1 Manje, lawa ngemavi a-Amoni kubomnakabo, atsi: Banaketfu kanye nabomnaketfu, bukani ngitsi kini, sikhulu kangakanani sizatfu lesinaso kutsi sitfokote; ngoba sake sacabanga nje ngesikhatsi sisuka eveni laseZarahemla kutsi Nkulunkulu bekayawuke asinike tibusiso letinkhulu kanjena na?

2 Manje, ngiyabuta, ngutiphi tibusiso letinkhulu lasinike tona na? Ningasho na?

3 Bukani, ngitawuniphendvulela; ngoba bomnakenu, emaLamani, bebasebumnyameni, yebo, ngisho nasemhumeni webumnyama, kodvwa bukani, baningi kangakanani labaletfwa kutsi babone kukhanya lokumangalisako kwaNkulunkulu! Loku kusibusiso lesinikwe sona, kutsi sibe ngulabasetjentiswa nguNkulunkulu kutsi sente lomsebenti lomkhulu.

4 Bukani, tinkhulungwane tawo tiyatfokota, futsi sebaletfwe esibayeni saNkulunkulu.

5 Bukani, insimu beseyivutsiwe, nibusisiwe, ngoba nilifakile lisikela, navuna ngemandla enu, yebo, bonkhe budze belilanga nisebentile; bukani sibalo setitfungo tenu! Futsi tiyawubutselwa etinyangweni, kute tingonakali.

6 Yebo, atiyukushaywa sangcotfo ngelusuku lwekugcina, yebo, noma tibhengulwe tihhushuhhushu; kodvwa ngesikhatsi sangcotfo sifika tiyawubutselwa ndzawonye endzaweni yato, kute sangcotfo singakwati kungena kuto; yebo, futsi ngeke tichutjwe yimimoya leyesabekako tiye noma ngukuphi lapho sitsa siyawutitfwala sitiyise khona.

7 Kodvwa bukani, tisetandleni teNkhosi yesivuno, futsi tayo; itawutivusa ngelusuku lwekugcina.

8 Libusisiwe ligama laNkulunkulu wetfu; asihlabelele kulo ludvumo lwakhe, yebo, asilibonge libito lakhe lelingcwele, ngoba usebenta kulunga ingunaphakadze.

9 Ngoba kube besingakaphumi eveni laseZarahemla, laba bomnaketfu labatsandzekako kakhulu, labasitsandze kakhulu kangaka, bebayobe namanje basahlushwa yinzondo ngalokumelene natsi, yebo, ngetulu kwaloko bebayoba bantfu labangatiwa kuNkulunkulu.

10 Futsi kwenteka kutsi ngesikhatsi Amoni sekawashito lamavi, umnakabo Aroni wamekhuta, watsi: Amoni, ngiyesaba kutsi kujabula kwakho kutawukuholela ekutichayiseni.

11 Kodvwa Amoni watsi kuye: Angitichayisi ngewami emandla, noma ngekwami kuhlakanipha; kodvwa buka, injabulo yami igcwele, yebo, inhlitiyo yami iyacicima yinjabulo, futsi ngitawutfokota kuNkulunkulu wami.

12 Yebo, ngiyati kutsi angisilutfo; ngekwemandla ami ngibutsakatsaka; ngako-ke angitukutichayisa ngekwami, kodvwa ngitawutichayisa ngaNkulunkulu wami, ngoba ngemandla akhe ngingenta tonkhe tintfo; yebo, buka, letiningi timangaliso sitentile kulelive, sitawulidvumisa ligama lakhe ngato ingunaphakadze.

13 Bukani, tingakanani tinkhulungwane tabomnaketfu latikhululile ebuhlungwini besihogo; futsi tiletfwe kutsi tihlabelele lutsandvo lwenkhululeko, futsi loku kungenca yemandla elivi lakhe lelikitsi, ngako-ke asinaso yini sizatfu lesikhulu sekujabula na?

14 Yebo, sinesizatfu sekumdvumisa ingunaphakadze, ngoba unguNkulunkulu Losetikwako Konkhe, futsi ukhulule bomnaketfu etinketaneni tesihogo.

15 Yebo, bebatungeletwe bumnyama lobungapheli kanye nekubhujiswa; kodvwa bukani, ubaletse ekukhanyeni lokungapheli kwakhe, yebo, ensindzisweni lengapheli; batungeletwe ngelutsandvo lwakhe loluningi lolungeke lulinganiswe; yebo, tsine sibe ngulabasetjentiswa nguye ekwenteni lomsebenti lomkhulu futsi lomangalisako.

16 Ngako-ke, asitfokote, yebo, sitawutfokota eNkhosini; yebo, sitawutfokota, ngoba injabulo yetfu igcwele; yebo, sitawumdvumisa Nkulunkulu wetfu ingunaphakadze: Bukani, ngubani longatfokota kakhulu eNkhosini na? Yebo, ngubani longakhuluma kakhulu ngemandla akhe lamakhulu, kanye nangesihawu sakhe, kanye nekumela bulukhuni kwakhe kubantfwana bebantfu na? Bukani, ngitsi kini, anginawusho ngisho lokuncane lengikuvako.

17 Ngubani lobekacabanga kutsi Nkulunkulu wetfu bekangaba nesihawu lesikhulu kangaka sekutsi asihlwitse esimeni setfu lesesabekako, sekona, kanye nalesingcolile?

18 Bukani, besihamba ngisho nangentfukutselo, ngekwesabisa lokukhulu kute sibhubhise libandla lakhe.

19 Awu pho, kungani angasiyisanga ekubhujisweni lokwesabekako, yebo, kungani angayiyekelanga inkemba yekulunga kwakhe iwele etikwetfu, futsi asilahlele ekuphelelweni litsemba kwaphakadze na?

20 Awu, umphefumulo wami, cishe kube shengatsi, uyanyamalala ngaloyo mcabango. Bukani, akakusebentisanga kulunga kwakhe etikwetfu, kodvwa ngesihawu sakhe lesikhulu wasiwelisa kulelogibe lekufa kanye nelusizi lwaphakadze, kwate kwaba sekusindzisweni kwemiphefumulo yetfu.

21 Manje bukani, bomnaketfu, ngumuphi umuntfu wemvelo lokhona lowatiko ngaleti tintfo na? Ngitsi kini, kute namunye lotatiko leti tintfo, ngaphandle kwalabadzabukile ngekona.

22 Yebo, loyo lophendvukako aphindze asebentise lukholo, avete imisebenti lemihle, athandaze njalo-njalo angayekeli—kulonjalo kunikwa kwati timfihlakalo taNkulunkulu; yebo, kulonjalo kuyawunikwa kutsi embulelwe tintfo letingakaze tembulwa nanini; yebo, kuyawunikwa kulonjalo kutsi aletse tinkhulungwane temiphefumulo ekuphendvukeni, nanjengoba natsi siniketiwe kutsi sibuyise labomnaketfu ekuphendvukeni.

23 Manje anikhumbuli yini, bomnaketfu, kutsi satsi uma sitsi kubomnaketfu eveni laseZarahemla, siyahamba sikhuphukela eveni laNefi, kutsi siyawushumayela kubomnaketfu emaLamani, basihleka basihhalatisa.

24 Ngoba batsi kitsi: Nicabanga kutsi ningaletsa emaLamani ekwatini liciniso na? Nicabanga kutsi ningakwati kwenta emaLamani kutsi akholwe ngekungalungi kwemasiko aboyise, njengoba babantfu labanetinhloko letilukhuni labanjena; tinhlitiyo tabo letitfokota ekucitsekeni kwengati; tinsuku tabo labaticitsa ebubini lobukhulu kakhulu; tindlela tabo lekutindlela tesoni kusukela ekucaleni na? Manje bomnaketfu, niyakhumbula kutsi lolu bekululwimi lwabo.

25 Ngetulu kwaloko batsi: Asibatsatsele tikhali silwe nabo, kute sibabulale kanye nebubi babo baphele nya eveni, ngaphandle kwaloko batawusehlula baphindze basibulale.

26 Kodvwa bukani, bomnaketfu labatsandzekako, tsine seta ehlane hhayi ngenhloso yekutawubulala bomnaketfu, kodvwa ngenhloso yekutsi mhlawumbe singasindzisa leminye lemibalwa imiphefumulo yabo.

27 Manje ngesikhatsi tinhlitiyo tetfu setishone phansi, cishe besesitobuyela emuva, bukani, inkhosi yasidvudvuta, yatsi: Hambani niye emkhatsini wabomnakenu, emaLamani, niphindze nititfwale ngekubeketela tinhlupheko tenu, ngitawuninika imphumelelo.

28 Manje bukani, sifikile, besisetindzaweni tonkhe emkhatsini wabo; futsi sibeketele ekuhluphekeni kwetfu, sihlupheke ngekweswela konkhe; yebo, sihambe umuti ngemuti, setsembele emseni welive—hhayi emseni welive kuphela kodvwa nasemseni waNkulunkulu.

29 Singenile etindlini tabo saphindze sabafundzisa, sibafundzisile etitaladini tabo; yebo, sibafundzisile etikwetintsaba tabo; ngalokunjalo singenile nasemathempelini abo kanye nakumasinagoge abo saphindze sabafundzisa; kodvwa sicoshiwe, sahlekwa ngekuhhalatiswa, sakhafulelwa ngematse, sashaywa etihlatsini tetfu; sigandvwe nangematje, satsatfwa saboshwa ngetintsambo leticinile, saphonswa ejele; kodvwa ngemandla kanye nekuhlakanipha kwaNkulunkulu sikhululiwe futsi.

30 Sitive tonkhe tinhlobo tekuhlupheka, konkhe loku, kute mhlawumbe sibe lisu lekusindzisa umphefumulo lotsite; futsi besicabanga kutsi injabulo yetfu ingagcwala uma mhlawumbe singaba lisu lekusindzisa labanye.

31 Manje bukani, singabuka futsi sitibone titselo temisebenti yetfu; ngabe tincane na? Ngitsi kini, Cha, tiningi; yebo, futsi singafakaza ngebucotfo babo, ngenca yelutsandvo lwabo kubomnakabo phindze ngalokunjalo nakitsi.

32 Ngoba bukani, bakhetsa kunikela ngetimphilo tabo kunekutsi batsatse imphilo yesitsa sabo; futsi batingcwabile tikhali tabo temphi ekujuleni kwemhlaba, ngenca yelutsandvo lwabo kubomnakabo.

33 Manje bukani ngitsi kini, ngabe lwake lwaba khona lutsandvo lolungaka eveni lonkhe na? Bukani, ngitsi kini, Cha, alukate lube khona, ngisho nasemkhatsini wemaNefi.

34 Ngoba bukani, wona bekangabatsatsela bomnakabo tikhali; bebangeke bavume kutsi babulawe. Kodvwa bukani bangakhi balaba lababeke phansi timphilo tabo; futsi siyati kutsi bahambile baya kuNkulunkulu wabo, ngenca yelutsandvo lwabo kanye nekuzonda kwabo sono.

35 Manje ngabe site yini sizatfu sekutfokota na? Yebo, ngitsi kini, akukate kube khona bantfu labake baba nesizatfu lesikhulu kangaka sekutfokota njengatsi, seloku kwadzabuka umhlaba; yebo, injabulo yami itsatsekile, ngisho nasekutichayiseni kuNkulunkulu wami; ngoba unemandla onkhe, kuhlakanipha konkhe, kanye nekwati konkhe; ucondza tonkhe tintfo, ungumuntfu lonesihawu, kute kube sekusindzisweni, kulabo labatawuphendvuka phindze bakholwe egameni lakhe.

36 Manje uma loku kukutichayisa, nami ngalokunjalo ngitawutichayisa; ngoba loku kuyimphilo yami kanye nekukhanya kwami, injabulo yami kanye nensindziso yami, kanye nekukhululwa kwami elusizini lwaphakadze. Yebo, libusisiwe ligama laNkulunkulu wami, lobeseloku abanakekela laba bantfu, labaligala lesihlahla saka-Israyeli, futsi lebelikadze lilahlekile emtimbeni walo eveni lelingatiwa; yebo, ngitsi, libusisiwe ligama laNkulunkulu wami, lobeseloku asinakekela tsine, labazulazulako eveni lelingatiwa.

37 Manje bomnaketfu, siyabona kutsi Nkulunkulu unakekela bonkhe bantfu, noma ngabe bangaba kuliphi live; yebo uyababala bantfu bakhe, futsi tibilini takhe tesihawu tisemhlabeni wonkhe. Manje loku kuyinjabulo yami, kanye nekubonga kwami lokukhulu; yebo, futsi ngitawumbonga Nkulunkulu wami ingunaphakadze. Amen.