Sehluko 56
Hilamani utfumela incwadzi kuMoroni, ulandzisa ngesimo semphi nemaLamani—Anthiphasi naHilamani bazuza kuncoba lokukhulu kumaLamani—Emajaha latinkhulungwane letimbili langemadvodzana aHilamani alwa ngemandla lamangalisako, futsi kute namunye kuwo lobulawako. Livesi 1, cishe ngemnyaka wa 62 ngaphambi kwekutalwa kwaKhristu; emavesi 2–19, cishe ngemnyaka wa 66 ngaphambi kwekutalwa kwaKhristu; nemavesi 20–57, cishe ngemnyaka wa 65 kuya kuwa 64 ngaphambi kwekutalwa kwaKhristu.
1 Manje kwenteka ekucaleni kwemnyaka wemashumi lamatsatfu wekubusa kwebehluleli, ngelusuku lwesibili enyangeni yekucala, Moroni watfola incwadzi levela kuHilamani, ichaza ngesimo sebantfu kuleyo ncenye yelive.
2 Futsi lawa ngemavi lawabhala, atsi: Mnaketfu, lotsandzeka kakhulu, Moroni eNkhosini nasetinhluphekweni temphi yetfu; buka, mnaketfu lotsandzekako, nginalokutsite lengifuna kukutjela kona mayelana nemphi yetfu kulencenye yelive.
3 Buka, emadvodzana latinkhulungwane letimbili talabo bantfu Amoni lehla nabo wabakhipha eveni laNefi—manje bowati kutsi laba bebabesitukulwane saLamani, lobekayindvodzana lendzala yababe Lehi;
4 Manje kute sidzingo kutsi ngikulandzise mayelana nemasiko abo noma kungakholwa kwabo, ngoba uyati mayelana nato tonkhe leti tintfo—
5 Ngako-ke kuyangenetisa kutsi ngikutjele kutsi tinkhulungwane letimbili talawa majaha titsatse tikhali tato temphi, tafuna kutsi ngibe ngumholi wato; futsi siphumele ebaleni kutawuvikela live letfu
6 Futsi manje uyati mayelana nesivumelwano boyise labasenta, sekutsi angeke batitsatse tikhali tabo temphi kutsi balwe nabomnakabo kute bacitse ingati.
7 Kodvwa emnyakeni wemashumi lamabili nesitfupha, ngesikhatsi babona tinhlupheko tetfu kanye netinsizi tetfu ngabo, besebatosephula sivumelwano labebasentile bese batsatsa tikhali tabo temphi kuyawusivikela.
8 Kodvwa angibavumelanga kutsi basephule lesivumelwano lebebasentile ngekucabanga kutsi Nkulunkulu bekatawusicinisa, kangangekutsi besingeke sisahlupheka kakhulu ngenca yekugcwaliseka kwesifungo lebebasentile.
9 Kodvwa buka, nayi intfo yinye lesijabula ngayo kakhulu. Ngoba buka, ngemnyaka wemashumi lamabili nesitfupha, mine, Hilamani, ngawahola lawa majaha latinkhulungwane letimbili saya edolobheni laseJudiya, kuyawusita Anthiphasi, lowambeka kutsi abe ngumholo webantfu bakuleyo ncenye yelive.
10 Futsi ngawahlanganisa emadvodzana ami, (ngoba afanelekile kutsi abitwe ngemadvodzana) nelibutfo la-Anthiphasi, lawo mandla Anthiphasi lawajabulela kakhulu; ngoba buka, libutfo lakhe laselincishiswe ngemaLamani ngoba emabutfo awo besekabulele sibalo lesikhulu semadvodza etfu, lokusizatfu kutsi sikhale.
11 Noko, singatidvudvuta ngeliciniso, lekutsi bafele etimisweni telive labo kanye netaNkulunkulu wabo, yebo, futsi bajabulile.
12 Futsi emaLamani ngetulu kwaloko asagcine tiboshwa letiningi, tonkhe lekutindvuna letinkhulu, kute namunye lomunye labamshiye aphila. Futsi sicabanga kutsi kungumanje ngalesi sikhatsi setiseveni laNefi; kunjalo uma tingabulawanga.
13 Manje lawa ngemadolobha emaLamani labekawatsetse ngekucitsa ingati yalabaningi bemadvodza etfu lanesibindzi:
14 Live laseManthi, noma lidolobha laseManthi, nelidolobha laZeziromu, kanye nelidolobha laseKhumeni, kanye nelidolobha lase-Anthiphara.
15 Lawa ngemadolobha lawatfola kutsi abe ngewabo ngesikhatsi ngifika edolobheni laseJudiya; futsi ngatfola Anthiphasi kanye nemadvodza akhe basebenta kamatima ngemandla abo onkhe kutsi balicinise lelidolobha.
16 Yebo, bebakhatsele ngekwemtimba kanjalo nangekwemoya, ngoba bebalwe ngesibindzi emini baphindze basebenta kamatima ebusuku kute bawagcine emadolobha abo; futsi ngaleyondlela bebamelene netinhlupheko letinkhulu letitinhlobonhlobo.
17 Manje bebatimesele kuncoba kulendzawo noma bafe; ngako-ke ngaleso sizatfu ungacabanga kutsi lelibutfo lelincane lengafika nalo, yebo, lawo madvodzana ami, abanika ematsemba lamakhulu nenjabulo lenkhulu.
18 Manje kwenteka kutsi ngesikhatsi emaLamani asabona kutsi Anthiphasi besekatfole emandla lamakhudlwana ebutfweni lakhe, aphocelelwa yimiyalo ya-Amoroni kutsi angalihlaseli lidolobha laseJudiya, noma atawukulwa natsi.
19 Futsi ngaleyondlela sabusiswa yiNkhosi; ngoba kube ake eta etikwetfu kulobu butsakatsaka betfu mhlawumbe abengalibulala libutfo letfu lelincane; kodvwa salondvolotwa.
20 Ayalwa ngu-Amoroni kutsi awagcine lawo madolobha labesebawatsetse. Waphela kanjalo-ke umnyaka wemashumi lamabili nesitfupha. Ekucaleni kwemnyaka wemashumi lamabili nesikhombisa sasesililungiselele lidolobha letfu kanye natsi lucobo kutsi sitivikele.
21 Manje besifuna kutsi emaLamani atosihlasela; ngoba besingafuni kutsi siwahlasele etincabeni tawo.
22 Futsi kwenteka kutsi sabeka tinhloli ndzawo tonkhe, kutsi tigadze iminyakato yemaLamani, kute angasendluli ebusuku noma emini ayohlasela lamanye emadolobha etfu labengasenyakatfo.
23 Ngoba sasati kutsi kulawo madolobha bebangakacini ngalokwanele kutsi bahlangane nawo; ngako-ke besifuna, kutsi uma nje angendlula ngakitsi, siwahlasele ngemuva, futsi ngaleyondlela silwe nawo ngemuva phindze ngaso leso sikhatsi ahlangabetwe ngembili. Sasicabanga kutsi singawancoba; kodvwa buka, sadvumala kulesifiso setfu.
24 Akatange alokotse endlule ngakitsi nelibutfo lawo lonkhe, noma nje endlule nencenye, hleze angabi nemandla ngalokwanele bese ayehlulwa.
25 Noma akatange alokotse ahambe ehle ayawukulwa nelidolobha laseZarahemla; noma alokotse ancamule enhloko yeSidoni, kuya edolobheni laNefiha.
26 Ngaleyondlela, ngemabutfo awo, abetimisele kutsi awagcine lawo madolobha labekawatsetse.
27 Manje kwenteka kutsi ngenyanga yesibili yalowomnyaka, saletselwa imiphako leminingi lebeyivela kuboyise balawo madvodzana ami latinkhulungwane letimbili.
28 Ngetulu kwaloko satfunyelelwa emadvodza latinkhulungwane letimbili avela eveni laseZarahemla. Ngaleyondlela satilungiselela ngemadvodza latinkhulungwane letilishumi, nemiphako yawo, kanjalo neyebafati bawo kanye neyebantfwana bawo.
29 EmaLamani, nakabona emabutfo etfu akhula malanga onkhe, nemiphako ifika kutawusisekela, acala kwesaba, abese acala kuphuma, kube bekungenteka kuyosivimbela kutfola imiphako kanye nemandla.
30 Manje ngesikhatsi sibona kutsi emaLamani abesacala kungakhululeki ngaloku, saba nesifiso sekwenta licebo lelalitofezeka kuwo; ngako-ke Anthiphasi wayala kutsi ngihambe phambili nemadvodzana ami lamancane siye edolobheni lelingumakhelwane, kube shengatsi sihambisa imiphako.
31 Kwakufanele sendlule edvute nelidolobha i-Anthiphara, kube shengatsi siya edolobheni lelingaphambili, eminceleni ngaselugwini lwelwandle.
32 Futsi kwenteka kutsi sahamba, shengatsi setfwele imiphako yetfu, siya kulelo dolobha.
33 Futsi kwenteka kutsi Anthiphasi wahamba nencenye yelibutfo lakhe, washiya labasalako kutsi bagcine lidolobha. Kodvwa akahambanga ngate ngahamba ngaphambili nelibutfo lami lelincane, sate sefika dvutane nelidolobha i-Anthiphara.
34 Manje, edolobheni i-Anthiphara bekubekwe libutfo lelicine kakhulu lemaLamani; yebo, leliningi kakhulu.
35 Futsi kwenteka kutsi ngesikhatsi asatjelwe tinhloli tawo, eta nelibutfo lawo ahamba acondza kitsi.
36 Futsi kwenteka kutsi sawabalekela, saya ngasenyakatfo. Ngaleyondlela saliholela khashane libutfo lelinemandla lamakhulu lemaLamani.
37 Yebo, kwate kwaba libanga lelidze, kangangekutsi ngesikhatsi abona libutfo la-Anthiphasi liwalandzela, ngemandla alo onkhe, akatange ajikele ngesekudla noma ngesencele, kodvwa achubeka neluhambo lwawo ngendlela lecondzile emvakwetfu; futsi, njengoba sasicabanga, kwakuyinhloso yawo kutsi asibulale ngaphambi kwekutsi Anthiphasi awakhandze, kute angatungeletwa bantfu betfu.
38 Manje Anthiphasi, abubona bungoti betfu, walusheshisa luhambo lwelibutfo lakhe. Kodvwa buka, kwasekungusebusuku; ngako-ke akasikhandzanga, na-Anthiphasi akawakhandzanga; ngako-ke samisa emathende sahlala kwesikhashana ngalobo busuku
39 Futsi kwenteka kutsi ngaphambi kwentsatsakusa, buka, emaLamani abesasilandzela. Manje sasingakacini ngalokwanele kutsi silwe nawo; yebo, ngangingeke ngivume kutsi emadvodzana ami lamancane awele etandleni tawo; ngako-ke sachubeka neluhambo lwetfu saya ehlane.
40 Manje akalokotsanga ajikela ngesekudla noma ngesencele hleze atungeletwe; nami ngalokunjalo angilokotsanga ngajikela ngesekudla noma ngesencele hleze angikhandze, bese asisakhoni kumelana nawo, kodvwa sibulawe bese ayaphunyula; ngako-ke sabaleka lilanga lonkhe saya ehlane, kwate kwaba mnyama.
41 Futsi kwenteka kutsi, ngesikhatsi kukhanya kwasekuseni kufika sawabona emaLamani asetikwetfu, sawabalekela.
42 Kodvwa kwenteka kutsi akasilandzelanga kakhulu ngaphambi kwekutsi eme; futsi kwakusekuseni ngelusuku lwesitsatfu enyangeni yesikhombisa.
43 Manje, noma akhandvwa ngu-Anthiphasi asatanga, kodvwa ngatsi kumadvodzana ami: Bukani, asati kodvwa sicabanga kutsi beme ngenhloso yekutsi sibahlasele, kute asibambe elugibeni lwawo;
44 Ngako-ke nitsini, madvodzana ami, nitawuhamba yini niyawuwahlasela na?
45 Manje ngitsi kuwe, mnaketfu lotsandzekako Moroni, angitange nanini ngisibone sibindzi lesikhulu kangaka, cha, hhayi emkhatsini wawo onkhe emaNefi.
46 Ngoba njengoba ngangihlale ngibabita ngemadvodzana ami (ngoba bonkhe bebabancane kakhulu) nabo batsi kimi: Babe, buka Nkulunkulu wetfu unatsi, futsi angeke avume kutsi sibulawe; ngako sivumele sihambe; angeke sibabulele bomnaketfu uma nabo bangasiyekela; ngako-ke asambeni, hleze balehlule libutfo la-Anthiphasi
47 Manje, bebangatange sebalwe, kodvwa bebangakwesabi kufa; futsi bebacabanga kakhulu ngenkhululeko yaboyise kunekucabanga ngetimphilo tabo; yebo, bebafundziswe bonina, kutsi uma bangangabati, Nkulunkulu bekatawubakhulula.
48 Futsi bangilandzisa emavi abonina, batsi: Asingabati kutsi bomake betfu bebakwati loko.
49 Futsi kwenteka kutsi ngabuyela emuva netinkhulungwane letimbili tami ngayokulwa nemaLamani labekasicoshile. Manje buka, emabutfo a-Anthiphasi besekawakhandzile, yabe imphi leyesabekako seyicalile.
50 Libutfo la-Anthiphasi selikhatsele, ngenca yeluhambo lwabo ngesikhatsi lesifishane kangaka, beselitowela etandleni temaLamani; futsi kube angibuyanga netinkhulungwane tami letimbili abetoyifeza inhloso yawo.
51 Ngoba Anthiphasi besekafile ngenkemba, kanye nalabaningi bebaholi bakhe, ngenca yekukhatsala kwabo, lokwakubangwa luhambo lwabo lolwalushesha—ngako-ke emadvodza a-Anthiphasi adidekile ngenca yekufa kwebaholi babo, acala kuhlehlela emuva ngaphambi kwemaLamani.
52 Futsi kwenteka kutsi emaLamani ema sibindzi, acala kubacosha; futsi emaLamani bekabacosha ngemfutfo lomkhulu ngesikhatsi Hilamani atseleka etikwawo netinkhulungwane letimbili takhe, wacala kuwabulala kakhulu, kangangekutsi libutfo lonkhe lemaLamani lema laphindze lagucukela kuHilamani
53 Manje ngesikhatsi bantfu ba-Anthiphasi babona kutsi emaLamani abesagucukile, bagcogcela ndzawonye emadvodza abo baphindze beta emvakwemaLamani.
54 Manje kwenteka kutsi tsine, bantfu baNefi, bantfu ba-Anthiphasi, nami netinkhulungwane tami letimbili, sawatungeleta emaLamani, sawabulala; yebo, kangangekutsi aphoceleleka kutsi anikele ngetikhali tawo temphi kanjalo nawo njengetiboshwa temphi.
55 Manje kwenteka kutsi ngesikhatsi asatinikele kitsi, buka, ngawabala lawo majaha labekalwe kanye nami, nginekwesaba hleze bekamaningi lebekabulelewe.
56 Kodvwa buka, ngekujabula kwami lokukhulu, kwakute nalinye kuwo lebelibulewe; yebo, futsi bekalwe shengatsi anemandla aNkulunkulu; yebo, kute emadvodza latiwako lake alwa ngemandla lamangalisa kangaka; futsi nangemandla lamakhulu atseleka etikwemaLamani, kangangekutsi awesabisa; ngalesi sizatfu emaLamani atinikela njengetiboshwa temphi.
57 Njengoba sasite indzawo yetiboshwa tetfu, kutsi sitigadze kute tingahlangani nemabutfo emaLamani, ngako-ke satitfumela eveni laseZarahemla, kanye nencenye yalawo madvodza labekangakabulawa a-Anthiphasi, kanye nawo; kwatsi labasalako ngabatsatsa ngabahlanganisa nemajaha ami ema-Amoni, sase sitsatsa luhambo lwetfu sabuyela emuva edolobheni laseJudiya.