Sehluko 4
Alima ubhabhatisa tinkhulungwane talabaphendvukako—Bubi bungena ebandleni, futsi inchubekela phambili yeliBandla iyavimbeka—Nefiha ubekwa kutsi abengumehluleli lomkhulu—Alima, njengemphristi lomkhulu, utinikela ebufundisini. Cishe ngemnyaka wa 86 kuya kuwa 83 ngaphambi kwekutalwa kwa Khristu.
1 Manje kwenteka ngemnyaka wesitfupha wekubusa kwebehluleli ngetulu kwebantfu baNefi, akutange kube khona imibango netimphi eveni laseZarahemla;
2 Kodvwa bantfu bebakhatsatekile, yebo, bakhatsateke kakhulu ngenca yekulahlekelwa bomnakabo, futsi ngalokunjalo nangenca yekulahlekelwa yimihlambi yetimvu kanye nemihlambi yetinkhomo tabo, futsi ngalokunjalo nangenca yekulahlekelwa ngemasimu alokuyinhlavu kwabo, labekanyatselwe ngetinyawo abhujiswa ngemaLamani.
3 Futsi betitinkhulu kakhulu tinhlupheko tabo kangangekutsi yonkhe imiphefumulo yayinesizatfu sekukhala; futsi bebakholelwa kutsi bekutehlulelo taNkulunkulu lebetitfunyelwe kubo ngenca yebubi babo kanye netinengiso tabo; ngaloko-ke bavuselwa ekukhumbuleni umsebenti wabo.
4 Futsi bacala kumisa libandla ngalokugcwele; yebo, labaningi babhajatiswa emantini aseSidoni phindze bahlanganiswa nelibandla laNkulunkulu; yebo, babhajatiswa ngesandla sa-Alima, lobekagcotjwe kutsi abe ngumphristi lomkhulu kubantfu belibandla, ngesandla seyise Alima.
5 Futsi kwenteka kutsi ngemnyaka wesikhombisa wekubusa kwebehluleli kwabakhona cishe bantfu labatinkhulungwane letintsatfu nemakhulu lasihlanu labatihlanganisa nelibandla laNkulunkulu phindze babhajatiswa. Waphela kanjalo umnyaka wesikhombisa wekubusa kwebehluleli ngetulu kwebatfu baNefi; futsi kwabakhona kuthula njalo ngaso sonkhe leso sikhatsi.
6 Futsi kwenteka kutsi ngemnyaka wesiphohlongo wekubusa kwebehluleli, bantfu belibandla bacala baba nekutichenya, ngenca yengcebo yabo leningi, kanye nesilika yabo lecolisakele, nelineni yabo lelukiwe lecolisakele, futsi nangenca yemihlambi yabo yetimvu kanye nemihlambi yabo yetinkhomo leminingi, neligolide labo, nesiliva yabo, kanye nato tonkhe tintfo letiligugu, lebebatitfole ngekusebenta kwabo; kuto tonkhe leti tintfo batiphakamisa ngekutikhukhumeta emehlweni abo, ngoba bacala kugcoka tingubo letibitako.
7 Manje loku bekuyimbangela yekukhatsateka kwa-Alima, yebo, futsi nakulabaningi bantfu Alima labekabagcobe kutsi babe bafundisi, nebaphristi, kanye nemagosa ebandleni; yebo, labaningi babo bebadzabuke kakhulu ngenca yebubi labebabubona kutsi besebucale kuba khona emkhatsini webantfu.
8 Ngoba babona futsi babuka ngelusizi lolukhulu kutsi bantfu belibandla bacala kutsi batiphakamise ngekutikhukhumeta emehlweni abo, kanye nekutsi babeke tinhlitiyo tabo kumcebo kanye nasetintfweni letilite telive, nekutsi bacala baba nekwedzelela, lomunye kuloyo naloyo, bacala bahlupha labo labebangakholwa njengekwentsandvo nangekwesifiso sabo.
9 Futsi ngenca yaloko, ngakulomnyaka wesiphohlongo wekubusa kwebehluleli, kwacala kwabakhona imibango lemikhulu emkhatsini webantfu belibandla; yebo, kwabakhona kuhawukela, nekuphikisana, nentondvo, nekuhluphana, kanye nekutatisa, lokwendlula kutikhukhumeta kwalabo labekungibo belibandla laNkulunkulu.
10 Yaphela kanjalo-ke iminyaka lesiphohlongo yekubusa kwebehluleli; futsi bubi belibandla bebusikhubekiso lesikhulu kulabo labebangasibo balo libandla; ngaleyondlela libandla lacala kwehluleka kunchubekela phambili yalo.
11 Futsi kwenteka kutsi ekucaleni kwemnyaka wemfica, Alima wabubona bubi belibandla, waphindze wabona kutsi sibonelo selibandla sacala kutsi siholele labo labebangakholwa kusuka ebubini lobutsite kuya kulobunye bubi, ngalendlela baletsa kubhujiswa kwebantfu.
12 Yebo, wabona kungalingani lokukhulu emkhatsini webantfu, labanye batiphakamisa ngekutatisa kwabo, babukela phansi labanye, bafulatsela labadzingako nalabangcunu nalabebalambile, nalabebomile, kanye nalabo labebagula futsi bahluphekile.
13 Manje loku bekusizatfu lesikhulu setililo emkhatsini webantfu, labanye batehlisa, basita labo labebadzinga kusitwa ngibo, njengekunika loko labanako kulabamphofu nalabadzingako, bapha labalambile, futsi babeketelela tonkhe tinhlobo tetinhlupheko, ngenca yaKhristu, lekufanele ete njengekwemoya wesiphrofetho.
14 Babuke phambili kulolosuku, ngaleyondlela bagcina kutsetselelwa kwetono tabo; bagcwaliswa ngenjabulo lenkhulu ngenca yekuvuka kwalabafile, ngekwentsandvo kanye nemandla kanye nekukhululwa kwaJesu Khristu ekuboshweni kwekufa.
15 Manje kwenteka kutsi Alima, sekatibonile tinhlupheko tebalandzeli baNkulunkulu labatfobekile, kanye nekuhlushwa lebekubekwe etikwabo ngulabasele bebantfu bakhe, futsi babona konkhe kungalingani kwabo, wacala kuba nelusizi lolukhulu; noko Moya weNkhosi awumshiyanga.
16 Futsi wakhetsa indvodza lehlakaniphile lebeyisemkhatsini wemagosa elibandla, wayinika emandla njengekwelivi lebantfu, kutsi ibe nemandla ekutsi ishaye imitsetfo ngekwemitsetfo lebeyiniketiwe, futsi nekutsi iyisebentise ngekwebubi kanye nemacala ebantfu.
17 Manje libito lalendvodza bekunguNefiha, futsi yakhetfwa kutsi ibe ngumehluleli lomkhulu; yahlala esihlalweni sekwehlulela kutsi ihlulele iphindze iphatse bantfu.
18 Manje Alima akayiniketanga sikhundla sekutsi ibe ngumphristi lomkhulu ngetulu kwelibandla, kodvwa wasigcina kuye lesi sikhundla sekuba ngumphristi lomkhulu; kodvwa sihlalo sekwehlulela wasiniketa Nefiha.
19 Futsi loku wakwenta kute yena lucobo ahambe emkhatsini webantfu bakhe, noma emkhatsini webantfu baNefi, ashumayele livi laNkulunkulu kubo, kute abaphehle kutsi bakhumbule umsebenti wabo, nekutsi akudvonsele phansi, ngelivi laNkulunkulu, konkhe kutikhukhumeta nebucili kanye nayo yonkhe imibango lebeyisemkhatsini webantfu bakhe, angayiboni lenye indlela yekutsi ababuyise ngaphandle kwekutsi abacindzetele ngekuniketa bufakazi lobumsulwa ngalokumelene nabo.
20 Futsi ngenca yaloko ekucaleni kwemnyaka wemfica wekubusa kwebehluleli ngetulu kwebantfu baNefi, Alima wanika sihlalo sekwehlulela kuNefiha, yena watinikela ngalokuphelele ebuphristini lobukhulu beluhlelo lolungcwele lwaNkulunkulu, ngebufakazi belivi, ngekwemoya wekwembulelwa kanye newekuphrofetha.