Sehluko 43
Alima kanye nemadvodzana akhe bashumayela livi—EmaZoramu kanye nalabanye labahlubukile bemaNefi baba ngemaLamani—EmaLamani alwa nemaNefi emphini—Moroni uhlomisa emaNefi ngetikhali tekutivikela—INkhosi yembulela Alima lisu lemaLamani—EmaNefi avikela emakhaya awo, inkhululeko yawo, imindeni yawo, kanye nenkholo yawo—Emabutfo aMoroni kanye naLehi atungeleta emaLamani. Cishe ngemnyaka wa 74 ngaphambi kwekutalwa kwaKhristu.
1 Manje kwenteka kutsi emadvodzana a-Alima ahamba aya emkhatsini webantfu, kute amemetele livi kubo. Na-Alima ngalokunjalo, bekangakwati kuphumula, naye wahamba.
2 Manje asisenokusho lutfo lokunye mayelana nekushumayela kwabo, ngaphandle nje kwekutsi balishumayela livi, kanye neliciniso, ngekwemoya wekuphrofetha kanye newekwembulelwa; futsi bashumayela ngekweluhlelo lolungcwele lwaNkulunkulu labebabitwe ngalo.
3 Manje sengibuyela emlandvweni wetimphi emkhatsini wemaNefi kanye nemaLamani, ngemnyaka welishumi nesiphohlongo wekubusa kwebehluleli.
4 Ngoba buka, kwenteka kutsi emaZoramu aba ngemaLamani; ngako-ke, ekucaleni kwemnyaka welishumi nesiphohlongo bantfu bemaNefi babona kutsi emaLamani beseketa etikwabo; ngako-ke benta emalungiselelo emphi; yebo, babutsela ndzawonye emabutfo abo eveni laseJeshoni.
5 Futsi kwenteka kutsi emaLamani eta netinkhulungwane tawo; eta angena eveni lase-Anthiyonamu, lekulive lemaZoramu; futsi indvodza le libito layo kwakunguZerahemna yayingumholi wawo.
6 Manje, njengoba ema-Amaleki ngekwawo bekabantfu labebanebubi kakhulu futsi ababulali kakhulu kunaloko emaLamani labekangiko, ngako-ke, Zerahemna wabeka tindvuna letinkhulu ngetulu kwemaLamani, futsi tonkhe betingema-Amaleki kanye nemaZoramu.
7 Manje loku wakwenta kute agcine inzondo yabo kumaNefi, kute abaletse ngaphansi kwakhe kute afeze emacebo akhe.
8 Ngoba buka, emacebo akhe beka ekuphehla emaLamani kutsi atfukutselele emaNefi; loku wakwenta kute atfole emandla lamakhulu ngetulu kwawo, futsi ngalokunjalo kute azuze emandla ngetulu kwemaNefi ngekuwaletsa ebugcilini.
9 Manje lisu lemaNefi bekukusekela emave abo, netindlu tabo, nebafati babo, kanye nebantfwana babo, kute babavikele etandleni tetitsa tabo; ngetulu kwaloko kute bavikele emalungelo abo kanye nenzuzo yabo, yebo, kanjalo nenkhululeko yabo, kute badvumise Nkulunkulu njengekwetifiso tabo.
10 Ngoba bebati kutsi uma bangawela etandleni temaLamani, nekutsi loyo loyawukhonta Nkulunkulu ngekwakamoya kanye nangeliciniso, Nkulunkulu weliciniso futsi lophilako, emaLamani abeyawumbulala.
11 Yebo, futsi ngetulu kwaloko bebati ngenzondo lenkhulu yemaLamani kubomnakabo, labebabantfu baka-Anthi-Nefi-Lehi, labebabitwa ngebantfu ba-Amoni—futsi bebangeke bate batitsatse tikhali tabo, yebo, bebangene esivumelwaneni futsi bebangeke bate basephule—ngako-ke, uma bebangawela etandleni temaLamani bebayawubulawa.
12 Futsi emaNefi bekangayuvuma kutsi babulawe; ngako-ke babanika emave kutsi abe ngemafa abo.
13 Futsi bantfu ba-Amoni bawaniketa emaNefi incenye lenkhulu yemphahla yabo kute basekele emabutfo abo; ngaleyondlela emaNefi aphoceleka, wona odvwa, kutsi amelane nemaLamani, labebayinhlanganisela yaLamani naLemuweli, kanye nemadvodzana a-Ishmayeli, kanye nabo bonkhe labo labebahlubuke kumaNefi, labebangema-Amaleki nemaZoramu, kanye nesitukulwane sebaphristi baNowa.
14 Manje leso situkulwane besisiningi kakhulu, cishe, njengemaNefi; futsi ngaleyondlela emaNefi aphoceleleka kutsi alwe nabomnakabo, ngisho nangekucitsa ingati.
15 Futsi kwenteka ngesikhatsi emabutfo emaLamani sekabutsene ndzawonye eveni lase-Anthiyonamu, buka, emabutfo emaNefi besekatilungiselele kutsi ahlangane nabo eveni laseJeshoni.
16 Manje, umholi wemaNefi, noma indvodza lebeyibekwe kutsi ibe yindvuna lenkhulu ngetulu kwemaNefi—manje indvuna lenkhulu beyikhuta onkhe emabutfo emaNefi—libito lakhe bekunguMoroni.
17 Moroni nguye lobekekhuta, futsi aphetse timphi tabo. Bekaneminyaka lengemashumi lamabili nesihlanu nje kuphela budzala ngesikhatsi abekwa kutsi abe yindvuna lenkhulu ngetulu kwemabutfo emaNefi.
18 Futsi kwenteka kutsi wahlangana nemaLamani eminceleni yaseJeshoni, bantfu bakhe bebahlome ngetinkemba, nangabocelemba, kanye nangato tonkhe tinhlobo tetikhali temphi.
19 Ngesikhatsi emabutfo emaLamani abona kutsi bantfu baNefi, noma kutsi Moroni, besekabalungiselele bantfu bakhe ngetivikelo tetifuba kanye nangetivikelo temkhono, yebo, futsi kanjalo nangetihlangu tekuvikela tinhloko tabo, ngetulu kwaloko bagcoke tingubo leticinile—
20 Manje emabutfo aZerahemna bekangakatilungiseleli ngalutfo lolufana naleti tintfo; bona bebaphetse kuphela tinkemba tabo nabocelemba babo, butjoki babo kanye nemicibisholo yabo, ematje abo kanye netilingi tabo; futsi bona bebangcunu, ngaphandle nje kwesikhumba lebesitungelete tinkhalo tabo; yebo, bonkhe bebangcunu, ngaphandle kwemaZoramu kanye nema-Amaleki.
21 Kodvwa bona bebangakahlomi ngetivikelo tesifuba, noma tihlangu—ngako-ke, bawesaba kakhulu emabutfo emaNefi ngenca yetikhali tawo, nanoma sibalo sabo sasingetulu kunaleso semaNefi.
22 Buka, manje kwenteka kutsi abatange balokotse nakancane basondzele kutolwa nemaNefi eminceleni yaseJeshoni; ngako-ke bahamba baphuma eveni lase-Anthiyonamu baya ehlane, batsatsa luhambo lwabo batungeleta lihlane, baya ngasenhloko yemfula iSidoni, kute babuyele eveni laseManthi futsi balitsatse live libe labo; ngoba bebangacabangi kutsi emabutfo aMoroni ayati kutsi baye ngakuphi.
23 Kodvwa kwenteka kutsi, masinyane nje ngesikhatsi sebahambile baya ehlane Moroni watfumela tinhloli taya ehlane kutsi tiyoyibuka inkambu yabo; Moroni, ngetulu kwaloko, ati ngetiphrofetho ta-Alima, watfumela emadvodza latsite kuye, anesifiso sekutsi abute eNkhosini kutsi emabutfo emaNefi ngabe bekufanele aye ngakuphi kuyawutivikela kumaLamani.
24 Futsi kwenteka kutsi livi leNkhosi leta ku-Alima, Alima watitjela titfunywa taMoroni, kutsi emabutfo emaLamani bekahamba atungeleta lihlane, kute afike eveni laseManthi, kute acale kuhlasela ngasencenyeni lebutsakatsaka yebantfu. Titfunywa leto tahamba tayawukwetfula umlayeto kuMoroni.
25 Manje Moroni, washiya incenye yelibutfo lakhe eveni laseJeshoni, hleze ngandlela tsite incenye yemaLamani ifike kulelo live ititsatsele lidolobha libe labo, watsatsa incenye lebeyisele yemphi yakhe wahamba nayo waya eveni laseManthi.
26 Futsi wenta kutsi bonkhe bantfu kuleyoncenye yelive bahlangane ndzawonye kute balwe nemaLamani, kute bavikele imihlaba yabo kanye nelive labo, emalungelo abo kanye nenkhululeko yabo; ngako-ke bese basilungele sikhatsi sekufika kwemaLamani.
27 Futsi kwenteka kutsi Moroni wenta kutsi imphi yakhe ibhace esigodzini lebesisedvute nelusentse lwemfula iSidoni, lebesisenshonalanga yemfula iSidoni ehlane.
28 Moroni waphindze wabeka tinhloli tatungeleta, kute ati ngesikhatsi libutfo lemaLamani selita.
29 Manje, njengoba Moroni bekayati inhloso yemaLamani, kutsi bekuyinhloso yawo kutsi abulale bomnakabo, noma kutsi babacindzetele futsi babaletse ebugcilini kute batakhele umbuso ngetulu kwalo lonkhe live;
30 Ngetulu kwaloko ati kutsi bekungiso kuphela sifiso semaNefi kutsi agcine emave awo, nenkhululeko yawo, kanye nelibandla lawo, ngako-ke wabona kutsi bekungasiso sono kutsi abavikele ngelicebo; ngako-ke, watfola ngetinhloli takhe kutsi nguyiphi indlela emaLamani labekatawuyitsatsa.
31 Ngako-ke, walehlukanisa libutfo lakhe waletsa incenye esigodzini, futsi walibhacisa emphumalanga, kanye naseningizimu yeligcuma iRiphila.
32 Kwatsi labasalako wababhacisa esigodzini lesisenshonalanga, enshonalanga yemfula iSidoni, kwehla njalo kuya eminceleni yelive iManthi.
33 Futsi ngaleyondlela asalibekile libutfo lakhe njengekwesifiso sakhe, besekatilungiselele kutsi ahlangane nawo.
34 Futsi kwenteka kutsi emaLamani eta akhuphukela ngasenyakatfo yeligcuma, lapho incenye yelibutfo laMoroni beyibhace khona.
35 Ngesikhatsi emaLamani sekandlulile egcumeni iRiphila, sekafike esigodzini, sekacala kuwela umfula iSidoni, libutfo lebelibhace eningizimu yeligcuma, lebeliholwa yindvodza libito layo kunguLehi, yalihola libutfo layo laya phambili lawatungeleta emaLamani emphumalanga emvakwawo.
36 Futsi kwenteka kutsi ngesikhatsi emaLamani abona kutsi emaNefi atseleka etikwawo emvakwawo, agucukela kuwo acala alwa nelibutfo laLehi.
37 Kubulala kwacala etinhlangotsini totimbili, kodvwa kwaba kubi kakhulu encenyeni yemaLamani, ngoba bungcunu bebungakavikeleki emagalelweni lamatima emaNefi ngetinkemba tawo kanye nangabocelemba babo, lebekuletsa kufa cishe ngawo onkhe emagalelo.
38 Kantsi ngakulolunye luhlangotsi, bekukhona nje lapha nalapha indvodza lebeyiwa emkhatsini wemaNefi, ngetinkemba tawo kanye nangekulahleka kwengati, ngenca yekutsi bona bebavikelekile etindzaweni letibucayi emitimbeni yabo, noma tindzawo letibucayi kakhulu temtimba betivikelekile emagalelweni emaLamani, ngetivikelo tesifuba tawo, nangetivikelo temkhono tawo, kanye netivikelo tenhloko tawo; futsi emaNefi achubeka kanjalo-ke nekubulala emkhatsini wemaLamani.
39 Futsi kwenteka kutsi emaLamani acala kwesaba, ngenca yekubulawa lokukhulu emkhatsini wawo, ate acala kubalekela ngasemfuleni iSidoni.
40 Futsi acoshwa nguLehi kanye nemadvodza akhe; achutjwa nguLehi ate afika emantini aseSidoni, ancamula emantini aseSidoni. Lehi wahlala nelibutfo lakhe elusentseni lwemfula iSidoni kute angaweli.
41 Futsi kwenteka kutsi Moroni kanye nelibutfo lakhe bahlangana nemaLamani esigodzini, kulenye incenye yemfula iSidoni, futsi bacala kutseleka etikwawo bawabulala.
42 EmaLamani aphindza ababalekela, aya ngaseveni laseManthi; aphindze ahlangabetana nemabutfo aMoroni.
43 Manje kuloku emaLamani alwa kakhulu; yebo, bekangakate emaLamani atiwe alwa ngemandla lamakhulu kangaka kanye nangesibindzi lesingaka, cha, ngisho kusukela ekucaleni.
44 Futsi bekakhutsatwa ngemaZoramu kanye nema-Amaleki, labekatindvuna letinkhulu kanye nebaholi bawo, kanye nanguZerahemna, lobekayindvuna yawo lenkhulu, noma umholi kanye nemekhuti wawo lomkhulu; yebo, alwa njengabonyokangwenya, futsi labaningi bemaNefi babulawa ngetandla tawo, yebo, ngoba abashaya tate tahlukana kabili letiningi tivikelo tenhloko tawo, ngetulu kwaloko atibhobosa letiningi tivikelo tesifuba tawo, ashaya ajuba lemininngi imikhono yawo; futsi emaLamani alwa kanjalo-ke ngentfukutselo yawo lembi kakhulu.
45 Noko, emaNefi bekakhutsatwa sizatfu lesincono, ngoba bekangalweli nje kubusa noma emandla kodvwa bekalwela emakhaya awo nenkhululeko yawo, bafati bawo kanye nebantfwana bawo, kanye nako konkhe kwawo, yebo, netimiso tawo tekukhonta kanye nelibandla lawo.
46 Futsi bebenta loko labebacabanga kutsi bekungumsebenti labebadzinga kuwentela Nkulunkulu wabo; ngoba iNkhosi beyishito kubo, futsi kanjalo nakuboyise, kutsi: Kangangoba ningenacala lesono sekucala, kanjalo nesesibili, aniyukuvuma kutsi nibulawe ngetandla tetitsa tenu.
47 Ngetulu kwaloko, iNkhosi itsite: Niyawuyivikela imindeni yenu ngisho nangekucitsa ingati. Ngako-ke emaNefi alwa nemaLamani ngenca yalesi sizatfu, kutsi ativikele wona, kanye nemindeni yawo, nemihlaba yawo, nelive lawo, nemalungelo awo, kanye nenkholo yawo.
48 Futsi kwenteka kutsi ngesikhatsi emadvodza aMoroni abona budlova kanye nentfukutselo yemaLamani, besebatohocisa futsi bababalekele. Futsi Moroni, ayibona inhloso yawo, watfumela phambili wabafaka inshisekelo etinhlitiyweni tawo ngalemicabango—yebo, imicabango yetindzawo tawo, inkhululeko yawo, yebo, kukhululeka kwawo ebugcilini.
49 Futsi kwenteka kutsi bagucukela kumaLamani, bakhala ngelivi linye eNkhosini Nkulunkulu wawo, ngenkhululeko yawo kanye nekukhululwa kwawo ebugcilini.
50 Futsi bacala babukana nemaLamani ngemandla; futsi ngalo lelohora bakhala eNkhosini ngenkhululeko yabo, emaLamani acala ababalekela; abaleka ate ayofika emantini aseSidoni.
51 Manje, emaLamani bekamaningi kakhulu, yebo, ngetulu kwalokuphindvwe kabili kwesibalo semaNefi; noko, achutjwa kangangekutsi ate agcogcelwa ndzawonye aba licembu linye esigodzini, elusentseni ngasemfuleni iSidoni.
52 Ngako-ke emabutfo aMoroni abatungeleta, yebo, nasetinhlangotsini totimbili temfula. Ngoba buka, emphumalanga bekukhona emadvodza aLehi.
53 Ngako-ke ngesikhatsi Zerahemna abona emadvodza aLehi emphumalanga yemfula iSidoni, kanye nemabutfo aMoroni enshonalanga yemfula iSidoni, kutsi bese batungeletwe ngemaNefi, besaba.
54 Manje Moroni, ngesikhatsi abona kwesaba kwawo, wayala emadvodza akhe kutsi akuyekele kucitsa ingati yawo.