1 Manje njengoba Amoni bekasachubeka nekufundzisa bantfu baLamonayi, sitawubuyela emlandvweni wa-Aroni kanye nabomnakabo; ngoba emvakwekutsi sekahambile eveni laseMidonayi waholwa nguMoya waya eveni lakaNefi, ngisho nasendlini yeNkhosi lebeyingetulu kwalo lonkhe live ngaphandle kwelive la-Ishmayeli, Futsi beyinguyise waLamonayi.

2 Futsi kwenteka kutsi wahamba waya kuyo esigodlweni senkhosi, kanye nabomnakabo, wakhotsama phambi kwenkhosi, watsi kuyo: Buka, Awu nkhosi, tsine sibomnakabo-Amoni, lomkhululile ejele.

3 Manje, Awu nkhosi, uma ungasindzisa timphilo tetfu, sitawuba tinceku takho. Futsi inkhosi yatsi kubo: Phakamani, ngoba ngitawuninika timphilo tenu, angitukunivumela kutsi nibe tinceku tami; kodvwa ngitawufuna kutsi ningisite; ngoba ngandlela tsite bengikhatsatekile emcondvweni wami ngenca yebubele kanye nebukhulu bemavi a-Amoni umnakenu; futsi ngifisa kwati sizatfu sekutsi kungani angetanga lapha kanye nani aphume eveni laseMidonayi.

4 Aroni watsi enkhosini: Buka, Moya weNkhosi umbitele kulenye indzawo; uhambe waya eveni la-Ishmayeli, kuyawufundzisa bantfu baLamonayi.

5 Manje inkhosi yatsi kubo: Yini lena leniyishito mayelana naMoya weNkhosi na? Bukani, ngulentfo lengikhatsatako.

6 Ngetulu kwaloko, yini lena leshiwo ngu-Amoni—kutsi uma utawuphendvuka utawusindziswa, futsi uma ungeke uphendvuke, uyawulahlwa ngelusuku lwekugcina na?

7 Aroni waphendvula watsi kuyo: Uyakholwa yini kutsi ukhona Nkulunkulu na? Inkhosi yatsi: Ngiyati kutsi ema-Amaleki atsi ukhona Nkulunkulu, ngibavumele kutsi bakhe tindlu letingcwele, kute bahlangane ndzawonye kute bamkhonte. Uma wena manje utsi ukhona Nkulunkulu, buka ngitawukholwa.

8 Manje ngesikhatsi Aroni akuva loku, inhlitiyo yakhe yacala kutfokota, watsi: Buka, ngalokucinisekile njengoba uphila, Awu nkhosi, ukhona Nkulunkulu.

9 Inkhosi yatsi: Ngabe Nkulunkulu ngulowo Moya loMkhulu lowakhipha bobabe betfu baphuma eveni laseJerusalema na?

10 Aroni watsi kuyo: Yebo, unguye loyo Moya loMkhulu, wadala tonkhe tintfo lokusezulwini nalokusemhlabeni. Uyakholwa yini nguloku na?

11 Yona yatsi: Yebo, ngiyakholwa kutsi Moya loMkhulu wadala tonkhe tintfo, futsi ngifisa kutsi ungitjele mayelana nato tonkhe leti tintfo, futsi ngitawuwakholwa emavi akho.

12 Futsi kwenteka kutsi ngesikhatsi Aroni abona kutsi inkhosi yayitawuwakholwa emavi akhe, wacala kusukela ekudalweni kwa-Adamu, afundzela inkhosi imibhalo lengcwele—kutsi Nkulunkulu wamdala kanjani umuntfu ngemfanekiso wakhe lucobo, nekutsi Nkulunkulu wamnika imiyaleto, nangekutsi ngenca yesiphambuko, umuntfu wawa.

13 Aroni wayichazela ngemibhalo lengcwele kusukela ekudalweni kwa-Adamu, abeka ngekuwa kwemuntfu phambi kwayo, kanye nesimo sabo sekunaka inyama futsi ngalokunjalo nangelisu lekuhlengwa, lelalungiswa kusukela ekusekelweni kwemhlaba, nguKhristu, lilungiselelwa bonkhe labo labayawukholwa egameni lakhe.

14 Futsi njengoba umuntfu awa ngeke akwati kuzuza lutfo ngekwakhe; kodvwa kuva buhlungu kanye nekufa kwaKhristu kwahlawulela tono tabo, ngelukholo kanye nangekuphendvuka, njalonjalo; nekutsi uncamula tibopho tekufa, kute lithuna lingabi nekuncoba, nekutsi ludvonsi lwekufa kumele lwenganywe ematsembeni enkhatimulo; futsi Aroni watichaza tonkhe leti tintfo enkhosini.

15 Futsi kwenteka kutsi emvakwekutsi Aroni sekatichazile leti tintfo, inkhosi yatsi: Ngingenta njani kute ngibe naloku kuphila lokuphakadze lose ukhulume ngako na? Yebo, ngingenta njani kute ngitalwe ngekwakaNkulunkulu, lomoya lomubi usiphulwe uphume esifubeni sami, futsi ngemukele uMoya wakhe, kute ngigcwaliswe ngenjabulo, kute ngingalahlwa ngelusuku lwekugcina na? Buka, kusho yona, ngitawudzela konkhe lenginako, yebo, ngitawushiya nembuso wami, kute ngemukele lenjabulo lenkhulu.

16 Kodvwa Aroni watsi kuyo: Uma uyifisa lentfo, uma ungakhotsama phansi embikwaNkulunkulu, yebo, uma ungaphendvuka etonweni takho tonkhe, futsi ubite ligama lakhe ngelukholo, ukholwa kutsi utawutfola lokucelako, uma kunjalo uyawulitfola lelotsemba lolifisako.

17 Futsi kwenteka kutsi ngesikhatsi Aroni sekawashito lamavi, inkhosi yakhotsama phansi embikweNkhosi, ngemadvolo ayo; yebo, yate yatsi nja phansi emhlabatsini, futsi yakhala kakhulu, itsi:

18 Awu Nkulunkulu, Aroni ungitjele kutsi ukhona Nkulunkulu; Futsi uma akhona Nkulunkulu, uma wena unguNkulunkulu, ungatembula yini kimi, ngitawudzela tonkhe tono tami kutsi ngikwati, nekutsi ngivuswe ekufeni, futsi ngisindziswe ngelusuku lwekugcina. Manje ngesikhatsi inkhosi seyiwashito lamavi, yashayeka phansi kwaba shengatsi ifile.

19 Futsi kwenteka kutsi tinceku tayo tagijima tayawutjela indlovukazi konkhe lobekwenteke enkhosini. Yeta enkhosini; ngesikhatsi iyibona ilele shengatsi ifile, ngetulu kwaloko Aroni nabomnakabo bemile shengatsi ngibo labebasizatfu sekuwa kwayo, yabatfukutselela, yayaleta kutsi tinceku tayo, noma tinceku tenkhosi, tibabambe tibabulale.

20 Manje tinceku tatiyibonile imbangela yekuwa kwenkhosi, ngako-ke atitange tilokotse tibeke tandla tato ku Aroni nabomnakabo; futsi tatikhalela kuyo indlovukazi titsi: Usiyaletelani kutsi sibulale lamadvodza na, ngoba buka lomunye wabo unemandla kunatsi sonkhe. Ngako-ke sitawukuwa embikwabo.

21 Manje ngesikhatsi indlovukazi ibona kwesaba kwetinceku nayo ngalokunjalo yacala kwesaba kakhulu, hleze kubekhona bubi lobutsite lobutawuta kuyo. Futsi yayaleta tinceku tayo kutsi tihambe tiyobita bantfu, kute babulale Aroni kanye nabomnakabo.

22 Manje ngesikhatsi Aroni akubona kuphikelela kwendlovukazi, futsi ati bulukhuni betinhlitiyo tebantfu, wesaba hleze sicuku sibutsane ndzawonye, bese kuba khona umbango lomkhulu kanye nekuphatamiseka emkhatsini wabo; ngako-ke welula sandla sakhe futsi wayiphakamisa inkhosi phansi, watsi kuyo: Sukuma. Yasukuma yema ngetinyawo tayo, yatfola emandla ayo.

23 Manje loku kwenteka embikwendlovukazi kanye naletiningi tinceku. Futsi ngesikhatsi bakubona loku bamangala kakhulu, bacala kwesaba. Inkhosi yema ngembili, yacala kubafundzisa. Yabafundzisa, kangangekutsi bendlu yayo bonkhe baphendvukela eNkhosini.

24 Manje bekukhona sicuku lesasibutsene ndzawonye ngenca yekuyaletwa yindlovukazi, futsi kwacala kwabakhona kuvungama lokukhulu emkhatsini waso ngenca ya-Aroni kanye nabomnakabo.

25 Kodvwa inkhosi yeta ngembili yema emkhatsini waso futsi yasifundzisa. Futsi batfotjiswa macondzana na-Aroni kanye nalabo labekanabo.

26 Futsi kwenteka kutsi ngesikhatsi inkhosi ibona kutsi bantfu bese batfobile, yenta kutsi Aroni kanye nabomnakabo bete ngembili beme emkhatsini wesicuku, futsi bashumayele livi kuso.

27 Futsi kwenteka kutsi inkhosi yatfumela simemetelo kulo lonkhe live, emkhatsini wabo bonkhe bantfu bayo labebakulo lonkhe live layo, labo labebakuto tonkhe tifundza letatitungeletile, letatigudla ngisho naselwandle, emphumalanga kanye nasenshonalanga, kanye nalelo lelalehlukaniswe eveni lase Zarahemla ngendledlana lencane yasehlane, lebeyigijima isuka emphumalanga yelwandle ite iye nasenshonalanga yelwandle, futsi itungelete eminceleni yelugu lwelwandle, kanye naseminceleni yelihlane lebelisenyakatfo ngaseveni laseZarahemla, kuya eminceleni yeManthi, ngasenhloko yemfula iSidoni, lebewugijima usuka emphumalanga uya ngasenshonalanga—bekahlukaniswe kanjalo-ke emaLamani kanye nemaNefi.

28 Manje, incenye lenkhulu lengemavila yemaLamani beyihlala ehlane, ihlala emathendeni; futsi beyigcwele kulo lonkhe lihlane enshonalanga, eveni laNefi; yebo, futsi ngalokunjalo nasenshonalanga yelive laseZarahemla, eminceleni yelugu lwelwandle, kanye nasenshonalanga eveni laNefi, endzaweni yeyise lelifa labo lekucala, futsi ngaleyondlela bagudla umncele welugu lwelwandle.

29 Futsi ngetulu kwaloko bekukhona emaLamani lamaningi emphumalanga ngaselugwini lwelwandle, lapho emaNefi bekawachubele khona. Futsi ngaleyondlela emaNefi bekacishe atungeletwe ngemaLamani; noko emaNefi bekatitsetse tonkhe tincenye letisenyakatfo telive lebetigudla lihlane, enhloko yemfula iSidoni, kusukela emphumalanga kuya enshonalanga, kutungelete kuye eluhlangotsini lwasehlane; enyakatfo, bate bafika eveni lebebalibita ngekutsi yiNala.

30 Futsi beligudla eveni lebebalibita ngekutsi yiNcitsakalo, likhashane kakhulu kuya ngasenyakatfo kangangekutsi belifinyelela eveni lebelikadze linebantfu lababulawa, ematsambo abo lesesikhulume ngawo, lelatfolwa bantfu baseZarahemla, lebekuyindzawo yabo yekucala labafikela kuyo.

31 Futsi bavela lapho bakhuphukela eningizimu yelihlane. Ngaleyondlela live lelingasenyakatfo labitwa ngekutsi yiNcitsakalo, bese kutsi live lelingaseningizimu labitwa ngekutsi yiNala, lilihlane leligcwele tonkhe tilwane tasendle letinhlobonhlobo, incenye yato lebeyivele eveni lelingasenyakatfo kutofuna kudla.

32 Manje, bekulibanga nje lelilanga nencenye yeluhambo lwemNefi, kusukela eveni iNala kuya eveni iNcitsakalo, kusukela emphumalanga kuya enshonalanga yelwandle; futsi ngaleyondlela live laNefi kanye nelive laseZarahemla bekacishe atungeletwe ngemanti, khona lapho kukhona siceshana lesincane selive emkhatsini welive lelingasenyakatfo kanye nelive lelingaseningizimu.

33 Futsi kwenteka kutsi emaNefi besekakhile eveni iNala, kusukela emphumalanga kuya elwandle lolusenshonalanga, futsi ngaleyondlela emaNefi ngekuhlakanipha kwawo, kanye nabogadzi bawo kanye nemabutfo awo, bawabiyela ngekhatsi emaLamani eningizimu, kute angabe asaba nesabelo enyakatfo, nekutsi angabe asengcela eveni lelingasenyakatfo.

34 Ngaloko-ke emaLamani akatange asakhona kuba nalesinye sabelo ngaphandle kwelive laNefi kuphela, kanye nelihlane lebelitungeletile. Manje loku bekukuhlakanipha kwemaNefi—njengoba emaLamani bekatitsa kubo, bebangeke bavumele tinhlupheko tabo kuto tonkhe tinhlangotsi, futsi ngetulu kwaloko kute babe nelive lapho bebengabalekela khona, ngekutsandza kwabo.

35 Manje, emvakwekutsi sengikushito loku, ngiyaphindza ngibuyela endzabeni ya-Amoni kanye na-Aroni, Omneri kanye naHimnayi, kanye nabomnakabo.