1 Manje kwenteka kutsi ngenyanga yelishumi nakunye ngemnyaka welishumi nemfica, ngelusuku lwelishumi enyangeni, emabutfo emaLamani abonakala ahamba aya ngaseveni lase-Amoniha.

2 Futsi bukani, lidolobha laselakhiwe kabusha, futsi Moroni besekabeke libutfo ngaseminceleni yelidolobhha, base babeka kungcola kwatungeleta kubavikela emicibisholweni kanye nasematjeni emaLamani; ngoba bukani, abelwa ngematje kanye nemicibisholo

3 Bukani ngitse lidolobha lase-Amoniha laselakhiwe kabusha. Ngitsi kini, yebo, incenye yalo yaseyakhiwe kabusha; futsi ngenca yekutsi emaLamani bekake alibhubhisa kanye ngenca yebubi bebantfu, acabanga kutsi kutfolwa kwalo kwakutobalula kuwo.

4 Kodvwa bukani, kwaba kukhulu kangakanani kudvumala kwawo; ngoba buka, emaNefi abegubhe umngcengcema wemhlabatsi ubatungeletile, lowawuphakeme ngendlela yekutsi emaLamani abengakwati kujikijela ematje awo kanye nemicibisholo yawo kubo kute ibalimate, angakhoni nekuta kubo ngaphandle kwekutsi asebentise indzawo yekungena.

5 Manje ngalesi sikhatsi tindvuna letinkhulu temaLamani tamangala kakhulu, ngenca yekuhlakanipha kwemaNefi ekulungiseni tindzawo tawo tekutivikela.

6 Manje baholi bemaLamani bebacabanga kutsi, ngenca yebukhulu belinani labo, yebo, bebacabanga kutsi bebatoba nenhlanhla yekutsi bete kubo njengoba bebakadze bentile ekucaleni; yebo, ngetulu kwaloko bebatilungiselele ngetihlangu, kanye netivikelo tesifuba; ngetulu kwaloko bebatilungiselele ngetingubo tetikhumba, yebo, tingubo leticinsi kakhulu kute bambonye bungcunu babo.

7 Futsi ngalokutilungiselela kanje bebacabanga kutsi bebatobehlula kalula futsi babafake bomnakabo ngaphansi kwelijoka lebugcili, noma bababulale futsi bababulale ngesihluku ngekwentsadvo yawo.

8 Kodvwa bukani, ngekumangala kwabo lokukhulu, bebawalungele, ngendlela leyayingatange yatiwe emkhatsini webantfwana baLehi. Manje bebawalungele emaLamani, kutsi balwe ngendlela yemiyalo yaMoroni.

9 Futsi kwenteka kutsi emaLamani, noma ema-Amalikhiya, amangala kakhulu ngendlela yawo yekulungiselela imphi.

10 Manje, kube inkhosi Amalikhiya beyehlile yaphuma eveni laNefi, ahola libutfo lakhe, mhlawumbe yayiyokwenta emaLamani ahlasele emaNefi edolobheni lase-Amoniha; ngoba bukani, yayingayikhatsaleli nakancane ingati yebantfu bayo.

11 Kodvwa bukani, Amalikhiya akatange ehle kutolwa. Futsi buka, tindvuna takhe letinkhulu atitange tilokotse tiwahlasele emaNefi edolobheni lase-Amoniha, ngoba Moroni besekatishintjile tindlela emaNefi labekenta ngato tintfo, kangangekutsi emaLamani abedvumele ngenca yetindzawo tawo tekuphepha futsi akakhonanga kuta etikwawo.

12 Ngako-ke abalekela ehlane, atsatsa inkambu yawo ahamba aya ngaseveni laNowa, acabanga kutsi kwakunguyona ndzawo lelandzelako lencono kutsi ahlasele emaNefi.

13 Ngoba abengati kutsi Moroni besekacinisile, noma besekakhe tincaba tekutivikela, talo lonkhe lidolobha eveni lonkhe lelalitungeletiwe; ngako-ke, ahamba aya eveni laNowa anemphokophelo lecinile; yebo, tindvuna tawo letinkhulu teta phambili futsi tafunga kutsi tatitobabulala bantfu bakulelo dolobha.

14 Kodvwa bukani, ngekumangala kwabo, lidolobha laNowa, ngaphambilini lelaliyindzawo lebutsakatsaka, manje, ngenca yaMoroni, laselinemandla, yebo, kwendlula ngisho nemandla elidolobha lase-Amoniha.

15 Manje, bukani, loku bekukuhlakanipha kwaMoroni; ngoba bekacabange kutsi bebatoba nekulesaba lidolobha lase-Amoniha; futsi njengoba lidolobha laNowa kwakunguyona ncenye yelive ngaleso sikhatsi leyayibutsakatsaka kakhulu, ngako-ke bebatohamba baye lapho kuyohlasela; futsi loku kwenteka ngekwetifiso takhe.

16 Futsi bukani, Moroni bekabeke Lehi kutsi abe yindvuna lenkhulu ngetulu kwemadvodza alelo dolobha; futsi kwakunguye kanye loyo Lehi lowalwa nemaLamani esigodzini emphumalanga yemfula iSidoni.

17 Manje bukani kwenteka, kutsi ngesikhatsi emaLamani asatfole kutsi Lehi bekalawula lelidolobha aphindze advumala, ngoba abemesaba kakhulu Lehi; noko tindvuna tawo letinkhulu tatifungile ngesifungo kulihlasela lelidolobha; ngako-ke, tawaletsa emabutfo ato.

18 Manje bukani, emaLamani akakhonanga kungena etincabeni tawo tekutivikela nganoma nguyiphi lenye indlela ngaphandle kwekutsi kube sekungeneni, ngenca yekuphakama kwemngcengcema lobewakhiwe waya etulu, kanye nekujula kwemsele lowawumbiwe watungeleta, ngaphandle kwekutsi kube sekungeneni.

19 Futsi ngaleyondlela emaNefi abekatilungiselele kutsi abulale bonkhe labebatowetama kutsi bagibele etulu kute bangene esivimbelweni nganoma nguyiphi lenye indlela, ngekutsi babajikijele ngematje nangemicibisholo.

20 Ngaleyondlela abetilungiselele, yebo, licembu lemadvodza awo lanemandla lamakhulu, ngetinkemba tawo kanye netilingi tawo, kutsi alahle phansi bonkhe labebayowetama kutsi bete endzaweni yabo yekutivikela ngendzawo yekungena; futsi ngaleyondlela atilungiselela kutsi ativikele kumaLamani.

21 Futsi kwenteka kutsi tindvuna temaLamani tawaletsa emabutfo ato phambi kwendzawo yekungena, acala alwa nemaNefi, kute bangene endzaweni yawo yekutivikela; kodvwa bukani, achutjwa abuyiselwa emuva tikhatsi ngetikhatsi, kangangoba abulawa kakhulu.

22 Manje ngesikhatsi abona kutsi abengenawukwati kutfola emandla ngetulu kwemaNefi ngendlela yekungena, acala kuyidzilita imingcengcema yemhlaba kute atfole indlela yekungena kuya emabutfweni awo, kute abe nelitfuba lelilinganako lekulwa; kodvwa bukani, kulemetamo besuswa ngematje kanye nemicibisholo leyayijikijelwa kubo; futsi esikhundleni sekugcwalisa imisele yawo ngekutsi badvonse imingcengcema yemhlabatsi, yagcwala yaba sezingeni lelitsite ngalabafile bawo kanye nemitimba lelimele.

23 Ngaleyondlela emaNefi aba nemandla onkhe ngetulu kwetitsa tawo; futsi ngalokunjalo emaLamani etama kutsi abulale emaNefi tate tonkhe tindvuna tawo letinkhulu tabulawa; yebo, futsi kwabulawa emaLamani langetulu kwenkhulungwane; lokwatsi, ngakulolunye luhlangotsi, kwababete namunye umphefumulo wemaNefi lowabulawa.

24 Bekukhona cishe labangemashumi lasihlanu labalimala, labebasebaleni emicibisholweni yemaLamani ekungeneni, kodvwa bebavikelwe tihlangu tawo, netivivelo tesifuba tawo, kanye nangetivikelo tenhloko tawo, kangangoba emanceba awo abesemilenteni, lamaningi awo abematima kakhulu.

25 Futsi kwenteka, kutsi ngesikhatsi emaLamani abona kutsi tindvuna tawo letinkhulu tonkhe tasetibulewe abalekela ehlane. Futsi kwenteka kutsi abuyela eveni laNefi, kutsi ayobikela inkhosi yawo Amalikhiya, lobekangumNefi ngekutalwa, mayelana nekulahlekelwa kwabo lokukhulu.

26 Futsi kwenteka kutsi wabatfukutselela kakhulu bantfu bakhe, ngenca yekutsi bekangakasizuzi sifiso sakhe kumaNefi, abengatange akhone kubayisa ngaphansi kwelijoka lebugcili.

27 Yebo, watfukutsela kakhulu, futsi wamcalekisa Nkulunkulu, kanjalo naMoroni, afunga ngesifungo kutsi uyawuyinatsa ingati yakhe; loku ngenca yekutsi Moroni bekagcine imiyaleto yaNkulunkulu ekulungiseleleni kuphepha kwebantfu bakhe.

28 Fusti kwenteka, kutsi ngakulolunye luhlangotsi, bantfu baNefi bayibonga iNkhosi Nkulunkulu wabo, ngenca yemandla ayo langenakulinganiswa ekubakhululeni etandleni tetitsa tabo.

29 Futsi ngaleyondlela yaphela kanjalo iminyaka lelishumi nemfica yekubusa kwebehluleli ngetulu kwebantfu baNefi.

30 Yebo, futsi kwaba khona kuthula njalo emkhatsini wawo, kanye nemphumelelo lenkhulu kakhulu ebandleni ngenca yekulalela kwawo kanye nekukhutsala lababa nako evini laNkulunkulu lelalishunyayelwe kuwo nguHilamani, naShibiloni, naKhoriyanthoni na-Amoni kanye nabomnakabo, yebo, kanye nabo bonkhe labo labebagcotjwe ngekweluhlelo lolungcwele lwaNkulunkulu, babhajatiselwe ekuphendvukeni, futsi batfunyelwa kutsi bayoshumayela emkhatsini webantfu.