1 Manje kwenteka kutsi ngatfola incwadzi ivela ku-Amoroni, inkhosi, itsi uma ngangingaletsa leto tiboshwa temphi lebesititsetse naye bekatawusitiniketa lidolobha lase-Anthiphara.

2 Kodvwa ngatfumela incwadzi enkhosini, letsi besinesiciniseko kutsi emabutfo etfu bekenele kutsi alitsatse lidolobha lase-Anthiphara ngemandla etfu, futsi kukhulula tiboshwa ngalelo lidolobha bekungasho kutsi besingakahlakaniphi, nekutsi besiyawutikhulula kuphela tiboshwa tetfu ngekushintjiselana.

3 Futsi Amoroni wayala imibandzela yencwadzi yami, ngoba bekangafuni kushintjiselana ngetiboshwa; ngako-ke sacala kwenta emalungiselelo ekutsi siyawuhlasela lidolobha lase-Anthiphara.

4 Kodvwa bantfu base-Anthiphara balishiya lidolobha, babalekela kulamanye emadolobha abo, lebekangewabo, kute bawacinise; ngaleyondlela lidolobha lase-Anthiphara lawela etandleni tetfu.

5 Waphela kanjalo-ke umnyaka wemashumi lamabili nesiphohlongo wekubusa kwebehluleli.

6 Futsi kwenteka kutsi ekucaleni kwemnyaka wemashumi lamabili nemfica, satfola imiphako, kanjalo nekungetelwa ebutfweni letfu, kusuka eveni laseZarahemla, kanye naseveni lelitungelete lapho, lokwaba sibalo semadvodza latinkhulungwane letisitfupha, ngaphandle kwemashumi lasitfupha emadvodzana a-Amoni lebeketele kutawuhlanganyela nabomnakabo, licembu lami lelincane letinkhulungwane letimbili. Manje buka, besesicinile, yebo, futsi ngetulu kwaloko saba nemiphako leminingi leyaletfwa kitsi.

7 Futsi kwenteka kutsi bekusifiso setfu kutsi siyichube imphi nelibutfo lebelibekwe kutsi livikele lidolobha iKhumeni.

8 Manje buka, ngitawukukhombisa kutsi sasheshe sasifeza lesifiso setfu; yebo, ngelibutfo letfu lelicinile, noma nencenye yelibutfo letfu lelicinile, salitungeleta, ebusuku, lidolobha iKhumeni, ngaphambi nje kwekutsi batfole imiphako.

9 Futsi kwenteka kutsi sabeka emathende kwesikhashane satungeleta lidolobha busuku lobuningi; salala etikwetinkemba tetfu, futsi sabeka bogadzi, kute emaLamani angeti kitsi ebusuku asibulale, loku lakwetama tikhatsi letiningi; kodvwa etikhatsini letiningi akwetama loku ingati yawo yacitfwa.

10 Ekugcineni imiphako yawo yefika, futsi besekatongena edolobheni ebusuku. Tsine, esikhundleni sekuba ngemaLamani, besingemaNefi; ngako-ke, sawatsatsa kanye nemiphako yawo.

11 Futsi nanoma emaLamani besekavinjelwe kutsi atfole kusekelwa ngalendlela, bekatimisele kutsi aligcine lelidolobha; ngako-ke kwadzingeka kutsi siyitsatse leyo miphako siyitfumele eJudiya, kutsi tiboshwa tetfu sititfumele eveni laseZarahemla.

12 Futsi kwenteka kutsi kungakendluli tinsuku letiningi ngaphambi kwekutsi emaLamani acale kulahla lonkhe litsemba lekusitakala; ngako-ke alidedela lidolobha etandleni tetfu; futsi ngaleyondlela bese siwafezile emacebo etfu ekutfola lelidolobha iKhumeni.

13 Kodvwa kwenteka kutsi tiboshwa tetfu betitiningi kakhulu kangangekutsi, nanoma sibalo setfu sasisikhulu, saphoceleleka kutsi sisebentise lonkhe libutfo letfu kutsi sitigcine, noma sitibulale.

14 Ngoba buka, betiyawukweca tibaleke setisibalo lesikhulu, futsi tilwe ngematje, kanye nangetagila, nanoma ngayini lenye intfo lebetingayitfola, kangangekutsi abulala letingetulu kwetinkhulungwane letimbili kuyangetulu emvakwekutsi setitinikele kuba tiboshwa temphi.

15 Ngako-ke kwadzingeka, kutsi siticedze timphilo tato, noma sitigadze, ngenkemba esandleni, sitehlise tiye eveni laseZarahemla; futsi ngetulu kwaloko nemiphako yetfu yayingabeneli bantfu betfu, singakayibali leyo lebesiyitsetse kumaLamani.

16 Manje, kuleto timo letibucayi, kwaba yindzaba lematima kakhulu kutsi kutsatfwe sincumo kutsi kwentiweni ngaleti tiboshwa temphi; noko, sancuma kutsi sititfumele entansi eveni laseZarahemla; ngako-ke sakhetsa incenye yemadvodza etfu, sawaniketa ligunya etiboshweni tetfu kutsi aye entansi eveni laseZarahemla.

17 Kodvwa kwenteka kutsi ngakusasa abuya. Manje buka, asiwabutanga mayelana netiboshwa; ngoba buka, emaLamani besekasetikwetfu, futsi abuya ngesikhatsi kutsi atawusisindzisa kutsi singaweli etandleni tawo. Ngoba buka, Amoroni besekawatfumelele sabelo lesisha semiphako futsi kanjalo nemabutfo lamaningi emadvodza.

18 Futsi kwenteka kutsi lawo madvodza lebesiwatfumele netiboshwa afika ngesikhatsi kutawuwamisa, njengoba besekatosincoba.

19 Kodvwa buka, licembu lami lelincane letinkhulungwane letimbili kanye nemashumi lasitfupha lalwa ngekutinikela lokukhulu; yebo, belicinile phambi kwemaLamani, futsi lababulala bonkhe labebabukene nalo.

20 Futsi njengoba labebasele belibutfo letfu lase lifuna kuhlehla phambi kwemaLamani, buka, lawo latinkhulungwane letimbili nemashumi lasitfupha bekacinile futsi aphikelele.

21 Yebo, lalalela futsi lacaphela kutsi liwente onkhe emavi ekuyalwa ngalokungiko; yebo, futsi kwenteka kulo ngisho njengekwelukholo lwalo; futsi ngawakhumbula emavi lelawakhuluma kimi ekutsi bonina bebalifundzisile.

22 Manje buka, bekungulamadvodzana ami, kanye nalawo madvodzana labekadze akhetsiwe kutsi ahambise tiboshwa, lesiwabonga ngaloku kuncoba lokukhulu; ngoba bekungiwo lawashaya emaLamani; ngako-ke achutjwa abuyiselwa emuva edolobheni laseManthi.

23 Saligcina lidolobha letfu iKhumeni, futsi asibulawanga sonkhe ngenkemba; noko, salahlekelwa kakhulu.

24 Futsi kwenteka kutsi emvakwekutsi emaLamani sekabalekile, ngekushesha nganiketa imiyalo yekutsi emadvodza ami labekalimele atsatfwe emkhatsini walabafile, futsi ngenta kutsi emanceba awo abhandishwe.

25 Futsi kwenteka kutsi bekukhona langemashumi lamabili, kulawo latinkhulungwane letimbili nemashumi lasitfupha ami, labekaculekile ngenca yekulahlekelwa yingati; noko, ngenca yebuhle baNkulunkulu, nangekumangala kwetfu lokukhulu, nangenjabulo yemabutfo etfu onkhe, bekute namunye wawo lowafa; yebo, futsi bekute namunye emkhatsini wawo longawatfolanga emanceba lamaningi.

26 Manje, kulondvoloteka kwawo bekumangalisa ebutfweni letfu lonkhe, yebo, kutsi alondvoloteke kube kukhona tinkhulungwane tabomnaketfu labebabulewe. Futsi ngalokufanele sikubona kungenca yemandla lamangalisako aNkulunkulu, ngenca yelukholo lwabo lolukhulu kuloko labebafundziswe kona kutsi bakukholwe—kutsi bekukhona Nkulunkulu lolungile, futsi nekutsi loyo lobekangangabati, bekalondvolotwa ngemandla akhe lamangalisako.

27 Manje lolu bekulukholo lwalabo lengikhulume ngabo; bancane, futsi tingcondvo tabo ticinile, futsi babeka litsemba labo kuNkulunkulu njalo nje.

28 Manje kwenteka kutsi emvakwekutsi sesiwanakekele emadvodza etfu labekalimele, futsi sesibangcwabile betfu labebafile kanjalo nalabafile bemaLamani, labebabaningi, buka, sabuta kuGidi mayelana naleto tiboshwa lebeticale kuhamba tehla taya eveni laseZarahemla naye.

29 Manje Gidi bekuyindvuna lenkhulu yelicembu lebeyibekiwe kutsi igadze ngesikhatsi tehla tiya kulelo live.

30 Manje, lawa ngemavi Gidi lawakhuluma kimi: Buka, sesicalile kuhamba sehlela entansi eveni laseZarahemla netiboshwa tetfu. Futsi kwenteka kutsi sahlangana netinhloli temabutfo etfu, lebetitfunyelwe kutsi tiyobuka inkambu yemaLamani.

31 Futsi tasimemeta, titsi—Bukani, emabutfo emaLamani ahamba acondze ngasedolobheni iKhumeni; futsi bukani, atawubahlasela, yebo, atawubabulala bantfu betfu.

32 Futsi kwenteka kutsi tiboshwa tetfu takuva kumemeta kwato, lokwenta kutsi tibe nesibindzi; futsi tacala kusivukela.

33 Futsi kwenteka ngenca yekusivukela kwato senta kutsi tinkemba tetfu tiwele etikwato. Futsi kwenteka kutsi taya tilicembu tagijimela etinkembeni tetfu, lokwenta kutsi, sibalo lesikhulu sato sibulawe; labasala bato beca futsi basibalekela.

34 Futsi buka, ngesikhatsi setibalekile asikhonanga kutikhandza, satsatsa luhambo lwetfu ngematubane sacondza ngasedolobheni iKhumeni; buka, safika ngesikhatsi kute sisite bomnaketfu ekugcineni lelidolobha.

35 Futsi buka, sesiphindze sakhululwa saphuma etandleni tetitsa tetfu. Futsi libusisiwe libito laNkulunkulu wetfu; ngoba buka, nguye losikhululile; yebo, losentele lentfo lenkhulu kangaka.

36 Manje kwenteka kutsi ngesikhatsi mine, Hilamani, sengiwevile lamavi aGidi, ngagcwala injabulo lenkhulu ngenca yebuhle baNkulunkulu ekusilondvoloteni, kute singafi sonkhe; yebo, futsi ngiyetsemba kutsi imiphefumulo yalaba lababulewe seyingene ekuphumuleni kwaNkulunkulu wabo.