1 Manje, kwenteka kutsi ngemnyaka wemashumi lamabili nesitfupha wekubusa kwebehluleli kubantfu baNefi, bukani, ngesikhatsi emaLamani avuka ngekusa kwekucala kwenyanga yekucala, bukani, atfola Amalikhiya afile ethendeni lakhe; futsi abona kutsi Thiyankham besekakulungele kutsi alwe nawo ngalolo suku.

2 Manje, ngesikhatsi emaLamani akubona loku esaba; aliyekela lisu lawo lekuhamba aye eveni lelingasenyakatfo, ahlehla kanye nalo lonkhe libutfo lawo aya edolobheni laMulekhi, afuna kuvikeleka etincabeni tawo.

3 Futsi kwenteka kutsi umnakabo-Amalikhiya wabekwa kutsi abe yinkhosi ngetulu kwebantfu; libito lakhe bekungu-Amoroni; ngako-ke inkhosi Amoroni, umnakabonkhosi Amalikhiya, wabekwa kutsi abuse esikhundleni sakhe.

4 Futsi kwenteka kutsi wayaleta kutsi bantfu bakhe bawagcine lawo madolobha, labebawatsetse ngekucitsa ingati, ngoba kute emadolobha labawatsatsa ngaphandle kwekucitsa ingati leningi.

5 Manje, Thiyankham wabona kutsi emaLamani abetimisele kugcina lawo madolobha labekawatsetse, kanye naleto tincenye telive lebekatitsetse taba ngetawo; futsi ngetulu kwaloko ngekubona buningi besibalo sawo, Thiyankham wacabanga kutsi kwakungakafaneli etame kutsi awahlasele etincabeni tawo.

6 Kodvwa wawagcina emadvodza akhe ndzawo tonkhe, shengatsi wenta emalungiselelo emphi; yebo, futsi ngempela bekalungiselela kutsi ativikele kuwo, ngekukhuphula tindvonga titungelete aphindze alungiselela tindzawo tekubhaca.

7 Futsi kwenteka kutsi wachubeka kanjalo alungiselela imphi wate Moroni watfumela sibalo lesikhulu semadvodza kutsi ayocinisa libutfo lakhe.

8 Waphindze Moroni ngetulu kwaloko watfumela imiyaleto kuye kutsi atigcine tonkhe tiboshwa letatiwele etandleni takhe; njengoba emaLamani abebophe tiboshwa letiningi, kute atigcine tonkhe tiboshwa temaLamani njengenhlawulo yalabo emaLamani bekabatsetse.

9 Ngetulu kwaloko waphindze watfumela imiyaleto kuye kutsi acinise live iNala, futsi avikele indlela lencane leyayiholela eveni lelingasenyakatfo, hleze emaLamani ayitfole leyo ndzawo bese aba nemandla ekubahlukubeta ndzawo tonkhe.

10 Moroni ngetulu kwaloko watfumela kuye, afisa kutsi etsembeke ekugcineni leyo ncenye yelive, nekutsi afune onkhe ematfuba ekuwahlupha emaLamani kuleyo ncenye, ngekwemandla akhe bekanawo, kute mhlawumbe aphindze awatsatse ngelicebo noma ngalenye indlela lawo madolobha labekadze atsetfwe etandleni tabo; nekutsi avimbe aphindze acinise emadolobha ndzawo tonkhe, lawo labengakate awele etandleni temaLamani.

11 Futsi waphindze watsi kuye, bengitota kuwe, kodvwa buka, emaLamani ayasihlasela eminceleni yelive ngaselwandle lolungasenshonalanga; futsi buka, ngiyawahlasela, ngako-ke anginawukwati kuta kuwe.

12 Manje, inkhosi (Amoroni) beseyihambile yaphuma eveni laseZarahemla, futsi yaseyatise indlovukazi mayelana nekufa kwemnakabo, seyigcogcele ndzawonye sibalo lesikhulu semadvodza, futsi sesihambe sayokulwa nemaNefi eminceleni ngaselwandle lolungasenshonalanga.

13 Ngaleyondlela yayetama kuwahlukubeta emaNefi, kanye nekuheha incenye yemabutfo awo kutsi aye kuleyo ncenye yelive, asayalete lawo labekawashiye kutsi atsatse emadolobha lebekadze bawatsatsile, kutsi awahlukubete emaNefi eminceleni ngaselwandle lolungasemphumalanga, futsi awatsatse emave awo kangangoba kwakusemandla awo, ngekwemandla emabutfo awo.

14 Ngalesi sizatfu emaNefi aba kuleto timo letiyingoti ekupheleni kwenyaka wemashumi lamabili nesitfupha wekubusa kwebehluleli kubantfu baNefi.

15 Kodvwa bukani, kwenteka ngemnyaka wemashumi lamabili nesikhombisa wekubusa kwebehluleli kutsi Thiyankham, ngekuyaletwa nguMoroni—lobekabeke emabutfo kutsi avikele imincele leseningizimu kanye nasenshonalanga yelive, futsi lobekasacale luhambo loluya ngaseveni iNala, kute asite Thiyankham ngemadvodza akhe ekutsatseni futsi emadolobha labekadze abalahlekele—

16 Futsi kwenteka kutsi Thiyankham bekatfole imiyaleto yekutsi ahlasele lidolobha laMulekhi, aphindze futsi alitsatse uma kungase kwenteke.

17 Futsi kwenteka kutsi Thiyankham wenta emalungiselelo kutsi ahlasele lidolobha laMulekhi, futsi ahambe nelibutfo kuyowahlasela emaLamani; kodvwa wabona kutsi kwakungeke kwenteke kutsi awehlule uma asetincabeni tawo; ngako-ke wawayekela emasu akhe wabuyela edolobheni iNala, kutsi alindzele kufika kwaMoroni, kute libutfo lakhe licine.

18 Futsi kwenteka kutsi Moroni wafika nelibutfo lakhe eveni iNala, ekupheleni kwemnyaka wemashumi lamabili nesikhombisa wekubusa kwebehluleli kubantfu baNefi.

19 Futsi ekucaleni kwenyaka wemashumi lamabili nesiphohlongo, Moroni naThiyankham kanye nalabaningi betindvuna letinkhulu babamba umhlangano wemphi—wekutsi bebatokwenta kanjani kutsi bente emaLamani aphume atawukulwa nabo; noma kutsi ngandlela tsite babakhohlise kutsi baphume etincabeni tawo, kute batfole kubengama baphindze balitsatse lidolobha laMulekhi.

20 Futsi kwenteka kutsi batfumela titfunywa ebutfweni lemaLamani, lelalivikele lidolobha laMulekhi, kumholi walo, libito lakhe lobekunguJakobe, bafisa kutsi aphume nemabutfo akhe kutsi bahlangane nabo ematsafeni emkhatsini wemadolobha lamabili. Kodvwa bukani, Jakobe, lobekangumZoramu, akafunanga kuphuma nelibutfo lakhe kutsi atohlangana nabo ematsafeni.

21 Futsi kwenteka kutsi Moroni, ete ematsemba ekuhlangana nabo endzaweni lengavuni muntfu, ngako-ke, wenta sincumo ngekutsi ente lisu kute awalutse emaLamani kutsi aphume etincabeni tawo.

22 Ngako-ke wenta kutsi Thiyankham atsatse sibalo lesincane semadvodza ahambe ehlele entansi edvute nelugu lwelwandle; futsi Moroni kanye nelibutfo lakhe, ngekuhlwa, bahamba baya ehlane, enshonalanga yelidolobha iMulekhi; ngako-ke, ngakusasa, ngesikhatsi bogadzi bemaLamani sebabone Thiyankham, bagijima bayotjela Jakobe, umholi wabo.

23 Futsi kwenteka kutsi emabutfo emaLamani ahamba ayawukulwa naThiyankham, acabanga kutsi ngesibalo sawo angamncoba Thiyankham ngenca yebuncane besibalo sakhe. Ngesikhatsi Thiyankham awabona emabutfo emaLamani eta kutawukulwa naye wacala kuhlehla wehlela ngaselugwini lwelwandle, ngasenyakatfo.

24 Futsi kwenteka kutsi ngesikhatsi emaLamani abona kutsi besekacala kubaleka, aba nesibindzi abacosha ngemfutfo. Futsi ngesikhatsi Thiyankham awaholela khashane emaLamani labekabacosha angabakhandzi, buka, Moroni wayaleta kutsi incenye yelibutfo lakhe lelalinaye lihambe liye edolobheni, futsi lilitsatse.

25 Futsi benta kanjalo, baphindze bababulala bonkhe labo labebashiywe kutsi balivikele lidolobha, yebo, bonkhe labo bebangafuni kubeka phansi tikhali tabo temphi.

26 Ngalesi sizatfu Moroni walitsatsa lidolobha iMulekhi nencenye yelibutfo lakhe, abe ahamba nalenye incenye kuyohlangana nemaLamani uma abuya ekucosheni Thiyankham.

27 Futsi kwenteka kutsi emaLamani amlandzela Thiyankham ate efika dvutane nelidolobha iNala, emvakwaloko ahlangabetwa nguLehi kanye nelibutfo lakhe lelincane, lelalishiywe kutsi livikele lidolobha iNala.

28 Manje bukani, ngesikhatsi tindvuna letinkhulu temaLamani setibone Lehi nelibutfo lakhe beta batawukulwa nawo, abaleka adideke kakhulu, hleze mhlawumbe angabe asakhona kulitfola lidolobha iMulekhi ngaphambi kwekutsi Lehi awakhandze; ngoba abesakhatsele ngenca yekuhamba kwawo, futsi emadvodza aLehi abengakakhatsali.

29 Manje emaLamani abengati kutsi Moroni bekasemuva kwawo nelibutfo lakhe; konkhe labekwesaba kwakunguLehi kanye nebantfu bakhe.

30 Manje Lehi bekete sifiso sekuwakhandza bate bahlangane naMoroni kanye nelibutfo lakhe.

31 Futsi kwenteka kutsi ngaphambi kwekutsi emaLamani asahlehlele khashane atungeletwa ngemaNefi, ngemadvodza aMoroni kulunye luhlangotsi, kanye nebantfu baLehi ngakulolunye, bonkhe labebangakakhatsali futsi basagcwele emandla; kodvwa emaLamani besekakhatsele ngenca yeluhambo lwawo loludze.

32 Futsi Moroni wayaleta emadvodza akhe kutsi awahlasele ate anikele tikhali tawo temphi.

33 Futsi kwenteka kutsi Jakobe, angumholi wawo, aphindze angumZoramu, futsi anemoya longancobeki, wawahola emaLamani kutsi ayawukulwa ngentfukutselo lenemandla lamakhulu ngalokumelene naMoroni.

34 Ngenca yekutsi Moroni abesendleleni yawo yekuhamba, ngako-ke, Jakobe bekatimisele kubabulala abancume ate aphumele ngale kwelidolobha laMulekhi. Kodvwa bukani, Moroni kanye nemadvodza akhe bebanemandla kakhulu; ngako-ke abatange bawavumele emaLamani kutsi endlule.

35 Futsi kwenteka kutsi tinhlangotsi totimbili talwa ngentfukutselo lenemandla lamakhulu; futsi kwaba khona labaningi lababulawa kuto totimbili tinhlangotsi; yebo, naMoroni walimala kwatsi Jakobe wabulawa.

36 Lehi wacindzetela emuva kwabo ngentfukutselo lenemandla nemadvodza akhe lanemandla, kangangekutsi emaLamani labekangemuva anikela tikhali tawo temphi; kwatsi labasele bawo, badidekile kakhulu, abatanga noma bahambe noma balwe.

37 Manje Moroni abona kudideka kwawo, watsi kuwo: Uma ningaletsa ngaphambili tikhali tenu temphi futsi nitinikele, bukani sitawuyekela kucitsa ingati yenu.

38 Futsi kwenteka kutsi ngesikhatsi emaLamani asawavile lamavi, tindvuna tawo letinkhulu, bonkhe labo labebangatange babulawe, beta ngaphambili futsi batijika phansi tikhali tabo temphi etinyaweni taMoroni, baphindze bayala emadvodza abo kutsi nawo ente njalo.

39 Kodvwa bukani, bebabaningi labebangafuni; futsi labo labebangafuni kunikela tinkemba tabo batsatfwa baboshwa, kwatsi tikhali tabo temphi tatsatfwa kubo, baphocelelwa kutsi bahambe nabomnakabo baye eveni iNala.

40 Manje sibalo setiboshwa letatitsetfwe sasendlula sibalo salabo labebabulewe, yebo, sasingetulu kwalabo labebabulewe etinhlangotsini totimbili.