Emavi Alima, uMphristi loMkhulu ngekweluhlelo lolungcwele lwaNkulunkulu, lawakhuluma kubantfu emadolobheni kanye nasetigodzini tabo kulo lonkhe live.
Acala esehlukweni 5.
Sehluko 5
Kute batfole insindziso, bantfu kufanele baphendvuke futsi bagcine imiyaleto, batalwe kabusha, bahlante tingubo tabo engatini yaKhristu, batfobeke futsi batihlubule ekutikhukhumeteni kanye nesekuhawukeleni, bente imisebenti yekulunga—uMelusi loLungile ubita bantfu Bakhe. Labo labenta imisebenti yebubi babantfwana badeveli—Alima ufakaza ngeliciniso lemfundziso yakhe futsi uyaleta bantfu kutsi baphendvuke—Emagama alabalungile atawubhalwa encwadzini yekuphila. Cishe ngemnyaka wa 83 ngaphambi kwekutalwa kwaKhristu.
1 Manje kwenteka kutsi Alima wacala kukhuluma livi laNkulunkulu kubantfu, wacala eveni laseZarahemla, wasuka lapho waya eveni lonkhe.
2 Lawa ngemavi lawakhuluma kubantfu ebandleni lelalimiswe edolobheni laseZarahemla, ngekwembhalo wakhe lucobo, atsi:
3 Mine, Alima, ngigcotjwe ngubabe, Alima, kutsi ngibe ngumphristi lomkhulu ebandleni laNkulunkulu, yena anemandla neligunya lelivela kuNkulunkulu kwenta leti tintfo, bukani, ngitsi kini wacala wamisa libandla eveni lelaliseminceleni yakaNefi; yebo, live lelalibitwa ngekutsi live laMormon; yebo, futsi wababhabhatisa bomnakabo emantini aMormon.
4 Futsi bukani, ngitsi kini, bakhululwa etandleni tebantfu benkhosi Nowa, ngemusa kanye nemandla aNkulunkulu.
5 Bukani, emvakwaloko, baletfwa ebugcilini ngetandla temaLamani ehlane; yebo, ngitsi kini, bebasekutfunjweni, futsi yaphindze iNkhosi yabakhipha ebugcilini ngemandla elivi layo; saletfwa lapha kulelive, lapha sacala kwakha libandla laNkulunkulu kulo lonkhe lelive futsi.
6 Manje bukani, ngitsi kini, bomnaketfu, nine lenibaleli libandla, ngabe nikukhumbule ngalokwanele yini kutfunjwa kwaboyihlo na? Yebo, futsi ngabe niwukhumbule ngalokwanele yini umusa wakhe kanye nekumela bulukhuni kwakhe kubo na? Futsi ngetulu kwaloko, ngabe nikukhumbule ngalokwanele yini kutsi uyikhululile imiphefumulo yabo esihogweni na?
7 Bukani, watigucula tinhlitiyo tabo; yebo, wabavusa ebutfongweni lobujulile, futsi bavukela kuNkulunkulu. Bukani, bebasekhatsi nekhatsi nebumnyama; noko, imiphefumulo yabo yakhanyiswa ngekukhanya kwelivi laphakadze; yebo, bebatungeletwe tibopho tekufa, kanye netinketane tesihogo futsi kubhujiswa kwaphakadze kwakubalindzile.
8 Manje ngibuta kini, bomnaketfu, babhujiswa na? Bukani, ngitsi kini, Cha, abazange.
9 Ngetulu kwaloko, ngiyabuta, ngabe tibopho tekufa tagcushulwa, kanye netinketane tesihogo lebetibatungeletile, ngabe tacekiswa na? Ngitsi kini, Yebo, tacekiswa, futsi imiphefumulo yabo yakhula, bahlabela ngelutsadvo lwekuhlengwa. Futsi ngitsi kini basindzisiwe.
10 Manje ngibuta kini kutsi nguyiphi imibandzela labasindziswa ngayo na? Yebo, ngutiphi tizatfu lebebatsembele kuto kute basindziswe na? Ngusiphi sizatfu sekukhululwa kwabo etibopheni tekufa, yebo, futsi ngalokunjalo nasetinketaneni tesihogo na?
11 Bukani, nginganitjela—ngabe babe Alima akakholelwanga yini emavini lebekakhulunywe ngemlomo wa-Abinadi na? Futsi bekangasiye yini umphrofethi longcwele na? Ngabe akakhulumanga yini emavi aNkulunkulu, futsi babe Alima wawakholwa na?
12 Futsi ngelukholo lwakhe kwaba khona lushintjo lolukhulu lolwenteka enhlitiyweni yakhe. Bukani ngitsi kini konkhe loku kuliciniso.
13 Bukani, washumayela livi kubobabe, nakubo lushintjo lolukhulu lwenteka etinhlitiyweni tabo, futsi batitfoba babeka litsemba labo kuNkulunkulu weliciniso nalophilako. Futsi bukani, betsembeka kwate kwaba sekugcineni; ngaloko-ke basindziswa.
14 Manje bukani, ngibuta kini, bomnaketfu belibandla, ngabe senitelwe yini ngekwakamoya waNkulunkulu na? Ngabe seniwemukele yini umfanekiso wakhe ebusweni benu na? Ngabe seniluvile yini lushintjo lolukhulu etinhlitiyweni tenu na?
15 Ngabe niyalusebentisa lukholo ekuhlengweni kwakhe loyo lowanidala na? Ngabe nibuka phambili yini ngeliso lelukholo, futsi niwubone lomtimba lobhubhako sewuvuselwe ekungabhubhini futsi naloku lokubolako sekuvuselwa ekungabolini, kutsi kume phambi kwaNkulunkulu kute kwehlulelwe ngekwetento letentiwa emtimbeni lobhubhako na?
16 Ngitsi kini, ninako na kuticabanga niva livi leNkhosi, litsi kini, ngalolosuku: Wotani kimi nine lenibusisiwe, ngoba bukani, imisebenti yenu bekuyimisebenti yekulunga etikwebuso bemhlaba?
17 Noma ninako na kuticabanga nicamba emanga eNkhosini ngalolosuku, nitsi—Nkhosi, imisebenti yetfu bekuyimisebenti lelungile etikwebusa bemhlaba—nekutsi yena utawunisindzisa na?
18 Noma-ke ngalenye indlela, ninako na kuticabanga niletfwa phambi kwesihlalo sekutsetsa emacala saNkulunkulu nemiphefumulo yenu igcwele kulahlwa ngunembeza nekutisola, ninako konkhe kukhumbula emacala enu, yebo, kukhumbula lokuphelele kwabo bonkhe bubi benu, yebo, kukhumbula kutsi niyente lite imiyaleto yaNkulunkulu na?
19 Ngitsi kini, ningabuka yini etulu kuNkulunkulu ngalolosuku ngenhlitiyo lemsulwa netandla letihlantekile na? Ngitsi kini, ningabuka yini etulu, ninemfanekiso waNkulunkulu ucoshwe ebusweni benu na?
20 Ngitsi kini, ngabe ningacabanga ngekusindziswa nibe nitivumele kutsi nibe ngaphansi kwadeveli na?
21 Ngitsi kini, niyawukwati ngalolosuku kutsi aninakusindziswa; ngoba kute umuntfu longasindziswa ngaphandle kwekutsi tingubo takhe tihlantwe tibe mhlophe; yebo, tingubo takhe kufanele tihlanjululwe tite tihlanteke kuwo onkhe emabala, engatini yaloyo lokukhulunywe ngaye bobabe betfu, lokufanele ete kutohlenga bantfu bakhe etonweni tabo.
22 Manje ngiyabuta kini, bomnaketfu, ningativa kanjani, uma senime embikwesihlalo saNkulunkulu, ninetingubo tenu letinemabala engati kanye nayo yonkhe inhlobo yekungcola na? Bukani, ngabe leti tintfo tiyawufakaza ini ngalokumelene nani?
23 Bukani ngabe angeke yini tifakaze kutsi nibabulali, yebo, nekutsi ninelicala layo yonkhe inhlobo yebubi na?
24 Bukani, bomnaketfu, ngabe ningacabanga yini kutsi lonjalo angaba nayo indzawo yekuhlala embusweni waNkulunkulu, kanye na-Abrahama, na-Isaka, naJakobe, ngalokunjalo nabo bonkhe baphrofethi labangcwele, labanetingubo letihlantiwe futsi letingenabala, letimsulwa futsi letimhlophe na?
25 Ngitsi kini, Cha; ngaphandle uma nenta uMdali wenu umkhohlisi kusukela ekucaleni, noma nicabanga kutsi ungumkhohlisi kusukela ekucaleni, angeke nicabange kutsi labanjalo bangaba nendzawo embusweni wasezulwini; kodvwa bayawukhishelwa ngaphandle ngoba babantfwana bembuso wadeveli.
26 Manje bukani, ngitsi kini, bomnaketfu, uma niluvile lushintjo lwenhlitiyo, futsi uma nive kutsi anihlabele liculo lelutsandvo lekuhlengwa, ngitobuta, ngabe niseva kanjalo yini namanje na?
27 Ngabe nihambile, natigcina ningenacala phambi kwaNkulunkulu na? Ningasho yini kutsi, uma banganibita ekufeni ngalesi sikhatsi, ngekhatsi kini, kutsi benititfobe ngalokwanele na? Kutsi tingubo tenu tihlantiwe futsi tentiwe tabamhlophe ngengati yaKhristu, lotawukuta kutawuhlenga bantfu bakhe etonweni tabo na?
28 Bukani, ngabe nihlutjuliwe yini kutikhukhumeta na? Ngitsi kini, uma kungenjalo anikakulungeli kuhlangana naNkulunkulu, Bukani kufanele nitilungiselele ngekushesha; ngoba umbuso welizulu sewusondzele, futsi lonjalo ute kuphila lokuphakadze.
29 Bukani, ngitsi, ngabe ukhona yini emkhatsini wenu longakahlutjulwa umona na? Ngitsi kini lonjalo akatilungiseleli; futsi ngifisa kwangatsi angatilungiselela masinyane, ngoba lihora selisedvute, futsi akati kutsi sikhatsi siyawufika nini; ngoba lonjalo angeke atfolwe angenacala.
30 Futsi ngetulu kwaloko ngitsi kini, ngabe ukhona yini emkhatsini wenu lohlekisa ngemnakabo na, noma lobeka incwaba yetinhlupheko etikwakhe na?
31 Maye kuloyo lonjalo, ngoba akatilungiseleli, futsi sikhatsi sesisondzele sekutsi kufanele aphendvuke kungenjalo angeke asindziswe!
32 Yebo, maye nakini nonkhe tisebenti tebubi; phendvukani, phendvukani, ngoba iNkhosi Nkulunkulu ikukhulumile loku!
33 Bukani, utfumela simemo kubo bonkhe bantfu, ngoba tandla temusa teluliwe ngakubo, utsi: Phendvukani, futsi ngitawunemukela.
34 Yebo, utsi: Wotani kimi niyawukudla sitselo sesihlahla sekuphila: yebo, niyawukudla futsi ninatse kuso sinkhwa kanye nakuwo emanti ekuphila ngekukhululeka;
35 Yebo, wotani kimi futsi nivete imisebenti yekulunga, aniyukujutjwa phansi futsi niphonswe emlilweni—
36 Ngoba bukani, sikhatsi sesisondzele sekutsi loyo longaveti titselo letinhle, loyo longayenti imisebenti yekulunga, labo ngibo labanesizatfu sekukhala nekulila.
37 Awu nine tisebenti tebubi; lenikhukhumele etintfweni letilite telive, lenimemetela ngekutati tindlela tekulunga kodvwa nidukile, njengetimvu letite umelusi, nanoma umelusi anibitile futsi usanibita namanje, kodvwa anililaleli livi lakhe!
38 Bukani, ngitsi kini, umelusi lolungile uyanibita; yebo, futsi ngelibito lakhe lucobo uyanibita, lokulibito laKhristu; futsi uma ningeke nililalele livi lemelusi lolungile, ligama lenibitwa ngalo, bukani, anisito timvu temelusi lolungile.
39 Manje uma ningasito timvu temelusi lolungile, ngabe niwamuphi umhlambi na? Bukani, ngitsi kini, develi ungumelusi wenu, futsi nibemhlambi wakhe; manje, ngubani longakuphika loku na? Bukani, ngitsi kini, loyo lokuphikako loku ungumkhohlisi futsi ungumntfwana wadeveli.
40 Ngoba ngitsi kini noma ngabe yini lenhle iphuma kuNkulunkulu, futsi noma ngabe yini lembi iphuma kudeveli.
41 Ngako-ke uma umuntfu aveta imisebenti lemihle ulalela livi lemelusi lolungile, futsi uyamlandzela; kodvwa loyo loveta imisebenti lemibi, ngalokufanako loyo uba ngumntfwana wadeveli, ngoba ulalela livi lakhe, futsi uyamlandzela.
42 Futsi loyo lowenta loku kufanele atfole inkhokhelo yakhe kuye; ngako-ke, ngekwenkhokhelo yakhe utfola kufa, ngekwetintfo letiphatselene nekulunga, abe ngulofile kuyo yonkhe imisebenti lemihle.
43 Manje, bomnaketfu, ngifuna kutsi ningive, ngoba ngikhuluma ngemandla emphefumulo wami; ngoba bukani, ngikhulume nani ngalokusobala kangangekutsi angeke niphambuke, noma ngikhulume ngekwemiyaleto yaNkulunkulu.
44 Ngoba ngibitelwe kutsi ngikhulume ngalendlela, ngekweluhlelo lolungcwele lwaNkulunkulu, lolukuKhristu Jesu; yebo, ngiyaletwe kutsi ngime futsi ngifakaze kulaba bantfu tintfo letikhulunywe bobabe betfu mayelana netintfo letisatokwenteka.
45 Futsi loku akusiko konkhe. Ngabe nicabanga kutsi ngitatela mine leti tintfo na? Bukani, ngiyafakaza kini kutsi ngiyati kutsi letintfo lengikhulume ngato tiliciniso. Futsi nicabanga kutsi ngabe ngati kanjani ngekwesiciniseko sato na?
46 Bukani, ngitsi kini tatiswe kimi ngaMoya loNgcwele. Bukani, ngizilile ngaphindze ngathandaza tinsuku letiningi kute ngitati leti tintfo ngekwami. Manje sengiyati ngekwami kutsi tiliciniso; ngoba iNkhosi Nkulunkulu itibonakalisile kimi ngaMoya wayo loNgcwele; futsi lona ngumoya wekwembulelwa lokimi.
47 Ngetulu kwaloko, ngitsi kini ngaleyondlela kwembuliwe kimi, kutsi emavi lakhulunywe bobabe betfu aliciniso, kanjalo ngekwemoya wekuphrofetha lokimi, lotse kanjalo wabonakaliswa ngaMoya waNkulunkulu.
48 Ngitsi kini, ngiyati ngekwami kutsi noma ngabe yini lengitawuyisho kini, mayelana naloko lokusatowenteka, kuliciniso; futsi ngitsi kini, ngiyati kutsi Jesu Khristu uyawukuta, yebo iNdvodzana, leTelwe Yodvwa yaBabe, legcwele umusa, nebubele, kanye neliciniso. Futsi bukani, nguye loyo lotako lototsatsa tono temhlaba, yebo, tono tawo wonkhe umuntfu lokholwa ngekunganyakatiseki egameni lakhe.
49 Manje ngitsi kini ngilo luhlelo lengibitwe ngalo, yebo, kutsi ngishumayele kubomnaketfu labatsandzekako, yebo, kanye nakubo bonkhe labahlala kulelive; yebo, kutsi ngishumayele kubo bonkhe, labadzala nalabancane, lababoshiwe nalabakhululekile; yebo, ngitsi kini labadzala, futsi ngalokunjalo nalabasekhatsi ngebudzala, kanye nakuso situkulwane lesikhulako; yebo, kutsi ngikhale kubo kutsi kufanele baphendvuke batalwe kabusha.
50 Yebo, naku lokushiwo nguMoya: Phendvukani, nonkhe nine mikhawulo yemhlaba, ngoba umbuso welizulu sewusondzele; yebo, iNdvodzana yaNkulunkulu iyeta ngenkhatimulo yayo, nangemandlakati ayo, nebukhosi, nemandla, kanye nebukhulu bayo. Yebo, bomnaketfu labatsandzekako, ngitsi kini, Moya utsi: Bukani inkhatimulo yeNkhosi yemhlaba wonkhe; futsi ngetulu lwaloko iNkhosi yasezulwini masinyane nje itawukhanya emkhatsini wabo bonkhe bantfwana bebantfu.
51 Futsi ngetulu kwaloko Moya utsi kimi, yebo, ukhala kimi ngelivi lelikhulu, utsi: Hamba utsi kulaba bantfu—Phendvukani, ngoba ngaphandle kwekutsi niphendvuke kute ngisho nalencane indlela yekutsi nidle lifa lembuso welizulu.
52 Futsi ngetulu kwaloko ngitsi kini, Moya utsi; Bukani, lizembe libekiwe emphandzeni yesihlahla; ngako-ke sonkhe sihlahla lesingatseli sitselo lesihle sitawujutjwa siphonswe emlilweni, yebo, umlilo longeke acishwe, umlilo longacimeki. Bukani, futsi nikhumbule, loNgcwele nguye lokukhulumile loku.
53 Manje bomnaketfu labatsandzekako, ngitsi kini, ningaphikisana yini naloku lokushiwoko; yebo, ningatibeka yini eceleni leti tintfo, futsi ninyatsele loNgcwele ngaphansi kwetinyawo tenu; yebo, ningatikhukhumeta yini ekutatiseni kwetinhlitiyo tenu; yebo, nisengaphikelela yini ekugcokeni tingubo letibitako phindze nibeke tinhlitiyo tenu etintfweni letilite telive, nasemcebeni wenu na?
54 Yebo, nisengaphikelela yini nekucabanga kutsi nincono kunalomunye; yebo, nisengaphikelela yini nekuhlupha bomnakenu, labatitfobako futsi bahamba ngekweluhlelo lolungcwele lwaNkulunkulu, labaletfwe ngalo kulelibandla, bangcweliswe ngaMoya loNgcwele, futsi baveta imisebenti lefanele yekuphendvuka—
55 Yebo, futsi nisengaphikelela yini nekufulatsela labamphofu, nalabeswele, kanye nekugodla leninako kubo na?
56 Kwekugcina, nonkhe nine lenitawuphikelela ebubini benu, ngitsi kini ngibo labo labo labayawujujtwa baphonswe emlilweni ngaphandle kwekutsi baphendvuke ngekushesha lokukhulu.
57 Manje ngitsi kini, nonkhe nine lenifisa kulandzela livi lemelusi lolungile, phumani emkhatsini walababi, nitehlukanise, ningatitsintsi tintfo tabo letingcolile; bukani, emagama abo ayawukwesulwa, kute emagama alababi angabalwa emkhatsini wemagama alabalungile, kute livi laNkulunkulu ligcwaliseke, lelitsi: Emagama alababi akayukuhlanganiswa nemagama ebantfu bami;
58 Ngoba emagama alabalungile ayawubhalwa encwadzini yekuphila, futsi ngitawubanika lifa esandleni sami sangesekudla. Manje, bomnaketfu, yini leningayisho kuphikisana naloku na? Ngitsi kini, uma nikhuluma ngalokumelene naloku, akusho lutfo, ngoba livi laNkulunkulu kufanele ligcwaliseke.
59 Ngoba ngumuphi umelusi emkhatsini wenu longatsi unetimvu letiningi angatigadzi, kute timphisi tingangeni tishwabadzele umhlambi wakhe na? Bukani, uma imphisi ingenela umhlambi wakhe angeke yini ayikhiphele ngaphandle na? Yebo, futsi ekugcineni, uma angakwati utawuyibulala.
60 Manje ngitsi kini umelusi lolungile uyanibita; futsi uma nitawulilalela livi lakhe utawuniletsa esibayeni sakhe, ngoba nitimvu takhe; futsi uyaniyaleta kutsi ningayivumeli imphisi lelambile kutsi ingene emkhatsini wenu, kute ningabhujiswa.
61 Manje mine, Alima, ngiyaniyaleta ngelulwimi lwakhe longiyaletile, kutsi nitame niwente lamavi lengiwakhulume kini.
62 Ngikhuluma ngendlela yekuniyala nine lenibelibandla; futsi nakubo labo lokungasibo belibandla ngikhuluma ngendlela yekubamema, ngitsi: Wotani nibhajatiselwe ekuphendvukeni, kute nani nibe ngulabadla esitselweni sesihlahla sekuphila.