ginikanan nga nagpadako og mga anak sa kamatuoran” (“Kamatuoran ug ang Plano,” Liahona, Nob. 2018, 27).
Ang ebanghelyo ni Jesukristo mopanalangin nato og balaanong panglantaw bahin sa kaimportante sa mga anak (pananglitan, tan-awa sa Salmo 127:3 ug Mateo 19:13–15). Si Elder Andersen mitudlo:
Usa kini ka talagsaong pribilehiyo sa bana ug asawa kinsa makapanganak aron makahatag og mortal nga lawas alang niining espiritung mga anak sa Dios. …
Kon ang usa ka bata matawo sa usa ka bana ug asawa, nagtuman sila og bahin sa plano sa atong Langitnong Amahan sa pagdala og mga anak dinhi sa yuta. Ang Ginoo miingon, “Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” [Moises 1:39]. Sa dili pa ang imortalidad, kinahanglan nga dunay mortalidad. (“Mga Bata,” 28)
Si Presidente M. Russell Ballard sa Korum sa Napulog Duha ka Apostoles mitudlo nga ang pagbaton og mga anak usa ka bahin sa katuyoan sa mortalidad:
Ang katuyoan sa mortalidad mao ang pagkahimong sama sa Dios pinaagi sa pag-angkon og pisikal nga lawas, mogamit sa kabubut-on, mobuhat sa mga tahas nga kanhi naa lamang sa atong langitnong mga ginikanan—mga tahas sa bana, asawa, ug ginikanan. …
… Usa sa mahinungdanong katuyoan sa mortal nga kinabuhi mao nga mahimo natong masunod kana nga kasinatian sa pamilya nga kita mismo, dinhi niining kinabuhia isip mga ginikanan kay sa mga anak lamang. …
Gusto sa Langitnong Amahan [nga kita] … [mosunod sa] Iyang unang sugo sa “pagsanay ug pagpuno”—dili lang sa pagtuman sa iyang plano apan sa pagpangita usab og kalipay nga gidesinyo sa Iyang plano nga ihatag ngadto sa Iyang mga anak. (“Ang mga Oportunidad ug mga Responsibilidad sa mga Magtutudlo sa CES sa ika-21 Siglo” [usa ka gabii uban sa General Authority, Peb. 26, 2016], broadcasts.ChurchofJesusChrist.org)
Hisgoti agi og Pagpangandam alang sa Klase
Hisgoti ang mosunod nga mga pangutana uban sa usa ka tawo nga adunay mga anak. Kon ikaw minyo na ug adunay mga anak, ikonsiderar ang paghisgot niini nga mga pangutana uban sa imong kapikas.
-
Unsay imong nakat-onan mahitungod sa Langitnong Amahan gikan sa imong kasinatian isip usa ka ginikanan?
-
Sa unsang paagi nga ang pagkaginikanan nakapalambo sa imong kinabuhi?
4:30
Seksiyon 2
Unsaon man sa akong kapikas ug nako sa pagdesisyon kon kanus-a magbaton og mga anak ug kon pila kabuok anak?
Ang minyo nga mga magtiayon nag-atubang og importanting mga pangutana kon kanus-a magbaton og mga anak ug kon pila kabuok anak.
Pagtuon agi og Pagpangandam alang sa Klase
Basaha ang Alma 37:37, ug pangitaa ang tambag nga makatabang sa minyo nga magtiayon sa paghimo niini nga mga desisyon.
Si Elder Andersen namulong sa kaimportante sa pagpakigtambag uban sa Ginoo sa paghimo niini nga mga desisyon:
Kon kanus-a gustong magkaanak ug pila kabuok anak mga pribado nga desisyon nga himoon tali sa bana ug asawa ug sa Ginoo. Sagrado kini nga mga desisyon—mga desisyon nga kinahanglang buhaton uban sa sinserong pag-ampo ug buhaton uban sa hugot nga pagtuo. …
Mga kaigsoonan, kinahanglan nga dili kita maghukom sa usag usa niining sagrado ug pribado nga responsibilidad. (“Mga Bata,” 28, 30)
Ang ubang mga tawo nga matarong nga nagtinguha nga makabaton og mga anak tingali walay oportunidad niining kinabuhia. Kalabot niini, si Elder Andersen mitudlo:
Ang pagpanganak usa … ka subo nga hilisg[o]tan alang sa matar[o]ng nga mga magtiayon kinsa nagminyo ug wala gay[o]d makaanak sumala sa ilang gipaab[o]t o alang sa bana ug asawa nga nagplano sa paghimo og dakong pamilya apan gipanalanginan og gamay ra nga pamilya.
Dili nato kanunay mapasab[o]t ang mga kalisdanan sa atong mortalidad. Usahay ang kinabuhi ingon og dili gay[o]d makiangayon—ilabi na kon ang atong pinakatinguha mao ang paghimo gay[o]d sa unsay gisugo sa Ginoo. Isip sinugo sa Ginoo ako mopaniguro kaninyo nga kini nga saad sigurado: “Ang matinud-anong mga miyembro kansang mga kahimtang wala motugot kanilang makadawat sa mga panalangin sa mahangt[o]rong kaminyoon ug pagkaginikanan niining kinabuhia makadawat sa tanang gisaad nga mga panalangin sa kahangt[o]ran, [samtang] gihuptan nila ang mga pakigsaad nga ilang gihimo ngadto sa Dios” [Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.1.4, ChurchofJesusChrist.org]. (“Mga Bata,” 30)
Pamalandong agi og Pagpangandam alang sa Klase
Nganong importante man nga ang mga bana ug mga asawa makigtinambagay uban sa Langitnong Amahan kalabot kon kanus-a magbaton og mga anak ug kon pila kabuok anak?
Seksiyon 3
Sa unsang paagi nga ang pagsabot sa kasagrado sa kinabuhi diha sa plano sa Dios makaimpluwensiya sa atong mga pagpili?
Pinaagi sa buhi nga mga propeta, ang Ginoo mipasabot sa kasagrado sa kinabuhi sa tawo ug kon unsay angayng madawat sa tanang bata, lakip na niadtong wala pa matawo:
Kami mopamatuod sa pagkabalaan sa kinabuhi ug sa iyang pagkamahinungdanon diha sa walay kataposan nga plano sa Dios. …
… Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtah[o]d sa mga panaad sa kaminyoon uban sa hingpit nga pagkamaunungon. (“Ang Pamilya: Usa ka Pamahayag ngadto sa Kalib[o]tan”)
Kalabot sa kabalaan sa kinabuhi, si Presidente Russell M. Nelson mitudlo:
Walay usa nga mokugos og usa ka inosenteng masuso, motan-aw niadtong matah[o]m nga mga mata, mohikap sa gagmay nga mga tudlo, ug mohalok sa aping niana nga masuso nga walay lawom nga balaanong pagtah[o]d alang sa kinabuhi ug alang sa atong Tiglalang. Ang kinabuhi naggikan sa kinabuhi. Dili kini sulagma. Usa kini ka gasa gikan sa Dios. (“Aborsyon: Usa ka Pag-ataki ngadto sa Walay Ikapanalipod,” Liahona, Okt. 2008, 37)
Ang mga deklarasyon diha sa pamahayag bahin sa pamilya naghisgot batok sa nagkalainlaing mga tulumanon nga gidawat sa kadaghanan karong panahona, sama sa aborsyon ug pagbaton og mga anak nga gawas sa kaminyoon. Kalabot sa aborsyon, diha sa daghang bahin sa kalibotan, ang paghimo niini gikonsiderar nga madawat, ug minilyon ka aborsyon gipahigayon matag tuig.
Ang mga lider sa Simbahan mihatag sa mosunod nga instruksiyon mahitungod sa aborsyon:
Ang Ginoo misugo, “Dili kamo … magpatay, ni magbuhat sa bisan unsa nga butang nga sama niini” (Doktrina ug mga Pakigsaad 59:6). Ang Simbahan supak sa pinili nga aborsyon alang sa personal o sosyal nga kasayon. Ang mga miyembro kinahanglan nga dili mopaubos, mopahigayon, makigsabot, mobayad, mouyon, o moawhag og aborsyon. Ang bugtong posible nga eksepsiyon mao kon:
Ang pagmabdos miresulta tungod sa paglugos o pakighilawas sa duol nga kabanay [incest].
Ang usa ka takos nga doktor motino nga ang kinabuhi o panglawas sa inahan seryoso nga nameligro.
Ang usa ka takos nga doktor motino nga ang puya adunay grabe nga mga depekto nga ang bata dili mabuhi human sa pagkatawo.
Bisan pa niini nga mga eksepsiyon dili awtomatik nga makatarunganon ang aborsyon. Ang aborsyon usa ka seryoso kaayo nga butang ug kinahanglan nga ikonsiderar lamang human ang mga tawo nga responsable nakakonsulta sa ilang mga bishop ug nakadawat og balaan nga kumpirmasyon pinaagi sa pag-ampo. (Kinatibuk-ang Tamdanan nga Basahon, 38.6.1)
Ang ubang wala makasal nga mga ginikanan mipili sa aborsyon tungod kay mibati sila nga dili makasangkap sa ilang mga anak og “sigurado, maamumahon, ug makanunayon nga relasyon” nga iyang gikinahanglan. Niini nga sitwasyon, ang pagsagop mahimong “usa ka dili hinakog, mahigugmaon nga desisyon nga mopanalangin sa bata, sa mga ginikanan nga nagpahimugso, ug sa nagsagop nga mga ginikanan dinhi niini nga kinabuhi ug sa tibuok kahangt[o]ran” (Pamahayag sa Unang Kapangulohan, Okt. 4, 2006, nga gikutlo diha sa Liahona, Okt. 2008, 37).
Pamalandong agi og Pagpangandam alang sa Klase
Unsa ang imong nakat-onan gikan sa mga pagtulon-an niini nga seksiyon mahitungod sa atong Langitnong Amahan? Unsaon nimo paggamit sa imong nakat-onan mahitungod sa plano sa Dios sa pagpasabot kon ngano nga ang “pinili nga aborsyon alang sa personal o sosyal nga kasayon” supak sa Iyang kabubut-on? (Kinatibuk-ang Tamdanan nga Basahon, 38.6.1).