Leksiyon 11 Materyal sa Magtutudlo

Pagpili og Mahangtorong Kapikas

Ang Ginoo gustong motabang kanato sa atong mga pangingkamot sa pagpangita og usa ka mahangtorong kapikas. Niini nga leksiyon, mopasabot ang mga estudyante kon unsaon nila paggamit ang hugot nga pagtuo diha ni Jesukristo samtang sila naghimo og mga paningkamot sa pagtukod og mga relasyon uban sa mga sakop sa kaatbang nga sekso ug magminyo. Dapiton usab ang mga estudyante sa pagpili og Kristohanong mga hiyas nga sila makapaningkamot sa pagpalambo nga motabang kanila sa pagpangandam alang sa mahangtorong kaminyoon o mahimong mas maayong mahiuyon ngadto sa usa ka mahangtorong kaminyoon.

Mga Sugyot alang sa Pagtudlo

Ang Ginoo nagpaabot kanato sa paglihok uban sa hugot nga pagtuo diha Kaniya samtang kita nangita og mahangtorong kapikas.

Bahina ang klase ngadto sa ginagmay nga mga grupo, ug pagtudlo og usa ka lider alang sa matag grupo. Hatagi ang matag estudyante sa bahin 1 sa mosunod nga sitwasyon ug sa mga pangutana nga nagsunod. Tudloi ang mga estudyante sa pagdungan sa pagbasa og kusog sa sitwasyon ug sa paghisgot sa mga pangutana. (Kon mahimo, tingali ikaw gusto nga mopadala sa bahin 1 sa sitwasyon ngadto sa mga estudyante sa wala pa magklase aron sila makaanha ingon nga nakabasa ug nakahunahuna mahitungod niini.)

Mubo nga sulat: Hunahunaa ang mga paagi nga ikaw makapahaom sa sitwasyon sa paghimo niini nga mas angay sa mga kahimtang, mga pangutana, o kultura sa mga estudyante.

Pagpalambo sa Atong Pagtudlo ug Pagkat-on

Ang mga panaghisgot sa gagmayng grupo makatabang sa mga estudyante nga mas malig-on ang pagkat-on. Ang ginagmay nga mga grupo nagtugot og mas daghang mga estudyante nga aktibong makaapil diha sa mga panaghisgot. Makabaton sa oportunidad sa pagpakigbahin diha sa ginagmay nga mga grupo makasilsil usab og pagsalig diha sa mas hilomon nga mga estudyante. Hunahunaa ang pagtudlo og usa ka lider sa grupo, paghatag og klaro nga mga panudlo kon unsay gipaabot nga buhaton sa mga estudyante, pagbutang og takda nga oras, pagdapit sa matag sakop sa pag-apil, ug sa pag-awhag sa mga estudyante sa pagpangandam sa pagpakigbahin sa unsay ilang nakat-onan.

Sitwasyon, Bahin 1

Materyal sa Magtutudlo sa Ang Mahangtorong Pamilya—Leksiyon 11

Si Luis nakauli na sa panimalay gikan sa iyang hapit duha ka tuig nga misyon. Tungod kay siya nabalaka mahitungod sa pagbuhi alang sa umaabot nga pamilya, midesisyon siya sa pagtrabaho og part time samtang siya nag-eskwela. Limitado ang iyang oras, apan siya malingaw sa iyang sinemana nga klase sa institute ug naghimo niini nga usa ka prayoridad. Kasagaran motan-aw si Luis sa social media ug magdula og mga dula diha sa bus o sa wala pay klase. Siya walay nahimamat nga daghang babaye sukad siya miabot sa panimalay. Nagsulti siya sa iyang pamilya nga gibati niya ang ingon og mas maayo ang paghulat sa seryosong pagpaninguha og kaminyoon hangtod mahuman siya sa pag-eskwela. Nagtuo siya nga kon pagbuot na nga siya maminyo dayon, kini mahitabo.

Si Emma nagtambong og sama sa klase ni Luis sa institute apan wala gayod sukad makahimamat kaniya. Kasagaran siya molingkod tupad sa iyang mga higala ug panagsa ra nga makig-istorya ngadto ni bisan kinsa pa. Nawad-an na siya og paglaom sa pakighimamat og mga lalaki ug sa pagpakig-date sa kinatibuk-an. Siya nabalaka nga kon siya magsugod og laing relasyon, kini matapos, sama sa uban niya nga nanglabay. Kapoy na ang iyang kasingkasing ug wala mobati nga siya adunay igo nga enerhiya nga mosulod pa og laing relasyon. Nahuman na siya sa pag-eskwela usa ka tuig na ang milabay, ug adunay full-time nga trabaho. Nabalaka siya nga tingali dili na gayod niya mahimamat ang iyang tinuod nga gugma o masilyo diha sa templo ug naghunahuna kon kinahanglan ba siyang makig-date og usa ka tawo nga dili miyembro sa Simbahan.

Human mabasa og dungan ang sitwasyon, hisgoti ang mosunod nga mga pangutana:

• Unsay inyong hunahuna sa mga kabalaka ni Luis ug Emma?

• Naghunahuna sa unsay atong nakat-onan gikan sa seksiyon 1 sa materyal sa pagpangandam, unsa nga tambag ang makatabang kaha ni Luis? Unsa nga tambag ang makatabang kaha ni Emma?

• Kon kamo wala pa magkaistorya mahitungod sa mosunod nga mga tudling diha sa inyong panaghisgot sa grupo, pagdungan og basa niini ug paghisgot kon sa unsa nga paagi kini kalabot ngadto ni Luis ug Emma: Mga Proverbio 3:5–6; 2 Nephi 22:2; Doktrina ug mga Pakigsaad 58:26–28. Giunsa ninyo sa paggamit o unsaon ninyo nga makagamit og hugot nga pagtuo diha sa Ginoo sa inyong mga paningkamot sa pagpangita sa inyong mahangtorong kapikas?

© 2022 pinaagi sa Intellectual Reserve, Inc. All rights reserved.

Sitwasyon, Bahin 1

handout sa magtutudlo

Human ang mga estudyante may igo nga panahon sa paghisgot sa sitwasyon ug sa mga pangutana, dapita ang pipila kanila sa pagpakigbahin unsay ilang nakat-onan o gibati atol sa ilang mga panaghisgot. Samtang ang mga estudyante nakigbahin mahimo kang motabang kanila sa pag-ila og mga kamatuoran nga sama ngadto niining mosunod: Ang hugot nga pagtuo diha ni Jesukristo motabang kanato sa pagbaton og kaisog ug pagpailob sa atong mga paningkamot sa pagpangita og mahangtorong kapikas. Ang Dios nagpaabot kanato sa paggamit sa atong kabubut-on sa pagpauswag sa Iyang plano. Hunahunaa ang pagsulat diha sa pisara sa mga kamatuoran nga giila sa mga estudyante.

Ang pagpalambo og Kristohanong mga kalidad ug sa pagtinguha og pagpadayag motabang kanato sa pagpangandam sa pagminyo.

Hatagi ang matag estudyante sa bahin 2 sa sitwasyon. Tudloi sila sa pagbasa niini ug sa paghisgot diha sa ilang mga grupo sa mga pangutana nga nagsunod.

Sitwasyon, Bahin 2

Materyal sa Magtutudlo sa Ang Mahangtorong Pamilya—Leksiyon 11

Human sa leksiyon sa institute kabahin sa mahangtorong kaminyoon, si Luis ug si Emma parehas nga mibati og pagkadani sa paghimo og pipila ka mga kausaban ug pagsalig pa diha sa Ginoo. Sa dihang miabot si Luis alang sa klase sa institute sa pagkasunod semana, milingkod siya tupad ni Emma ug mipaila sa iyang kaugalingon. Wala madugay nahimo silang maayo nga mga higala. Nagplano sila og daghang mga kalihokan nga nagtugot kanila sa paggahin og panahon nga mag-uban ug mailhan ang usag usa. Sa naglakaw ang panahon, naugmad kanila ang lig-on nga mga pagbati alang sa usag usa.

Dihay pipila ka mga kabalaka si Emma, hinoon. Siya adunay lista sa mga kalidad nga iyang gusto sa usa ka bana. Si Luis aduna niini nga mga kalidad, apan dili tanan niini.

Nagsugod usab si Luis sa pagbati og kakuyaw. Nahigugma siya ni Emma, apan nakakita sa kaminyoon sa iyang kaugalingong mga ginikanan nga nabungkag, nahadlok siyang mohimo og sayop sa pagpili kon kinsa ang minyoan. Mabinantayon niyang gihunahuna ang tanan nga iyang nahibaloan mahitungod ni Emma gikan sa ilang daghang mga panagsultihanany ug mga kasinatian nga nag-uban. Gibati niya nga ang ilang mga tumong managsama ug gustong mohangyo ni Emma nga makigminyo kaniya, apan adunay daghan pa kaayong wala mahibaloi nga mga hinungdan. Nag-ampo si Luis alang sa usa ka timailhan nga si Emma mao ang husto nga pagpili. Kutob dinhi, walay nahitabo.

• Pamalandonga unsay inyong nakat-onan gikan sa seksiyon 2 sa materyal sa pagpangandam. Unsay makatabang ni Emma sa iyang paagi kon unsay iyang gipangita alang sa usa ka potensyal nga kapikas? Unsa nga mga problema ang atong maatubang kon ang atong mga gipaabot sa usa ka potensyal nga kapikas hilabihan sa kaubos o hilabihan sa kataas?

• Unsa kaha ang makatabang ni Luis sa pagsabot mahitungod sa iyang mga kahadlok? Unsa kaha ang makatabang kaniya sa pagsabot mahitungod sa pagdawat og pagpadayag? (Mahimo nimong rebyohon ang seksiyon 3 sa materyal sa pagpangandam.)

• Unsa nga mga kalihokan o mga kasinatian ang makatabang sa duha ka tawo sa pagpalambo og panaghigalaay ug sa pagkat-on pa og dugang mahitungod sa mga kalidad, personalidad ug mga hiyas sa usag usa? Unsay usa o duha ka mga kalidad sa Manluluwas nga inyong gilaoman sa pagpalambo agi og pagpangandam alang sa kaminyoon o samtang kamo nagpadayon sa inyong kaminyoon?

© 2022 pinaagi sa Intellectual Reserve, Inc. All rights reserved.

Sitwasyon, Bahin 2

handout sa magtutudlo

Human sa igong panahon, dapita ang pipila ka estudyante sa pagpakigbahin sa unsay ilang nakat-onan o gibati atol sa ilang mga panaghisgot.

Rebyoha ang bisan hain nga materyal sa mga seksiyon 2 ug 3 sa materyal sa pagpangandam nga ang mga estudyante makakuha og kaayohan. Mahimo nimong sa piho nga paagi ilhon ang mosunod nga mga kamatuoran: Atong minyoan ang potensyal, dili ang kahingpitan. Kon kamo naglaom og mahangtorong kapikas nga nagbaton og pipila ka espirituhanong mga kalidad, tinguhaa ang pagpalambo niini sa imong kaugalingon. Kon kita nagtinguha sa paggiya sa Ginoo sa atong mga desisyon, Siya mohatag og kalinaw sa atong mga hunahuna ug atong bation kon ang atong mga pagpili husto.

Kon adunay minyo nga mga estudyante sa imong klase, mahimo nimong dapiton ang usa o duha kanila sa pagpakigbahin sa ilang mga kasinatian sa bisan hain niini nga mga kamatuoran. Kon ikaw minyo, hunahunaa ang pagpakigbahin sa imong kaugalingong kasinatian usab. Pagpamatuod sa tinguha sa Ginoo sa pagtabang sa mga estudyante sa ilang panaw sa pagpangita og usa ka mahangtorong kapikas.

Mahimo nimong pangutan-on ang mga estudyante kon sila ba adunay mga pangutana kalabot ngadto sa leksiyon karon. Kon sila aduna, paggahin og pipila ka panahon sa paghisgot sa ilang mga pangutana isip usa ka klase. Dayon hatagi ang mga estudyante og pipila ka minuto diha sa kataposan sa klase sa pagrekord og bisan unsa nga mga panghunahuna nga tingali ilang gibati mahitungod sa ilang kaugalingong sitwasyon. Dapita sila sa pagtino kon unsaon nila pagpadayon sa paggamit sa ilang hugot nga pagtuo diha sa Ginoo sa ilang mga paningkamot sa pagpakig-date o unsa kaha ang ilang kinahanglang buhaton sa paggamit pa og dugang sa hugot nga pagtuo diha Kaniya.

Alang sa Sunod nga Higayon

Dapita ang mga estudyante sa pagpangandam alang sa sunod nga klase pinaagi sa pagtuon sa materyal sa pagpangandam ug sa pagpangutana sa usa ka malipayong magtiayon nga minyo kon giunsa nila sa pag-amuma ang ilang kaminyoon ug sa paghimo sa ilang relasyon nga lig-on.