Emavi a-Alima lawakhuluma kubantfu eGideyoni, ngekwembhalo wakhe lucobo.
Atfolakala esehlukweni 7.
Sehluko 7
Khristu utawutalwa nguMariya—Utawucekisa tibopho tekufa futsi atfwale tono tebantfu Bakhe—Labo labaphendvukako, lababhajatiswako, futsi labagcina imiyaleto batawuba nekuphila lokuphakadze—Kungcola ngeke kulidle lifa lembuso waNkulunkulu—Kutitfoba, lukholo, litsemba kanye nelutsandvo kuyadzingeka. Cishe ngemnyaka wa 83 ngaphambi kwekutalwa kwaKhristu.
1 Bukani bomnaketfu labatsandzekako, ngekubona kutsi ngivunyelwe kutsi ngite kini, ngakoke-ke ngitotama kutsi ngikhulume nani ngelulwimi lwami; yebo, ngemlomo wami lucobo, ngekubona kutsi kwekucala kutsi ngikhulume nani ngemavi emlomo wami, ngibekwe esihlalweni sekwehlulela ngalokuphelele, nginemsebenti lomningi kangangekutsi angikhonanga kuta kini.
2 Futsi nami bengingeke ngite namanje ngalesi sikhatsi kube bekungasiko kutsi sihlalo sekwehlulela siniketwe lomunye, kutsi abuse esikhundleni sami; futsi iNkhosi ngemusa lomkhulu ingivumele kutsi ngite kini.
3 Bukani, ngite nginelitsemba lelikhulu kanye nesifiso lesikhulu sekutsi ngitfole kutsi nititfobile ngaphambi kwaNkulunkulu, nekutsi nichubekile ekuwuncuseni umusa wakhe, kutsi ngitfole kutsi beningenacala ngaphambi kwakhe, kutsi ngitfole kutsi beningekho esimeni lesibucayi lesesabekako lebebakuso bomnaketfu eZarahemla.
4 Kodvwa libusisiwe ligama laNkulunkulu, ngoba unginikile kutsi ngati, yebo, unginikile injabulo lenkhulu kakhulu yekwati kutsi baphindze bamiswa ngendlela yekulunga kwakhe.
5 Ngiyetsemba, ngekwakaMoya waNkulunkulu lokimi, kutsi ngitotfokota ngani futsi; noko angifisi kutsi injabulo yami ngani ite ngendlela yetinhlupheko letiningi kangaka kanye nelusizi lengiluvile ngabomnaketfu baseZarahemla, ngoba bukani, injabulo yami ita ngabo emvakwekwendlula etinhluphekweni letiningi kanye nelusizi.
6 Kodvwa bukani, ngiyetsemba kutsi nine anikho esimeni sekungakholwa lokukhulu njengoba bomnakenu bebakuso; ngiyetsemba kutsi nine anitiphakamisi ngekutikhukhumeta etinhlityweni tenu; yebo ngiyetsemba kutsi anikatibeki tinhlitiyo tenu kumcebo kanye nasetintfweni letilite telive; yebo, ngiyetsemba kutsi anikhonti tithico, kodvwa nikhonta Nkulunkulu weliciniso nalophilako, futsi nibuke embili ekutsetselelweni kwetono tenu lokutokuta, ngelukholo lolungapheli.
7 Ngoba bukani, ngitsi kini kukhona tintfo letiningi letitota; futsi bukani, kukhona intfo yinye lebaluleke kakhulu kunato tonkhe letinye—ngoba bukani, sikhatsi asikho khashane kakhulu sekutsi uMhlengi aphile futsi afike emkhatsini webantfu bakhe.
8 Bukani, angisho kutsi utawufika emkhatsini wetfu ngesikhatsi sekuphila kwakhe emtimbeni wakhe lobhubhako; ngoba bukani, Moya akatange asho kimi kutsi loku kuyoba njalo. Manje mayelana naloku angati; kodvwa nguloku lengikwatiko, kutsi iNkhosi Nkulunkulu inemandla ekwenta tonkhe tintfo letingekwelivi layo.
9 Kodvwa bukani, naku lokushiwo nguMoya, utsi: Khala kulaba bantfu, utsi—Phendvukani, futsi nilungise indlela yeNkhosi, nihambe etindleleni tayo, leticondzile; ngoba bukani, umbuso welizulu sewusondzele, neNdvodzana yaNkulunkulu iyeta etikwebuso bemhlaba.
10 Futsi bukani, iyawutalwa nguMariya, eJerusalema lekulive labokhokho betfu, yena ayintfombi, sitja lesiligugu nalesikhetsiwe, loyawusibekelwa futsi akhulelwe ngemandla aMoya loNgcwele, futsi avete indvodzana, yebo, iNdvodzana yaNkulunkulu.
11 Futsi iyawuhamba, ive buhlungu netinhlupheko kanye netilingo talo lonkhe luhlobo; loku kute kugcwaliseke livi lelitsi iyawutfwala buhlungu netifo tebantfu bayo.
12 Futsi iyawutfwala kufa, kute icekise tibopho tekufa letibophe bantfu bayo, futsi iyawutfwala butsakatsaka babo, kute tibilini tayo tigcwaliswe ngesihawu, ngekwasenyameni, kute yati ngekwasenyameni kutsi ingabasita kanjani bantfu bayo ngekwebutsakatsaka babo.
13 Manje Moya wati tonkhe tintfo; noko indvodzana yaNkulunkulu ihlupheka ngekwasenyameni kute itfwale tono tebantfu bayo, kute isule tiphambeko tabo ngekwemandla ekubakhulula kwayo; manje bukani, loku bufakazi lobukimi.
14 Manje ngitsi kini kufanele niphendvuke, futsi nitalwe kabusha; ngoba Moya utsi uma ningakatalwa kabusha ngeke nilidle lifa lembuso wasezulwini; ngako-ke wotani nibhajatiselwe ekuphendvukeni, kute nihlantwe etonweni tenu, kute nibe nelukholo kuyo iMvana yaNkulunkulu, lesusa tono temhlaba, lenemandla ekusindzisa nekuhlanta kuko konkhe kungalungi.
15 Yebo, ngitsi kini wotani futsi ningesabi, nibeke eceleni sonkhe sono, lokulula kutsi sinihace, lesinibophela phansi ekubhujisweni, yebo, wotani nite phambili, nimkhombise Nkulunkulu wenu kutsi nitimisele ngekuphendvuka etonweni tenu futsi ningene esivumelwaneni naye sekutsi nitayigcina imiyaleto yakhe, nifakaze ngaloko kuye ngalolusuku ngekutsi nihambe niye emantini embhabhatiso.
16 Futsi loyo lowenta loku, futsi agcine imiyaleto yaNkulunkulu kusukela manje kuya phambili, nguye kanye loyo loyawukhumbula kutsi mine ngitsi kuye, yebo, uyawukhumbula kutsi ngitsite kuye, uyawuba nekuphila lokuphakadze, ngekwebufakazi baMoya loNgcwele, lofakaza kimi.
17 Manje bomnaketfu labatsandzekako, ngabe niyakholwa yini nguleti tintfo na? Bukani, ngitsi kini, yebo, ngiyati kutsi niyatikholwa; futsi indlela lengati ngayo kutsi niyatikholwa kungesibonakaliso saMoya lesikimi. Manje ngenca yekutsi lukholo lwenu lucinile mayelana naloko, yebo mayelana netintfo lengitikhulumile, kukhulu kujabula kwami.
18 Ngoba njengoba ngishito kini kusukela ekucaleni, kutsi nginesifiso lesikhulu kutsi nine ningabi sesimeni lesibucayi njengabomnakenu, kanjalo ngitfole kutsi tifiso tami tigcwalisekile.
19 Ngoba ngiyabona kutsi nisetindleleni tekulunga; ngiyabona kutsi nisetindleleni letiholela embusweni waNkulunkulu; yebo, ngiyabona kutsi nenta tindlela takhe ticondze.
20 Ngiyabona kutsi nembulelwe, ngebufakazi belivi lakhe, kutsi ngeke ahambe etindleleni letigwegwile; noma ashintje kuloko lakushito; noma abe nesitfunti nje sekujika esuke ngesekudla aye ngesencele, noma esuke kuloko lokulungile aye kuloko lokungakalungi; ngako-ke, indlela yakhe yinye nanini nanini.
21 Futsi akahlali emathempelini langasingcwele; futsi kungcola noma yini lenye lengakahlantenki ngeke yemukeleke embusweni waNkulunkulu; ngako-ke, ngitsi kini sikhatsi siyawufika, yebo, futsi siyawuba ngelusuku lwekugcina, lapho loyo longcolile ayosala ekungcoleni kwakhe.
22 Manje bomnaketfu labatsandzekako, ngikhulume letintfo kini kute nginivusele emsebentini wenu kuNkulunkulu, kute nihambe ngekungabi nelicala ngaphambi kwakhe, kute nihambe ngekweluhlelo lolungcwele lwaNkulunkulu, lenemukelwe ngalo.
23 Manje ngifisa kutsi nititfobe, futsi nitibeke phansi nibe mnene; nifundziseke kalula; nigcwale kubeketela kanye nekumela bulukhuni; nititsibe kuto tonkhe tintfo; nikhutsale ekugcineni imiyaleto yaNkulunkulu ngato tonkhe tikhatsi; nicele noma ngabe yini leniyidzingako, kwakamoya kanye nekwenyama; ngaso sonkhe sikhatsi nibuyisele kubonga kuNkulunkulu ngato tonkhe tintfo lenititfolako.
24 Futsi cinisekisani kutsi ninelukholo, nelitsemba, kanye nelutsandvo, futsi uma kunjalo nitawukhula njalo ekwenteni imisebenti lemihle.
25 Futsi shengatsi iNkhosi inganibusisa, igcine tingubo tenu tite libala, kute ekugcineni niletfwe kutsi nihlale phansi na-Abrahama, na-Isaka, naJakobe, kanye nebaphrofethi labangcwele labebakhona kusukela ekudzabukeni kwemhlaba, tingubo tenu tingenalibala njengetingubo tabo letingenalibala, embusweni welizulu ningabe nisaphumela ngaphandle nanini.
26 Manje bomnaketfu labatsandzekako, ngikhulume lamavi kini ngekwakaMoya lofakaza kimi; futsi umphefumulo wami uyatfokota kakhulu, ngenca yekukhutsala lokukhulu kanye nekulalela lenikunike emavi ami.
27 Manje, shengatsi kuthula kwaNkulunkulu kungaba etikwenu, nasetikwemiti kanye nasemihlabeni yenu, nasetikwemihlambi yetimvu nemihlambi yetinkhomo tenu, kanye nako konkhe leninako, bafati benu kanye nebantfwana benu, ngekwelukholo lwenu kanye nangekwemisebenti lemihle, kusukela ngalesi sikhatsi kuya phambili naphakadze. Ngikhulume kanjena. Amen.