1 Manje kwenteka kutsi, masinyane nje emvakwekutsi Amalikhiya sekatfole umbuso wacala kufaka umoya etinhlitiyweni temaLamani ngalokumelene nebantfu baNefi; yebo, wabeka emadvodza kutsi akhulume kumaLamani asemibhoshongweni yawo, ngalokumelene nemaNefi.

2 Ngaleyondlela wawufaka umoya etinhlitiyweni tabo ngalokumelene nemaNefi, kangangekutsi ngasekupheleni kwemnyaka welishumi nemfica wekubusa kwebehluleli, sekawafezile emacebo akhe kute kube ngumanje, yebo, sekentiwe inkhosi ngetulu kwemaLamani, wafuna kutsi abuse kulo lonkhe live, yebo, kanye nakubo bonkhe bantfu labebaseveni, emaNefi ngalokunjalo nemaLamani.

3 Ngako-ke besekawafezile emacebo akhe, ngoba besekatente taba lukhuni tinhlitiyo temaLamani futsi watiphumphutsekisa tingcondvo tawo, wawaphehla kutsi atfukutsele, kangangekutsi besekagcogcele ndzawonye libutfo lelikhulu kutsi lihambe liyolwa nemaNefi.

4 Ngoba bekaphokophele, ngenca yebukhulu besibalo sebantfu bakhe, kutsi awancobe emaNefi futsi awaletse ebugcilini.

5 Ngenca yalesi sizatfu wabeka tindvuna letinkhulu temaZoramu, ngoba tatiwajwayele kakhulu emandla emaNefi, kanye netindzawo tawo tekubhaca, kanye netincenye temadolobha awo lebetibutsakatsaka; ngako-ke watibeka kutsi tibe tindvuna letinkhulu ngetulu kwemabutfo akhe.

6 Futsi kwenteka kutsi batsatsa inkambu yabo, bachubekela phambili baya ngaseveni laseZarahemla ehlane.

7 Manje kwenteka kutsi ngesikhatsi Amalikhiya asatfola emandla ngebucili kanye nangenkhohliso, Moroni, ngakulolunye luhlangotsi, bekaloku alungisela tingcondvo tebantfu kutsi batsembeke eNkhosini Nkulunkulu wabo.

8 Yebo, bekaloku acinisa emabutfo emaNefi, amisa tincaba letincane, noma tindzawo tekuphumula; akha lusentse ngemhlabatsi atungeleta kute avalele emabutfo akhe, ngetulu kwaloko akha tindvonga tematje kute awatungelete, atungelete emadolobha abo kanye nemincele yemave abo; yebo, kutungeleta lonkhe live.

9 Etincabeni tabo letibutsakatsaka wabeka emadvodza lamaningi; futsi ngaleyondlela walicinisa waphindze walenta laba nemandla lelive lemaNefi.

10 Ngaleyondlela bekalungiselela kutsi asekele inkhululeko yawo, emave awo, bafati bawo, bantfwana bawo, kanye nekuthula kwawo, nekutsi ahlale eNkhosini Nkulunkulu wawo, kanye nekutsi agcine loko lobekubitwa titsa tabo ngekutsi timiso temaKhristu.

11 Futsi Moroni bekayindvodza lecinile nalenemandla; bekayindvodza lenekucondza lokuphelele; yebo, indvodza lebeyingatfokoti ekucitseni ingati; indvodza umphefumulo wayo lobewutfokota ngenkhululeko yelive layo, kanye neyabomnakabo ebugcilini nasekugcilatweni;

12 Yebo, indvodza le inhlitiyo yayo beyigcwele kubonga kuNkulunkulu wayo, ngemalungelo lamaningi kanye netibusiso latinika bantfu bakhe; indvodza lebeyisebentela kakhulu inhlalakahle kanye nekuphepha kwebantfu bayo.

13 Yebo, futsi bekayindvodza lebeyicinile elukholweni lwaKhristu, futsi bekafunge ngesifungo kuvikela bantfu bakhe, emalungelo akhe, nelive lakhe, kanye nenkholo yakhe, ngisho nangekulahlekelwa yingati yakhe.

14 Manje emaNefi bekafundziswe kutivikela etintfweni tawo, ngisho nasekucitseni ingati uma kwakudzingekile; yebo, ngetulu kwaloko bekafundziswe kutsi angoni muntfu nanini, yebo, futsi angayiphakamisi nanini inkemba ngaphandle kwekutsi kungulokumelene nesitsa, ngaphandle kwekutsi bekukwekulondvolota timphilo tawo.

15 Futsi loku bekulukholo lwabo, kutsi ngekwenta njalo Nkulunkulu bekatobaphumelelisa eveni, noma ngalamanye emavi, uma bebatsembekile ekugcineni imiyaleto yaNkulunkulu kutsi bekatobaphumelelisa eveni; yebo, abacwayise kutsi babaleke, noma balungiselele imphi, njengekuba sengotini kwabo;

16 Ngetulu kwaloko, nekutsi Nkulunkulu uyawubatisa kutsi baye ngakuphi kute bativikele etitseni tabo, ngekwenta njalo, iNkhosi iyawubakhulula; loku bekulukholo lwaMoroni, futsi inhliyito yakhe beyitfokota ngaloku; hhayi ekucitseni ingati kodvwa ekwenteni lokuhle, ekulondvoloteni bantfu bakhe, yebo, ekugcineni imiyaleto yaNkulunkulu, yebo, kanye nekwala bubi.

17 Yebo ngicinisile, ngicinisile ngitsi kini, kube bonkhe bantfu bebanjengaye, futsi banjengaye, futsi bayahlala banjengaye Moroni, buka, emandla esihogo lucobo bekayawubhujiswa ingunaphakadze; yebo, develi bekangayukuba nemandla ngetulu kwetinhlitiyo tebantfwana bebantfu.

18 Buka, bekayindvodza lenjenga-Amoni, indvodzana yaMosiya, yebo, futsi ngisho njengalamanye emadvodzana aMosiya, yebo, futsi ngalokunjalo na-Alima kanye nemadvodzana akhe, ngoba bonkhe bebabantfu baNkulunkulu.

19 Manje buka, Hilamani kanye nabomnakabo bekungasiko kutsi bebanelusito loluncane kubantfu kunalolo lwaMoroni; ngoba balishumayela livi laNkulunkulu, futsi babhabhatisela ekuphendvukeni wonkhe umuntfu noma ngubani lobekayawuwalalela emavi abo.

20 Bahamba ngaleyondlela, nebantfu batitfoba ngenca yemavi abo, kangangekutsi bebatsandvwa kakhulu yiNkhosi, ngaleyondlela bebakhululekile etimphini kanye nasemibangweni emkhatsini wabo, yebo, kwate kwaba sikhatsi lesingangeminyaka lemine.

21 Kodvwa, njengoba ngishito, ngasekupheleni kwemnyaka welishumi nemfica, yebo, nanoma kwakunekuthula emkhatsini wabo, bebaphocelelekile bangatsandzi kutsi balwe nabomnakabo emaLamani.

22 Yebo, kwephetsa, timphi tabo nemaLamani atitange tiphele sikhatsi lesingangeminyaka leminingi, nanoma kwakungasiko kutsandza kwabo lokukhulu.

23 Manje, bebadzabukile kutsi batsatsele emaLamani tikhali, ngoba bebangatfokoti ekucitseni ingati; yebo, futsi loku bekungasiko kona kuphela—bebadzabukile kutsi babe yimbangela yekutfumela labaningi kangaka babomnakabo babasuse kulomhlaba baye emhlabeni waphakadze, bangakatilungiseleli kuhlangana naNkulunkulu wabo.

24 Noko, bebangenakuvuma kutsi babeke phansi timphilo tabo, kutsi bafati babo kanye nebantfwana babo babulawe ngesihluku ngulabo belunya lwebucaba labake baba bomnakabo, yebo, futsi labebahlubuke ebandleni labo, babashiyile bahamba bayohlangana nemaLamani kute bababulale.

25 Yebo, bebangeke bakubeketelele kutsi bomnakabo batfokote ngengati yemaNefi, uma nje bekusekhona labo labebasayigcina imiyaleto yaNkulunkulu, ngoba setsembiso seNkhosi besingukutsi, uma nje bangayigcina imiyaleto yayo bayawuphumelela eveni.