Leksiyon 17 Materyal sa Magtutudlo

Patas nga Panag-uban diha sa Kaminyoon

Gikan sa panahon ni Adan ug ni Eva, tumong sa Ginoo nga ang mga bana ug mga asawa mahimong managkauban diha sa kaminyoon. Ang buhing mga propeta mimatuod niini nga baroganan sa atong panahon. Niini nga leksiyon, ang mga estudyante makabaton og oportunidad sa pagpasabot sa mga pagtulon-an sa ebanghelyo mahitungod sa patas nga panag-uban diha sa kaminyoon ug pagdumala diha sa pamilya. Ang mga estudyante pagadapiton usab sa pagtino unsay ilang mahimo aron adunay patas nga panag-uban diha sa kaminyoon.

Mga Sugyot alang sa Pagtudlo

Ang mga bana ug mga asawa kinahanglan nga mahimong managkauban diha sa kaminyoon.

Ikonsiderar ang pagsugod sa leksiyon pinaagi sa pagpakita o pag-apod-apod og mga kopya sa mosunod nga pamahayag ni Presidente Jean B. Bingham, Kinatibuk-ang Presidente sa Relief Society. Hangyoa ang mga estudyante sa pagbasa sa pamahayag, mangita kon sa unsa nga paagi ang kaaway naningkamot sa paglaglag sa mga kaminyoon ug sa mga pamilya.

Si Lucifer nakahibalo nga kon iyang maguba ang gibati nga panaghiusa sa mga lalaki ug babaye, kon siya makapalib[o]g nato sa atong balaang bili ug mga responsibilidad sa pakigsaad, siya magmalamp[o]son sa paglaglag sa mga pamilya, nga mao ang importanting mga [y]unit sa kahangt[o]ran.

Si Satanas nag-agni og panagtandi isip usa ka himan nga mobati nga mas taas o mas ubos, nagtago sa mahangt[o]rong kamatuoran nga ang kalainan sa mga lalaki ug babaye tinuyo sa Dios ug parehang gihatagan og bili. … Ang iyang tumong mao ang pag-awhag og pakigbisog sa gah[o]m kay sa pagsaulog sa talagsaong mga kontribusyon sa mga lalaki ug mga babaye nga nagsangkap sa usag usa ug nakasalmot sa panaghiusa. (“Nagkahiusa sa Pagtuman sa Buhat sa Dios,” Liahona, Mayo 2020, 60–61)

• Unsa nga mga hagit ang moabot sa usa ka kaminyoon kon ang bana o asawa mobati nga mas ubos o mas taas ngadto sa usa?

Rebyoha ang Moises 3:18, 21–23 uban sa mga estudyante, ug pangutana:

• Unsay atong makat-onan gikan sa pamaagi sa paghulagway sa Ginoo sa pisikal nga paglalang ni Eva, sumala sa narekord niini nga asoy? (Kon gikinahanglan, giyahe ang mga estudyante ngadto sa mga pagpasabot sa mga lider niining tudling sa kasulatan diha sa seksiyon 1 sa materyal sa pagpangandam. Tabangi ang mga estudyante sa pag-ila sa kamatuoran sama sa mosunod: Diha sa kaminyoon, ang Langitnong Amahan buot nga ang bana ug asawa magtinabangay sa usag usa isip managkauban.)

Aron matabangan ang mga estudyante nga dugang nga makasabot niini nga kamatuoran, ikonsiderar ang pagpakita sa pipila ka mga aytem nga adunay mahimo kon parison. Kini nga mga aytem mahimong maglakip sa duha ka suwab sa parisan nga gunting, usa ka tinidor ug kutsilyo, usa ka instrumento sa musika nga nagkinahanglan og duha ka bahin aron motukar (sama sa bayolin), parisan sa sapatos o gwantis, parisan sa ear buds o mga headphone, ug uban pa. Dapita ang mga estudyante sa paghunahuna unsa ang mahitabo kon sila mogamit lang sa usa ka bahin sa parisan aron mahuman ang ilang buluhaton.

• Sa unsang paagi nga kini nga mga aytem sama sa bana ug asawa nga nagtambayayong?

• Unsa nga mga panalangin ang moabot sa usa ka kaminyoon kon ang bana ug asawa mosalig ug mosuporta sa usag usa isip managkauban?

Pagpalambo sa Atong Pagtudlo ug Pagkat-on

Dawata ang mga tubag sa mga estudyante sa positibo nga mga paagi. Kon ang usa ka estudyante mohatag og tubag, dawata kini sa positibo nga paagi. Kini mahimo nga usa ka yano nga “pasalamat” o komentaryo mahitungod sa tubag. Ang pagbuhat sa ingon makatabang sa mga estudyante nga mobati nga gipaminaw ug gihatagan og bili. Kining positibo nga tubag makatabang sa mga estudyante nga mobati nga mas komportable nga mopaambit og mga tubag, mga panabot, ug mga kasinatian sa umaabot.

Pahinumdomi ang mga estudyante nga sila mibasa diha sa materyal sa pagpangandam nga ang Ginoo mitudlo og talagsaon nga mga responsibilidad ngadto sa mga bana ug mga asawa diha sa pamilya nga “managsama og bili ug importansya” (Quentin L. Cook, “Dakong Gugma alang sa mga Anak sa Atong Amahan,” Liahona, Mayo 2019, 79). Sa samang paagi, ang mga propeta mitudlo, “Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).

Mahimong imong hisgotan nga ang pipila niini nga mga responsibilidad pagahisgotan sa umaabot nga mga leksiyon. Apan aron sa pagsugod og hisgot sa usa ka ehemplo, ipakita ang mosunod nga kamatuoran: “Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatar[o]ng ” (“Ang Pamilya: Usa ka Pamahayag ngadto sa Kalib[o]tan”).

• Unsaon nimo sa pagpasabot kon unsay gipasabot sa pagpangulo diha sa gugma ug pagkamatarong? Unsa sa imong hunahuna ang atong makat-onan mahitungod sa pagpangulo gikan sa ehemplo sa Manluluwas? (Kon gikinahanglan, rebyoha uban sa mga estudyante ang pamahayag gikan sa Kinatibuk-ang Tamdanan nga Basahon ug ang pamahayag ni Presidente Ezra Taft Benson sa seksiyon 2 sa materyal sa pagpangandam.)

Pahinumdomi ang mga estudyante nga ang Doktrina ug mga Pakigsaad 121:41–43 nag-ila og pipila ka Kristohanon nga mga hiyas nga may labot sa matarong nga pagdumala sa pamilya. Hangyoa ang mga estudyante sa pagrebyo niini nga tudling ug unsay ilang gisulat agig tubag sa kalihokan sa “Irekord ang Inyong mga Hunahuna” diha sa seksiyon 2 sa materyal sa pagpangandam. Dapita ang pipila ka estudyante sa pagpaambit kon unsa ang ilang gisulat ngadto sa klase. Dayon ikonsiderar ang mosunod nga pangutana:

• Unsa nga mga ehemplo sa managkauban ug matarong nga pagdumala sa pamilya ang inyong nakita ug nadungog?

Ang mga bana ug mga asawa kinahanglan nga magtinambagay sa paghimo og mga desisyon alang sa ilang mga pamilya.

Ang mosunod nga senaryo gidesinyo aron matabangan ang mga estudyante nga maanalisar ang ilang pagsabot sa patas nga panag-uban diha sa kaminyoon ug pagdumala sa pamilya. (Ikonsiderar kon unsaon nimo sa paggamit kini nga sitwasyon kon angay aron mas makapakita sa inyong kultura o sa pagtubag sa bisan unsa nga piho nga mga panginahanglan nga tingali anaa ang imong mga estudyante.)

Magtambayayong isip usa ka klase o sa gagmay nga mga grupo, rebyoha ang mosunod nga senaryo, ug hisgoti ang mga pangutana sa kataposan sa handout.

Istorya ni Nicolas ug Elena

Materyal sa Magtutudlo sa Ang Mahangtoron nga Pamilya—Leksiyon 17

Si Nicolas ug Elena malipayon nga naminyo sulod sa 10 ka tuig ug adunay tulo ka anak. Silang duha gusto nga ang ilang pamilya maestablisar diha sa pundasyon ni Jesukristo ug sa Iyang ebanghelyo, ug silang duha naningkamot sa pagtuman sa ilang balaan nga gitudlo nga mga responsibilidad sa pamilya.

Sama sa ubang minyo nga mga magtiayon, si Nicolas ug Elena adunay mga panagsumpaki. Ang ilang mga panagsumpaki sa kasagaran mahitungod sa kwarta. Si Nicolas nagtrabaho nga full time sa gawas sa panimalay. Si Elena makahimo sa pag-atiman sa ilang mga anak ug pagdumala sa ilang panimalay nga full time, agig dugang sa panagsa nga pagtrabaho sa ginagmay nga mga trabahoon. Si Nicolas nagtuo nga ang iyang tahas sa pagdumala sa panimalay, ingon man nga mao ang adunay mas dakong kinitaan nga kwarta, nagpasabot nga siya ang adunay kataposan nga paghukom kon unsaon sa paggasto ang kwarta. Si Elena mibati nga siya kinahanglan nga mas adunay gahom sa mga desisyon nga maglakip sa mga anak tungod kay siya mas nag-uban kanila kay ni Nicolas. Usahay sa nangagi, nga dili mosulti ni Nicolas, siya migasto sa ilang kwarta sa paagi nga gusto niya.

Si Nicolas ug Elena bag-o lang naghisgot unsay buhaton sa gamay nga kwarta nga ilang natigom. Si Nicolas gusto nga gamiton kini aron ipalit og sakyanan aron mas makapasayon kini alang niya nga moadto sa trabahoan ug alang sa pagbiyahe-biyahe sa ilang pamilya. Si Elena gusto nga mogamit sa kwarta aron dad-on ang mga anak sa usa ka pagbakasyon sa pagbisita sa ilang mga paryente ug maglingaw-lingaw sa dili pa managko ang mga bata.

Ang panagsumpaki ni Nicolas ug Elena nakapabalaka kanila, apan kinahanglan nga himoon ang usa ka desisyon.

• Unsay inyong ikasulti nga mao ang labing dako nga hagit nga giatubang ni Nicolas ug Elena sa paghukom unsay buhaton sa kwarta?

• Unsa sa inyong hunahuna nga ilang gikinahanglan aron mas makasabot mahitungod sa pagkamanagkauban ug pagdumala kalabot sa paghimo og mga desisyon alang sa ilang pamilya? (Tan-awa sa seksiyon 3 sa materyal sa pagpangandam.)

• Kon kamo si Nicolas o Elena, unsaon ninyo sa pagduol ang inyong kapikas aron magtinambagay mahitungod niini nga desisyon sa Kristohanong paagi?

© 2022 pinaagi sa Intellectual Reserve, Inc. All rights reserved.

Istorya ni Nicolas ug Elena

Human ang mga estudyante adunay igong panahon sa paghisgot sa senaryo, mahimo kang mangutana:

• Sa unsa nga paagi nga ang pagtinambagay diha sa pagkamatarong makapanalangin sa mga magtiayon ug sa ilang mga anak?

Sa pagtapos, ipakita ang mosunod nga mga pangutana, ug hatagi ang mga estudyante og igong panahon nga hilom nga mamalandong ug morekord sa bisan unsa nga mga impresyon nga ilang madawat.

• Unsa nga Kristohanong kinaiya, hiyas, o praktis ang akong mapalambo o mapalig-on aron sa pagtabang nako nga makapasiugda og pagkamanagkauban diha sa akong kaminyoon? Unsaon nako sa pagpangayo og tabang sa Ginoo sa akong mga paningkamot?

Alang sa Sunod nga Higayon

Sultihi ang mga estudyante nga sa kasagaran ang dakong problema sa mga magtiayon samtang ilang ikonsiderar ang kaminyoon ug ang mga anak mao kon unsaon nila nga makahimo sa paghatag sa ilang pinansyal nga mga panginahanglan. Awhaga ang mga estudyante sa pagtuon sa mainampoong paagi sa materyal sa pagpangandam alang sa sunod nga leksiyon ug sa pagpaminaw sa mga pag-aghat nga makatabang nila sa paghimo og maalamon nga pinansyal nga mga pagpili ug mahimong mas makabarog pinaagi sa kinaugalingon nga paningkamot.