1 Manje kwakusemtsetfweni waMosiya kutsi wonkhe umuntfu lobekangumehluleli wemtsetfo, noma labo labebabekwe kutsi babe behluleli, batfole inkhokhelo ngekwesikhatsi leso labebasisebentile kwehlulela labo labebaletfwe phambi kwabo kutsi behlulelwe.

2 Manje uma umuntfu akweleta lomunye, futsi ala kubhadala loko lakukweletako, bekamangalelwa kumehluleli; bese umehluleli usebentisa ligunya, atfumele tindvuna kutsi loyo muntfu aletfwe phambi kwakhe; bese yena wehlulela lomuntfu ngekwemtsetfo kanye nangebufakazi lobo lobabuletfwa ngalokumelene naye, futsi ngaleyo ndlela umuntfu bekaphoceleleka kutsi abhadale loko lakukweletako, noma emukwe loko lanako, noma alahlwe ngaphandle aphume emkhatsini webantfu njengelisela nesigebengu.

3 Bese umehluleli utfola inkhokhelo yakhe ngekwesikhatsi sakhe—isenine yeligolide ngelusuku, noma isenumu yesiliva, lelingana nesenine yeligolide; futsi loku kwakwentiwa ngekwemtsetfo lobekiwe.

4 Manje lawa ngemagama etinhlobo letehlukene tetincetu teligolide labo, kanye nesiliva yabo, ngekwelinani lato. Futsi emagama anikwa ngemaNefi, ngoba wona awatange abale ngendlela yemaJuda labekaseJerusalema; noma alinganise ngendlela yemaJuda; kodvwa wona akugucula kubala kanye nekulinganisa kwawo, ngekwemicondvo kanye netimo tebantfu, kuto tonkhe titukulwane, kwate kwaba kubusa kwebehluleli, bona bamiswe yinkhosi Mosiya.

5 Manje kubala kukanje—isenine yeligolide, isiyoni yeligolide, ishumu yeligolide, kanye nelimna yeligolide.

6 Isenumu yesiliva, i-aminori yesiliva, i-eziromu yesiliva, kanye ne-onthi yesiliva.

7 Isenumu yesiliva yayilingana nesenine yeligolide, futsi kona ngakunye kwakungangesilinganiso sebhali, ngetulu kwaloko kwakungangesilinganiso sayo yonkhe inhlobo yalokuyinhlavu.

8 Manje linani lesiyoni yeligolide laliphindvwa kabili kulo linani lesenine.

9 Futsi ishumu yeligolide yayiphindvwa kabili kulo linani lesiyoni.

10 Futsi iIimna yeligolide yayilinani lako konkhe.

11 Futsi i-aminori yesiliva yayiyinkhulu ngangemasenumu lamabili.

12 Futsi i-eziromu yesiliva yayiyinkhulu ngangemasenumu lamane.

13 Futsi i-onthi yayiyinkhulu ngetulu kwato tonkhe.

14 Manje loku linani lesibalo lesincane sekubala kwabo—

15 Ishibiloni yincenye yesenumu; ngako-ke, ishibiloni ingangencenye yesilinganiso sebhali.

16 Ishibilumu iyincenye yeshibiloni.

17 I-liya iyincenye yeshibilumu.

18 Manje sibalo sabo lesi, ngekwekubala kwabo.

19 Manje i-anthiyoni yeligolide ilingana nemashibiloni lamatsatfu,

20 Manje, loku kwakungenhloso yekutsi bazuze nje kuphela, ngenca yekutsi bebatfola inkhokhelo yabo ngekusebenta kwabo, ngako-ke, babaphehla bantfu kutsi kube khona lutfutfuva, kanye nayo yonkhe inhlobo yekuphatamiseka kanye nenkhohlakalo, kute babe nemsebenti lomningi, batfole imali ngekwemacala labekaletfwa kubo; ngako-ke babaphehla bantfu ngalokumelene na-Alima kanye na-Amulekhi.

21 Futsi lo Zeziromu wacala kubuta Amulekhi, watsi: Ungangiphendvula yini imibuto lemibalwa lengitawuyibuta kuwe na? Manje Zeziromu bekayindvodza lenguchwephesha emachingeni adeveli, kute abhubhise loko lokwakukuhle; ngako-ke, watsi ku-Amulekhi: Ungayiphendvula yini imibuto lengitawuyibhekisa kuwe na?

22 Futsi Amulekhi watsi kuye: Yebo, uma kungekwakaMoya weNkhosi, lokimi; ngoba angeke ngisho lutfo loluphambene naMoya weNkhosi. Futsi Zeziromu watsi kuye: Buka, nankha ema-onthi lasitfupha esiliva, futsi onkhe lawa ngitawukunika wona uma nje ungaphika bukhona baloNgetulu Kwakokonkhe.

23 Manje Amulekhi watsi: Awu mntfwana wesihogo, ungilingelani na? Awati yini kutsi labalungile abatinikeli etilingweni letinjengaleti na?

24 Uyakholwa yini kutsi Nkulunkulu kute na? Ngitsi kuwe, Cha, uyati kutsi Nkulunkulu ukhona, kodvwa utsandza leyo mali kakhulu kunaye.

25 Manje ucambe emanga kimi phambi kwaNkulunkulu. Utsite kimi—Buka lama-onthi lasitfupha, langelinani lelikhulu, ngitawukunika wona—ube wati kahle enhlitiyweni yakho kutsi utawuwagodla unganginiki; futsi bekusifiso sakho nje kuphela kutsi mine ngiphike Nkulunkulu weliciniso nalophilako, kute ube nesizatfu sekungibulala. Manje buka, ngenca yalobubi lobukhulu utawutfola umvuzo wakho.

26 Futsi Zeziromu watsi kuye: Utsi ukhona Nkulunkulu weliciniso nalophilako na?

27 Futsi Amulekhi watsi: Yebo, ukhona Nkulunkulu weliciniso futsi lophilako.

28 Manje Zeziromu watsi: Ngabe bakhona yini labanye ngaphandle kwaNkulunkulu munye na?

29 Waphendvula watsi, Cha.

30 Manje Zeziromu waphindze watsi kuye: Utati kanjani leti tintfo na?

31 Watsi: Ingilosi ingatise tona.

32 Zeziromu waphindze watsi: Ngubani yena lona loyawuta na? Ngabe yiNdvodzana yaNkulunkulu?

33 Watsi kuye, Yebo.

34 Zeziromu waphindze watsi: Ngabe uyawubasindzisa yini bantfu bakhe etonweni tabo na? Amulekhi waphendvula futsi watsi kuye: Ngitsi kuwe angeke, ngoba akakwati kutsi aphikise livi lakhe.

35 Manje Zeziromu watsi kubantfu: Bonani kutsi niyatikhumbula leti tintfo; ngoba utse munye kuphela Nkulunkulu; kodvwa futsi utse iNdvodzana yaNkulunkulu iyawukuta, kodvwa angeke ibasindzise bantfu bayo—usho shengatsi uneligunya lekuyaleta Nkulunkulu.

36 Manje Amulekhi waphindze watsi kuye: Buka ucamba emanga, ngoba utsi ngikhulume shengatsi ngineligunya lekuyaleta Nkulunkulu ngoba ngitse angeke abasindzise bantfu bakhe etonweni tabo.

37 Futsi ngiyaphindza ngitsi kuwe angeke abasindzise etonweni tabo; ngoba angeke ngiliphikise livi lakhe, futsi utse kute intfo lengcolile lengadla lifa lembuso welizulu; ngako-ke, ningasindziswa kanjani, ngaphandle kwekutsi nidle lifa lembuso welizulu na? Ngako-ke angeke nisindziswe nisetonweni tenu.

38 Manje Zeziromu waphindze watsi kuye: Ngabe iNdvodzana yaNkulunkulu ngiyo cobolwayo yini Babe longunaPhakadze?

39 Futsi Amulekhi watsi kuye: Yebo, inguye kanye Babe longunaPhakadze welizulu nemhlaba, kanye nato tonkhe tintfo letikuwo; isicalo kanye nesiphetfo, yekucala neyekugcina.

40 Futsi iyawukuta emhlabeni kutawuhlenga bantfu bayo; iyawutfwala tiphambuko talabo labakholwa egameni layo; futsi ngibo labo labayawukuba nekuphila lokuphakadze, futsi insindziso ayiti kulomunye.

41 Ngako-ke lababi bayawuhlala shengatsi akutange kube khona kuhlengwa lokwentiwe, ngaphandle kwekutsi kube kucekiswa kwetibopho tekufa; ngoba bukani, lusuku luyeta lapho bonkhe bayawuvuka ekufeni baphindze beme phambi kwaNkulunkulu, behlulelwe ngekwemisebenti yabo.

42 Manje, kukhona kufa lokubitwa ngekutsi kufa kwesikhashana; kufa kwaKhristu kuyawucekisa tibopho taloku kufa kwesikhashana, kute bonkhe bavuswe ekufeni kwesikhashana.

43 Umoya kanye nemtimba kuyawuhlanganiswa futsi kube sesimeni sako lesiphelele; titfo kanye nemalunga kuyawubuyiselwa esicwini sako lesiphelele, njengoba sinje manje kulesi sikhatsi; futsi siyawuletfwa sime phambi kwaNkulunkulu, sati njengaloku sati manje, futsi siyawuwakhumbula ngalokucacile onkhe emacala etfu.

44 Manje, loku kubuyiselwa kuyawukuta kubo bonkhe bantfu, lomdzala kanye nalomncane, loboshiwe nalokhululekile, wesilisa newesifazane, lababi nalabalungile; futsi kute nalunye lunwele lwetinhloko tabo loluyawulahleka; kodvwa tonkhe tintfo tiyawubuyiselwa esicwini sato lesiphelele, njengoba kunjalo manje, noma emtimbeni, futsi tiyawuletfwa tibekwe licala phambi kwesihlalo saKhristu iNdvodzana, kanye naNkulunkulu Babe, kanye neMoya loNgcwele, longuNkulunkulu munye waPhakadze, kute tehlulelwe ngekwemisebenti yato, noma ngabe mihle noma ngabe mibi.

45 Manje, bukani, sengikhulumile kini mayelana nekufa kwemtimba lobhubhako, futsi ngalokunjalo nangekuvuka kwemtimba lobhubhako. Ngitsi kini lomtimba lobhubhako uvuselwa emtimbeni longabhubhi, lokungukutsi usuka ekufeni kusukela ekufeni kwekucala kuya ekuphileni, kute ingabe isafa futsi; imimoya yabo ihlangana nemitimba yabo, ingaphindzi yehlukaniswe futsi; ngaleyondlela konkhe kube ngumtimba wemoya kanye nalongabhubhi, kute ingabe isakubona futsi kubola.

46 Manje, ngesikhatsi Amulekhi asacedzile kusho lamavi bantfu bacala futsi kumangala, ngalokunjalo naZeziromu wacala kuchachatela. Aphela kanjalo emavi a-Amulekhi, noma nguloku kuphela lengikubhalile.