1 Manje kwenteka kutsi emvakwekufa kwaKorihori, Alima asatfole tindzaba kutsi emaZoramu abesagucula tindlela teNkhosi, nekutsi Zoramu, lobekangumholi wabo, abeholela tinhlitiyo tebantfu kutsi tikhotsamele tithico letitimungulu, inhlitiyo yakhe yaba buhlungu ngenca yebubi bebantfu.

2 Ngoba bekuyimbangela yelusizi lolukhulu ku-Alima kwati ngebubi emkhatsini webantfu bakhe; ngako-ke inhlitiyo yakhe yababuhlungu kakhulu ngenca yekuhlukana kwemaZoramu nemaNefi.

3 Manje emaZoramu besekagcogcene ndzawonye eveni lebekalibita ngekutsi yi-Anthiyonumu, lelalisemphumalanga yelive laseZarahemla, lelalisedvute kwemncele welugu lwelwandle, lelaliseningizimu yelive iJeshoni, futsi lelaligudla lihlane eningizimu, lelo hlane lelaligcwele emaLamani.

4 Manje emaNefi abesaba kakhulu kutsi emaZoramu abetawungena esivumelwaneni nemaLamani, nekwekutsi loko kwakutawuba yimbangela yekulahlekelwa lokukhulu kwemaNefi.

5 Manje, ngoba kushunyayelwa kwelivi kwakunemkhuba lomkhulu kuholela bantfu ekwenteni loko lokwakulungile—yebo, kwakunemphumela lonemandla lamakhulu emicondvweni yebantfu kunenkemba, noma ngayini lenye, leyayenteke kubo—ngako-ke Alima wacabanga kutsi kwakufanele kutsi bakwetame kulunga kwelivi laNkulunkulu.

6 Ngako-ke watsatsa Amoni, na-Aroni, kanye na-Omneri; kwatsi Himnayi yena wamshiya ebandleni eZarahemla; kodvwa laba bekucala labatsatfu wabatsatsa bahamba naye, futsi ngalokunjalo na-Amulekhi kanye naZeziromu, labebaseMelekhi; waphindze watsatsa emadvodzana akhe lamabili.

7 Manje lomdzala kumadvodzana akhe akatange amtsatse ahambe naye, libito lakhe kwakunguHilamani; kodvwa emabito alabo labatsatsa wahamba nabo kwakubo Shibiloni naKhoriyanthoni; lawa ngemabito alabo labahamba naye emkhatsini wemaZoramu, kuyawushumayela kuwo livi.

8 Manje emaZoramu abengemahlubuka asuka kumaNefi, ngako-ke bekake aba nalo livi laNkulunkulu lashunyayelwa kubo.

9 Kodvwa abesawele etiphosisweni letinkhulu, ngoba abengasafuni kwetama kugcina imiyaleto yaNkulunkulu, kanye nemitsetfo yakhe, ngekwemtsetfo waMosi.

10 Angafuni nekugcina tento telibandla, bachubeke ekuthandazeni kanye nasekuncuseni Nkulunkulu nsuku tonkhe, kutsi bangangeni ekulingweni

11 Yebo, kwephetsa, atigucula tindlela teNkhosi etikhatsini letiningi kakhulu; ngako-ke, ngalesi sizatfu, Alima kanye nabomnakabo bahamba baya eveni kuyawushumayela livi kubo.

12 Manje, ngesikhatsi sebafikile eveni, buka, ngekumangala lokukhulu batfola kutsi emaZoramu abesakhe emasinagoge, nekutsi abebutsana ndzawonye kanye ngelusuku evikini, lokwakulusuku abelubita ngekutsi lusuku lweNkhosi; futsi abekhonta ngendlela Alima nabomnakabo labebangatange nanini bayibone;

13 Ngoba abenendzawo lebeyakhiwe ekhatsi nekhatsi nesinagoge labo, indzawo yekuma, leyayiphakeme ngetulu kwenhloko; futsi sicongo sayo sasingema umuntfu munye kuphela.

14 Ngako-ke, noma ngubani lobekanesifiso sekudvumisa kwakufanele ahambe aye ngaphambili bese uma etulu esicongweni lapho, bese welula tandla takhe atibhekise ngasezulwini, bese ukhala ngelivi lelikhulu, utsi:

15 Nkulunkulu longcwele, longcwele; siyakholwa kutsi wena unguNkulunkulu, futsi siyakholwa kutsi wena ungcwele, nekutsi wena wawungumoya, futsi nekutsi ungumoya, nekutsi utawuhlala ungumoya ingunaphakadze.

16 Nkulunkulu loNgcwele, siyakholwa kutsi wena usehlukanisile kubomnaketfu; futsi tsine asikholelwa esikweni labomnaketfu, lelendluliselwa kubo ngenca yebuntfwana baboyise; kodvwa siyakholwa kutsi usikhetsile tsine kutsi sibe bantfwana bakho labangcwele; ngetulu kwaloko usembulele kutsi angeke abekhona Khristu.

17 Kodvwa usafana nayitolo, namuhla, naphakadze; futsi usikhetsile kutsi siyawusindziswa, kutsi bonkhe labasitungeletile bakhetselwe kutsi baphonswe ngentfukutselo yakho entasi esihogweni; ngalokuphatselene nalobu bungcwele, Awu Nkulunkulu, siyakubonga; futsi siyaphindza siyakubonga kutsi usikhetsile, kute singaholelwa khashane ngekulandzela buwula bemasiko abomnaketfu, lababophela phansi ekukholweni kuKhristu, lokuholela tinhlitiyo tabo kutsi tizulazule khashane nawe, Nkulunkulu wetfu.

18 Futsi ngetulu kwaloko siyakubonga, Awu Nkulunkulu, kutsi sikhetsiwe futsi sibantfu labangcwele. Amen.

19 Manje kwenteka kutsi emvakwekutsi Alima nabomnakabo kanye nemadvodzana akhe sebayivile lemithandazo, bamangala kakhulu.

20 Ngoba buka, wonkhe muntfu waya ngaphambili washo yona leyo mithandazo lefanako.

21 Manje lendzawo bebayibita ngekutsi yiRamiyamtom, letsi, uma ihunyushwa, yindzawo yekuma lengcwele.

22 Manje, kulendzawo yekuma bebenta, wonkhe muntfu, umthandazo lofanako kuNkulunkulu, bambonga Nkulunkulu wabo kutsi bona bakhetfwa nguye, nekutsi akabaholelanga khashane balandzela lisiko labomnakabo, nekutsi tinhlitiyo tabo atetjiwanga kutsi tikholelwe etintfweni letitawufika, labebangati lutfo ngato.

23 Manje, emvakwekutsi bonkhe bantfu sebakwentile kubonga ngalendlela, bebabuyela emakhaya abo, bangaphindzi nanini bakhulume ngaNkulunkulu wabo bate baphindze babutsane ndzawonye kuleyo ndzawo yekuma lengcwele, kutawukwenta kubonga ngendlela yabo.

24 Manje ngesikhatsi Alima akubona loku inhlitiyo yakhe yadzabuka; ngoba wabona kutsi bebabantfu labakhohlakele futsi labaphambene; yebo, wabona kutsi tinhlitiyo tabo bebatibeke etikweligolide, etikwesiliva, kanye nasetikwatotonkhe tinhlobo tetimphahla leticolisakele.

25 Yebo, futsi waphindze wabona kutsi tinhlitiyo tabo tase tiphakeme ekutikhukhumeteni lokukhulu, ekutichenyeni kwabo.

26 Waphakamisela livi lakhe ezulwini, wakhala, watsi: Awu, kuyawute kube nini, Awu Nkhosi, uvumela tinceku takho kutsi tihlale lapha ngaphansi enyameni, kutsi tibone lobubi lobungaka emkhatsini webantfwana bebantfu na?

27 Buka, Awu Nkulunkulu, bakhala kuwe, kodvwa tibe tinhlitiyo tabo tenganywe kutikhukhumeta kwabo. Buka, Awu Nkulunkulu, bakhala kuwe ngemilomo yabo, babe bakhukhumele, bativa babakhulu, ngetintfo letilite temhlaba.

28 Buka, Awu Nkulunkulu wami, tingubo tabo letibitako, kanye netindandatho tabo letincane, kanye nemabhengela abo, kanye netintfo tabo tekuhlobisa teligolide, kanye nato tonkhe tintfo tabo letiligugu labahlotjiswe ngato; buka, tinhlitiyo tabo batibeke kuto, kodvwa babe bakhala kuwe batsi—Siyakubonga, Awu Nkulunkulu, ngoba sibantfu labakhetsiwe kuwe, babe labanye batawushabalala.

29 Yebo, batsi ubambulele kutsi engeke abekhona Khristu.

30 Awu Nkhosi Nkulunkulu, kutawute kube nini uvumela kutsi bubi lobunjena kanye nekungakholwa kube semkhatsini walabantfu na? Awu Nkhosi, unganginika yini emandla, kute ngikwati kutsi ngibubeketelele butsakatsaka bami. Ngoba ngibutsakatsaka, futsi bubi lobunje emkhatsini walabantfu bungivisa buhlungu emphefumulweni wami.

31 Awu Nkhosi, inhlitiyo yami iyadzabuka kakhulu; ungawudvudvuta umphefumulo wami kuKhristu. Awu Nkhosi unganginika kutsi ngibe nemandla, kute ngititfwale ngekubeketela leti tinhlupheko letitawuta kimi, ngenca yebubi balabantfu.

32 Awu Nkhosi, ungawudvudvuta umphefumulo wami, futsi ungiphe imphumelelo, futsi ngalokunjalo nalaba lengisebenta nabo labanami—yebo, Amoni, na-Aroni, na-Omneri, kanjalo na-Amulekhi naZeziromu, kanjalo nemadvodzana ami lamabili—yebo, nabo bonkhe laba ungabadvudvuta, Awu Nkhosi. Yebo, ungayidvudvuta imiphefumulo yabo kuKhristu.

33 Ungabavumela kutsi babe nemandla, kute batetfwale tinhlupheko tabo letiyawufika kubo ngenca yebubi balabantfu.

34 Awu Nkhosi, ungavuma kutsi sibe nemphumelelo ekubaletseni futsi kuwe kuKhristu.

35 Buka, Awu Nkhosi, imiphefumulo yabo iligugu, futsi labaningi babo babomnaketfu; ngako-ke, sinike, Awu Nkhosi, emandla kanye nenhlakanipho kute siletse laba, bomnaketfu, kuwe futsi.

36 Manje kwenteka kutsi ngesikhatsi Alima asawashito lamavi, wabeka tandla takhe etikwabobonkhe labo labebanaye. Buka, ngesikhatsi abeka tandla takhe etikwabo, bagcwaliswa ngaMoya loNgcwele.

37 Emvakwaloko batehlukanisa lomunye kulomunye, bangakhatsateki kutsi batodlani, noma batonatsani, noma batogcokani

38 Futsi iNkhosi yabaniketa kutsi bangalambi, nekutsi bangomi; yaphindze yabanika emandla, kute bangabi nanoma nguluphi luhlobo lwetinhlupheko, ngaphandle kwekutsi tenganywe enjabulweni yaKhristu. Manje loku kwaba ngekwemthandazo wa-Alima; futsi loku kungenca yekutsi wathandaza ngelukholo.