“Leksiyon 3: Materyal sa Pagpangandam sa Klase: Atong Balaang Kinaiyahan ug Padulngan,” Materyal sa Magtutudlo sa Ang Mahangtoron nga Pamilya (2022)
“Leksiyon 3 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Leksiyon 3 Materyal sa Pagpangandam sa Klase
Atong Balaang Kinaiyahan ug Padulngan
Ang pipila sa labing importanting mga pangutana nga kita aduna sa kinabuhi kalabot ngadto sa atong gigikanan ug padulngan––kinsa gayod kita sa tinuod ug unsa ang atong mga potensyal. Samtang kamo nagtuon niini nga leksiyon, hunahunaa kon giunsa ninyo pagtagad ang inyong kaugalingon ug giunsa ninyo pagtagad ang uban. Unsaon niini pagkausab kon kamo sa kanunay maghinumdom sa inyong balaang kinaiyahan ug padulngan?
Seksiyon 1
Kinsa ako?
Gitudlo ni Propeta Joseph Smith, “Kon ang mga tawo dili makasab[o]t sa kinaiya sa Dios, sila wala makasab[o]t sa ilang kaugalingon” (Mga Pagtulun-an sa mga Presidente sa Simbahan: Joseph Smith [2007], 46–47). Nagtanyag ang mga kasulatan og gamhanang pagpamatuod kon kinsa ang Dios ug unsa ang atong relasyon ngadto Kaniya.
Pagtuon agi og Pagpangandam alang sa Klase
Basaha ang Mga Buhat 17:29, Mga Hebreohanon 12:9, ug 1 Juan 3:2, mangita kon kinsa ang Dios ug unsa ang atong makat-onan mahitungod sa atong relasyon ngadto Kaniya.
Si Presidente Dieter F. Uchtdorf, nga kaniadto diha sa Unang Kapangulohan, mitudlo niini mahitungod sa atong relasyon ngadto sa Dios:
Kita gilalang sa Labawng Makagagahum nga Dios. Siya ang atong Langitnong Amahan. Kita sa literal Iyang mga anak sa espiritu. Kita gihimo sa langitnon nga materyal nga bililhon ug lunsay kaayo, ug mao nga nagdala kita sa atong kaugalingon og diosnon nga kinaiya.
Dinhi sa kalibutan, hinoon, ang atong mga hunahuna ug mga buhat mahimong negatibong maimpluwensyahan nianang dunot, dili balaan, ug mahugaw. Ang kahugaw sa kalibutan makapamansa sa atong mga kalag, naghatag nato og kalisud sa pag-ila ug paghinumdom sa atong panulundon ug katuyoan.
Apan kining tanan dili makapausab kon kinsa gayud kita. Ang labing mahinungdanon nga pagkadiosnon sa atong kinaiya magpabilin. (“Dieter F. Uchtdorf, “Pas-anon Ka Niya sa Iyang Abaga ug Dad-on Pauli,“ Liahona, Mayo 2016, 104)
Ang mga propeta ug apostoles nanghimatuod nga “tanan nga mga tawo—lalaki ug babaye—gilalang diha sa hitsura sa Dios. Ang matag usa kanato hinigugmang espiritu nga anak nga lalaki o babaye sa langitnong mga ginikanan” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Hunahunaa kon sa unsa nga paagi ang mosunod nga mga pagtulon-an makadugang sa inyong pagsabot sa inyong langitnong mga ginikanan:
Ang tanan nga mga lalaki ug babaye may pagkasama sa tibuok kalib[o]tan nga Amahan ug Inahan ug literal nga mga anak sa Dios. …
Ang tawo, isip espiritu, gipanamkon ug natawo sa langitnong mga ginikanan, ug gimatuto ngadto sa pagkahingkod diha sa mahangturong mga mansyon sa Amahan, sa wala pa moanhi dinhi sa yuta sulod sa usa ka temporal [yutan-on] nga lawas. (“Gospel Classics: The Origin of Man,” Ensign, Peb. 2002, 29, 30)
Si Presidente Harold B. Lee mipahayag, “Kita nakalimot nga kita adunay Langitnong Amahan ug Langitnong Inahan kinsa mas nabalaka, tingali, kay sa atong yutan-ong amahan ug inahan, ug kanang mga impluwensya gikan sa halayo kanunay nga naglihok sa pagpaninguha sa pagtabang kanato kon atong buhaton ang tanan nga kita makahimo” [Harold B. Lee, “The Influence and Responsibility of Women,” Relief Society Magazine, Peb. 1964, 85]. (Gospel Topics [Mga Hilisgotan sa Ebanghelyo], “Mother in Heaven [Inahan sa Langit],” topics.ChurchofJesusChrist.org)
Si Presidente M. Russell Ballard sa Korum sa Napulog Duha ka Apostoles mitudlo usab, “Una ug labaw sa tanan, ikaw karon ug sa kanunay mahimong usa ka espiritung anak sa Dios” (“Children of Heavenly Father [Mga Anak sa Langitnong Amahan]” [debosyonal sa Brigham Young University, Mar. 3, 2020], 2, speeches.byu.edu). Gitudlo ni Presidente Uchtdorf nga ang kamatuoran nga kita tinuoray nga espiritu nga mga anak sa Dios “kinahanglang makausab sa atong pagtan-aw sa atong mga kaugalingon, sa atong kaigsoonan, ug sa kinabuhi mismo” (“Upat ka Tawag,” Liahona, Mayo 2013, 58).
Irekord ang Imong mga Hunahuna
Sa inyong kwaderno o note-taking nga app, tubaga ang usa o mas daghan pa sa mosunod nga mga pangutana:
-
Unsaon ang pagsabot sa atong balaang kinaiyahan pag-apekto kon unsaon nato pagtagad ang atong mga kaugalingon ug ang uban? Kanus-a kamo dihay kasinatian diin nakahimo kamo sa pagpalabay sa daotang pamatasan o linihokan sa usa ka tawo ug nakita ang ilang balaang kinaiyahan?
-
Unsa ang pipila ka mga ehemplo gikan sa kinabuhi sa Manluluwas nga nagpakita nga Siya misabot sa balaang kinaiyahan sa uban? Sa unsa nga mga paagi kaha kamo mas maayong mosunod Kaniya diha sa paagi nga kamo nagtratar sa uban?
Pag-andam sa pagpakigbahin og pipila sa inyong mga hunahuna diha sa klase.
Seksiyon 2
Unsa ang mahimong kalainan -nga makahibalo nga ako anak sa Dios?
Hunahunaa ang mosunod nga pamahayag ni Sister Michelle D. Craig, usa ka magtatambag sa Kinatibuk-ang Kapangulohan sa Young Women:
Kon daghan kamong nasabtan sa inyong tinuod nga pagkatawo ug katuyoan, lig-on kaayo nga pagsab[o]t, mas makaimpluwensya kini sa tanan sa inyong kinabuhi. (“Mata aron sa Pagtan-aw,” Liahona, Nob. 2020, 16)
Usa ka kasinatian ni Moises human makigsulti sa Dios nga nag-atubangay ug nagkat-on sa iyang balaang kinaiyahan naghulagway sa gahom kini nga kahibalo aduna alang kanato.
Pagtuon agi og Pagpangandam alang sa Klase
Basaha ang Moises 1:3–6, 12–16, mangita kon sa unsang paagi nahatagan og gahom si Moises pinaagi sa pagdawat sa iyang balaang kinaiyahan.
Moises nagbuntog sa mga tentasyon ni Satanas
Pamalandong agi og Pagpangandam alang sa Klase
Paghunahuna og maayo mahitungod kon unsaon sa pagsabot sa inyong balaang pagkaginikanan ug kinaiyahan sa pagtabang kaninyo sa pagsalikway sa mga bakak ug mga tentasyon sa kaaway.
Seksiyon 3
Unsa ang akong balaang padulngan?
Hunahunaa kon unsa ka daghan ang inyong nakat-onan ug tinuboan sa milabay nga 10 ka tuig. Isip mga anak sa usa ka langitnong mga ginikanan, kamo adunay dili katoohang kapasidad alang sa pagtubo. Sa tinuod, kamo adunay balaang padulngan. (Tan-awa sa “Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org.)
Pagtuon agi og Pagpangandam alang sa Klase
Basaha ang Mga Taga-Roma 8:16–17, mangita kon unsay gitudlo ni Apostol Pablo mahitungod sa atong balaang padulngan.
Ang usa ka isigkamanununod mao ang usa ka tawo kinsa nagdawat og managsama nga kabilin ngadto sa ubang mga manununod. Isip ang unang natawo ug bugtong hingpit nga Anak sa Langitnong Amahan, kini katungod ni Jesukristo sa pagpanunod sa tanan nga ang Amahan aduna. Kadtong kinsa masulundon ug makadawat sa hingpit nga mga panalangin sa Pag-ula sa Manluluwas makapanunod usab sa tanan nga ang Amahan aduna (tan-awa sa Mga Taga-Roma 8:14–18; Mga Taga-Galacia 3:26–29; Doktrina ug mga Pakigsaad 93:21–22). Kini nagpasabot nga tanan kanato adunay potensyal nga mahimong sama sa atong Langitnong Amahan.
Mitabang si Presidente Russell M. Nelson sa pagpatin-aw kon unsa ang kahulogan sa atong balaang padulngan:
Mangandam kita alang sa atong kaugalingon nga balaang padulngan—himaya, pagka-imortal, ug kinabuhing dayon. Kining langitnong mga panalangin mahimong maato ang tanan, pinaagi sa atong pagkamatinud-anon. (“The Creation,” Ensign, Mayo 2000, 86)
Sa mosunod nga mga leksiyon, inyong makat-unan og dugang pa ang mahitungod kon giunsa ni Jesukristo paghimo niini nga posible alang kanato sa pagkab-ot sa atong balaang padulngan isip mga manununod sa kinabuhing dayon. Ingon sa gitudlo ni Presidente Uchtdorf, kini gihimo usa ka lakang sa matag higayon:
Nakakita kita sa usa ka bata nga nagkat-on og lakaw. Molakang siya og ginagmay ug mobarag. Siya matumba. Kasab-an ba nato tungod niana? Siyempre dili. Unsang klaseha sa amahan ang mosilot sa bata tungod kay natumba? Kita modasig, mopakpak, ug modayeg, kay sa ginagmay nga lakang, ang bata mas mahisama sa iyang ginikanan.
… Kon itandi ang pagkahingpit sa Dios, kitang mortal morag susama ra sa bakikaw, katumbahon nga mga bata. Apan ang Langitnong Amahan gusto nga kita mahisama Niya, ug, … kana mao usab unta ang atong mahangturong tumong. Ang Dios nakasab[o]t nga makaab[o]t kita didto dili diha-diha dayon apan pinaagi sa usa ka lakang sa matag higayon. (“Upat ka Tawag,” Liahona, Mayo 2013, 58)
Pamalandong agi og Pagpangandam alang sa Klase
Giunsa pag-usab sa pamahayag ni Presidente Uchtdorf ang inyong pagtan-aw sa inyong katumbahon, nga mga lakang sama sa gamay nga bata? Sa unsa nga mga paagi kamo makadapit sa Ginoo sa pagtabang kaninyo sa pagpadayon ngadto sa unahan?