Sehluko 37
Bongcwengcwe belitfusi naleminye imibhalo lengcwele kuyagcinwa kute kuletse bantfu ensindzisweni—EmaJarede abhujiswa ngenca yebubi bawo—Tifungo kanye netivumelwano tawo letiyimfihlo kufanele kungavetwa ebantfwini—Tfolani seluleko eNkhosini ekwenteni kwenu konkhe—Njengoba iLiyahona yacondzisa emaNefi, kanjalo nelivi laKhristu liholela bantfu emphilweni yaphakadze. Cishe ngemnyaka wa74 ngaphambi kwekutalwa kwaKhristu.
1 Manje, ndvodzana yami Hilamani, ngiyakuyala kutsi utsatse lemibhalo lebengiphatsiswe yona ngekwetsenjwa.
2 Ngetulu kwaloko ngiyakuyala kutsi ugcine lombhalo walabantfu, njengoba nami ngentile, kulabongcwengcwe baNefi, futsi utigcine tonkhe letintfo lengitigcinile tingcwele, njengoba nami ngitigcinile; ngoba kungenhloso yekuhlakanipha kutsi tigcinwe.
3 Futsi labongcwengcwe belitfusi, labacuketse lemicopho, labanemibhalo lengcwele kubo, labanemlandvo wetitukulwane tabokhokho betfu, kusukela ekucaleni—
4 Buka, kwaphrofethwa bobabe betfu, kutsi kumele bagcinwe futsi bendluliswe behle kusukela etitukulwaneni kuya kulesinye, futsi bagcinwe balondvolotwe ngesandla seNkhosi baze bahambe baye kuto tonkhe tive, imindeni, tilimi, kanye nakubantfu, kute bati ngetimfihlakalo leticuketfwe kubo.
5 Manje buka, uma bagciniwe kufanele bahlale bakhatimula; yebo, batawuhlala bakhatimula; yebo, kanjalo nabo bonkhe bongcwengcwe labacuketse leyo mibhalo lengcwele.
6 Manje ungacabanga kutsi loku lengikwentako kubulima; kodvwa buka ngitsi kuwe, ngetintfo letincane naletisobala kufezeka tintfo letinkhulu; futsi emasu lamancane etikhatsini letiningi ayatitfobisa tihlakaniphi.
7 Futsi iNkhosi Nkulunkulu isebenta ngemasu kute ifeze tinhloso tayo letinkhulu netaphakadze; futsi ngemasu lamancane kakhulu iNkhosi itfobisa tihlakaniphi iphindze isindzise imiphefumulo leminingi.
8 Manje, kute kube ngumanje bekusolo kukuhlakanipha kwaNkulunkulu kutsi leti tintfo tilondvolotwe; ngoba buka, tiyivulile imicondvo yalabantfu, yebo, takholisa labaningi ngemaphutsa etindlela tabo, futsi baletfwa ekumatini Nkulunkulu wabo kute kusindziswe imiphefumulo yabo.
9 Yebo, ngitsi kuwe, kube bekungasiko ngenca yaleti tintfo leticuketfwe ngulemibhalo, lekulabongcwengcwe, Amoni kanye nabomnakabo bebangeke bakwati kutsi bakholise tinkhulungwane letiningi kangaka temaLamani ngemasiko langakalungi aboyise; yebo, lemibhalo kanye nemavi abo abaletsa ekuphendvukeni; lokusho kutsi, yabaletsa ekuyatini iNkhosi Nkulunkulu wabo, kanye nasekutseni bajabule ngaJesu Khristu uMhlengi wabo.
10 Futsi ngubani lowatiko mhlawumbe ingaba yindlela yekuletsa letiningi tinkhulungwane tabo, yebo, futsi kanjalo letiningi tinkhulungwane tabomnaketfu lababonhlokolukhuni, emaNefi, lokungumanje atente lukhuni tinhlitiyo tawo esonweni kanye nasebubini, ekumatini uMhlengi wawo na?
11 Manje leti timfihlakalo atikembulwa ngalokugcwele kimi; ngako-ke ngitawugcina lapha.
12 Futsi ngabe kwenele uma ngingatsi kuphela nje balondvolotelwe ngenhloso yekuhlakanipha, leyo nhloso leyatiwa nguNkulunkulu; ngoba yena weluleka ngekuhlakanipha kuyo yonkhe imisebenti yakhe, tindlela takhe ticondzile, futsi indlela yakhe yinye naphakadze.
13 Awu khumbula, khumbula, ndvodzana yami Hilamani, kutsi icine kanjani imiyaleto yaNkulunkulu. Watsi: Uma utawuyigcina imiyaleto yami uyawuphumelela eveni—kodvwa uma ungayigcini imiyaleto yakhe uyawususwa phambi kwakhe.
14 Manje khumbula, ndvodzana yami, kutsi Nkulunkulu utiphatsise wena ngekukwetsemba leti tintfo, letingcwele, latigcine tingcwele, futsi latawutigcina phindze atilondvolotele ngenhloso yakhe yekuhlakanipha, kute akhombise emandla akhe etitukulwaneni letitako.
15 Manje buka, ngikutjela ngemoya wekuphrofetha, kutsi uma uphambuka emiyalweni yaNkulunkulu, buka, leti tintfo letingcwele tiyawutsatfwa kuwe ngemandla aNkulunkulu, futsi uyawunikelwa kuSathane, kutsi akuhlunge njengemakhoba emoyeni.
16 Kodvwa uma ugcina imiyaleto yaNkulunkulu, futsi wente ngaletintfo letingcwele njengoba iNkhosi ikuyaletile, (ngoba kufanele uncuse eNkhosini ngato tonkhe tintfo lekufanele utente ngato) buka, kute emandla asemhlabeni noma esihogo langatitsatsa kuwe, ngoba Nkulunkulu unemandla ekugcwalisa onkhe emavi akhe.
17 Ngoba utawutigcwalisa tonkhe tetsembiso takhe layawutenta kuwe, ngoba utigcwalisile tetsembiso takhe latenta kubobabe betfu.
18 Ngoba wetsembisa kubo kutsi uyawutilondvolota letintfo atilondvolotele inhloso yakhe yekuhlakanipha, kute akhombise emandla akhe etitukulwaneni letitako.
19 Futsi manje buka, inhloso yinye sewuyigcwalisile, nasekubuyiselweni kwetinkhulungwane letiningi temaLamani ekwatini liciniso; uwakhombisile emandla akhe kubo, futsi kanjalo usetawuwakhombisa emandla akhe kubo etitukulwaneni letitako; ngako-ke tiyawulondvolotwa.
20 Ngako-ke ngiyakuyala, ndvodzana yami Hilamani, kutsi ukhutsale ekuwagcwaliseni onkhe emavi ami, futsi nekutsi ukhutsale ekugcineni imiyaleto yaNkulunkulu njengoba ibhaliwe.
21 Manje, sengitawukhuluma kuwe mayelana nalabongcwengcwe labangemashumi lamabili nakune, kutsi ubagcine, kute timfihlakalo kanye nemisebenti yebumnyama, kanye nemisebenti yabo yangansense, noma imisebenti yangansense yalabo bantfu lababhujisiwe, yembulwe kulabantfu; yebo, konkhe kubulala kwabo, nebugebengu, nekuphanga, nabo bonkhe bubi kanye netinengiso tabo, kungembulwa kulabantfu; yebo, futsi nekutsi ubalondvolote laba bahumushi.
22 Ngoba buka, iNkhosi yabona kutsi bantfu bayo bacala kusebenta ebumnyameni, yebo, basebenta kubulala ngansense kanye netinengiso; ngako-ke iNkhosi yatsi, uma bangakaphendvuki bayawubhujiswa baphele ebusweni bemhlaba.
23 Futsi iNkhosi yatsi: Ngitawulungiselela inceku yami Gazelema, litje, leliyawukhanya ebumnyameni libe kukhanya, kute ngibonise bantfu bami kutsi ngubani longisebentelako, nekutsi ngibakhombise imisebenti yabomnakabo, yebo, imisebenti yabo lefihlakele, imisebenti yabo yebumnyama, nebubi babo kanye netinengiso.
24 Manje, ndvodzana yami, labo bahumushi balungiselelwa kutsi livi laNkulunkulu ligcwaliseke, lalikhuluma, atsi:
25 Ngiyawukwembula ebumnyameni ngivete ekukhanyeni yonkhe imisebenti yabo lefihlakele kanye netinengiso tabo; ngaphandle kwekutsi baphendvuke ngiyawubabhubhisa baphele nya ebusweni bemhlaba; futsi ngiyawutiveta ekukhanyeni tonkhe timfihlakalo kanye netinengiso tabo, kuto tonkhe tive letiyawuba banikati balelive emvakwaloku.
26 Manje, ndvodzana yami, siyabona kutsi abatange baphendvuke; ngako-ke babhujisiwe, futsi kute kube ngumanje livi laNkulunkulu ligcwalisekile; yebo, tinengiso tabo letifihlakele tikhishiwe ebumnyameni tembulelwa tsine.
27 Manje, ndvodzana yami, ngiyakuyala kutsi utigodle tonkhe tifungo tabo, netivumelwano tabo, kanye nekuvumelana kwabo ngalokuphatselene netinengiso tabo letifihlakele; yebo, kanye nato tonkhe timphawu tabo netimangaliso tabo uyawubafihlela labantfu, kute bangatati, hleze mhlawumbe bawele ebumnyameni nabo bese bayabhujiswa.
28 Ngoba buka, kukhona sicalekiso etikwalo lonkhe lelive, sekutsi kubhujiswa kuyawuta etikwato tonkhe leto tisebenti tebumnyama, ngekwemandla aNkulunkulu, uma setivutfwe ngalokuphelele; ngako-ke ngifisa kutsi labantfu bangabhujiswa.
29 Ngako-ke uyawuwafihla lamasu layimfihlo etifungo tabo kanye netivumelwano tabo kulabantfu, futsi bubi babo kuphela nekubulala kwabo kanye netinengiso tabo loyawukwembula kubo; uyawubafundzisa kutsi babenyanye bubi lobunjalo netinengiso kanye nekubulala; ngetulu kwaloko uyawubafundzisa kutsi labantfu babhujiswa ngenca yebubi babo netinengiso kanye nekubulala kwabo.
30 Ngoba buka, bababulala bonkhe baphrofethi beNkhosi labefika emkhatsini wabo kutawushumayela kubo mayelana nebubi babo; futsi ingati yalabo labababulala yakhala eNkhosini Nkulunkulu wabo kutiphindziselela kulabo lebebababulali babo; ngaleyondlela tehlulelo taNkulunkulu teta etikwaleti tisebenti tebumnyama kanye nemacembu layimfihlo.
31 Yebo, futsi licalekisiwe lelive ingunaphakadze kuleto tisebenti tebumnyama kanye nemacembu layimfihlo, bate babhujiswe, ngaphandle kwekutsi baphendvuke ngaphambi kwekutsi bavutfwe ngalokuphelele.
32 Manje, ndvodzana yami, khumbula emavi lengiwakhulume kuwe; ungabaniki lawo masu layimfihlo labantfu, kodvwa bafundzise kutsi basitondze njalo sono kanye nebubi.
33 Shumayela kubo kuphendvuka, kanye nelukholo eNkhosini Jesu Khristu; bafundzise kutsi batitfobe baphindze babe mnene nekutsi batitfobe ngenhlitiyo; bafundzise kutsi bamelane nato tonkhe tilingo tadeveli, ngekukholwa kwabo eNkhosini Jesu Khristu.
34 Bafundzise kutsi bangalokotsi bakhatsale kwenta imisebenti lemihle, kodvwa kutsi babe mnene futsi batitfobe ngenhlitiyo; ngoba ngulabanjalo labayawutfola kuphumula emiphefumulweni yabo.
35 Awu, khumbula, ndvodzana yami, futsi ufundze kuhlakanipha ebusheni bakho; yebo, fundza ebusheni bakho kugcina imiyaleto yaNkulunkulu.
36 Yebo, khala kuNkulunkulu kute utfole konkhe kuphila kwakho; yebo, konkhe kwenta kwakho akube seNkhosini, futsi noma ngabe uyakuphi akube seNkhosini; yebo, yonkhe imicabango yakho yicondzise eNkhosini; yebo, lutsandvo lwenhlitiyo yakho alube seNkhosini ingunaphakadze.
37 Tfola seluleko eNkhosini kuko konkhe kwenta kwakho, futsi itawukucondzisa kute uzuze; yebo, uma ulala phansi ebusuku lala eNkhosini, kute ikuvikele ekulaleni kwakho; futsi uma uvuka ekuseni inhlitiyo yakho ayigcwale kubonga kuNKulunkulu; futsi uma utenta letintfo, uyawuphakanyiswa ngelusuku lwekugcina.
38 Manje, ndvodzana yami, nginalokutsite lengifuna kukusho mayelana naleyontfo bobabe betfu labayibita ngebhola, noma umcondzisi—noma bobabe betfu lebebakubita ngekutsi yiLiyahona, ngekuhunyushwa lokutsiwa, yinkhombandlela; futsi iNkhosi yayilungisa.
39 Futsi buka, kute namunye umuntfu longenta loku ngendlela yebuciko lobungaka. Buka, yayilungiselelwe kutsi ikhombise bobabe betfu indlela lebekufanele bahambe ngayo ehlane.
40 Futsi yabasebentela ngekwelukholo lwabo kuNkulunkulu; ngako-ke, uma bebanelitsemba lekukholwa kutsi Nkulunkulu bekangakwati kwenta leto tintfo tikhombe indlela lokwakumele bahambe ngayo, buka, bekwenteka; ngako-ke bebanalesi simangaliso, futsi kanjalo naletiningi letinye timangaliso letenteka ngemandla aNkulunkulu, lusuku ngelusuku.
41 Noko, ngenca yekutsi leto timangaliso betenteka ngetintfo letincane tabakhombisa imisebenti lemihle kakhulu. Bebavilapha, baphindze bakhohlwa kusebentisa lukholo lwabo kanye nekukhutsala kwase kutsi leyo misebenti lemihle kakhulu yancamuka, futsi abatange basachubeka neluhambo lwabo.
42 Ngako-ke, bahlala ehlane, noma abatange basahamba indlela lecondzile, futsi bahlushwa yindlala kanye nekoma, ngenca yetiphambuko tabo.
43 Manje, ndvodzana yami, ngifuna kutsi ucondze kutsi leti tintfo tite kufana; ngoba njengoba bobabe betfu bavilapha kutsi bayinake lenkhombandlela (manje leti tintfo betitesikhashana) abaphumelelanga; kunjalo-ke nangetintfo letitakamoya.
44 Ngoba buka, kulula kutsi ulinake livi laKhristu, leliyawukukhombisa indlela lecondzile leya entfokotweni yaphakadze, njengoba bekunjalo kubobabe betfu kutsi bayinake lenkhombandlela, lebeyibakhombisa indlela lecondzile leya eveni lesetsembiso.
45 Manje ngitsi, ngabe kute yini kufana kulentfo na? Ngoba njengoba nakanjani lomcondzisi uletse bobabe betfu, ngekulandzela indlela yakhe, eveni lesetsembiso, kanjalo ngemavi aKhristu, uma silandzela indlela yawo, ayawusetfwala asiyise ngale kwalesigodzi selusizi siye eveni lelincono kakhulu lesetsembiso.
46 Awu ndvodzana yami, ungasivumeli kutsi sivilaphe ngenca yekubalula kwendlela; ngoba bekunjalo nakubobabe betfu; ngoba beyilungiselwe bona kanjalo, kutsi uma bebangabuka bebangaphila; kusenjalo nakitsi. Indlela ilungisiwe, futsi uma singabuka singaphila ingunaphakadze.
47 Manje, ndvodzana yami, buka kutsi uyatinakekela leti tintfo letingcwele, yebo, caphela kutsi ubuka kuNkulunkulu futsi uphile. Hamba uye kulaba bantfu futsi umemetele livi, futsi ube cotfo. Ndvodzana yami, hamba kahle.