1 Awu kube bengiyingilosi, ngitfole sifiso senhlitiyo yami, sekutsi ngihambe ngikhulume ngelicilongo laNkulunkulu, ngelivi lekunyakatisa umhlaba, futsi ngimemetele kuphendvuka kubo bonkhe bantfu.

2 Yebo, bengitomemetela kuwo wonkhe umphefumulo, njengelivi lekudvuma, kuphendvuka kanye nelisu lekuhlengwa, kutsi abaphendvuke futsi bete kuNkulunkulu wetfu, kute kungasabikhona lusizi lolukhulu etikwebuso bonkhe bemhlaba.

3 Kodvwa bukani, ngingumuntfu, futsi ngiyona ngekufisa kwami; ngoba kumele ngeneliseke ngetintfo iNkhosi lengabele tona.

4 Angikafanele ngishintje etifisweni tami simemetelo lesicinile saNkulunkulu lolungile, ngoba ngiyati kutsi unika bantfu ngekufisa kwabo, noma ngabe kuholela ekufeni noma ngabe kuholela ekuphileni; yebo, ngiyati kutsi uyababela bantfu, yebo, umemetela kubo timemetelo letingeke tiguculwe, ngekwetifiso tabo, noma ngabe tekusindziswa noma tekubhujiswa.

5 Yebo, ngiyati kutsi lokuhle nalokubi kute embikwabo bonkhe bantfu; loyo longakwati kwehlukanisa lokuhle kulokubi akanacala; kodvwa loyo lokwatiko lokuhle nalokubi, kuye kunikwa ngekwetifiso takhe, noma ngabe ufisa lokuhle noma ufisa lokubi, kuphila noma kufa, injabulo noma kudliwa ngunembeza.

6 Manje, ngekubona kutsi ngiyatati leti tintfo, kungani ngifisa lokungetulu kunekutsi ngente umsebenti lengibitelwe kuwo na?

7 Kungani ngifisa kutsi ngibe yingilosi, kute ngikhulume kuyo yonkhe imikhawulo yemhlaba na?

8 Ngoba bukani, iNkhosi inika tonkhe tive, ngekwebuve bato kanye nangelulwimi lwato, kutsi tilifundzise livi lakhe, yebo, ngekuhlakanipha, konkhe loko lakubona kufanele kutsi tibe nako; ngako-ke siyabona kutsi iNkhosi iyala ngekuhlakanipha, ngaloko lokulungile futsi lokuliciniso.

9 Ngiyakwati loko iNkhosi lengiyalete ngako, futsi ngiyatfokota ngako, Angitikhukhumeti ngekwami, kodvwa ngitfokota kuloko iNkhosi lengiyalete ngako; yebo, loku yinjabulo yami, kute mhlawumbe ngibe sikhali etandleni taNkulunkulu kutsi ngiletse umphefumulo lotsite ekuphendvukeni, futsi loku kuyinjabulo yami.

10 Futsi bukani, uma ngibona labaningi babomnaketfu batisola ngekweliciniso, futsi beta eNkhosini Nkulunkulu wabo, nakunjalo umoya wami ugcwala injabulo; bese ngikhumbula loko iNkhosi lengentele kona, yebo, nekutsi iwuvile umthandazo wami; yebo, bese ngikhumbula sandla sayo lesinesihawu lengelulele sona.

11 Yebo, futsi ngetulu kwaloko ngikhumbula kutfunjwa kwabobabe, ngoba ngempela ngiyati kutsi iNkhosi yabakhulula yabakhipha ebugcilini, futsi ngaloku yalimisa libandla layo; yebo, iNkhosi Nkulunkulu, Nkulunkulu wa-Abrahama, Nkulunkulu wa-Isaka, kanye naNkulunkulu waJakobe, yabakhulula baphuma ebugcilini.

12 Yebo, seloku ngakukhumbula njalo kutfunjwa kwabobabe; futsi naloyo Nkulunkulu lowabakhulula baphuma etandleni temaGibhithe wabakhulula baphuma ebugcilini.

13 Yebo, futsi loyo Nkulunkulu wamisa libandla lakhe emkhatsini wabo; yebo, futsi loyo Nkulunkulu ungibite ngelubito lolungcwele, kutsi ngishumayele livi kulabantfu, futsi unginike imphumelelo lenkhulu, kuyo injabulo yami igcwele.

14 Kodvwa angijatjuliswa yimphumelelo yami kuphela, kodvwa injabulo yami igcwele kakhulu ngenca yemphumelelo yabomnaketfu, labebakadze bangenhla eveni laNefi.

15 Bukani, basebente kakhulu, baletsa titselo letiningi; futsi uyawuba mkhulu kanganani umvuzo wabo!

16 Manje, uma ngicabanga ngemphumelelo yalaba bomnaketfu umphefumulo wami uyatsatseka, kube shengatsi uhlukaniswa nemtimba wawo, njengoba kwakunjalo, injabulo yami yinkhulu kakhulu.

17 Futsi kwangatsi Nkulunkulu angavuma laba, bomnaketfu, kutsi bahlale phansi embusweni waNkulunkulu; yebo, futsi ngalokunjalo nabo bonkhe labo labatitselo temisebenti yabo kute bangabe basaphumela ngaphandle nanini, kodvwa kutsi bamdvumise ingunaphakadze. Futsi shengatsi Nkulunkulu angavuma kutsi kwenteke ngekwemavi ami, nanjengoba ngikhulumile. Amen.