Umlandvo wemadvodzana aMosiya, lalahla emalungelo awo embuso ngenca yelivi laNkulunkulu, ahamba akhuphukela eveni laNefi kuyawushumayela kumaLamani; tinhlupheko tawo kanye nekukhululwa kwawo—ngekwembhalo wa-Alima.
Utfolakala etahlukweni 17 kuya ku 27.
Sehluko 17
Emadvodzana aMosiya anemoya wekuphrofetha kanye newekwembulelwa—Ahamba tindlela tawo letehlukene kuyawumemetela livi kumaLamani—Amoni uya eveni la-Ishmayeli futsi uba yinceku yeNkhosi Lamonayi—Amoni usindzisa imfuyo yenkhosi futsi ubulala titsa tayo emantini aseSebhas. Emavesi 1–3, cishe ngemnyaka wa 77 ngaphambi kwekutalwa kwaKhristu; livesi 4, cishe ngemnyaka wa 91 kuya kuwa 77 ngaphambi kwekutalwa kwaKhristu; kanye nemavesi 5–39, cishe ngemnyaka wa 91 ngaphambi kwekutalwa kwaKhristu.
1 Manje kwenteka kutsi ngesikhatsi Alima ahamba esuka eveni laGideyoni aya ngaseningizimu, aya eveni laseManthi, buka, wamangala, asahlangana nemadvodzana aMosiya ahamba aya ngaseveni laseZarahemla.
2 Manje lamadvodzana aMosiya bekana-Alima ngesikhatsi ingilosi ifika kuye kwekucala; ngako-ke Alima watfokota kakhulu kubona bomnakabo; futsi lokwangeta kakhulu ekujabuleni kwakhe, bebasengibo bomnakabo eNkhosini; yebo, futsi bekasakhule acina elwatini lweliciniso; ngoba bekangemadvodza lanekucondza lokuphelele phindze besekayiphenyisisile imibhalo lengcwele ngekukhutsala, kute alati livi laNkulunkulu.
3 Kodvwa akusiko loku kuphela; besekatinikele ekuthandazeni lokukhulu, kanye nasekuzileni kudla; ngako-ke besekanamoya wekuphrofetha, kanye namoya wekwembulelwa, futsi kwakutsi uma afundzisa, abefundzisa ngemandla kanye nangeligunya laNkulunkulu.
4 Futsi bekafundzisa livi laNkulunkulu sikhatsi lesilishumi nakune seminyaka emkhatsini wemaLamani, asabe nemphumelelo lenkhulu ekuletseni labaningi ekulatini liciniso; yebo, ngemandla emavi awo labaningi baletfwa phambi kwelilati laNkulunkulu, kutsi babite ligama lakhe futsi bavume tono tabo phambi kwakhe.
5 Manje leti timo lahlangabetana nato ekuhambeni kwabo, ngoba aba netinhlupheko letiningi; ahlupheka kakhulu, emtimbeni kanye nasengcondvweni, njengendlala, koma kanye nekukhatsala, kanjalo nekuvivinywa ngekwakamoya.
6 Manje loku kuhamba kwawo: Sekamshiyile uyise, Mosiya, emnyakeni wekucala wekubusa kwebehluleli; awalile umbuso uyise bekanesifiso sekuwuniketa wona, ngetulu kwaloko loku kwakusifiso sebantfu;
7 Noko ahamba aphuma eveni laseZarahemla, atsatsa tinkemba tawo, netikhali tawo, butjoki bawo, nemicibisholo yawo, kanye netilingi tawo; loko akwenta kute atitfolele kudla ngesikhatsi asesehlane.
8 Ahamba kanjalo-ke aya ehlane kanye nesibalo lebekasikhetsile, kutsi bahambe bakhuphukele eveni laNefi, kute bayawushumayela livi laNkulunkulu kumaLamani.
9 Futsi kwenteka kutsi bahamba tinsuku letiningi ehlane, bazila kakhulu kudla bathandaza kakhulu kutsi iNkhosi ibaphe incenye yaMoya wayo kutsi uhambe nabo, futsi ahlale nabo, kute babe sikhali etandleni taNkulunkulu kutsi baletse, kube bekungenteka, bomnakabo, emaLamani, elwatini lweliciniso, elwatini lwebubi bemasiko aboyise, labekangakalungi.
10 Futsi kwenteka kutsi iNkhosi yabavakashela ngaMoya wayo, futsi yatsi kubo: Dvudvutekani. Badvudvuteka.
11 INkhosi yaphindze yatsi kubo: Hambani niye emkhatsini wemaLamani, bomnakenu, nimise livi lami; kodvwa nibe nekubeketela ekumeleni bulukhuni kanye netinhlupheko, kute nibonakalise tibonelo letinhle kubo ngami, futsi ngitawunenta sikhali etandleni tami kute kusindziswe bantfu labaningi.
12 Futsi kwenteka kutsi tinhlitiyo temadvodzana aMosiya, kanjalo nalabo labebanawo, tema sibindzi kutsi bachubekele phambili kuwo emaLamani kutsi bamemetele kuwo livi laNkulunkulu.
13 Futsi kwenteka kutsi ngesikhatsi sebafike eminceleni yelive lemaLamani, batehlukanisa bahamba ngamunye ngamunye, betsembele eNkhosini kutsi bebatophindze bahlangane futsi ekupheleni kwesivuno sabo; ngoba bebacabanga kutsi wawumkhulu lomsebenti labebatetfwese wona.
14 Futsi ecinisweni wawumkhulu, ngoba bebatetfwese kushumayela livi laNkulunkulu kubantfu labebayimidlwembe balukhuni futsi banesihluku; bantfu labebatfokotiswa kubulala emaNefi, kuwagebenga kanye nekuwaphanga; futsi tinhlitiyo tabo bebatibeke emcebeni, noma kulo ligolide, nesiliva, kanye nakumatje laligugu; kodvwa bebafuna kutitfola leti tintfo ngekubulala kanye nangekuphanga, kute bangatisebenteli ngetandla tabo lucobo.
15 Ngaleyondlela bebabantfu labavilaphako kakhulu, labaningi babo bebakhonta tithico, futsi sicalekiso saNkulunkulu sasiwele etikwabo ngenca yemasiko aboyise, nanoma tetsembiso teNkhosi tatelulelwe kubo uma baphendvuka.
16 Ngako-ke, loku kwakusizatfu lesenta kutsi emadvodzana aMosiya atetfwese lomsebenti, kute mhlawumbe abaletse ekuphendvukeni; kute mhlawumbe abaletse kutsi bati ngelisu lekuhlengwa.
17 Ngako-ke batehlukanisa lomunye kulomunye, bahamba baya emkhatsini wabo, wonkhe umuntfu ngamunye, ngekwelivi kanye nemandla aNkulunkulu lebekaniketwe kuye.
18 Manje Amoni angumholi emkhatsini wabo, noma-ke lokukanye wabasita, futsi wase uyesuka kubo, emvakwekutsi sekababusisile ngekwetikhundla tabo letehlukene, asabelene nabo ngelivi laNkulunkulu, asabasitile ngaphambi kwekuhamba kwakhe; futsi ngaleyondlela batsatsa tindlela tabo letehlekene kulo lonkhe live.
19 Futsi Amoni wahamba waya eveni la-Ishmayeli, live lelacanjwa ngemadvodzana a-Ishmayeli, nawo laba ngemaLamani.
20 Futsi ngesikhatsi Amoni angena eveni la-Ishmayeli, emaLamani amtsatsa futsi ambopha, njengoba kwakulisiko labo kutsi babophe onkhe emaNefi labekawele etandleni tawo, bese bayawatfwala bawayisa phambi kwenkhosi; futsi ngalokunjalo kwakuba yintsandvo yenkhosi kutsi ibabulale, noma ibagcine ekutfunjweni, noma ibaphonse ejele, noma ibacoshe baphume eveni layo, ngekwesifiso nangekwentsandvo yayo.
21 Ngalokunjalo Amoni wetfwalwa wayiswa phambi kwenkhosi leyayibusa eveni la-Ishmayeli; libito layo kwakunguLamonayi; futsi beyiyesitukulwane sa-Ishmayeli.
22 Futsi inkhosi yabuta Amoni kutsi ngabe bekusifiso sakhe yini kutsi ahlale eveni emkhatsini wemaLamani, noma emkhatsini webantfu bakhe.
23 Amoni watsi kuyo: Yebo, ngifisa kutsi ngihlale emkhatsini walaba bantfu kwesikhashana; yebo, mhlawumbe kute kube lusuku lwekufa kwami.
24 Futsi kwenteka kutsi inkhosi Lamonayi yatfokota kakhulu nga-Amoni, yenta kutsi tibopho takhe ticegiswe; futsi yayifuna nekutsi Amoni atsatse yinye yemadvodzakati ayo abe ngumkakhe.
25 Kodvwa Amoni watsi kuyo: Cha, kodvwa ngitawuba yinceku yakho. Ngako-ke Amoni waba yinceku yenkhosi Lamonayi. Futsi kwenteka kutsi wabekwa emkhatsini waletinye tinceku kutsi agadze imfuyo yaLamonayi, ngekwelisiko lemaLamani.
26 Emvakwekutsi sekasebentele inkhosi tinsuku letintsatfu, ngesikhatsi anetinceku letingemaLamani basahamba nemihlambi yabo baya endzaweni yemanti, leyayibitwa ngekutsi ngemanti aseSebhas, futsi onkhe emaLamani bekachuba imihlambi yawo lapho, kute itfole emanti—
27 Ngako-ke, ngesikhatsi Amoni kanye netinceku tenkhosi basachuba imihlambi yabo baya kuleyo ndzawo yemanti, buka, sibalo lesitsite semaLamani, labekadze anemihlambi yawo emantini, ema aphindze ahlakata imihlambi ya-Amoni netinceku tenkhosi, futsi ayihlakata kangangekutsi yabaleka ngetindlela letiningi.
28 Manje tinceku tenkhosi tacala kuvungama, titsi: Manje inkhosi itawusibulala, njengoba yenta kubomnaketfu ngenca yekutsi imihlambi yabo yayihlakatiwe ngebubi balamadvodza. Futsi tacala takhihla sililo lesikhulu, titsi: Bukani, imihlambi yetfu vele seyihlakatiwe.
29 Manje bakhihla sililo ngenca yekwesaba kubulawa. Manje ngesikhatsi Amoni akubona loku inhlitiyo yakhe yagcwala injabulo; ngoba, watsi, ngitawubakhombisa emandla ami laba balingani bami, noma emandla lakimi, ngekubuyisela lemihlambi enkhosini, kute ngizuze tinhlitiyo talaba balingani bami, kute ngibaholele ekukholweni emavini ami.
30 Manje, loku kwakuyimicabango ya-Amoni, ngesikhatsi abona tinhlupheko talabo labekababita ngekutsi bomnakabo.
31 Futsi kwenteka kutsi wabancenga ngemavi akhe, watsi: Bomnaketfu, manini sibindzi asihambeni siyawufuna imihlambi, futsi sitawuyigcogca ndzawonye siyibuyisele endzaweni yemanti; ngaleyondlela sitawuyigcinela inkhosi imihlambi yayo futsi ngeke isibulale.
32 Futsi kwenteka kutsi bahamba bayoyifuna imihlambi, bamlandzela Amoni, baphutfuma baya embili ngekushesha lokukhulu bayijikisa imihlambi yenkhosi, bayigcogca ndzawonye futsi endzaweni yemanti.
33 Futsi lawo madvodza aphindze ema kute ayihlakate imihlambi yabo; kodvwa Amoni watsi kubomnakabo: Tungeletani lemihlambi ndzawotonkhe kute ingabaleki; mine ngitawuhamba ngiyolwa nalamadvodza lahlakata imihlambi yetfu.
34 Ngako-ke, benta njengoba Amoni abebayaletile, yena wahamba waya ngembili wayawukulwa nalabo labebeme ngasemantini aseSebhas; futsi ngesibalo bebangasibo labancane.
35 Ngako-ke abamesabanga Amoni, ngoba bebacabanga kutsi munye wabo bekangambulala ngekwentsandvo yabo, ngoba bebangati kutsi iNkhosi yayimtsembisile Mosiya kutsi iyawuwakhulula emadvodzana akhe etandleni tawo; futsi bebangati lutfo mayelana neNkhosi; ngako-ke bebatfokota ekubhujisweni kwabomnakabo; futsi ngalesi sizatfu bema kute bahlakate imihlambi yenkhosi.
36 Kodvwa Amoni wema ngembili wacala kubashaya ngematje ngesilingi sakhe; yebo, ngemandla akhe lamakhulu wabajikijela ngematje; futsi ngaleyondlela wabulala linani lelitsite lawo kangangekutsi acala kwetfuswa ngemandla akhe; noko atfukutsela ngenca yekubulawa kwabomnakabo, futsi aphikelela afuna kutsi awe; ngako-ke, abona kutsi abengakhoni kumshaya ngematje awo, eta kuye netagila atombulala.
37 Kodvwa buka, wonkhe umuntfu lobekaphakamisa sagila sakhe kutsi ashaye Amoni, wamshaya wamsusa umkhono wakhe ngenkemba yakhe; ngoba wawamela emagalelo awo ngekuwashaya imikhono yawo ngeluhlangotsi lolukhaliphile lwenkemba yakhe, kangangekutsi acala kwetfuka, aphindze acala kumbalekela; yebo, futsi abengasiko lamancane ngekwesibalo; futsi wenta kutsi abaleke ngemandla emkhono wakhe.
38 Manje labasitfuba babo bese bawile ngesilingi, kodvwa akabulalanga namunye ngaphandle kwemholi wabo ngenkemba yakhe; futsi wabashaya wabancuma imikhono yabo labaningi labayiphakamisela kuye, futsi bebangasibo labambalwa.
39 Ngesikhasti asawachubile wawayisa khashane, wabuya futsi banatsisa imihlambi yabo bayibuyisela emadlelweni enkhosi, emvakwaloko bahamba baya enkhosini, betfwele imikhono leyayincunywe ngenkemba ya-Amoni, yalabo labebafuna kumbulala; yatfwalwa yayiswa enkhosini kutsi ibe bufakazi betintfo lebebatentile.