INcwadzi yaAlima
Indvodzana ya-Alima
Umlandvo wa-Alima, lobekayindvodzana ya-Alima, umehluleli lomkhulu newekucala kubantfu baNefi, ngalokunjalo nemphristi lomkhulu eBandleni. Umlandvo ngekubusa kwebehluleli, kanye netimphi kanye nemibango emkhatsini webantfu. Ngetulu kwaloko umlandvo ngemphi emkhatsini wemaNefi nemaLamani, ngekwembhalo wa-Alima, wemehluleli lomkhulu newekucala.
Sehluko 1
Nehori ufundzisa timfundziso letingemanga, umisa libandla, ucalisa buphristi-mbumbulu, futsi ubulala Gideyoni—Nehori ubulawela emacala akhe—Buphristi-mbumbulu kanye nekuhlushwa kuyandza emkhatsini webantfu—Baphristi batondla bona, bantfu banakekela labamphofu, liBandla liyaphumelela. Cishe ngemnyaka wa 91 kuya kuwa 88 ngaphambi kwekutalwa kwaKhristu.
1 Manje kwenteka kutsi ngemnyaka wekucala wekubusa kwebehluleli ngetulu kwebantfu baNefi, kusukela ngalesi sikhatsi kuya phambili, inkhosi Mosiya seyiyihambile indlela yemhlaba wonkhe, seyikulwile kulwa lokuhle, seyihambe ngebucotfo phambi kwaNkulunkulu, ingashiyanga namunye kutsi abuse esikhundleni sayo; noko beyiyimisile imitsetfo, futsi yayemukelekile kubantfu; ngako-ke bebaphocelelekile kutsi bayigcine imitsetfo lebeyiyibekile.
2 Futsi kwenteka kutsi ngemnyaka wekucala wekubusa kwa-Alima esihlalweni sekwehlulela, kwaba khona indvodza leyaletfwa phambi kwakhe kutsi yehlulelwe, indvodza lebeyiyinkhulu, futsi lebeyatiwa ngemandla ayo lamakhulu.
3 Futsi beseyihambile yatungeleta emkhatsini webantfu, ishumayela kubo ngaloko beyikubita ngekutsi livi laNkulunkulu, ihudvulela phansi libandla; imemetela kubantfu kutsi wonkhe umphristi kanye nemfundzisi kumele atsandvwe; futsi akukameli basebente ngetandla tabo, kodvwa kumele bondliwe bantfu.
4 Ngetulu kwaloko yafakaza kubantfu kutsi lonkhe luntfu kumele lusindziswe ngelusuku lwekugcina, nekutsi akukafaneli besabe noma batfutfumele, kodvwa kutsi baphakamise tinhloko tabo batfokote, ngoba inkhosi yabadala bonkhe bantfu, ngetulu kwaloko yahlenga wonkhe umuntfu; futsi, ekugcineni, bonkhe bantfu kumele batfole kuphila lokuphakadze.
5 Futsi kwenteka kutsi yatifundzisa leti tintfo kangangekutsi labaningi bakholelwa emavini ayo, baba baningi ngendlela yekutsi bacala kuyondla futsi bayinika imali.
6 Yacala kutiphakamisa ngekutichayisa enhlitiyweni yayo, yagcoka tingubo letibitako, yebo, yacala kumisa libandla ngekweluhlobo lwenshumayelo yayo.
7 Futsi kwenteka kutsi ngesikhatsi isahamba, iyoshumayela kulabo labebakholelwa emavini ayo, yahlangana nendvodza lebeyiyelibandla laNkulunkulu, yebo, lomunye webafundzisi babo; yacala kuphikisana nayo kamatima, kute iholele kudze bantfu belibandla; kodvwa lendvodza yamelana nayo, iyiyala ngemavi aNkulunkulu.
8 Manje ligama lalendvodza kwakunguGideyoni; futsi kwakunguye loyo lobekasikhali etandleni taNkulunkulu ekukhululeni bantfu baLimhayi kubakhipha ebugcilini.
9 Manje, ngoba Gideyoni wamelana nayo ngemavi aNkulunkulu yamtfukutselela Gideyoni, yahoshula inkemba yayo yacala kumshaya. Manje Gideyoni ekubeni sekakhulile ngeminyaka leminingi, ngako-ke akakwatanga kumelelana nemagalelo ayo, ngako-ke wabulawa ngenkemba.
10 Lendvodza leyambulala yatsatfwa bantfu belibandla, yaletfwa phambi kwa-Alima, kutsi yehlulelwe ngekwemacala leyayiwentile.
11 Futsi kwenteka kutsi yema phambi kwa-Alima yatincengela ngesibindzi lesikhulu.
12 Kodvwa Alima watsi kuyo: Buka, loku kwekucala kutsi buphristi-mbumbulu bucaliswe emkhatsini webantfu. Buka, awunacala lebuphristi-mbumbulu kuphela, kodvwa utame kubuphocelela ngenkemba; futsi kube buphristi-mbumbulu bebuyophocelelwa emkhatsini walabantfu loko bekuyokusho kubhujiswa kwabo nya.
13 Ucitse ingati yemuntfu lolungile, yebo, indvodza leyente lokuningi lokuhle emkhatsini walabantfu; futsi uma singakusindzisa ingati yakhe ingeta etikwetfu kutiphindzisela.
14 Ngako-ke ugwetjwa ngekutsi ufe, ngekwemtsetfo lesawunikwa nguMosiya, inkhosi yetfu yekugcina; futsi uvunyiwe ngulaba bantfu; ngako-ke labantfu kufanele bawugcine umtsetfo.
15 Futsi kwenteka kutsi bayitsatsa; ligama layo bekunguNehori; bamtfwala bamyisa esicongweni seligcuma iManthi, lapho wentiwa, noma-ke ngalenye indlela wavuma, emkhatsini wemazulu nemhlaba, kutsi loko lobekakufundzisa kubantfu kwakuphikisana nelivi laNkulunkulu; futsi lapho weva kufa lokulihlazo.
16 Noko loko akuzange kucedze kwandza kwebuphristi-mbumbulu eveni lonkhe; ngoba bebabaningi labebatsandza tintfo letilite temhlaba, futsi bahamba bashumayela timfundziso letingemanga; loko bakwenta ngesizatfu sekufuna ingcebo kanye nekuhlonishwa.
17 Noko, abazange balinge kucamba emanga, uma bekungatiwa, ngenca yekwesaba umtsetfo, ngoba bakhohlisi bebajeziswa; ngako-ke bebatenta shengatsi bashumayela ngekwenkholo yabo; manje umtsetfo wawungenamandla kunoma ngumuphi umuntfu ngekwenkholo yakhe.
18 Abazange balinge bebe, ngenca yekwesaba umtsetfo, ngoba labanjalo bebajeziswa; futsi bebangeke balinge baphange, noma babulale, ngoba lobekabulala bekajeziswa ngekufa.
19 Kodvwa kwenteka kutsi loyo lobekangasiye welibandla laNkulunkulu wacala kuhlupha labo labebabelibandla laNkulunkulu, futsi labebamukele kubitwa ngeligama laKhristu.
20 Yebo, babahlupha, babavisa buhlungu ngalo lonkhe luhlobo lwemavi, futsi loku kwenteka ngenca yekutitfoba kwabo; ngenca yekutsi bebangatikhukhumeti emehlweni abo, nangenca yekutsi bebabelana ngelivi laNkulunkulu, loyo naloyo, ngaphandle kwemali nangaphandle kwentsengo.
21 Manje kwakukhona umtsetfo locinile emkhatsini webantfu belibandla, wekutsi kube bete namunye umuntfu, longuwelibandla, lotovukela phindze ahluphe labo labebangasibo belibandla, futsi nekutsi kubebete kuhluphana emkhatsini wabo.
22 Noko, kwakukhona labaningi emkhatsini wabo labacala kutikhukhumeta, bacala kubanga kamatima netitsa tabo, nangekugadla, yebo, bebashayana ngetibhakela.
23 Manje lona bekungumnyaka wesibili wekubusa kwa-Alima, futsi kwabangela kuhlupheka lokukhulu kulo libandla; yebo, kwabayimbangela yekulingwa lokukhulu kulo libandla.
24 Ngoba tinhlitiyo talabaningi taba lukhuni, futsi emagama abo esulwa, kangangekutsi abazange basakhunjulwa nanini emkhatsini webantfu baNkulunkulu. Ngetulu kwaloko labaningi batikhipha emkhatsini wabo.
25 Manje loku kwakukulingwa lokukhulu kulabo labebeme bacina elukholweni, noko, bebabambelele baphindze banganyakatiseki ekugcineni imiyaleto yaNkulunkulu, futsi batitfwala ngekubeketela tinhlupheko letatibutsiswe etikwabo.
26 Futsi ngesikhatsi baphristi bashiya imisebenti yabo kutsi bayokwabelana ngelivi laNkulunkulu kubantfu, bantfu nabo ngalokunjalo bashiya imisebenti yabo kutsi bayoliva livi laNkulunkulu. Ngesikhatsi umphristi asabelene nabo ngelivi laNkulunkulu bonkhe bebabuyela futsi ngekukhutsala emisebentini yabo; umphristi, angatiphakamisi ngetulu kwalabo labebalalele, ngoba umshumayeli bekangasiko ncono kunemlaleli, noma umfundzisi bekangasiko ncono kunemfundzi; ngaleyondlela bonkhe bebalingana, futsi bonkhe basebenta, wonkhe umuntfu ngekwemandla akhe.
27 Babelana ngalabebanako, wonkhe umuntfu ngaloko abenako, kulabamphofu, nalabeswele, nalabagulako, kanye nalabahluphekile; futsi abazange bagcoke tingubo letibitako, kodvwa bebangemanono baphindze babukeka.
28 Batichuba ngaleyondlela tindzaba telibandla; bacala kuba nekuthula njalo futsi, nanoma bebahlushwa.
29 Manje, ngenca yekucina kwelibandla bacala kuceba kakhulu, banenala yato tonkhe tintfo labebatidzinga—inala yemihlambi yetimvu, nemihlambi yetinkhomo, nalokukhuluphalisiwe kwalo lonkhe luhlobo, futsi ngalokunjalo nenala yalokuyinhlavu, neligolide, nesiliva, netintfo letiligugu, nenala yesiliki nelineni lelilukiwe lecolisakele, kanye nayo yonkhe inhlobo yendvwangu lenhle leyayijwayelekile.
30 Ngaleyondlela, esimeni sabo sekuphumelela, abacoshanga namunye lobekangcunu, noma lobekalambile, noma lobekomile, noma lobekagula, noma loyo lobekangakondleki; futsi abatibekanga tinhlitiyo tabo etikwemcebo, ngako-ke bebanesisa kubo bonkhe, labadzala nalabancane, lababoshiwe nalabakhululiwe, besilisa nebesifazane, noma bangaphandle kwelibandla noma bangekhatsi ebandleni, bangakhetsi bala lamuntfu kulabo bebadzinga.
31 Ngaleyondlela baphumelela banotsa kakhulu ngetulu kwalabo labebangasilo belibandla labo.
32 Ngoba labo labebangasilo belibandla labo bebatitika ngebutsakatsi, kanye nangekukhonta tithico noma buvila, nekukhuluma lokulite, kanye nemona nekubangisana; bagcoka tingubo letibitako; batiphakamisa ngekutichenya emehlweni abo; bahlupha, bakhuluma emanga, beba, baphanga, benta bugwadla, babulala, kanye nayo yonkhe inhlobo yenkhonhlakalo, noko, umtsetfo wacina kubo bonkhe labo bebawephula, kangangoba bekungenteka.
33 Futsi kwenteka kutsi ngaloko kusentjentiswa kwemtsetfo kubo, wonkhe umuntfu ajeziswa ngaloko labekakwentile, baba nekuthula lokukhulu, futsi bangalinge bayenta inkhohlakalo uma ngabe bekwatiwa; ngako-ke, kwaba khona kuthula lokukhulu emkhatsini webantfu baNefi kwate kwaba ngumnyaka wesihlanu wekubusa kwebehluleli.