Imiyaleto ya-Alima kundvodzana yakhe Khoriyanthoni.
Itfolakala etahlukweni 39 kuya ku 42.
Sehluko 39
Sono sekulalana sisinengiso—Tono taKhoriyanthoni tavimbela emaZoramu ekumukeleni livi—Kuhlenga kwaKhristu kusebentile ngesikhatsi lesendlulile ekusindziseni labakholwako labebaphila kungakentiwa. Cishe ngemnyaka wa 74 ngaphambi kwekutalwa kwaKhristu.
1 Manje, ndvodzana yami, nginalokutsite lokunye lengitawukusho kuwe kunaloko lengikushito kumnakenu; ngoba buka, awukubonanga yini kucina kwemnakenu, kwetsembeka kwakhe, kanye nekukhutsala kwakhe ekugcineni imiyaleto yaNkulunkulu na? Buka akatange yini abe sibonelo lesihle kuwe na?
2 Ngoba wena awutange uwanake kangako emavi ami njengoba umnakenu enta, emkhatsini webantfu bemaZoramu. Manje nguloku lenginako ngalokumelene nawe; wena bewuhamba utigabatisa ngemandla akho kanye nangekuhlakanipha kwakho.
3 Futsi akusiko loku kuphela, ndvodzana yami. Wena wente loko lokubuhlungu kakhulu kimi; ngoba uyilahlile inkonzo wahamba waya eveni laseSironi emkhatsini wemincele yemaLamani, ulandzela ingwadla Isabhela.
4 Yebo, watintjontja tinhlitiyo talabaningi; kodvwa loku kwakungasilo licembe lekubhacisa kuwe, ndvodzana yami. Wena kwakufanele utinikele enkonzweni lebewuphatsiswe yona ngekwetsenjwa.
5 Awati yini ndvodzana yami, kutsi leti tintfo tisinengiso emehlweni eNkhosi; yebo, tinengeke kakhulu ngetulu kwato tonkhe tono ngaphandle kwekucitsa ingati lengenacala noma kuphika Moya loNgcwele na?
6 Ngoba buka, uma umphika Moya loNgcwele uma wake waba nendzawo kuwe, futsi wati kutsi uyamphika, buka, loku kusono lesingacoleleki; yebo, loyo lobulalako ngalokuphambene nekukhanya kanye nekumati Nkulunkulu, akulula kuye kutsi atfole kutsetselelwa; yebo, ngitsi kuwe, ndvodzana yami, akulula kuye kutsi atfole kutsetselelwa.
7 Manje, ndvodzana yami, ngifisa shengatsi ngabe awubanga nacala lesono lesikhulu kangaka kuNkulunkulu. Bengingeke ngihlale etikwemacala akho, kutsi ngikhatsate umphefumulo wakho, kube bengingakahlosi kutsi uzuze.
8 Kodvwa buka, angeke ukwati kufihla emacala akho kuNkulunkulu, futsi ngaphandle kwekutsi uphendvuke ayawukuma njengebufakazi ngalokumelene nawe ngelusuku lwekugcina.
9 Manje ndvodazana yami, ngifisa kutsi uphendvuke uphindze utishiye tono takho, ungabe usatilandzela nanini tinkhanuko temehlo akho, kodvwa tincishe tonkhe leti tintfo; ngoba ngaphandle kwekutsi wente loku awunawukwati nanini kutsi udle lifa lembuso waNkulunkulu. Awu, Khumbula, futsi ukwemukele, utincishe leti tintfo.
10 Futsi ngiyakuyala kutsi ukwemukele kutsi utfole teluleko kubomnakenu labadzala etintfweni lotentako; ngoba buka, wena usesebusheni bakho, futsi usadzinga kondliwa bomnakenu. Tinake teluleko tabo.
11 Ungativumeli kutsi udukiswe ngunoma yini lelite noma lebuwula; ungamvumeli develi kutsi aphindze adukise inhlitiyo yakho futsi kutsi ulandzele leto tingwadla letikhohlakele. Buka, Awu ndvodzana yami, bukhulu kanganani bubi lowubuletse etikwemaZoramu; ngoba ngesikhatsi abona kutiphatsa kwakho awatange asawakholwa emavi ami.
12 Manje Moya weNkhosi utsi kimi: Yala bantfwana bakho kutsi bente lokuhle, hleze badukise tinhlitiyo tebantfu labaningi ekubhujisweni; ngako-ke ngiyakuyala, ndvodzana yami, ngekwesaba Nkulunkulu, kutsi buyekele lobubi bakho.
13 Kutsi ugucukele eNkhosini ngayo yonkhe ingcodvo yakho, nemandla, kanye nekucina; kute ungabe usatidukisa tinhlitiyo tabo nanini kutsi bente bubi, kodvwa esikhundleni saloko buyela kubo, uwavume emaphutsa akho kanye naloko lokubi lowukwentile.
14 Ungayifuni ingcebo noma tintfo letilite talomhlaba; ngoba buka, angeke utitfwale uhambe nato.
15 Manje, ndvodzana yami, ngitawusho lokutsite kuwe mayelana nekuta kwaKhristu. Buka, ngitsi kuwe, nguye ngempela loyawukuta kutawususa tono temhlaba; yebo, utawumemetela tindzaba letimnandzi tensindziso kubantfu bakhe.
16 Manje, ndvodzana yami, ngiyo lena inkonzo lowawubitelwe kuyo, kutsi umemetele letindzaba letimnandzi kulabantfu, kutsi ulungise tingcondvo tabo; noma ngalenye indlela kute insindziso ite kubo, kute balungise tingcondvo tebantfwana babo kutsi balive livi ngesikhatsi sekuta kwakhe.
17 Manje sengitawuphumuta ingcodvo yakho ngandlela tsite ngalesi sihloko. Buka, uyamangala kutsi kungani leti tintfo kumele tatiwe kudze kangaka ngaphambilini. Buka, ngitsi kuwe, ngabe umphefumulo ngalesi sikhatsi awusilo yini ligugu kuNkulunkulu njengoba kuyawuba njalo ngesikhatsi sekuta kwakhe na?
18 Ingabe akudzingeki yini kutsi lisu lekuhlengwa latiswe labantfu kanjalo nakubantfwana babo na?
19 Ingabe akusiko yini lula ngalesi sikhatsi kutsi iNkhosi itfumele tingilosi tayo kutsi timemetele leti tindzaba letimnandzi kitsi kanjalo nakubantfwana betfu, noma emvakwesikhatsi sekuta kwakhe na?