Sehluko 34
Amulekhi ufakaza kutsi livi lensindziso likuKhristu—Ngaphandle kwekutsi inhlawulo yentiwe, lonkhe luntfu kufanele lubhubhe—Wonkhe umtsetfo waMosi ukhomba kumhlatjelo weNdvodzana yaNkulunkulu—Lisu laphakadze lekuhlengwa lisekelwe elukholweni kanye nasekuphendvukeni—Thandazela tibusiso tesikhashana kanye netakamoya—Lemphilo lena sikhatsi sekutsi bantfu batilungiselele kuhlangana naNkulunkulu—Sebentelani kusindziswa kwenu ngekwesaba phambikwaNkulunkulu. Cishe ngemnyaka wa 74 ngaphambi kwekutalwa kwaKhristu.
1 Manje kwenteka kutsi emvakwekutsi Alima sekawakhulumile lamavi kubo wahlala phansi emhlabatsini, Amulekhi wasukuma wacala kubafundzisa, watsi:
2 Bomnaketfu, ngicabanga kutsi ngeke kwenteke kutsi ningabi nelwati lwaleti tintfo lokukhulunywe ngato mayelana nekuta kwaKhristu, lesifundzisa ngaye kutsi uyiNdvodzana yaNkulunkulu; yebo, ngiyati kutsi leti tintfo tafundziswa kini kaningi ngaphambi kwekuhlubuka kwenu emkhatsini wetfu.
3 Futsi njengoba nibe nesifiso sekutsi umnaketfu lotsandzekako anikhombise kutsi kumele nenteni, ngenca yetinhlupheko tenu; ukhulumile ngandlela tsite kini kulungiselela tingcondvo tenu; yebo, unincusele elukholweni kanye nasekubeketeleni—
4 Yebo, nekutsi nibe nelukholo lolukhulu kakhulu kangangekutsi nite nihlanyele livi etinhlitiyweni tenu, kute netame kulinga buhle balo.
5 Futsi sibonile kutsi umbuto lomkhulu losetingcodvweni tenu ngewekutsi ngabe livi likuyo iNdvodzana yaNkulunkulu, noma ngabe akuyuba khona Khristu na.
6 Futsi niphindze nabona kutsi umnaketfu unibonisile, kaningi, kutsi livi lensindziso likuKhristu.
7 Umnaketfu ucaphune emavini aZenoshe, kutsi kuhlengwa kuta ngeNdvodzana yaNkulunkulu, ngalokunjalo nasemavini aZenokhi; uphindze wacaphuna kuMosi, kubonisa kutsi letintfo tiliciniso.
8 Manje, bukani, ngitawufakaza kini ngekwami kutsi letintfo tiliciniso. Bukani, ngitsi kini, ngiyati kutsi Khristu uyawufika emkhatsini webantfwana bebantfu, kutotfwala tiphambuko tebantfu bakhe, nekutsi uyawuhlawulela tono temhlaba; ngoba iNkhosi Nkulunkulu ikukhulumile loku.
9 Ngoba kufanele kutsi inhlawulo yentiwe; ngoba ngekwelisu lelikhulu laNkulunkulu waPhakadze kufanele kube khona inhlawulo leyentiwako, kungenjalo lonkhe luntfu kufanele ngalokungenakuvimbeleka lushabalale; yebo, bonkhe balukhuni; yebo bonkhe bawile baphindze balahlekile, futsi kufanele bashabalale ngaphandle kwekutsi kube ngekwenhlawulo lokufanele kutsi yentiwe.
10 Ngoba kufanele kutsi kube khona umhlatjelo lomkhulu newekugcina; yebo, hhayi umhlatjelo wemuntfu, noma wesilwane, noma wanoma nguluphi luhlobo lwenyoni; ngoba akuyuba ngumhlatjelo wemuntfu; kodvwa kufanele kube ngumhlatjelo longenakuphela futsi waphakadze.
11 Manje kute namunye umuntfu longanikela ngengati yakhe lucobo lengahlawulela tono talomunye. Manje, uma umuntfu abulala, buka ngabe umtsetfo wetfu, lolungile, ungayitsatsa yini imphilo yemnakabo na? Ngitsi kini, Cha.
12 Kodvwa umtsetfo ufuna imphilo yakhe loyo lobulele; ngako-ke angeke kubekhona intfo lengaba ngephansi kwenhlawulo lengapheli leyowenela tono temhlaba.
13 Ngako-ke, kufanele kutsi kube khona umhlatjelo lomkhulu newekugcina, futsi uma kunjalo kuyawuba khona, noma kufanele kutsi kube khona, kuphela kwekucitsa ingati; uma kunjalo umtsetfo waMosi uyawube sewuyagcwaliseka; yebo; wonkhe uyawugcwaliseka, onkhe emaganyana nemacashatana, futsi kute nakunye lokuyawube kungakagcwaliseki.
14 Buka, loku kuyinchazelo yawo wonkhe umtsetfo, konkhe nalokuncane kanganani kukhomba kulowo mhlatjelo lomkhulu kanye newekugcina; lowo mhlatjelo lomkhulu kanye newekugcina utawuba yiNdvodzana yaNkulunkulu, yebo, longapheli futsi newaphakadze.
15 Ngaleyondlela iyawuletsa insindziso kubo bonkhe labayawukholwa egameni layo; loko kuyinjongo yalomhlatjelo wekugcina, kuletsa bubele, lobehlula kulunga, futsi lobuveta indlela kubantfu kute babe nelukholo ngalokwanele kute baphendvuke.
16 Ngaleyondlela umusa ungatenelisa tidzingo tekulunga, futsi ubatungelete ngemikhono yekuphepha, kutsi loyo longalusebentisi lukholo kute aphendvuke uba ngaphansi kwawo wonkhe umtsetfo wetidzingo tekulunga; ngako-ke lisu lelikhulu nelaphakadze lekuhlengwa liletfwa kuloyo kuphela lonelukholo kute aphendvuke.
17 Ngako-ke shengatsi Nkulunkulu angavuma, bomnaketfu, kutsi nicale kusebentisa lukholo lwenu nite niphendvuke, kutsi nicale kubita ligama lakhe lelingcwele, kute abe nemusa kini;
18 Yebo, khalelani umusa kuye, ngoba unemandla ekusindzisa.
19 Yebo, titfobeni, futsi nichubeke nekuthandaza kuye.
20 Khalani kuye uma nisemasimini enu, yebo, ngetulu kwayo yonkhe imihlambi yenu.
21 Khalani kuye etindlini tenu, yebo, ngetulu kwemindeni yenu yonkhe, ekuseni, emini, kanye nantsambama.
22 Yebo, khalani kuye ngalokumelene nemandla etitsa tenu.
23 Yebo, khalani kuye ngalokumelene nadeveli, lositsa sako konkhe kulunga.
24 Khalani kuye ngetulu kwetitjalo temasimu enu, kute niphumelele kuwo.
25 Khalani ngetulu kwemihlambi yemasimu enu, kute yandze.
26 Kodvwa akusiko loku kuphela; thandazani ngenshisekelo lenkhulu emagumbini enu, nasetindzaweni tenu letifihlekile, kanye nasehlane lenu.
27 Yebo, futsi uma ningakhali eNkhosini, tinhlitiyo tenu atigcwale, nichubeke nekuthandazela inhlalakahle yenu kuye, ngalokunjalo nenhlalakahle yalabo labanitungeletile.
28 Manje bukani, bomnaketfu labatsandzekako, ngitsi kini, ningacabangi kutsi nguloku kuphela; ngoba emvakwekutsi senitentile tonkhe leti tintfo, uma nicosha labeswele, kanye nalabangcunu, ningabavakasheli labagulako kanye nalabahluphekile, futsi ninikele ngetimphahla tenu, uma ninato, kulabo labadzingako—ngitsi kini, uma ningenti noma ngukuphi kwaleti tintfo, bukani, umthandazo wenu ulite, futsi awunisiti ngalutfo, futsi ninjengebatentisi labaluphikako lukholo.
29 Ngako-ke, uma ningakhumbuli kutsi nibe nelutsandvo, nifana nelinyela, lelilahlwa bacwengi (ngoba alisenamsebenti) futsi linyatselwa ngaphansi kwetinyawo tebantfu.
30 Manje, bomnaketfu, ngifuna kutsi, emvakwekutsi senitfole bofakazi labaningi kangaka, nibonile kutsi imibhalo lengcwele iyafakaza ngaleti tintfo, wotani ngaphambili niletse titselo kute niphendvuke.
31 Yebo, ngifisa shengatsi beningeta ngaphambili ningabe nisatenta lukhuni tinhlitiyo tenu; ngoba bukani, manje sengiso sikhatsi kanye nelusuku lwekusindziswa kwenu, ngako-ke, uma nitawuphendvuka futsi ningatenti lukhuni tinhlitiyo tenu, khona madvute nje lisu lelikhulu lekuhlengwa litawutiswa kini.
32 Ngoba bukani, lemphilo lena isikhatsi sekutsi bantfu batilungiselele kutsi bahlangane naNkulunkulu; yebo, bukani lusuku lwalemphilo lulusuku lwebantfu kutsi bente imisebenti yabo.
33 Manje, njengoba ngishito kini ngaphambilini, njengoba nibe nabofakazi labaningi kangaka, ngako-ke, ngiyanincenga kutsi ningaluhlehlisi lusuku lwekuphendvuka kwenu kute kube sekugcineni; ngoba emvakwalolu lusuku lwalemphilo, lesinikwe lona kutsi silungiselele liphakadze, bukani, uma singasenti ncono sikhatsi setfu sikulemphilo, emvakwaloko kufika busuku bebumnyama lapho kungeke kusaba khona umsebenti lowentiwako.
34 Angeke nitsi, uma seniletfwa kuleso simo lesibi, kutsi ngitawuphendvuka, ngitawubuyela kuNkulunkulu wami. Cha, angeke nikusho loku; ngoba lowo moya lophetse imitimba yenu ngesikhatsi seniphuma kulemphilo, lowo moya utawuba nemandla ekuphatsa umtimba wakho kulowo mhlaba waphakadze.
35 Ngoba bukani, uma niluhlehlisile lusuku lwenu lwekuphendvuka kute kube sekufeni, bukani, seningaphansi kwemoya wadeveli, uyanibopha nibe ngebakhe; ngako-ke, Moya weNkhosi uyobe sewusukile kini, awusenandzawo kini, develi sewunemandla onkhe ngetulu kwenu; futsi lesi simo sekugcina salababi.
36 Futsi loku ngiyakwati, ngoba iNkhosi ishito kutsi ayihlali emathempelini langasingcwele, kodvwa ihlala etinhlitiyweni talabalungile; yebo, iphindze yasho kutsi labalungile bayawuhlala phansi embusweni wayo, bangabe basaphuma; kodvwa tingubo tabo tihlantwe tibe mhlophe ngengati yeMvana.
37 Manje, bomnaketfu labatsandzekako, ngifisa kutsi nitikhumbule letintfo, futsi kumele nisebentele insindziso yenu ngekwesaba phambi kwaNkulunkulu, ningabe nisakuphika kuta kwaKhristu.
38 Nekutsi ningabe nisaphikisana naMoya loNgcwele nanini, kodvwa niwemukele, futsi nitsatse libito laKhristu nibitwe ngaye; nititfobe naselutfulini, nimkhonte Nkulunkulu, noma ngabe ngukuphi lapho ningaba khona, ngemoya kanye nangeliciniso; futsi nihlale ngekubonga tinsuku tonkhe, ngemusa lomningi kanye netibusiso laninika tona.
39 Yebo, futsi ngiyaphindza ngiyanincusa, bomnaketfu, kutsi nicaphele kutsi nithandaze njalonjalo, kute ningaholelwa khashane tilingo tadeveli, kute anganehluli, kute ningabi ngulabangephansi kwakhe ngelusuku lwekugcina; ngoba bukani, akaniniki umvuzo walutfo loluhle.
40 Manje bomnaketfu labatsandzekako, ngiyanincusa kutsi nibe nekubeketela, futsi nekutsi nibeketelele lonkhe luhlobo lwetinhlupheko, nekutsi ningabetfuki labo labaniphonsa ngaphandle ngenca yebumphofu benu lobukhulu, hleze nibe toni njengabo.
41 Kodvwa kutsi nibe nekubeketela, nibeketelele leto tinhlupheko, ngelitsemba lelicinile lekutsi ngalolunye lusuku niyawuphumula kuto tonkhe tinhlupheko tenu.