1 Futsi kwenteka kutsi emvakwetinsuku letimbili kanye nebusuku lobubili besebatowutsatsa umtimba wayo bawubeke ethuneni, lebebalentile ngenhloso yekungcwaba labafile babo.

2 Manje indlovukazi seyivile ngeludvumo lwa-Amoni, ngako-ke yatfumela inesifiso sekutsi ete kuyo.

3 Futsi kwenteka kutsi Amoni wenta njengoba ayaletiwe, futsi wahamba waya kuyo indlovukazi, anesifiso sekwati kutsi beyifuna kutsi ayenteleni.

4 Yatsi kuye: Tinceku temyeni wami tingatisile kutsi wena ungumphrofethi waNkulunkulu longcwele, nekutsi wena unemandla ekwenta imisebenti leminingi nalemikhulu ngeligama lakhe;

5 Ngako-ke, uma loku kunjalo, ngifuna kutsi uhambe ungene endlini ubone umyeni wami, ngoba seloku alele embhedzeni wakhe sikhatsi lesingangetinsuku letimbili kanye nebusuku lobubili; labanye batsi akafi, kodvwa labanye batsi sewufile nekutsi sewuyanuka, nekutsi sekufanele abekwe ethuneni; kodvwa ngekwami, kimi akanuki.

6 Manje, loku ngiko Amoni labekakufisa, ngoba bekati kutsi inkhosi Lamonayi yayingephansi kwemandla a-Nkulunkulu; bekati kutsi sihenco lesimnyama sekungakholwa sasisuswa engcondvweni yakhe, kukhanya lokwakhanyisa ingcondvo yakhe, lebekukukukhanya kwenkhatimulo yaNkulunkulu, lebekukukhanya lokumangalisako kwebuhle bakhe—yebo, loku kukhanya bekuletse injabulo lenkhulu emphefumulweni wakhe, lifu lebumnyama selisusiwe, nekutsi kukhanya kwekuphila lokuphakadze kwakukhanyisiwe emphefumulweni wakhe, yebo, bekati kutsi loku kwakusincobile sicu sakhe semvelo, futsi bekahlwitsiwe akuNkulunkulu.

7 Ngako-ke, loko indlovukazi leyayikufisa kuye kwakusifiso sakhe naye. Ngako-ke wangena wayawuyibona inkhosi njengoba indlovukazi yayikadze ifisile; wayibona inkhosi, futsi bekati kutsi beyingakafi.

8 Watsi kuyo indlovukazi: Ayikafi, kodvwa ilele kuNkulunkulu, itawuphindze ivuke kusasa; ngako-ke ningayingcwabi.

9 Amoni watsi kuyo: Uyakukholwa yini loku na? Yatsi kuye: Ngite fakazi ngaphandle kwelivi lakho, kanye nelivi letinceku tetfu; noko ngiyakholwa kutsi kutawuba njengoba ushito.

10 Amoni watsi kuyo: Ubusisiwe ngenca yelukholo lwakho lolukhulu; ngitsi kuwe; mfati, akukate kube khona lukholo lolukhulu kangaka emkhatsini wabo bonkhe bantfu bemaNefi.

11 Futsi kwenteka kutsi yawugadza umbhedze wemyeni wayo, kusukela ngaleso sikhatsi kwate kwaba nguleso sikhatsi sangakusasa Amoni abesishito kutsi itawuvuka ngaso.

12 Futsi kwenteka kutsi yavuka, njengekwemavi a-Amoni; ngesikhasti ivuka, yelula sandla sayo kuwesifazane, yatsi: Libusisiwe libito laNkulunkulu, futsi nawe ubusisiwe.

13 Ngoba njengoba ucinisekile ngekuphila kwakho, buka, ngimbonile uMhlengi wami; futsi uyawuta, uyawutalwa nguwesifazane, uyawuhlenga bonkhe bantfu labakholwa egameni lakhe. Manje ngesikhatsi seyiwashito lamavi, inhlitiyo yayo yakhukhumuka ngekhatsi kuyo, yaphindze yawa ngenca yenjabulo; indlovukazi nayo ngalokunjalo yawa phansi, yenganywe nguMoya.

14 Manje Amoni ambona Moya weNkhosi utselwa ngekwemithandazo yakhe etikwemaLamani, bomnakabo, labebayimbangela yekukhala lokukhulu kangaka emkhatsini wemaNefi, noma emkhatsini wabo bonkhe bantfu baNkulunkulu ngenca yebubi babo kanye nemasiko abo, wawa ngemadvolo akhe, wacala kuthandaza ngenshisekelo lenkhulu kanye nekubonga kuNkulunkulu ngaloko labekakwentele bomnakabo; naye ngalokunjalo wenganywa yinjabulo; ngenca yaloko bonkhe bobatsatfu bawela phansi.

15 Manje, ngesikhatsi tinceku tenkhosi setibonile kutsi bebawile, nato ngalokunjalo tacala kukhala kuNkulunkulu, ngoba kwesaba iNkhosi kwase kufikile nakuto ngalokunjalo, ngoba kwakungito lebetime phambi kwenkhosi futsi tifakaza kuyo mayelana nemandla lamakhulu a-Amoni.

16 Futsi kwenteka kutsi talibita libito leNkhosi, ngemandla ato, tate nato ngekwato tawela phansi, ngaphandle kwamunye wesifazane lobekangumLamani, libito lakhe kwakungu-Abhishi, lobekaphendvukele eNkhosini eminyakeni leminingi, ngenca yembono lowawumangalisa kakhulu weyise—

17 Ngako-ke, asaphendvukele eNkhosini, futsi angatange akwatise loko, ngako-ke, ngesikhatsi abona kutsi tonkhe tinceku taLamonayi tase tiwele phansi, futsi ngalokunjalo nenkhosikati yakhe, indlovukazi, kanye nenkhosi, kanye na-Amoni balele nja phansi, bekati kutsi kwakungemandla aNkulunkulu; futsi acabanga kutsi leli kwakulitfuba, lekutsi atise bantfu ngaloko lokwakwentekile emkhatsini wabo, kutsi ngekusibona lesi sehlakalo kwakutobenta kutsi bakholwe emandleni aNkulunkulu, ngako-ke wagijima wangena indlu ngendlu, atisa bantfu.

18 Bacala kubutsana ndzawonye endlini yenkhosi. Futsi kweta sicuku, ngekumangala bayibona inkhosi, kanye nendlovuazi, kanye netinceku tabo balele batse nja phansi, bonkhe bebalele lapho shengatsi bafile; ngetulu kwaloko bambona Amoni, buka, bekangumNefi.

19 Manje bantfu bacala kuvungama emkhatsini wabo; labanye batsi kwakububi lobukhulu lobu lobabufike kubo, noma enkhosini kanye nendlu yayo, ngenca yekutsi yayivume umNefi kutsi ahlale kulelive.

20 Kodvwa labanye babekhuta, batsi: Inkhosi itiletsele yona lobubi etikwendlu yayo, ngenca yekutsi yabulala tinceku tayo letatihlakatelwe umhlambi wato emantini aseSebhas.

21 Futsi ngetulu kwaloko batsetsiswa ngulawo madvodza labekeme emantini aseSebhas ahlakata imihlambi lokwakuyenkhosi, ngoba abemtfukutselele Amoni ngenca yesibalo sabomnakabo labekasibulele emantini aseSebhas, ngesikhatsi avikela imihlambi yenkhosi.

22 Manje, lomunye wabo, lobekanemnakabo lobekabulewe ngenkemba ya-Amoni, amtfukutselele kakhulu Amoni, wahoshula inkemba yakhe waya phambili kute ayiwisele etikwa-Amoni, kute ambulale; ngesikhatsi aphakamisa inkemba yakhe kutsi amshaye, buka, wawa wafa.

23 Manje siyabona kutsi Amoni bekangabulaleki, ngoba iNkhosi beyitsite kuMosiya, uyise: ngiyawumsindzisa, futsi kuyawuba ngekwelukholo lwakho—ngako-ke, Mosiya wamnikela eNkhosini.

24 Futsi kwenteka kutsi ngesikhatsi sicuku sibona kutsi lendvodza yaseyiwile yafa, leyayiphakamise inkemba kutsi ibulale Amoni, bafikelwa kwesaba bonkhe, futsi abatange basalokotsa nakancane kwelula tandla tabo kutsi bamtsintse noma lomunye walabo labebawile; futsi bacala kumangala emkhatsini wabo kutsi ngabe abebangwa yini lamandla lamakhulu kangaka, noma ngabe tonkhe leti tintfo tatisho kutsini.

25 Futsi kwenteka kutsi kwakukhona labaningi emkhatsini wabo labebatsi Amoni bekanguMoya loMkhulu, futsi labanye batsi bekatfunyelwe nguMoya loMkhulu;

26 Kodvwa labanye babekhuta bonkhe, batsi bekasilwane lesesabekako, lesasitfunyiwe sisuka kumaNefi kutsi sitawubahlupha.

27 Futsi kwakukhona labanye labebatsi Amoni bekatfunywe nguMoya loMkhulu kutsi atewubahlupha ngenca yebubi babo; futsi nekutsi bekunguMoya loMkhulu lobewusolo ugadze emaNefi, lobewusolo uwakhulula etandleni tabo; futsi bebatsi kwakungiwo loMoya loMkhulu lobulele labaningi kangaka babomnakabo, emaLamani.

28 Ngenca yaloku umbango wacala kutsi ube mkhulu kakhulu emkhatsini wabo. Futsi ngesikhatsi basabanga kanjalo, incekukati leyayente kutsi sicuku sigcogcane ndzawonye yeta futsi ngesikhatsi ibona lombango lowawusemkhatsini wesicuku yaba nekudzabuka lokukhulu, kangangekutsi yakhala tinyembeti.

29 Futsi kwenteka kutsi yahamba yatsatsa indlovukazi ngesandla, kute mhlawumbe iyiphakamise; masinyane emvakwekutsintsa sandla sayo yavuka yatimela ngetinyawo tayo, yakhala ngelivi lelikhulu, yatsi: Awu Jesu lobusisekile, longisindzise esihogweni lesesabekako! Awu Nkulunkulu lobusisekile, bani nemusa kulaba bantfu.

30 Ngesikhatsi seyikushito loku, yabamba tandla tayo, igcwaliswe ngenjabulo, ikhuluma emavi lamaningi labengacondzakali; ngesikhatsi seyikwentile loku, yatsatsa inkhosi, Lamonayi, ngesandla, buka nayo yavuka yema ngetinyawo tayo.

31 Nayo, ngekushesha, ibona umbango emkhatsini webantfu bayo, yaya kubo yacala kubekhuta, kanye nekubafundzisa emavi leyayiwavile aphuma emlonyeni wa-Amoni; ngebuningi balabo labaweva emavi ayo bakholwa, futsi baphendvukela eNkhosini.

32 Kodvwa kwakukhona labaningi emkhatsini wabo labangafunanga kuweva emavi ayo; ngako-ke bahamba indlela yabo.

33 Futsi kwenteka kutsi ngesikhatsi Amoni avuka naye ngalokunjalo wabasita, ngalokunjalo nato tonkhe tinceku taLamonayi; futsi bonkhe bamemetela ebantfwini intfo lefanako—kutsi tinhlitiyo tabo tase tishintjile; nekutsi besebete sifiso sekwenta lokubi.

34 Buka, labaningi, bamemetela kubantfu kutsi bebabone tingilosi phindze bacoca nato; ngenca yaloko tabatjela tintfo taNkulunkulu, kanye netekulunga kwakhe.

35 Futsi kwenteka kutsi kwabakhona labaningi labakholwa emavini abo; futsi ngebuningi balabo labakholwa babhajatiswa; baba bantfu labalungile, phindze bamisa libandla emkhatsini wabo.

36 Ngaleyondlela umsebenti weNkhosi wacala emkhatsini wemaLamani; ngako-ke iNkhosi yacala kutfululela Moya wayo etikwabo; futsi siyabona kutsi sandla sayo selulelwe kubo bonkhe bantfu labatawuphendvuka baphindze bakholwe egameni lakhe.