Leksiyon 17 Materyal sa Pagpangandam sa Klase

Patas nga Panag-uban diha sa Kaminyoon

Diha sa pamilya, gisaligan sa Ginoo ang mga lalaki ug mga babaye “sa lahi pero sama ra kamahinungdanon nga mga tahas [nga] nagtinabangay sa usag usa” (M. Russell Ballard, “Ang Sagrado nga mga Responsibilidad sa Pagkaginikanan,” Liahona, Mar. 2006, 13). Ang mga propeta mitudlo nga “niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Kini nga mga responsibilidad hisgotan pa pag-ayo sa mosunod nga pipila ka leksiyon.

Seksiyon 1

Sa unsa nga paagi ako mahimong managkauban diha sa kaminyoon?

Makat-on kita og importante nga mga kamatuoran mahitungod sa relasyon nga gitumong sa Ginoo alang sa bana ug asawa gikan sa paagi nga Iyang gihulagway ang paglalang ni Eva sumala sa narekord diha sa basahon ni Moises.

Pagtuon agi og Pagpangandam alang sa Klase

Basaha ang Moises 3:18, 21–23, ug hunahunaa ang mahitungod sa kahulogan sa simbolismo nga gigamit sa paghulagway sa pagkalalang ni Eva.

Ang deskripsyon sa pagkalalang ni Eva nga gikan sa gusok ni Adan usa lang ka paghulagway (tan-awa sa Spencer W. Kimball, “The Blessings and Responsibilities of Womanhood,” Ensign, Mar. 1976, 71). Si Presidente Russell M. Nelson mipasabot sa usa ka posible nga simbolikanhon nga kahulogan sa gusok:

“Ang gusok, nga gikan sa kilid, daw masabot og panag-uban. Ang gusok wala magpasabot nga dominyon ni ulipon, apan pareha nga relasyon isip managkauban, sa pagtrabaho ug sa pagpakabuhi, nga magtambayayong. (“Lessons from Eve,” Ensign, Nob. 1987, 87)

Si Presidente Linda K. Burton, kanhi Kinatibuk-ang Presidente sa Relief Society, mitudlo sa mosunod mahitungod sa kahulogan sa katabang:

Ang pulong nga katabang nagpasabot og “tigtabang nga angay, tak[o]s, o makakompleto kaniya”. Sama pananglit, ang atong duha ka mga kamot magkasusama apan dili [gayod] parehas. Sa tinuod, kini kaatbang kaayo sa usag usa, apan kini mokompleto sa usag usa ug ha[o]m sa usag usa. Ang pagtinabangay, mas naglig-on kanila. (“Magdungan Kita’g Saka,” Liahona, Mayo 2015, 30)

Ang pipila nga kultura ug personal nga mga pagtuo ug mga kinaiya makapugong nato nga mahimong managkauban diha sa kaminyoon. Si Presidente Dallin H. Oaks sa Unang Kapangulohan mihulagway sa pipila niinii nga mga sirkumstansiya ug unsaon sa pagbuntog niini:

Pipila sa mga bana … adunay sayop nga ideya nga ang bana mopahulay samtang ang asawa mobuhat sa kadaghanang buluhaton sa balay o nga ang asawa ug ang mga anak mga sulugoon sa bana. Wala kini makapahimuot sa Ginoo tungod kay kini nagbabag sa matang sa relasyon sa pamilya nga [kinahanglan nga] mopatigbabaw sa kahangt[o]ran ug kini nagpugong sa matang sa kalamboan nga kinahanglang mahitabo dinhi sa yuta aron kita makasarang sa mga panalangin sa kahangt[o]ran. Tun-i ang mga kasulatan ug inyong makat-[o]nan nga si Adan ug Eva, ang una natong [mga] ginikanan, ang modelo natong tanan, dungan nga nag-ampo ug nagtrabaho (tan-awa sa Moises 5:1, 4, 10–12, 16, 27). Kinahanglang kana mao ang atong sumbanan sa kinabuhi sa pamilya—magtah[o]d sa usag usa ug magtinabangay uban sa gugma. (“Ang Kultura sa Ebanghelyo,” Liahona, Mar. 2012, 23-24)

Pamalandong agi og Pagpangandam alang sa Klase

Unsa nga mga panalangin ang moabot sa usa ka kaminyoon kon ang bana ug asawa mosalig ug mosuporta sa usag usa isip managkauban?

Seksiyon 2

Unsay buot ipasabot sa pagdumala diha sa pamilya?

Ang Ginoo mitudlo og talagsaon nga mga responsibilidad ngadto sa mga bana ug mga asawa diha sa pamilya nga “managsama og bili ug importansya.” (Quentin L. Cook, “Dakong Gugma alang sa mga Anak sa Atong Amahan,” Liahona, Mayo 2019, 79). Ang pipila niini nga mga responsibilidad hisgotan sa umaabot nga mga leksiyon. Apan usa ka ehemplo mao ang mosunod nga sagrado nga responsibilidad nga gihatag sa Ginoo ngadto sa mga bana ug mga amahan: “Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatar[o]ng” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Kon wala ang usa ka bana o amahan, ang asawa o inahan maoy mangulo sa panimalay (tan-awa sa Russell M. Nelson, “Espirituhanon nga mga Bahandi,” Liahona, Nob. 2019, 79).

Hunahunaa kon sa unsa nga paagi nga ang mosunod nga mga pagtulon-an makadugang sa inyong pagsabot kon sa unsa nga paagi ang usa ka amahan mangulo sa iyang pamilya pinaagi sa gugma ug pagkamatarong:

Ang pagdumala sa pamilya mao ang responsibilidad sa pagtabang sa paggiya sa mga sakop sa pamilya sa pagpuyo og balik sa presensya sa Dios. Kini himoon pinaagi sa pagserbisyo ug pagtudlo uban ang kalumo, kaaghop, ug putli nga gugma, magsunod sa ehemplo ni Jesukristo (tan-awa sa Mateo 20:26–28). Ang pagdumala sa pamilya naglakip sa paggiya sa mga sakop sa pamilya sa kanunay nga pag-ampo, pagtuon sa ebanghelyo, ug ubang mga aspeto sa pagsimba. Ang mga ginikanan molihok nga magkahiusa sa pagtuman niini nga mga responsibilidad. (“Mga Ginikanan ug mga Anak,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 2.1.3)

Ang Apostol nga si Pablo mitudlo mahitungod sa responsibilidad sa bana nga dili hakog nga mangulo sa dihang siya miingon: “Ang bana mao ang ulo sa iyang asawa ingon nga si Kristo maoy ulo sa simbahan. … Mga bana, higugmaa ang inyong asawa ingon nga gihigugma ni Kristo ang simbahan, ug gitugyan ang iyang kinabuhi alang niini” (Mga Taga-Efeso 5:23, 25). Si Presidente Ezra Taft Benson, human mobasa sa Mga Taga-Efeso 5:23, mihatag og gibug-aton kon sa unsa nga paagi ang Manluluwas usa ka hingpit nga ehemplo kon unsaon sa pagdumala:

Kana mao ang modelo nga kinahanglan nga atong sundon sa atong tahas sa pagdumala diha sa panimalay. Wala nato makita nga ang Manluluwas naggiya sa Simbahan sa is[o]g o manakit nga kamot. Wala nato makita nga ang Manluluwas nagtagad sa Iyang Simbahan nga walay pagrespeto o pagpasagad. Wala nato makita ang Manluluwas nga naggamit og pwersa o pagpamugos sa pagtuman sa Iyang mga katuyoan. Bisan asa dili nato makita ang Manluluwas nga naghimo og bisan unsa apan kana nga naglig-on, nagbayaw, naghupay, ug naghimaya sa Simbahan. Mga kaigsoonan, moingon ako kaninyo uban sa kaligdong, Siya mao ang modelo nga kinahanglan gay[o]d nga atong sundon samtang kita nangako sa espirituhanong paggiya sa atong mga pamilya. (Mga Pagtulun-an sa mga Presidente sa Simbahan: Ezra Taft Benson [2014], 235)

Sa usa ka dinasig nga sulat ngadto sa mga miyembro sa Simbahan, si Propeta Joseph Smith mihulagway sa kaimportante sa pagpakita og Kristohanong mga hiyas kon magdumala sa uban. Kini nga mga hiyas magamit sa pagdumala sa pamilya.

Pagtuon agi og Pagpangandam alang sa Klase

Basaha ang Doktrina ug mga Pakigsaad 121:41–43, ug ikonsiderar ang pagmarka sa Kristohanong mga hiyas nga inyong makit-an.

Irekord ang Inyong mga Hunahuna

Pagpili og usa sa Kristohanong mga hiyas nga inyong nakit-an o namarkahan, ug irekord ang inyong mga hunahuna mahitungod sa usa o daghan sa mosunod nga mga pangutana: Ngano nga kini nga hiyas importante sa pagdumala sa pamilya? Sa unsa nga paagi nga kini nga hiyas makatabang nako nga mahimong managkauban diha sa kaminyoon? Kanus-a gipakita ni Jesukristo kini nga hiyas sa Iyang tahas sa pagdumala? Pag-andam sa pagpaambit sa inyong mga hunahuna diha sa klase.

Seksiyon 3

Sa unsa nga paagi nga ang mga magtiayon matarong nga magtinambagay sa pagpangulo sa ilang pamilya?

Ang kahulogan sa “pagdumala sa pamilya” mahimong masayop pagsabot. Pananglitan, pipila ka tawo sayop nga misabot sa pinulongan sa tudling sa kasulatan sama sa Genesis 3:16 (ang Ginoo nagsulti ni Eva nga si Adan “maoy magbuot” kaniya) nga nagpasabot nga ang bana mahimong modominar o mokontrolar, nga usa ka sayop. Kini nga panudlo nga gikan sa Ginoo nagpasabot hinoon ngadto sa responsibilidad sa usa ka bana sa pagdumala pinaagi sa gugma ug pagkamatarong. Sama sa gitudlo ni Presidente Gordon B. Hinckley mahitungod sa kahulogan niining hugpong sa mga pulong, “ang madumalahon nga responsibilidad sa bana mao ang pagsangkap, sa pagpanalipod, sa pagpalig-on ug pagpanalipod sa asawa” (“Daughters of God,” Ensign, Nob. 1991, 99; tan-awa usab sa Spencer W. Kimball, “The Blessings and Responsibilities of Womanhood,” Ensign, Mar. 1976, 72).

Kabahin sa dili matarong nga binuhatan sa mga bana nga modominar o mokontrolar, si Elder Richard G. Scott sa Korum sa Napulog Duha ka Apostoles mitudlo:

Ang inyoha kultura ba diin ang bana mopakita og tahas nga modominar, o awtoridad, mohimo sa tanang importante nga mga desisyon alang sa pamilya? Kana nga sundanan kinahanglang usbon aron ang bana ug asawa maglihok isip managkauban, maghiusa sa paghimo og mga desisyon alang sa ilang kaugalingon ug sa ilang pamilya. Walay pamilya nga molungtad ubos sa kahadlok o pagpugos; mosangpot kana sa panagbingkil ug pagsukol. Ang gugma mao ang pundasyon sa malipayong pamilya. (“Removing Barriers to Happiness,” Ensign, Mayo 1998, 86)

Uban sa pagpaubos, pagtahod, ug pagkamabination, ang mga magtiayon kinahanglan nga magtinambagay sa paghimo og mga desisyon alang sa ilang pamilya. Si Elder Quentin L. Cook sa Korum sa Napulog Duha ka Apostoles mitudlo:

Sa konseho sa pamilya, ang [mga] bana ug [mga] asawa, isip magkaparehas nga mga kapares, mohimo sa labing importante nga mga desisyon. Sila modesisyon kon unsaon pagtudlo ug pagdisiplina sa mga anak, unsaon paggasto sa kwarta, asa sila mopuyo, ug uban pang daghang mga desisyon sa pamilya. Kini tambayayongan sa paghimo human sa pagpangayo og paggiya gikan sa Ginoo. (“Ang Dios Kahayag Ko,” Liahona, Mayo 2015, 64)

Hinumdomi kining dugang nga importante nga mga kamatuoran nga may kalabotan sa pagtinambagay isip mga magtiayon ug pagpasiugda og managkauban sa kaminyoon:

• Ang mga bana ug mga asawa kinahanglan nga dunay “magkapareha og katungod” sa paghimo og mga desisyon (L. Whitney Clayton, “Kaminyoon: Tan-awa ug Pagkat-on,” Liahona, Mayo 2013, 84).

• Ang mga asawa kinahanglan nga “mamulong isip ‘usa ka makatampo ug hingpit nga [kauban] [Spencer W. Kimball, “Privileges and Responsibilities of Sisters,” Ensign, Nob. 1978, 106] samtang [sila] makighiusa sa [ilang] bana sa pagdumala sa [ilang] pamilya” (Russell M. Nelson, “Usa ka Hangyo ngadto sa Akong mga Sister,” Liahona, Nob. 2015, 97).

• Ang mga bana ug mga asawa adunay “managsamang gah[o]m sa pagdawat og pagpadayag alang sa ilang pamilya” (Quentin L. Cook, “Dakong Gugma alang sa mga Anak sa Atong Amahan,” Liahona, May 2019, 79).

• Ang mga ginikanan makahimo og mga konseho sa pamilya uban sa ilang mga anak sa pagtinambagay mahitungod sa mga desisyon o mga hagit nga may kalabotan sa tibuok pamilya (tan-awa sa M. Russell Ballard, “Mga Family Council,” Liahona, Mayo 2016, 63–65).

Pamalandong agi og Pagpangandam alang sa Klase

Sa unsa nga paagi nga ang pagtinambagay diha sa pagkamatarong makapanalangin sa mga magtiayon ug sa ilang mga anak?

Gusto pa og Dugang? (Mahimong sundon o dili)

Unsa ang ubang mga baroganan ang makagiya nako nga mahimong managkauban diha sa kaminyoon?

Asa ako makakat-on pa mahitungod sa pagdumala sa pamilya?

Sa iyang pakigpulong “Ang Melchizedek nga Pagkapari ug ang mga Yawe” (Liahona, Mayo 2020, 69–72), si Presidente Dallin H. Oaks mipasabot sa kahulogan ug buhat sa pagdumala sa pamilya.

Basaha ang pakigpulong sa komperensiya ni Presidente Nelson “Our Sacred Duty to Honor Women” (Ensign, Mayo 1999, 38–40) aron madiskobrehan unsaon sa pagdumala sa dili hinakog nga paagi.