Sehluko 50
Moroni ucinisa emave emaNefi—Bakha emadolobha lamaningi lamasha—Timphi kanye nekubhujiswa kwehlela emaNefi ngemalanga ebubi kanye netinengiso tabo—Moriyanthoni kanye nemahlubuka akhe behlulwa nguThiyankham—Nefiha uyafa, futsi indvodzana yakhe Phahorani utsatsa sihlalo sekwehlulela. Cishe ngemnyaka wa 72 kuya kuwa 67 ngaphambi kwekutalwa kwaKhristu.
1 Manje kwenteka kutsi Moroni akatange ayekele kwenta emalungiselelo emphi, noma kuvikela bantfu bakhe kumaLamani; ngoba wenta kutsi emabutfo akhe acale ekucaleni kwemnyaka wemashumi lamabili wekubusa kwebehluleli, kutsi kumele bacale kugubha tindvundvuma temhlabatsi batungelete onkhe emadolobha, kulo lonkhe live lebelilemaNefi.
2 Etikwaletindvundvuma temhlabatsi wenta kutsi kube khona emapulango, yebo, imisebenti yemapulango leyakhiwe yaba midze ngangemuntfu, itungelete emadolobha.
3 Wenta kutsi kuyo leyo misebenti yemapulango kube khona luhlaka lwetikhonkwane lobelwakhiwe etikwemapulango lwatungeleta; beticinile futsi titindze.
4 Wenta kutsi kwakhiwe imibhoshongo lebeyibekwe kuyo leyo misebenti yetikhonkwane, futsi wenta kutsi kwakhiwe tindzawo tekutivikela kuyo leyo mibhoshongo, kute ematje kanye nemicibisholo yemaLamani ingabalimati.
5 Bekatilungiselele kutsi akwati kujikijela ematje etulu lapho, ngekutsandza kwawo kanye nangekwemandla awo, ambulale lobekatotama kusondzela edvute kwetindvonga telidolobha.
6 Ngaleyondlela Moroni watilungisa tincaba kulungiselela kuta kwetitsa tawo, kuwo onkhe emadolobha atungelete eveni lonkhe.
7 Futsi kwenteka kutsi Moroni wenta kutsi emabutfo akhe ahambe aye ehlane lelisemphumalanga; yebo, ahamba ayowachuba onkhe emaLamani labekasehlane lelisemphumalanga awayisa emaveni awo, labekaseningizimu yelive laseZarahemla.
8 Futsi live laNefi belihamba ngendlela lecondzile kusukela emphumalanga yelwandle kuya enshonalanga.
9 Futsi kwenteka kutsi ngesikhatsi Moroni sekawachube onkhe emaLamani wawakhipha ehlane lasemphumalanga, lebelisenyakatfo yemave labekawabo, wenta kutsi labahlala eveni laseZarahemla kanye nebaseveni lebelitungeletile bahambe baye ehlane lelisemphumalanga, ngisho naseminceleni lengaselugwini lwelwandle, balitsatse lelo live.
10 Waphindza wabeka emabutfo eningizimu, eminceleni yalobekukwabo, wabenta kutsi bamise tincaba kute bavikele emabutfo abo kanye nebantfu babo etandleni tetitsa tabo.
11 Ngaleyondlela watincamula tonkhe tincaba temaLamani lebetisehlane lebelisemphumalanga, yebo, futsi kanjalo nasenshonalanga, leticinisa umncele emkhatsini wemaNefi nemaLamani, emkhatsini welive laseZarahemla nelive lemaNefi, kusukela eLwandle lasenshonalanga, kuphikelele ngasekucaleni kwemfula iSidoni—emaNefi atitsatsele lonkhe live lelingasenyakatfo, yebo, ngisho nalo lonkhe live lebelingasenyakatfo yelive iNala, njengekutsandza kwabo.
12 Ngaleyondlela-ke Moroni, kanye nemabutfo akhe, labekakhula malanga onkhe ngenca yesiciniseko sekuvikela imisebenti yakhe leyasiletsa kubo, bafuna kuvimbela kucina kanye nemandla emaLamani bawasuse aphele emaveni langewabo, kute bangabi nemandla etikwemave abo.
13 Futsi kwenteka kutsi emaNefi acala sisekelo selidolobha, alibita lelidolobha ngeligama lelitsi yiMoroni; belingaselwandle lolungasemphumalanga; futsi laliseningizimu ngasemnceleni waloko lokukwemaLamani.
14 Ngetulu kwaloko bacala sisekelo selidolobha emkhatsini welidolobha laMoroni kanye nelidolobha la-Aroni, bahlanganisa imincele ya-Aroni kanye neya-Moroni; futsi balibita lelo dolobha, noma lelo live, ngeligama lelitsi, yiNefiha.
15 Ngetulu kwaloko bacala ngawo kanye lowo mnyaka kwakha emadolobha lamaningi enyakatfo, lelinye balakha ngendlela letsite balibita ngekutsi yiLehi, lebelisenyakatfo ngaseminceleni yelugu lwelwandle.
16 Futsi waphela ngaleyondlela-ke umnyaka wemashumi lamabili.
17 Futsi bebakulesi simo sekuphumelela bantfu baNefi ekucaleni kwemnyaka wemashumi lamabili nakunye wekubusa kwebehluleli kubantfu baNefi.
18 Baphumelela kakhulu, banotsa kakhulu; yebo, futsi bandza bate bakhula bacina eveni.
19 Ngaleyondlela siyabona kutsi tinemusa futsi tilunge kangakanani tento teNkhosi, ekugcwaliseni onkhe emavi ayo kubantfwana bebantfu; yebo, singabona kutsi emavi ayo ayacinisekiswa, ngisho nangalesi sikhatsi, lakhuluma ngaso kuLehi, atsi:
20 Ubusisiwe kanye nebantfwana bakho; futsi bayawubusiswa, nangabe bayawuyigcina imiyaleto yami bayawuphumelela kulelive. Kodvwa khumbula, nangabe bangeke bayigcine imiyaleto yami bayawususwa ebukhoneni beNkhosi.
21 Futsi siyabona kutsi leti tetsembiso ticinisekiswe ebantfwini baNefi; ngoba bekukucabana kanye nemibango yabo, yebo, kubulalana kwabo, kuphanga kwabo, kukhonta kwabo tithico, bugwadla babo, kanye netinengiso tabo, lokwabakhona emkhatsini wabo, lokwaletsa kubo timphi kanye nekubulawa kwabo.
22 Futsi labo labebatsembekile ekugcineni imiyaleto yeNkhosi bakhululwa ngetikhatsi tonkhe, kwatsi tinkhulungwane tabomnakabo lababi batfunyelwe ebugcilini, noma babulewe ngenkemba, noma bancishelwe kukholwa, futsi bahlangana nemaLamani.
23 Kodvwa buka akutange nanini kube khona sikhatsi lesimnandzi kanje emkhatsini webantfu baNefi, kusukela etinsukwini taNefi, njengasetinsukwini taMoroni, yebo, ngisho nangalesi sikhatsi, emnyakeni wemashumi lamabili nakunye wekubusa kwebehluleli.
24 Futsi kwenteka kutsi ngemnyaka wemashumi lamabili nakubili wekubusa kwebehluleli nawo ngalokunjalo waphela ngekuthula; yebo, futsi ngalokunjalo nemnyaka wemashumi lamabili nakutsatfu.
25 Futsi kwenteka kutsi ekucaleni kwemnyaka wemashumi lamabili nakune wekubusa kwebehluleli, kwakuyawuba khona kuthula emkhatsini webantfu baNefi kube bekungasiko ngenca yembango lowabakhona emkhatsini wabo mayelana nelive laLehi, kanye nelive laMoriyanthoni, labekahlangana eminceleni yaLehi; omabili bekaseminceleni ngaselugwini lwelwandle.
26 Ngoba buka, bantfu labekubanikati belive laMoriyanthoni bafuna incenye yelive laLehi; ngako-ke kwacala kwaba khona umbango loshisako emkhatsini wabo, kangangekutsi bantfu baMoriyanthoni batsatsa tikhali ngalokumelene nabomnakabo, futsi bebaphokophele kutsi bababulale ngenkemba.
27 Kodvwa buka, bantfu labebabanikati belive laLehi babalekela enkanjini yaMoroni, bayocela kuye lusito; ngoba buka bebangakoni lutfo.
28 Futsi kwenteka kutsi ngesikhatsi bantfu baMoriyanthoni, labebaholwa yindvodza libito layo lokwakunguMoriyanthoni, batfola kutsi bantfu baLehi bese babalekele enkanjini yaMoroni, baba nekwesaba lokukhulu hleze libutfo laMoroni lite kubo libabulale.
29 Ngako-ke, Moriyanthoni wakufaka etinhlitiyweni tabo kutsi babaleke baye eveni lebelisenyakatfo, lebelimbonywe ngemachibi lamakhulu emanti, futsi balitsatse libe labo lelo live lebelingasenyakatfo.
30 Buka, bebangalifeza lelisu labo, (lebeliyawuba sizatfu sekulila) kodvwa buka, Moriyanthoni ayindvodza lenelulaka lolukhulu, ngako-ke atfukutselele lomunye wetincekukati takhe kakhulu, wamhlasela wamshaya kakhulu.
31 Futsi kwenteka kutsi wabaleka, weta enkanjini yaMoroni, watjela Moroni tonkhe tintfo letiphatselene naloludzaba, kanjalo mayelana netinhloso tabo tekubalekela eveni lelingasenyakatfo.
32 Manje buka, bantfu labebaseveni iNala, noma Moroni, wesaba kutsi bebayawulalela emavi aMoriyanthoni bese bahlangana nebantfu bakhe, ngaleyondlela bekatotfola tincenye telive tibe ngetakhe, loko lokwakuyawuba nemiphumela leyingoti lebeyitoba khona emkhatsini webantfu baNefi, yebo, leyomiphumela leyayiyawuholela ekupheleni kwenkhululeko yabo.
33 Ngako-ke Moroni watfumela libutfo, kanye nenkambu yalo, kutsi bayojikisa bantfu baMoriyanthoni, kutsi bangabalekeli eveni lelingasenyakatfo.
34 Futsi kwenteka kutsi abatange babajikise bate bafika eminceleni yelive iNcitsakalo; lapho babajikisa, ngendlela lencane lebeyiholela ngaselwandle iya eveni lelingasenyakatfo, yebo, ngaselwandle, enshonalanga kanye nasemphumalanga.
35 Futsi kwenteka kutsi libutfo lebelitfunywe nguMoroni, lebeliholwa yindvodza libito layo lobekunguThiyankham, lahlangana nebantfu baMoriyanthoni; futsi bebanenkhani kakhulu bantfu baMoriyanthoni, (bagcugcutelwa bubi bakhe kanye nemavi akhe layengako) kangangekutsi imphi yacala emkhatsini wabo, lapho Thiyankham wabulala Moriyanthoni waphindze walehlula libutfo lakhe, wabatsatsa wabenta tiboshwa, wabuyela enkanjini yakaMoroni. Yaphela ngaleyondlela iminyaka lengemashumi lamabili nakune yekubusa kwebehluleli kubantfu baNefi.
36 Futsi babuyiselwa ngaleyondlela emuva bantfu baMoriyanthoni. Futsi emvakwesivumelwano sabo sekugcina kuthula babuyiselwa eveni laMoriyanthoni, lubumbano lwenteka emkhatsini wabo kanye nebantfu baLehi; baphindze babuyiselwa emaveni abo.
37 Futsi kwenteka kutsi ngawo lowo mnyaka lokwabuyiselwa ngawo kuthula kubantfu baNefi, Nefiha, umehluleli lomkhulu wesibili, wafa, aphetse sihlalo sekwehlulela ngebucotfo lobukhulu ngaphambi kwaNkulunkulu.
38 Noko, bekalile ku-Alima kutsi atsatse imibhalo kanye naleto tintfo lebetatiswa ngu-Alima kanye neyise kutsi tinguletingcwele kakhulu; ngako-ke Alima watiniketa indvodzana yakhe, Hilamani.
39 Buka, kwenteka kutsi indvodzana yaNefiha yabekwa kutsi itsatse sihlalo sekwehlulela, esikhundleni seyise; yebo, yabekwa kutsi ibe ngumehluleli lomkhulu kanye nembusi webantfu, ngesifungo kanye nangesimiso lesingcwele sekwehlulela ngekulunga, kanye nekugcina kuthula kanye nenkhululeko yebantfu, kanye nekubaniketa emalungelo abo langcwele ekukhonta iNkhosi Nkulunkulu wabo, yebo, nekutsi isekele futsi igcine indlela yaNkulunkulu tinsuku tonkhe tayo, futsi iletse lababi kutsi behlulelwe ngekwemacala abo.
40 Manje buka, libito layo bekunguPhahorani. Phahorani wasitsatsa sihlalo seyise, wacala kubusa kwakhe ekupheleni kwemnyaka wemashumi lamabili nakune, kubantfu baNefi.