1 Futsi kwenteka kutsi emvakwekutsi sekacedzile kukhuluma kubantfu labaningi babo bakholelwa emavini akhe, bacala kuphendvuka, kanye nekuphenya imibhalo lengcwele.

2 Kodvwa incenye leningi yabo beyinesifiso sekubabulala bo-Alima na-Amulekhi; ngoba bebamtfukutselele Alima, ngenca yekucondza kwemavi akhe lawakhuluma kuZeziromu; futsi batsi Amulekhi ucambe emanga kubo, wadzelela nemtsetfo wabo futsi ngalokunjalo netatimtsetfo tabo kanye nebehluleli babo.

3 Ngetulu kwaloko bebamtfukutselele Alima na-Amulekhi; ngenca yekutsi bebafakaze ngalokusobala kakhulu macondzana nebubi babo, bafuna kubabulala ngansense.

4 Kodvwa kwenteka kutsi abakwentanga loko; kodvwa babatsatsa bababopha ngetintsambo leticinile, babatsatsa babayisa embikwemehluleli lomkhulu welive.

5 Nebantfu beta ngembili bafakaza ngalokumelene nabo—bafakaza kutsi badzelele bamelana nemtsetfo, netatimtsetfo tabo kanye nebehluleli belive, ngalokunjalo nabo bonkhe bantfu labebaseveni; ngetulu kwaloko bafakaza ngekutsi kukhona Nkulunkulu loyedvwa kuphela, nekutsi uyawutfumela iNdvodzana yakhe emkhatsini webantfu, kodvwa yena akayukubasindzisa; futsi tiningi tintfo letifana naleti bantfu labafakaza ngato nga-Alima kanye nanga-Amulekhi. Manje loku kwentiwa ngaphambi kwemehluleli lomkhulu welive.

6 Futsi kwenteka kutsi Zeziromu wamangala ngalamavi labekakhulunyiwe; ngetulu kwaloko bekati mayelana nebumphumphutse betingcondvo, lebekabentile emkhatsini webantfu ngemavi akhe enkhohliso; futsi umphefumulo wakhe wacala kukhatsateka ngaphansi kwanembeza welicala lakhe; yebo, wacala kutungeleta buhlungu besihogo.

7 Futsi kwenteka kutsi wacala wamemeta kubantfu, watsi: Bukani, nginelicala, futsi lamadvodza ete sici phambi kwaNkulunkulu. Wacala kubancengela kusukela ngaleso sikhatsi kuya phambili; kodvwa bamtfuka, batsi: Ngabe nawe sewubanjwe ngudeveli na? Bamkhafulela ngematse, bamcosha waphuma emkhatsini wabo, futsi ngalokunjalo nabo bonkhe labo labebakholelwa emavini labekakhulunywe ngu-Alima kanye na-Amulekhi; nabo bacoshwa bakhishelwa ngaphandle, futsi batfumela bantfu kutsi babagandze ngematje.

8 Baletsa bafati babo kanye nebantfwana babo ndzawonye, kanye nabo bonkhe labebakholelwa noma labebafundziswe kutsi bakholelwe evini laNkulunkulu benta kutsi bafakwe emlilweni; ngetulu kwaloko baletsa imibhalo yabo lebeyicuketse imibhalo lengcwele, nayo bayiphonsa emlilweni futsi, kute nayo ishiswe futsi ishabalaliswe ngemlilo.

9 Futsi kwenteka kutsi batsatsa Alima kanye na-Amulekhi, babatfwala babayisa endzaweni yekubulala labafela lukholo, kute batibonele kubhujiswa kwalabo labebashiswa ngemlilo.

10 Futsi ngesikhatsi Amulekhi abona buhlungu bebesifazane kanye nebebantfwana labebasha emlilweni, naye ngalokunjalo waba nebuhlungu; watsi ku-Alima: singasibukela kanjani lesi sento lesibuhlungu kangaka na? Ngako-ke aselule tandla tetfu, sisebentise emandla aNkulunkulu lakitsi, sibasindzise emalangabini.

11 Kodvwa Alima watsi kuye: Moya uyangiphocelela kutsi ngingaseluli sandla sami; ngoba buka iNkhosi iyabemukela ngetulu kuyo, enkhatimulweni, futsi ibavumele kutsi bayente lentfo, noma kutsi bantfu bayente lentfo kubo, njengebulukhuni betinhlitiyo tabo, kute kutsi kwehlulela leyawukwenta etikwabo entfukutselweni yayo kube ngulokulungile; futsi ingati yalabangenacala iyawuma njengebufakazi ngalokumelene nabo, yebo, futsi ikhale kakhulu ngalokumelene nabo ngelusuku lwekugcina.

12 Manje Amulekhi watsi ku-Alima: Buka, mhlawumbe batawusishisa natsi futsi.

13 Alima watsi: Akube njengentsandvo yeNkhosi. Kodvwa, buka, umsebenti wetfu awukapheli; ngako-ke ngeke basishise.

14 Manje kwenteka kutsi ngesikhatsi imitimba yalabo labebaphonswe emlilweni seyishile, ngalokunjalo nemibhalo lebeyiphonswe kanye nabo, umehluleli lomkhulu welive weta wema embikwa-Alima kanye na-Amulekhi, ngesikhatsi basaboshiwe; wabashaya ngemphama etihlatsini tabo, watsi kubo: emvakwaloku lesenikubonile, nisetawuphindze futsi nishumayele kulaba bantfu, kutsi bayawuphoswa echibini lemlilo kanye nesibabuli na?

15 Bukani, niyabona kutsi anikabi nemandla ekubasindzisa labo labebaphonswe emlilweni; ngisho naNkulunkulu akabasindzisi ngenca yekutsi bebabelukholo lwenu. Futsi umehluleli waphindza wabashaya etihlatsini tabo, wabuta watsi: Nitsini?

16 Manje lomehluleli bekaweluhlelo kanye nenkholo yaNehori, lowabulala Gideyoni.

17 Futsi kwenteka kutsi Alima na-Amulekhi abatange baphendvule; waphindza wabashaya, wase ubanika tindvuna kutsi baphonswe ejele.

18 Ngesikhatsi sebaphonswe ejele tinsuku letintsatfu, kwafika letiningi tatimtsetfo, nebehluleli, nebaphritsi, kanye nebafundzisi, labebabenkholo yaNehori; beta bangena ejele kutobabona, bababuta ngemavi lamaningi; kodvwa abatange babaphendvule.

19 Futsi kwenteka kutsi umehluleli wema ngaphambi kwabo, watsi: kungani ningawaphendvuli emavi alabantfu na? Anati yini kutsi nginemandla ekutsi ngininikele emalangabini? Futsi wabayaleta kutsi bakhulume; kodvwa abaphendvulanga lutfo.

20 Futsi kwenteka kutsi besuka bahamba ngetindlela tabo, kodvwa baphindza babuya ngakusasa; umehluleli waphindza wabashaya futsi etihlatsini. Labaningi beta ngembili, babashaya, batsi: Nisengaphindza futsi nime nehlulele laba bantfu, niphindze nisole umtsetfo wetfu na? Uma ninemandla lamakhulu kangaka pho kuya ngani ningatikhululi na?

21 Futsi tiningi tintfo letinjengaleti labatisho kubo, bagedletelisa ematinyo abo kubo, babakhafulela nangematse, batsi: Siyawubukeka kanjani uma sesilahliwe na?

22 Tiningi tintfo letinjena labatisho, yebo, tonkhe tinhlobo tetintfo letinjalo batikhuluma kubo; futsi ngaleyondlela bahlekisa ngabo tinsuku letiningi. Babancisha kudla kute balambe, nemanti kute bome; futsi babakhumula tingubo tabo kute babe ngcunu; ngaleyondlela baboshwa ngetintsambo leticinile, bavalelwa ejele.

23 Futsi kwenteka emvakwekutsi sebahlushwe ngalendlela tinsuku letiningi, (futsi bekungelusuku lwelishumi nakubili, enyangeni yelishumi, emnyakeni welishumi wekubusa kwebehluleli ngetulu kwebantfu baNefi) kutsi umehluleli lomkhulu eveni la-Amoniha kanye nalabaningi bebafundzisi babo kanye netatimtsetfo tabo bahamba bayongena ejele lapho Alima na-Amulekhi bebaboshwe khona ngetintsambo.

24 Umehluleli lomkhulu wema embikwabo, waphindza wabashaya, watsi kubo: Uma ninemandla aNkulunkulu tikhululeni kuleti tibopho, sitawukholwa kutsi iNkhosi itawubabulala labantfu ngekwemavi enu.

25 Futsi kwenteka kutsi bonkhe bahamba bayawubashaya, basho emavi lafanako, kwate kwafika kuwekugcina; ngesikhatsi lowekugcina sekakhulumile kubo emandla aNkulunkulu aba etikwa-Alima na-Amulekhi, baphakama bema ngetinyawo tabo.

26 Alima wamemeta watsi: Kuyawute kube nini sihlushwa nguleti tinhlupheko letinkhulu kangaka, Awu Nkhosi? Awu Nkhosi, siphe emandla ngekwelukholo lwetfu lolukuKhristu, nangalokwanele kutsi sikhululwe. Batidzabula tintsambo labebaboshwe ngato; ngesikhatsi bantfu bakubona loku, bacala babaleka, ngoba besaba, ngoba kubhujiswa bese kufike etikwabo.

27 Futsi kwenteka kutsi kwaba kukhulu kakhulu kwesaba kwabo kangangekutsi bawela phansi, futsi abawutfolanga umnyango loya ngaphandle kwelijele; kwatamatama kakhulu phansi, tindvonga telijele tachekeka kabili, kangangekutsi tawela phansi; umehluleli lomkhulu, netatimtsetfo, nebaphristi, kanye nebafundzisi, labebashaya Alima na-Amulekhi, babulawa kuwa kwato.

28 Alima kanye na-Amulekhi baphuma ejele, futsi bebangakalimali; ngoba iNkhosi beyibanike emandla, ngekwelukholo lwabo lebelukuKhristu. Futsi khona lapho baphuma ejele; bakhululwa etibopheni tabo, lijele bese liwele phansi, kanye nabo bonkhe bantfu labebangekhatsi kwetindvonga talo babulawa, ngaphandle kwa-Alima na Amulekhi; futsi khona lapho baphuma baya edolobheni.

29 Manje bantfu sebeve umsindvo lomkhulu beta bagijima babutsana ndzawonye ngeticuku bafuna kwati sizatfu sawo; ngesikhatsi babona Alima na-Amulekhi beta baphuma ejele, netindvonga talo setiwele phansi, bafikelwa kwesaba lokukhulu, babaleka phambi kwa-Alima ana-Amulekhi njengembuti ibaleka nelizinyane layo emabhubesini lamabili; babaleka kanjalo-ke phambi kwa-Alima na-Amulekhi.