inahan nga migakos sa iyang gamay nga anak

Leksiyon 19 Materyal sa Pagpangandam sa Klase

Ang Sagrado nga mga Responsibilidad sa mga Inahan

Si Presidente Russell M. Nelson nakaobserbar, “Imposibleng masukod ang impluwens[i]ya sa [nagtuman sa pakigsaad] nga mga babaye, dili lamang sa mga pamilya apan diha usab sa Simbahan sa Ginoo, isip mga asawa, mga inahan, ug mga apohan; isip mga igsoon ug iyaan; isip mga magtutudlo ug lider; ug ilabi na isip mga ehemplo ug mapahinung[o]rong mga tigpanalipod sa tinuohan” (“Usa ka Hangyo ngadto sa Akong mga Sister,” Liahona, Nob. 2015, 95–96). Samtang magtuon ka niini nga materyal, hunahunaa ang mahitungod sa impluwensiya sa matarong nga mga babaye diha sa imong kinabuhi.

Seksiyon 1

Sa unsang paagi nga ang tahas sa pagkainahan magamit sa tanang babaye?

Ang pagkainahan mahangtoron ang kinaiyahan. Dinhi sa yuta, ang pagkainahan nahilakip na sa pagkababaye sukad pa sa paglalang ni Eva: “Ug si Adan mitawag sa ngalan sa iyang asawa og Eva, tungod kay siya mao ang inahan sa tanan nga mga buhi; kay sa ingon Ako, ang Ginoong Dios, mitawag sa nag-una sa tanan nga mga babaye, diin daghan” (Moises 4:26).

Hunahunaa kon sa unsang paagi nga ang tahas sa pagkainahan magamit sa tanang babaye samtang magbasa ka sa mosunod nga pamahayag ni Sister Sheri L. Dew, kanhi magtatambag sa Kinatibuk-ang Kapangulohan sa Relief Society:

Sister Sheri L. Dew

Samtang kita mosulay sa paghunahuna sa pagkainahan nga mao lamang kadtong nanganak na, sa panglantaw sa Ginoo, ang pulong nga inahan adunay lainlaing kahulogan. Sa tanang pulong nga mahimo nilang pilion sa paghulagway sa iyang tahas ug kamahinungdanon, ang Dios nga Amahan ug si Adan mitawag ni Eva nga “ang inahan sa tanan nga mga buhi” [Moises 4:26]—ug gihimo nila kini sa wala pa siyay anak. … Ang pagkainahan labaw pa sa pagpanganak, bisan og mao gay[o]d kana. Kini mao ang kinaiya kon kinsa kita isip mga babaye. Naghulagway kini sa ato gy[o]d nga pagkatawo, sa atong balaang kadungganan ug kinaiyahan ug sa talagsaong mga hiyas nga gihatag kanato sa atong Amahan. …

Isip anak nga mga babaye sa atong Langitnong Amahan, ug anak nga mga babaye ni Eva, kitang tanan mga inahan ug sa kanunay kita mga inahan. (“Are We Not All Mothers?,” Ensign, Nob. 2001, 96, 97)

babaye nga nagpahiyom

icon, pamalandong

Pamalandong agi og Pagpangandam alang sa Klase

Si Presidente Nelson mitudlo nga “tanang babaye usa ka inahan tungod sa iyang mahangturong balaanong kinaiyahan” (“Ang Partisipasyon sa mga Sister sa Pagpundok sa Israel,” Liahona, Nob. 2018, 68). Pamalandongi kon unsay kahulogan niini nga pamahayag alang nimo ug sa mga babaye sa imong kinabuhi.

Seksiyon 2

Giunsa sa Langitnong Amahan pagtabang sa mga babaye sa pagtuman sa ilang sagradong responsibilidad sa pag-amuma?

Ang atong Langitnong Amahan mitugyan sa mga inahan nga “maoy unang responsable sa pag-amuma sa ilang mga anak” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Si Presidente Susan W. Tanner, kanhi Kinatibuk-ang Presidente sa Young Women, mihulagway sa unsay ipasabot sa pag-amuma:

Presidente Susan W. Tanner

Ang pagmatuto mao ang pagtudlo, pag-ugmad og kalamboan, ang pagpatubo, ang pagpakaon, ug ang pag-alima. Kinsa ang dili mosinggit sa kalipay nga gihatagan sa ingon ka sagrado nga tahas? (“Ang Akong Kalag Naglipay sa mga Butang sa Ginoo,” Liahona, Mayo 2008, 82)

Ang Langitnong Amahan mipanalangin sa Iyang mga anak nga babaye “uban sa dala sa pagkatawo nga tiunay nga katak[o]s sa paghigugma ug pag-alima,” nga makatabang sa mga babaye sa pagtuman niining makaimpluwens[i]ya ug sagrado nga responsibilidad (Anak nga mga Babaye sa Akong Gingharian: Ang Kasaysayan ug Buhat sa Relief Society [2011], 201).

Si Sister Neill F. Marriott, kanhi magtatambag sa Kapangulohan sa Young Women, mitudlo nga ang Langitnong Amahan motabang sa Iyang mga anak nga babaye sa ilang mga paningkamot sa pag-amuma sa uban:

Sister Neill F. Marriott

Mga sister, kitang tanan mianhi sa yuta uban … [sa] makahatag og kinabuhi, makaamuma, pang-inahan nga mga gasa tungod kay kana ang plano sa Dios. …

Kon mangutana kita sa kaugalingon, “Unsa may atong buhaton?” pamaland[o]ngan nato kini nga pangutana: “Unsa may padayong gibuhat sa Manluluwas?” Moalima Siya. Momugna Siya. Modasig Siya og kalamboan ug kamaayo. …

… Samtang kita mohangyo sa Amahan sa Langit nga himoon kitang mga tigtukod sa Iyang gingharian, ang Iyang gah[o]m modagayday kanato ug kita masay[o]d kon unsaon sa pag-amuma, sa katap[o]san mahisama sa atong langitnong mga ginikanan. (“Unsay Atong Buhaton,” Liahona, Mayo 2016, 11, 12)

Si Presidente Henry B. Eyring sa Unang Kapangulohan mitudlo mahitungod sa dugang nga mga gasa nga gihatag sa Langitnong Amahan ngadto sa mga babaye aron matabangan sila sa pagtuman sa ilang sagradong tawag sa pag-amuma:

Presidente Henry B. Eyring

Isip anak nga mga babaye sa Dios, kamo adunay natural ug dako nga kapasidad nga mobati sa panginahanglan sa uban ug sa paghigugma. Kana, sa ingon, makahimo kaninyo nga sensitibo sa mga paghunghong sa Espiritu. Ang Espiritu mahimo dayon nga mogiya kon unsa ang inyong mahunahunaan, unsa ang inyong isulti, ug unsa ang inyong buhaton aron sa pag-amuma sa mga tawo aron ang Ginoo makabu-b[o] og kahibalo, kamatuoran, ug kais[o]g ngadto kanila. (“Kababayen-an ug Pagkat-on sa Ebanghelyo diha sa Panimalay,” Liahona, Nob. 2018, 59)

usa ka inahan nga nag-ampo uban sa iyang anak nga lalaki

Ang ubang mga babaye tingali nabalaka nga dili kaayo sila maayo sa pag-amuma. Sama sa tanang gasa sa Dios, ang pag-amuma nagkinahanglan og praktis ug tabang gikan sa langit aron mapalambo ug magamit sa tukma nga paagi. Si Jesukristo mao ang hingpit nga ehemplo sa pag-amuma. Sama sa Iyang gipakita, ang pag-amuma dili managsama sa matag sitwasyon. Siya maloloy-on ug matinud-anon sa Iyang pagtabang sa uban aron molambo.

icon, pagtuon

Pagtuon agi og Pagpangandam alang sa Klase

Uban sa tabang sa Balaang Espiritu, ang mga babaye (ug mga lalaki) makakat-on sa pag-amuma sama sa gihimo sa Manluluwas. Pagpili og usa o duha sa mosunod nga mga tudling nga naghatag og mga ehemplo sa pag-amuma gikan sa kinabuhi sa Manluluwas. Pangitaa ang unsay imong makat-onan gikan Niya mahitungod sa pag-amuma.

• Mateo 14:14–21

• Marcos 10:13–16

• Lucas 10:38–42

• Juan 13:4–17

Unsa ang imong mahunahunaan nga ubang mga ehemplo sa Manluluwas sa pag-amuma sa uban?

icon, pamalandong

Pamalandong agi og Pagpangandam alang sa Klase

Kanus-a ka nakadawat og sama kang Kristo, makapadasig nga pag-amuma sa usa ka babaye? Ikonsiderar kon unsaon kaha nimo sa pagpaningkamot nga mapalambo kining sama kang Kristo nga kinaiya diha sa imong kinabuhi.

Seksiyon 3

Unsa ang kalainan nga mahimo sa mga inahan diha sa plano sa Langitnong Amahan?

Ang pipila sa mga babaye tingali adunay mga pagduhaduha mahitungod sa pagbaton og mga anak. Ang ilang mga pagduhaduha mas madugangan tungod sa mga gisulti sa katilingban nga nakapakunhod o gani nagbiaybiay sa kaimportante sa pagkainahan. Hunahunaa kon sa unsang paagi nga ang pagsabot sa kaimportante sa mga inahan diha sa plano sa Langitnong Amahan makatabang nimo nga isalikway kini o ang susama nga mga kinaiya ug mga pamatasan.

Si Presidente Nelson mipasabot, “Kamong mga sister gipili na sa wala pa ang katuk[o]ran sa kalib[o]tan sa pagpanamkon ug pag-atiman sa mga anak sa Dios; sa pagbuhat sa ingon, inyong gihimaya ang Dios” (“Unsay Inyong Pilion?,” Liahona, Ene. 2015, 31).

Si Elder D. Todd Christofferson sa Korum sa Napulog Duha ka Apostoles mitudlo kon sa unsang paagi nga ang pagpanganak makapadayon sa plano sa Langitnong Amahan:

Elder D. Todd Christofferson

Ang pinakasagrado mao ang papel sa usa ka babaye sa pagmugna og tawo. Nahibalo kita nga ang atong lawas dunay balaanong kagikan [tan-awa sa Moises 2:27] ug kita kinahanglang dunay pisikal nga pagkahimugso ug espirituhanong pagpakatawo pag-usab aron makab-ot ang kinatas-ang luna sa celestial nga gingharian sa Dios [tan-awa sa Moises 6:57–60]. Sa ingon, ang babaye nagdala sa importanting papel, (usahay morisgo sa kaugalingon nilang kinabuhi) sa buhat ug himaya sa Dios “sa pagpahinabo sa pagka-imortal ug kinabuhing dayon sa tawo” [Moises 1:39]. (“Ang Moral nga Impluwens[i]ya sa mga Babaye,” Liahona, Nob. 2013, 30)

usa ka inahan nga mihalok sa iyang masuso nga anak

Kalabot sa mga paagi nga ang mga babaye nakapanalangin og mga kinabuhi diha sa ilang pagtuman sa ilang tahas sa pagkainahan, si Elder Christofferson mitudlo:

Elder D. Todd Christofferson

Ang inahan makaimpluwens[i]ya nga dili matupngan sa ubang tawo o sa bisan unsang relasyon. Pinaagi sa gah[o]m sa iyang ehemplo ug pagtudlo, makakat-on ang iyang mga anak nga motah[o]d sa pagkababaye ug ilakip ang disiplina ug taas nga mga sumbanang moral sa ilang kinabuhi. Ang anak niyang mga babaye makakat-on sa pag-ugmad og kaugalingon nilang hiyas ug balik-balik nga mobar[o]g sa unsay husto, bisan yam-iran. Ang gugma sa inahan ug taas nga ekspektasyon mogiya sa iyang mga anak alang sa responsabling buhat nga dili mangita og rason, magsery[o]so sa edukasyon ug personal nga kalamboan, ug padayon nga motampo sa kaayohan sa tanang naglib[o]t kanila. (“Ang Moral nga Impluwens[i]ya sa mga Babaye,” 30)

Si Sister Marriott mitudlo usab mahitungod sa gamhanang impluwensiya sa mga inahan:

Sister Neill F. Marriott

Nagtuo ko nga ang “pagka-inahan” nagpasab[o]t sa “paghatag og kinabuhi.” Hunahunaa ang daghang mga paagi nga kamo naghatag og kinabuhi. Mahimong nagpasab[o]t kini sa paghatag og emosy[o]nal nga kinabuhi sa walay pagla[o]m o espirituhanong kinabuhi sa maduhaduhaon. Uban sa tabang sa Espiritu Santo, makamugna kita og makaayo nga dapit alang sa wala mauy[o]ni, sa sinalikway, ug sa estranghero. Niining malumo apan impluwens[i]yal nga mga paagi, nagtukod kita sa gingharian sa Dios. (“Unsay Atong Buhaton?,” 11)

Seed of Faith [Liso sa Hugot nga Pagtuo], ni Jay Bryant Ward

icon, pagtuon

Pagtuon agi og Pagpangandam alang sa Klase

Ang asoy sa Basahon ni Mormon bahin sa batan-ong mga manggugubat usa ka ehemplo kon unsa gayod ang impluwensiya sa matarong nga mga ginikanan. Basaha ang Alma 56:45–48; 57:21–26, nga mangita sa kalainan nga mahimo sa mga paningkamot sa inahan sa ilang mga anak diha nila, sa katilingban, ug sa kalibotan.

Samtang magbasa ka sa mosunod nga pagpamatuod nga gipaambit ni Presidente Julie B. Beck, kanhi Kinatibuk-ang Presidente sa Relief Society, ikonsiderar ang impluwensiya sa mga babaye nga mipasidungog sa ilang balaanong misyon ngadto sa inahan:

Presidente Julie B. Beck

Walay kinut[o]ban kon unsa ang makab-ot sa usa ka babaye nga adunay kasingkasing sa usa ka inahan. Ang matar[o]ng nga mga babaye nakapausab sa dagan sa kasaysayan ug mopadayon sa pagbuhat sa ingon, ug ang ilang impluwens[i]ya mokatap ug molambo pag-ayo hangt[o]d sa mga kahangt[o]ran. Mapasalamaton kaayo ko sa Ginoo alang sa pagsalig sa babaye og balaang misyon sa pagkainahan. (“‘Kasingkasing sa Usa ka Inahan,’” Liahona, Mayo 2004, 77)

icon, buhat

Paglihok

Ikonsiderar ang pagsulat ug pagpadala og mubo nga sulat sa pasalamat ngadto sa usa ka inahan o gipakasama nga inahan kansang maamumahon nga impluwensiya nakapanalangin sa imong kinabuhi.

Gusto pa og Dugang? (Opsiyonal)

Unsaon nako sa pagpanalipod ang balaanong tahas sa pagkainahan?

Presidente Bonnie L. Oscarson

Basaha kon giunsa pagpanalipod sa usa ka inahan ang tahas sa pagkainahan diha sa istorya nga gisaysay ni Presidente Bonnie L. Oscarson, kanhi kinatibuk-ang Presidente sa Young Women, diha sa pakigpulong nga “Mga Tigpanalipod sa Pamahayag bahin sa Pamilya” (Liahona, Mayo 2015, 16).

Asa pa ko makakat-on og dugang mahitungod sa impluwensiya nga mahimo sa matarong nga mga inahan?

Aron makat-on mahitungod sa ehemplo sa impluwensiya sa matarong nga inahan diha sa uban, mahimo nimong basahon ang mahitungod ni Lucy Mack Smith diha sa kapitulo 1, “Pangayo uban sa Hugot nga Pagtuo,” sa Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 5–12.

Unsa ang mahatag nga kadasig alang sa mga inahan nga mibati nga dili angayan?

Ang Iyang mga pagtulon-an mao ang gamhanang pahinumdom nga ang mga inahan mga kapares sa Dios ug sila makadangop ngadto Niya alang sa tabang sa pagtuman sa ilang sagradong tahas ug mga responsibilidad.