Leksiyon 18 Materyal sa Pagpangandam sa Klase: Pagsangkap alang sa Temporal nga mga Panginahanglan
“Leksiyon 18 Materyal sa Pagpangandam sa Klase: Pagsangkap alang sa Temporal nga mga Panginahanglan,” Materyal sa Magtutudlo sa Ang Mahangtoron nga Pamilya (2022)
“Leksiyon 18 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
usa ka bag-ong pamilya nalingaw nga magkaubang nanihapon
Leksiyon 18 Materyal sa Pagpangandam sa Klase
Pagsangkap alang sa Temporal nga mga Panginahanglan
Ang Ginoo nagpakabana mahitungod sa atong temporal, o pisikal, nga kaayohan. Siya mipadayag og mga kamatuoran nga makatabang nimo sa pagsangkap sa pisikal nga mga panginahanglan sa imong kaugalingon ug sa imong pamilya diha sa mga paagi nga makatabang usab nimo nga molambo sa espirituhanong paagi. Samtang magtuon ka niini nga materyal, ikonsiderar kon unsaon kaha nimo nga mas magamit kini nga mga kamatuoran.
Seksiyon 1
Unsa ang akong responsibilidad sa pagsangkap alang sa temporal nga mga panginahanglan sa akong pamilya?
Wala madugay human mapahiuli ang Simbahan ni Jesukristo, ang Ginoo mipadayag sa pipila ka temporal nga mga responsibilidad sa mga miyembro sa Simbahan.
Pinaagi sa mga propeta sa Ulahing mga Adlaw, gipamatud-an pag-usab sa Ginoo nga “ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatar[o]ng, [ug] sa pagsangkap alang sa ilang pisikal ug espirituhanon nga mga panginahanglan” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).
Aron matuman kini nga katungdanan sa pagsangkap alang sa pisikal nga mga panginahanglan sa ilang mga anak, ang mga ginikanan kinahanglan gayod nga magkat-on nga mahimong makabarog pinaagi sa kinaugalingong paningkamot. Ang pagbarog pinaagi sa kinaugalingong paningkamot usa ka mahinungdanong baroganan sa ebanghelyo. Kini mao “ang abilidad, pasalig, ug paningkamot sa pagsangkap sa mga kinahanglanon sa kinabuhi alang sa kaugalingon ug sa pamilya” (Pagsangkap Pinaagi sa Pamaagi sa Ginoo: Katingbanan sa Giya sa Usa ka Lider alang sa Welfare [2009], 1).
Si Elder Robert D. Hales sa Korum sa Napulog Duha ka Apostoles mitudlo sa mosunod nga mga baroganan mahitungod sa pagbarog pinaagi sa kinaugalingong paningkamot:
Imahe
Elder Robert D. Hales
Ang pagpaningkamot sa kaugalingon mao ang pag-angkon og responsibilidad alang sa atong kaugalingon nga espiritwal ug temporal nga kaayohan ug alang niadtong mga gisalig kanato sa Langitnong Amahan nga atong ampingan. Diha lamang sa pagpaningkamot sa atong kaugalingon nga kita mahimong matinud-anon nga makasunod sa Manluluwas sa pagpangalagad ug pagpanalangin sa uban.
Importante nga masabtan nga ang pagpaningkamot sa kaugalingon usa ka pamaagi aron makab-ot ang usa ka katuyoan. Ang atong katap[o]sang tumong mao ang pagkahimong sama sa Manluluwas, ug kana nga tumong gipadako pinaagi sa atong dili hinakog nga pagserbisyo ngadto sa uban. Ang atong abilidad sa pag-alagad mahimong mapadako o mapagamay pinaagi sa matang sa atong pagka mapaningkam[o]ton sa kaugalingon. (“Usa ka Panglantaw sa Ebanghelyo mahitungod sa Welfare: Hugot nga Pagtuo Inubanan sa Lihok,” diha sa Sukaranang mga Bar[o]ganan sa Welfare ug Pagpaningkamot sa Kaugalingon [tibuok kalibotan nga miting sa pagbansay sa pagpangulo, 2009], 1–2; tan-awa usab sa ChurchofJesusChrist.org)
Ikonsiderar ang kaimportante sa mosunod nga instruksiyon mahitungod sa pagbarog pinaagi sa kinaugalingong paningkamot:
Kon kamo mapaningkam[o]ton sa kaugalingon, gamiton ninyo ang mga panalangin ug mga abilidad nga gihatag sa Dios kaninyo aron sa pag-atiman sa inyong kaugalingon ug sa inyong pamilya ug sa pagpangita og mga solusyon sa inyong kaugalingong mga problema. Ang pagpaningkamot sa kaugalingon wala magpasab[o]t nga kamo kinahanglang makahimo sa tanang mga butang nga kamo ra. Aron mahimong tinuoray nga mapaningkam[o]ton sa kaugalingon, kinahanglan kamong makat-on kon unsaon sa pakig-uban og trabaho sa lain ug moduol sa Ginoo alang sa Iyang tabang ug kalig-on. (Alang sa Kalig-on sa mga Kabatan-onan [booklet, 2011], 41)
Si Presidente Spencer W. Kimball mitudlo, “Walay matinud-anon nga Santos sa Ulahing mga Adlaw, nga samtang makahimo pa sa pisikal ug emosyonal nga paagi ang b[o]luntaryo nga motugyan sa responsibilidad sa pag-atiman sa iyaha mismo o sa iyang pamilya ngadto sa uban” (Mga Pagtul[o]n-an sa mga Presidente sa Simbahan: Spencer W. Kimball [2006], 146; tan-awa usab sa 1 Timoteo 5:8). Hibaloi nga ang Ginoo motabang nimo sa imong mga paningkamot nga mahimong makabarog pinaagi sa kinaugalingong paningkamot. Si Jesukristo mitudlo nga “pinaagi sa [Iyang] kaalam,” ang Simbahan mahimong “mobar[o]g ibabaw sa tanan” sa temporal ug sa espirituhanong paagi (Doktrina ug mga Pakigsaad 78:14). Ingon usab niana, ang Manluluwas “pinaagi sa [Iyang] kaalam” makatabang usab nimo nga mahimong makabarog pinaagi sa kinaugalingong paningkamot ug makasangkap alang sa imong kaugalingon ug sa imong pamilya.
Imahe
icon, pamalandong
Pamalandong agi og Pagpangandam alang sa Klase
Unsa ang imong mga hunahuna o mga pagbati mahitungod sa responsibilidad sa pagsangkap sa temporal nga mga panginahanglan sa imong pamilya?
Seksiyon 2
Unsa ang makatabang nako nga mapalambo ang pagbarog pinaagi sa kinaugalingong paningkamot ug mahimong mas maayong tigsangkap?
Ang kinaiya sa makugihong pagtrabaho mahinungdanon sa pagpalambo sa pagbarog pinaagi sa kinaugalingong paningkamot ug pagsangkap sa atong mga pamilya. Sa sinugdanan uban ni Adan, ang atong Langitnong Amahan misugo sa Iyang mga anak sa pagtrabaho (tan-awa sa Moises 4:25, 29; 2 Mga Taga-Tesalonica 3:10–13). Ang pagtrabaho og maayo ug kakugi mao ang mga kinaiya sa Dios ug niadtong naningkamot sa pagsunod Niya (tan-awa sa 2 Nephi 5:17; Mosiah 27:3–4).
Si Elder D. Todd Christofferson sa Korum sa Napulog Duha ka Apostoles mipasabot sa kaimportante sa pagtrabaho og maayo sa dihang mitudlo siya:
Imahe
Elder D. Todd Christofferson
Ang Dios midesinyo niining mortal nga kinabuhi nga nagkinahanglan og kanunay nga paningkamot. … Pinaagi sa pagtrabaho kita makapatunhay ug makapalambo sa kinabuhi. Kini makaluwas kanato sa mga kasagmuyo ug mga trahedya sa mortal nga kasinatian. Ang gihagoan pag-ayo nga kalamp[o]san makahatag og bili sa kaugalingon. Ang pagtrabaho makatukod ug makahas-has sa kinaiya, makamugna og katah[o]m, ug mao ang instrumento sa atong pagserbisyo sa usag usa ug sa Dios. Ang gipahinungod nga kinabuhi puno sa buhat, usahay balik-balik, usahay mapaubsanon, usahay wala mahatagi og bili apan kanunayng nagbuhat niadtong makapalambo, makapatunhay, makapabayaw, makapangalagad, makapadasig. (“Mga Hulagway sa Gipahinungod nga Kinabuhi,” Liahona, Nob. 2010, 17)
Agi og dugang ngadto sa responsibilidad ang mga ginikanan kinahanglang “[mo]sangkap alang sa ilang [mga anak] sa pisikal ug espirituhanon nga mga panginahanglan,” “pinaagi sa balaan nga plano, ang mga amahan … may kapangakohan sa pagsangkap sa mga kinahanglanon sa kinabuhi … sa ilang mga pamilya” (“Ang Pamilya: Usa ka Pamahayag ngadto sa Kalib[o]tan”). Si Elder Christofferson miawhag niadtong nangandam nga mahimong mga amahan sa dihang miingon siya:
Imahe
Elder D. Todd Christofferson
Pangandam karon pinaagi sa pagkugi sa eskwelahan ug pagplano sa pagpadayon human sa high school. Ang edukasyon, sa unibersidad, teknikal nga eskwelahan, apprenticeship, o susama nga programa, mahinungdanon sa pagpalambo og mga kahanas ug mga kapabilidad nga inyo unyang kinahanglanon. (“Mga Amahan,” Liahona, Mayo 2016, 96)
Ang tambag sa pagtinguha og edukasyon importante alang sa tanang disipulo ni Jesukristo. Ang Ginoo mipahimangno nato nga “pangita[on] ang pagtul[o]n-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118; tan-awa usab sa Doktrina ug mga Pakigsaad 90:15). Kalabot niini nga responsibilidad, si Presidente Russell M. Nelson mitudlo:
Imahe
Presidente Russell M. Nelson
Tungod sa atong sagradong pagtagad sa matag salabotan sa tawo, atong gikonsiderar ang pag-angkon og edukasyon nga usa ka relihiyosong responsibilidad. … Ang atong Tiglalang naglaom sa Iyang mga anak bisan asa sa pag-edukar sa ilang kaugalingon. (“Where Is Wisdom?,” Ensign, Nob. 1992, 6)
Ikonsiderar ang ubang potensyal nga mga panalangin sa edukasyon nga labaw pa sa pagtabang nato aron mas makasangkap alang sa pinansyal nga mga panginahanglan sa atong pamilya. Ang pag-angkon og edukasyon makahatag og personal nga katumanan ug makatabang nato nga matubag ang gilaoman sa Ginoo sa pagpalambo ug paggamit sa mga gasa ug mga abilidad nga Iyang gihatag nato (tan-awa sa Mateo 25:14–30). Ang pag-angkon og edukasyon makapalambo sa atong abilidad sa pagdumala sa mga hagit sa kinabuhi. Ang edukasyon modugang usab sa atong kapasidad sa pagserbisyo sa uban ug sa pagtukod sa gingharian sa Ginoo.
Si Presidente Thomas S. Monson mitudlo:
Imahe
Presidente Thomas S. Monson
Ang inyong mga talento modako samtang kamo magtuon ug magkat-on. Kamo mas makatabang sa inyong mga pamilya sa ilang pagkat-on, ug kamo makabaton og kalinaw sa hunahuna nga makahibalo nga kamo andam sa inyong mga kaugalingon alang sa mga kalisdanan nga moab[o]t sa inyong kinabuhi. (“Tulo ka mga Tumong nga Mogiya Kaninyo,” Liahona, Nob. 2007, 119)
Sa pipila ka sitwasyon, tungod sa kamatayon o diborsyo o ubang makataronganon nga mga kahimtang, ang inahan kinahanglan gayod nga mosangkap alang sa pamilya (tan-awa sa parapo [paragraph] 7 sa pamahayag bahin sa pamilya). Sa ubang mga sitwasyon, ang duha ka ginikanan kinahanglang magtrabaho sa pagtabang nga matubag ang nag-unang mga panginahanglan sa ilang pamilya. Si Presidente M. Russell Ballard sa Korum sa Napulog Duha ka Apostoles mihatag og usa ka importante nga pasidaan ug makatabang nga tambag sa paghimo og mga desisyon kalabot sa mga ginikanan nga parehong nagtrabaho:
Imahe
Presidente M. Russell Ballard
Karon adunay hilabihan nga pagpamugos [pressure] sa atong kalib[o]tan nga hilig kaayo sa materyal nga butang aron makaangkon ug mogasto og mas daghan pa nga kwarta. Sa walay palad, nakapaaghat kini sa minyo nga mga inahan sa pagtrabaho gawas sa panimalay aron makahatag og dugang kita. Samtang ang mga bana, mga asawa, ug mga anak nakaila sa kalainan tali sa sukaranang mga panginahanglan ug materyal nga mga kagustohan, makapaminos sila sa pinansyal nga mga kabug-aton ug makasalmot sa pagtabang sa mga inahan nga magpabilin sa panimalay. Ang mga desisyon kabahin sa pagtrabaho gawas sa panimalay lis[o]d gay[o]d ug kinahanglan nga pagahimoon sa mainampoong paagi, nga kanunayng maghunahuna sa tambag sa buhi nga mga propeta kalab[ot] niining komplikado nga hilisg[o]tan. (“Ang Sagradong mga Responsibilidad sa mga Ginikanan,” Liahona, Mar. 2006, 15; tan-awa usab sa Alma 37:37)
Imahe
icon, pamalandong
Pamalandong agi og Pagpangandam alang sa Klase
Sa unsang paagi nga ang Ginoo nakatabang nimo, o sa unsang paagi nga Siya makatabang nimo, sa pagpalambo og kinaiya sa makugihong pagtrabaho o pag-angkon og dugang pa nga edukasyon?
Seksiyon 3
Unsa nga pinansyal nga mga baroganan ang makagiya nako sa pagsangkap alang sa akong pamilya?
Ang yuta Iya sa Ginoo (tan-awa sa Psalm 24:1). Siya mihatag nato og gahom ug paagi nga makagamit sa yutan-on nga mga kapanguhaan aron sa pagsangkap alang sa atong temporal ug espirituhanong mga panginahanglan (tan-awa sa Deuteronomio 8:10, 18; Doktrina ug mga Pakigsaad 59:18–20). Ngadto sa Ginoo, ang tanang butang espirituhanon, bisan ang Iyang temporal nga mga balaod (tan-awa sa Doktrina ug mga Pakigsaad 29:34). Nasayod siya sa mga panalangin ug sa espirituhanong mga risgo nga nag-uban sa pagtinguha ug pag-angkon og kwarta ug mga kabtangan. Mipadayag Siya og mga baroganan aron sa pagtabang nato nga madumala kini nga mga kapanguhaan diha sa mga paagi nga makapanalangin ug makapanalipod nato isip mga indibidwal ug mga pamilya.
Pagpili bisan duha lang sa mosunod nga mga tudling sa kasulatan, o pangita og duha sa imong kaugalingon, ug ilha ang mga baroganan bahin sa maalamong pagdumala sa pinansyal nga gitudlo niini. Tambong sa klase nga andam sa paghisgot sa unsay imong nadiskobre.
Isulat ang pipila ka maalamong mga pagpili nga imong nahimo sa pagsangkap alang sa imong temporal nga mga panginahanglan, ingon man sa pipila ka paagi nga sa imong pamati imong mapalambo diha sa imong mga paningkamot sa pagsangkap alang sa imong temporal nga mga panginahanglan.
